Tite o Betana le Kabelo e Thata
“KE NGOLLA uena Tite, ngoan’a ka oa sebele tumelong eo re nang le eona hammoho le uena.” Mantsoe ana e tlameha e be a ile a futhumatsa pelo ea Tite ha a qala ho bala lengolo la kabelo le tsoang ho moapostola Pauluse. O ne a siiloe Kreta ho sebeletsa e le molebeli ea tsamaeang, a etela liphutheho tse sa tšoaneng. Tite o ne a pakile hore ‘ke oa sebele’ ’me kahoo a tšoaneloa ke boikarabelo boo a neng a bo tšepetsoe.—Tite 1:4.
Lilemo tse ka bang 12 kapa ho feta moo pelenyana, Pauluse o ne a isitse Tite Jerusalema. Ha ho pelaelo hore Mokreste enoa “oa sebele” ea sa bollang oa Mogerike o ne a le teng ha baapostola le banna ba bang ba baholo ba fihlela qeto e nepahetseng ka khang ea lebollo. Hobane ba nahane ka bopaki bo bongata, ba fihlela qeto ea hore ha ho hlokahale hore Bakreste ba Balichaba ba kang Tite, ba bolle le ho boloka sohle se hlokoang ke Molao oa Moshe. Ebile phihlelo e tiisang tumelo hakaakang e fumanoeng sebokeng seo se tsebahalang!—Liketso 15:1-29; Ba-Galata 2:1-3.
Empa Kreta ho ne ho ntse ho e-na le banna ba kopanelang le liphutheho ba neng ba ntse ba khomaretse “lebollo.” Ba ne ba hanana le sehlopha se busang se Jerusalema. Ho e-na le ipolokela maikutlo a joalo ka ho bona, banna ba ‘itaolang’ bana ba ne ba ruta hore lebollo lea hlokahala bakeng sa pholoho. Ho hobe ka ho fetisisa, bana ba “bolelang mafeela” ba buella ‘litšōmo tsa ba-Jode’ le melao e sa fumanoeng ka Molaong oa Moshe. “Ba thetsang” bana ba ne ba senya tumelo ea “matlo.” Liphutheho tsa Kreta li ne li sokeloa ke karohano.—Tite 1:10, 11, 14.
Kotsi e ’ngoe e ne e le tikoloho e tsebisahalang ka bobe eo Bakreste ba Kreta ba neng ba tsoile ho eona. Moprofeta oa Mokreta o ile a lumela: “Ba-Kreta ke mahata ka mehla, ke liphoofolo tse mpe, ke limpa tse botsoa.” Joalokaha polelo ena e bontšitse, Bakreta ba ne ba tšoana le libatana tse harolang le ho bolaea; ba ne ba thabela ho senya botumo ba ba bang ka leshano le litšebo. Litšobotsi tse mpe joalo li ne li kenelletse ka phuthehong ea Kreta.—Tite 1:12; 3:2.
Lengolong la hae, ka ho hlakileng Pauluse o thathamisa mathata a neng a tlameha ho sebetsoa. Tite o ne a tlameha ho koala likheo tse peli tsa bohlokoa: “Taba eo ke u siileng Kreta ka baka la eona, ke hore [1] u qetelle ho lokisa tse e-song ho lokisoe, ’me [2] u bee baholo metseng eohle, joale ka ha nkile ka u laela.”—Tite 1:5.
Ho Lokisa Tse E-song ho Lokisoe
Ena e ne e le kabelo e thata. Har’a ba bakang mefere-fere, Tite o ne a tlameha ho emela ’nete, ‘a tiea thutong ea ’nete.’ Ba bang ba ne ba tla mo soma, ba qholotsa matla a hae. Empa Tite o ne a tšehelitsoe ke puso ea Molimo. O ne a ka ba bontša lengolo la kabelo, le reng: “Bolela taba tseo, ’me u khothatse, u khalemele ka matla ’ohle; ho se ke ha e-ba motho ea u nyelisang.”—Tite 1:9; 2:15.
Ho thoe’ng Haeba motho a ne a hana nyatso, a batla ho utloeloa bohloko ke ba bang ka phuthehong? Ka mohau, batho ba joalo ba ne ba tla ‘tsosoa la pele le ba bobeli.’ Haeba hoo ho hlōleha, Tite a laeloa: “Suthisa” ba joalo. Hona ho bolela hore ba ne ba tla khaoloa, kapa ba tlosoe setsoalleng.—Tite 3:10, 11.
