Ho Pepesa Bomene-mene ba Diabolose

“Diabolose, e leng sera sa lōna, o ntse a lika-lika joale ka tau e purumang, e batlang eo e ka mo jang.”—1 PETROSE 5:8.

1, 2. (a) Boemo bo sisimosang bo kang boo Jesu a ileng a talimana le bona e ka ba bofe? (b) Batho ba ne ba leka ho bolaea Jesu hobane’ng?

AK’U nahane u utloa hore motho e mong o rekiloe hore a u bolaee. Teng haeba u tseba hore hona joale o ntse a u nanarela, a emetse sebaka se setle sa hore a u hlasele? Hoo hoa tšosa! Na u kile ua hlokomela hore Jesu Kreste o ile a talimana le boemo bo joalo?

² Bibele e re: “Jesu a ’na a ea le Galilea; hobane a na a sa rate ho ea le Judea, ke hobane ba-Jode ba ne ba batla ho ’molaea.” Leha ho le joalo, ho sa tsotellehe kotsi bophelong ba hae, ka 32 C.E. Jesu a nyolohela Jerusalema bakeng sa mokete oa Metlotloane. Ka lekhetlo leo, “ba bang ba Jerusalema ba re: Na hase eena eo ba ’matlang ho ’molaea na?” (Johanne 7:1, 25) Ke hobane’ng ha batho ba ne ba batla ho bolaea Jesu? Hobane ba ne ba ho behetsoe ke Diabolose! Jesu ka boeena o itse, joalokaha ho tlalehiloe ho Johanne 8:44: “Diabolose, . . . ke ’molai ha e sa le ho qaleng.”

3. Ke hobane’ng ha temoso ea moapostola Petrose ka Diabolose e le e loketseng ka ho ikhethang kajeno?

³ Kahoo, he, re se ke ra makala hore Diabolose o tsoile letšolo ho tšoasa batho ba barapeli kajeno, haholo-holo ha e sa le a lihuoa leholimong. Bibele e-ea hlalosa: “Ho malimabe lōna ba ahileng lefatšeng le leoatleng, hobane Diabolose o theohetse ho lōna a halefile hampe, ka ho tseba hobane nako ea hae ha e sa le ekae.” (Tšenolo 12:7-12) Hona ho bolela hore Satane le bademona ba hae ba re hlasela ka mahohle! Temoso ke e loketseng ka ho ikhethang haholo hona joale: “Diabolose, e leng sera sa lōna, o ntse a lika-lika joale ka tau e purumang, e batlang eo e ka mo jang.” “Eo,” ke ho akarelletsa le uena, haeba u e mong oa Lipaki tsa Jehova. Ke ka lebaka leo Petrose a boetseng a itseng: “Le tsohe masene, le falimehe.”—1 Petrose 5:8.

4. (a) Sepheo sa Diabolose ka ho re atamela ka bomene-mene ke sefe? (b) Diabolose a ka ipaka a atlehile katamelong ea hae joang?

⁴ Empa sepheo sa Diabolose ka hore a re atamele ka bomene-mene ke sefe? Hase hore a re bolaee kapele. Ha a ne a atamela Jesu ka bonokoane, sepheo sa Satane e ne e le hore Jesu a sekisetse borapeli ba hae ho Jehova. (Mattheu 4:3-10) Ha boiteko ba hae ba hore Jesu a hlompholle Molimo bo hlōleha, sepheo sa Satane e ne e le hore Jesu a batle ho lopoloha litšokelong tsa lefu ka ho sekisetsa botšepehi ba hae ho Molimo. Ho joalo le kajeno, sepheo-pheo sa katamelo ea Satane ke ho senya kamano ea rōna e ntle le Molimo. Na o tla atleha? A ka atleha ka tsela e le ’ngoe feela. Bibele e bontša tsela eo ha e re: “Jehova o na le lōna mohla lōna le nang le eena. . . . ha le ka mo furalla, o tla lefuralla le eena.”—2 Likronike 15:2.

5. (a) Ho ka thoe’ng ka katleho ea mekhoa ea Satane? (b) Haeba re tla ema re tiile, re lokela ho hlokomela eng kamehla?

⁵ Ka masoabi, selemo le selemo ba bang ba hlōloa ke mekhoa ea Satane. Ba furalla Jehova. Ba bangata ho bona, ha e le hantle, ba tlameha ho khaoloa phuthehong ea Bokreste ka baka la boitšoaro ba bona boo e seng ba bomolimo. (1 Ba-Korinthe 5:13) Ba bang, kamoo ho leng kateng, ba fetoha ‘batšoaruoa ba ntoa’ ka ho tšoareha tsamaisong ea Diabolose. Na u tla ema u tiile khahlanong le boiteko bohle ba Satane hore u furalle Jehova? Haeba u tla etsa joalo, ho hlokahala u ’ne u lemohe bomene-mene ba Diabolose.

Mokhoa oo Satane a Sebetsang ka Oona

6. Ke hobane’ng ha ho sa hlokahale hore re be lefifing mabapi le mano a Satane?

⁶ Ha rea sala lefifing hore na Satane o sebetsa joang. Moapostola Pauluse o hlalositse hore, “re hlile re tseba merero ea hae.” (2 Ba-Korinthe 2:11) Hona ho bolela hore tlhokomelo ea Satane e ho rōna—o nahana ka rōna, a sebelisa monahano ’ohle oa hae o mobe ho re tlosa ho sebeletseng Molimo. Na hoo ha ho nahantše ka matla? Empa ka Bibeleng re na le pale e hlakileng ea mekhoa ea Satane, ke hore, mano a hae, maqiti le mekhoa ea ntoa, hoo ho sa hlokahaleng hore mang kapa mang a ka hloka tsebo ntlheng ena. Lesole le letle le ithuta lintoa tsa nako e fetileng ’me le sebelisa hamolemo seo le ithutang sona. Ka ho tšoanang, ‘joale ka bahlabani ba batle ba Kreste Jesu,’ re ka ithuta mahlale a sa tšoaneng a Satane ’me kahoo ra qoba ho tšoasoa re sa ikalosa mekhoeng efe kapa efe eo a e sebelisang.—2 Timothea 2:3.

7. (a) Satane o atamela ka ho toba ka linako tse ling joang? (b) Ke mekhoa efe hape eo a e sebelisang, hona hobane’ng?

⁷ Qetellong baemeli ba Satane ba hlorisa le ho bolaea Jesu. (Johanne 19:1; Mattheu 27:49, 50) ’Me Jesu o hlile a bolela ka balateli ba hae: “Le tla neeloa ho tšoenngoa, le tla bolaoa.” (Mattheu 24:9) Leha ho le joalo, taba e hlahisa hosele ka tlhaselo e tobileng joalo, e fella ka hore bahlanka ba Molimo ba hlorisoang bakeng sa tšebeletso ea bona ba chesehe haholoanyane. (Liketso 5:41, 42) Ka baka leo, hangata haholo Satane o leka mekhoa e meng—bomene-mene—ho senya botšepehi ba bahlanka ba Molimo.

8. Bibele e senola joang hore Satane o ne a tla sebelisa mekhoa ea bomene-mene?

⁸ Bibele e supa bomene-mene bo joalo ha e khothalletsa hore: “Le tle le tsebe ho hlōla lihlōhō tsohle tsa Diabolose.” (Ba-Efese 6:11) Lentsoe le Segerike bakeng sa “lihlōhō” mona le bolela “liketso tsa bolotsana.” (Kingdom Interlinear Translation of the Greek Scriptures) Hore Satane ke morena oa thetso, e le molotsana oa mano, ho boetse ho bontšoa ke ha Bibele e re: “Etsoe Satane le eena a ikhakanya ka sebopeho se kang sa lengeloi la leseli.”—2 Ba-Korinthe 11:14.

9, 10. (a) Re ka ithuta eng ka ho hlahloba leano la pele le ileng la atleha la Satane? (b) Ke eng e bontšang hore o ntse a sebelisa bona bolotsana boo le mano?

⁹ Nahana ka bolotsana ba pele ba Satane bo atlehileng. Ha a atamela Eva ha a ka a leka ho phea khang hore Molimo o tla lumela ha Eva a ja tholoana e hanetsoeng. Eva o ne a tseba hamolemo ho feta moo. Eaba Satane o etsa hore tholoana e bonahale e lakatseha haholo ho Eva. A mo bolella hore ho e ja ho hlile ho tla ntlafatsa boemo ba hae, a mo nea tebello e ipiletsang. A re, “le tla ba joale ka melimo.” (Genese 3:5) Eva a ineela kekong ea Satane. A hlaolela takatso e fosahetseng, e ileng ea mo isa sebeng sa hae.—Jakobo 1:14, 15.

¹⁰ Satane o ntse a sebelisa mano le bolotsana, joalokaha moapostola Pauluse a ngolile: “Empa ke tšohile, e se re mohlomong, joale ka ha noha e ne e thetse Eva ka mano a eona, le ea lōna mehopolo e ka senyeha, ea timelloa ke ’nete e ho Kreste.” (2 Ba-Korinthe 11:3) Haeba mekhoa ea Satane ea ho atamela e ne e se bomene-mene hakana ha ho bonolo hore batho ba bangata hakana e ne e tla ba ba hlabiloeng ntoeng. Nako le nako o bea meleko e faposang, ka bomene-mene a leka ho re etsa hore re khahloe ke lintho tseo qetellong li tla sitisa meea ea rōna. Sepheo sa hae ke ho re fokolisa e le hore re ka furalla Jehova ka mokhoa o iketlileng, kapa e le hore tlhaselo e tobileng e ka atleha ho senya botšepehi ba rōna ho Molimo.

11. (a) Ke ka tsela efe mekhoa ea Satane e ka tšoantšoang le ea motšoasi oa lihlapi? (b) Le ka mohla re se lebale eng?

¹¹ Mekhoa ea Satane e ka tšoantšoa le ea motho ea tšoasang lihlapi ea sebelisang maraba ho hoka lihlapi. Motšoasi oa lihlapi o tla etsa liteko tsa ho bona hore na ke leraba lefe le hokang lihlapi haholo. Ha e le hantle, ha hlapi e lōma lijo ha e hlokomele hore ho na le leraba le hokelletsoeng sejong. Rōna ho joang ka rōna? Na re hlokometse maraba a sebelisoang ke Satane? Na re ananela ka botlalo liphello tsa ho “hokoa”? U se ke ua thetsoa! Satane le bademona ba hae ke lira tsa sebele tse tsoileng letšolo ho re tšoasa! Ka baka leo le ka mohla u se lebale hore “lefatše lohle le rapaletse ka tlase ho e mobe.” O foufalitse likelello tsa batho ba bangata ntlheng ena. U se mo lumelle hore le uena a u foufatse.—1 Johane 5:19; 2 Ba-Korinthe 4:4.

Mekhoa e Bomene-mene ea Lintho tse Bonahalang

12. (a) Leraba le leholo le sebelisoang ke Satane ke lefe? (b) Mahlo a ka lakatsa lintho life?

¹² Leraba le leholo le sebelisoang ke Satane ke lerato la lintho tse bonahalang. (1 Timothea 6:10) Bibele e bua ka “takatso ea mahlo,” e lemosa hore takatso e joalo ‘ha e tsoe ho Ntate, empa e tsoa lefatšeng.’ (1 Johanne 2:16) Lefatšeng la rōna la kajeno ho na le lintho tse ngata haholo ho feta neng kapa neng tse ka lakatsoang ke mahlo a rōna. Ho na le ho hocha matlong, limmotokareng, livene, liketsoana, liaparo, thelevishene, li-hi-fi, li-supa-nako, li-computer, lipapali tsa “video” le mechine e meng ea mefuta eohle. Hape, ho na le menyaka e mengata e ka thabeloang ka tsela ea ’mino, motjeko, libaesekopo, sethala, ho shebella TV, le mefuta e sa feleng ea lipapali, le tse joalo.

13. (a) Satane a ka sebelisa lintho tse ka bang molemo joang ho hoka Bakreste hore ba tlohe tšebeletsong ea Molimo? (b) Ke hobane’ng ha re sa lokela ho tella Satane joaloka sera?

¹³ Ha e le hantle, lintho tse bonahalang le menyaka ha li hlile ha li phoso ka botsona. Jehova o hlotse bokahohleng bo thabisang bo bonahalang, ho akarelletsa lefatše la rōna ka botle bohle ba lona, ho khahlisa mahlo a rōna le boikutlo bo bong ba rōna. Ho totobetse hore mefuta e sa tšoaneng ea boikhathollo le boithabiso e molemo ha e bolokiloe sebakeng se e loketseng. (1 Timothea 4:8) Leha ho le joalo, ho boetse ho hlokahala hore re hlokomele hore hangata Satane o sebelisa lintho tsona tsena e le maraba ho tlosa Bakreste ho sebeletseng Molimo. Ha ho pelaelo hore Satane ka boeena o entse ho hongata ho ntlafatsa le ho sebelisa lintho tsena tsa kajeno tse bonahalang le menyaka tse sebelelitseng ho khelosa ba bangata ho sebeletseng Jehova Molimo. U se ke ua tella sera sa rōna Diabolose. O fetohile morena oa tlhaselo e nyonyobang ka bolotsana.

14. (a) Ke lintho life tse fanang ka leseli hore motho o susumetsoa ka mekhoa ea bomene-mene ea lintho tse bonahalang? (b) Ho sutha ho Molimo ho ka ’na ha se bonahale joang?

¹⁴ U ka tseba joang ha u se u nkiloe ke leraba la bomene-mene la Satane la lintho tse bonahalang? U ka tseba ha boikhathollo kapa ho phehella ntho efe kapa efe e bonahalang ho se ho qalile ho khathatsana le ho ithuta ha hao Bibele, ho ba teng kamehla libokeng tsa Bokreste, kapa mosebetsing oa beke le beke oa tšebeletso ea tšimo. Ha e le hantle, ho hlokahala hore ho falimehuoe. Leraba le ka u etsa hore u hoholehe ka hore feela u tšoarehe haholoanyane nakong ea hao, thahasellong le matleng. (Ba-Heberu 2:1) Ha seketsoana se hoholeha mohlomong u ke ke ua hlokomela hore sea tsamaea. U ka ba ua re ha se sisinyehe ho hang. Empa bopaki ba hore sea tsamaea bo tla bonoa ka hore se tla ’ne se tlohe butle-butle moo se leng teng. Ho joalo le ka motho ea hoholehang ho tloha ho Molimo le phutheho ea Oona.

15, 16. (a) Ho ka ba bohlale hore re itlhahlobe eng? (b) Ke boemo bofe bo bontšang hore ho bohlale hore re itlhahlobe joalo?

¹⁵ Ka bohlale, ka baka leo, re tlameha hore ka mehla re hlahlobe tšebetso ea rōna ea Bokreste, re ipotsa: “Na ke sa ithuta Bibele ka mehla joalokaha ke ne ke etsa pele? Na ke ea libokeng kamehla joalokaha ke ne ke etsa? Na ke sebetsa nako e ngata tšebeletsong ea tšimo joaloka pele?” Mohlomong u re: “Oho, hona joale ke tšoarehile haholoanyane.” Empa u tšoarehile haholoanyane ke eng? Na e be mohlomong u senya nako e ngata haholoanyane telekisong ea menyaka, mohlomong u shebelletse thelevishene? Na e be mohlomong ho bokella ha hao lintho tse bonahalang ho u sitisa tšebeletsong ea hao ho Molimo ho e-na le ho u thusa? Na kannete u hlokomela keletso ea Jesu ka ho se belaelle lintho tse bonahalang empa ho batla ’Muso oa Molimo pele?—Mattheu 6:31-33.

¹⁶ Lefatšeng lohle ho na le ba tsoileng likotsi ntoeng—Bakreste ba hapiloeng ke mekhoa e bomene-mene ea Diabolose ea lintho tse bonahalang ’me ba tsoile tšebeletsong ea Molimo. Mohlomong phuthehong eo u leng ho eona u nahana ka ba bang bao ka nako e fetileng le neng le sebetsa hammoho ka bokhabane, empa ba se ba se mafolo-folo tšebeletsong ea Molimo ka baka la ho ineela marabeng a bomene-mene a lintho tse bonahalang a ileng a ba etsa hore ba hoholehe habonolo butle-butle. (Ba-Filippi 3:18) Ka baka leo “le tsohe masene, le falimehe.” U se ke ua lumella Diabolose a u ja!—1 Petrose 5:8.

Mokhoa o Bomene-mene oa ho Kopana le Meea

17. (a) Ke hobane’ng ha mangeloi a ile a tloha libakeng tsa oona leholimong, eaba ho etsahala joang ka oona ha metsi a Moroallo a tšoloha? (b) Mangeloi aa a ikarabella bakeng sa eng?

¹⁷ Na u sa hopola ha mangeloi a mang a ikopanya le Satane ho fetohela Jehova? Ke nakoana pele ho Moroallo. Bibele e senola hore barali ba batle ba batho ba fetoha leraba ho mangeloi. A mang ho oona a tlohela libaka tsa oona tsa tšebeletso ea leholimo ho tla lefatšeng ho ba le likamano tsa botona le botšehali le basali bao ba batle. Seo ba ileng ba se etsa se ne se fosahetse joalokaha ho le joalo ka liketso tsa bosodoma tse neng li etsoa ke batho ba Sodoma le Gomorrha. (Genese 6:1, 2; Juda 6, 7) Ha metsi a Moroallo a tšoloha, mangeloi a hlobola ’mele ea nama ’me a khutlela leholimong. Le hoja a amohiloe matla a ho ikapesa ’mele ea nama ho khotsofatsa litakatso tsa oona tsa likamano tsa botona le botšehali tseo e seng tsa tlhaho, mangeloi ana ka mafolo-folo a ntse a silafatsa lelapa la motho boitšoarong. Keketseho e khōlō ea kajeno boitšoarong bo bobe ba botona le botšehali ba mefuta eohle ke phello e tobileng ea hore e be a ile a lelekoa leholimong ’me a qobelletsoe sebakeng sa lefatše.—1 Timothea 4:1; Tšenolo 12:9, 12.

18. Ke bopaki bofe, ba hona joale le ba nakong e fetileng, bo senolang hore boitšoaro bo bobe ba botona le botšehali ebile o mong oa mekhoa e ka sehloohong eo Satane a silafatsang bahlanka ba Jehova ka eona?

¹⁸ Leraba la boitšoaro bo bobe ba botona le botšehali ebile o mong oa mekhoa eo ka mehla Diabolose a e etelletsang pele ho silafatsa bahlanka ba Jehova. Nakoana pele batho ba Iseraele ba Molimo ba kena Lefatšeng la Pallo, Satane a sebelisa basali ba batle ba Moabe e le sejo lerabeng le tšoasang Baiseraele hore ba tlohele tšebeletso ea Jehova. Baiseraele ba likete ba “hokoa” ke bohlola, ’me ka lebaka leo, ba bolaeloa phoso ea bona. (Numere 25:1-3) Mabapi le ketsahalo eo, Bakreste baa lemosoa: “Hape, re se ke ra etsa bootsoa, joale ka ba bang har’a bona ba kileng ba ineela jona, ’me ka tsatsi le le leng ha oa ba likete tse mashome a mabeli a metso e meraro.” (1 Ba-Korinthe 10:7, 8, 11) Leano lena le bomene-mene la Satane le ile la sebetsa ka nako eo, ’me lea sebetsa le kajeno. Batho ba bangata ba khaoleloa boitšoaro bo bobe ba botona le botšehali ho feta mabaka afe kapa afe a mang a kopane.

19. (a) Ke hobane’ng ha ba bangata hakana ho bahlanka ba Jehova ba ameha boitšoarong bo bobe ba botona le botšehali empa ba tseba hore ha bo khahlise Molimo? (b) Ke eng e tla u thusa hore u qobe ho ameha boitšoarong bo bobe ba botona le botšehali?

¹⁹ Empa kaha bahlanka ba Jehova ba tseba hore bofebe le bohlola li hanana le melao ea Molimo, ke hobane’ng ha ba bangata hakana ho bona ba ameha ketsong e joalo? Hana Eva o ile a hlompholla molao oa Molimo hobane’ng? Hobane Satane o ile a etsa hore ho etsa joalo ho bonahale ho boheha ka ho fetisisang; Eva a bona hore ke monyetla oo a ke keng a o tlohela. Ho joalo le kajeno, ka mecha ea hae ea mashano—thelevishene, libaesekopo, likhatiso, le tse joalo—bohlola le bofebe li entsoe hore li se ke tsa bonahala li ipiletsa feela le ho ba monate empa hape e be tse amohelehang. Kahoo haeba u lōma leraba leo u le neoang ka mecha ea mashano ea Diabolose, ho tla etsahala joang? Le uena, u tla “hokoa”!

Qoba Monahano o Itaolang

20. (a) Mokhoa o mong oa bomene-mene oa Diabolose ke ofe? (b) Satane o sebelisitse mokhoa ona joang ka lilemo tse ka bang 6 000?

²⁰ Qalehong ea bofetoheli ba hae Satane o hlile a belaela tsela eo Molimo o etsang lintho ka eona. A phahamisa monahano o itaolang. ‘Le ka itherela hore na ho hotle le ho hobe ke hofe,’ ke Satane ha a bolella Eva. ‘Ha ho hlokahale hore le mamele Molimo. Ha a hlile ha a le bolelle ’nete.’ (Genese 3:1-5) Ho tla fihlela kajeno, ke leano la bomene-mene la Satane ho kenya ho batho ba Molimo monahano oa mofuta ona.—2 Timothea 3:1, 13.

21. Mehlala ea monahano o itaolang ke efe mehleng ea kajeno, ’me liphello ebile life?

²¹ Monahano o itaolang joalo o bonahala joang? Tsela e tloaelehileng ke ka ho belaella keletso e fanoang ke phutheho e bonahalang ea Molimo. Ka mohlala, phutheho ea Molimo nako le nako e ’nile ea lemosa ka ho mamela ’mino oa mofuta o itseng oa boitšoaro bo bobe le o tsosang takatso, le ka ho ea li-discong le liholong tsa mefuta eitseng tsa litantši tsa lefatše moo ho letsoang ’mino o joalo le moo ho tsebahalang hore batho ba oela boitšoarong bo bobe. (1 Ba-Korinthe 15:33) Empa ba bang ba itseng ba ipolela hore bona ba tseba hamolemo. Ea e-ba marabele keletsong e joalo ’me ba etsa se lokileng mahlong a bona. Ka phello efe? Hangata ba ameha boitšoarong bo bobe ba botona le botšehali ’me ba tsoa kotsi moeeng. Empa le haeba ba sa ka ba ameha joalo, na ha ba molato haeba ba bang ba latela mohlala oa bona ’me ba kotula litholoana tse mpe?—Mattheu 18:6.

22. (a) Re lokela ho ba seli ka eng ka linako tsohle? (b) Ke eng e tla nahanoa ka nepo thutong e latelang ea rōna?

²² ’Nete ena ha ho hlokahale hore e qapollisoe: Re loana le lira tse fetang motho ka matla, ’me ho hlokahala hore re hlokomele hona ka mehla. Satane le bademona ba hae ke ntho ea sebele; hase libopuoa tse phelang feela menahanong. Ke “marena a lefifi la lefatše lena,” ’me re loana ntoa ea moea le bona. (Ba-Efese 6:12) Ke habohlokoa haholo hore re hlokomele mano a bona a bomene-mene ’me re se ke ra itlohella hore a re tšoase. Ka ho nepahetseng, he, joale re tla nahana ka hore na re itlhomella joang ho loana le meea ena e khopo.

Na U ka Arabela Lipotso Tsee?

◻ Sepheo sa Diabolose ka ho atamela batho ba Jehova ka bomene-mene ke sefe?

◻ Ke hobane’ng ha Diabolose a sebelisa mekhoa ea bomene-mene?

◻ Mekhoa ea bomene-mene e sa tšoaneng ea Satane ke efe?

◻ Ke eng e tla re thusa ho qoba ho oela mekhoeng ena ea bomene-mene?

[Setšoantšo se leqepheng la 21]

Motsamao oa seketsoana se hoholehang butle-butle o batla o sa bonahale. Ho ka ba joalo le ka ho hoholeha ha Mokreste ha a tloha ho Molimo le phutheho ea Oona