Ka lebaka la tikoloho e lokolohileng, Bakreste ba bang ba Kreta ba ne ba nka taeo habobebe. Tite o ne a tlameha ho ba ‘khalemela ka thata.’ Le bona baena ba seng ba hōlile ho ne ho hlokahala ba hopotsoe hore ba “tšabe . . . ho saoha, ba be le kelello.”—Tite 1:13; 2:2.
Ho Beoa ha Baholo
Liphutheho tsa Kreta li ne li hloka bolebeli bo botle. Na Tite o ne a tla khetha setho se nang le tšusumetso e matla e be o se khethela ho ba “moprista” holim’a phutheho? Che, o ne a laetsoe hore a bee “baholo metseng eohle.” Hona ho bolela hore o ne a lokela ho bona hore sehlopha sa baholo se khetheloa ho lebela likhato tsa phutheho.—Tite 1:5.
Pauluse o thathamisa se hlokoang ho tataisa ho khethoeng ha balebeli bana. Se likoloha boitšoarong. Tšoaneleho ea pele e ne e le hore monna e be “ea se nang sekoli.” Le hoja ho ne ho sa hlokoe thuto e phahameng, banna bana ba ne ba lokela ho tseba le ho itšoarella ka matla ‘lentsoeng’ la Molimo ha ba ruta le ha ba ‘hlōla bahanyetsi.’ Litlhokahalo tsena e ntse e le tsa bohlokoa joalo ha ho nahaneloa banna bakeng sa libaka tsa bolebeli kajeno. Joalokaha, ka mohlala ha Pauluse a ne a ngola: “Molebeli e be motho . . . ea halalelang.” khalalelo e joalo e bontšoa ka ho “tiea thutong ea ’nete” joalokaha e qaqisoa ka libukeng tsa phutheho ea kajeno ea Jehova ea Bakreste.—Tite 1:6-9.
Ho na le litaba tse ling tsa bohlokoa tseo ho neng ho hlokahala hore Tite ‘a omele ka tieo kapele.’ (Tite 3:8) Tsena li ka aroloa likoto tse ’ne—litakatso, lipolelo, mesebetsi le boikutlo.
Hopola Litakatso tse Nepahetseng
Ka makhetlo a mabeli lengolong la hae le eang ho Tite Pauluse o bua ka ‘tšepo ea bophelo bo sa feleng.’ Ke ntle ho kotsi re ka beang tšepo ena lipelong tsa rōna hobane ‘e tšepisitsoe ke Molimo o sa thetseng.’ (Tite 1:2; 3:7) Le teng, ke ho sa tsitsang le ho kotsi hakaakang ho lumella “litakatso tsa lefatše” hore li khokhothe “tšepo e lehlohonolo” ena e thabileng, e akarelletsang “ho hlaha ha khanya ea Molimo o moholo, Jesu Kreste, ’Moloki oa rōna.”—Tite 2:11-14.
Ho ’hlaha hona ha khanya ea Molimo ka ’Moloki oa rōna, Kreste Jesu, ho haufi haholo. Ho salaneng morao le ho hlaha hoo e tla ba ho timetsoa ha tsamaiso eohle e khopo le bohle ba beileng bophelo ba bona ho potoloha likhoheli tsa eona tse bonahalang le tsa nama. Ke habohlokoa hakaakang, ka baka leo, ho rōna hore re ntše ka metso lipelong tsa rōna, e, “Ho tela . . . litakatso tsa lefatše, re tle re phele nakong ea joale . . . ka borapeli”!—Tite 2:11-14.
Ho Alosa Lipuo tsa Rōna
“Ba bolelang mafeela,” “mahata,” ‘ba fetolang,’ ‘ba nyefolang’ “likhang tsa booatla”—lipolelo tsena li senola hore ho sebelisoa ha leleme e ne e le ho hobe sehleke-hlekeng sa Kreta. Ho ne ho bile ho hlokahala hore Tite a lemose bo-khaitseli ba seng ba hōlile hore e se be “basebi.” Keletso eo e-ea hlokahala kajeno.—Tite 1:10, 12; 2:3, 9; 3:2, 9.
Ka mohlala, phuthehong e ’ngoe khaitseli ea hōlileng, le hoja a ne a chesehela tšebeletso ea tšimo, o ne a tloaetse ho bua hampe ka bana ba hae ba lilemong le ba ineetseng le ka monna oa hae ea sa lumelang. Ho sa boleloe lebitso la hae, ho ile ha hlokahala hore e mong oa baholo a fane ka puo ka phuthehong ka taba ena. Ka sebele, na re na le tokelo ea ho bua hampe ka motho ofe kapa ofe ea phelang? Lengolo le bululetsoeng la Pauluse le eang ho Tite lea arabela: “Ba se ke ba nyefola motho.” Ho e-na le hoo, Bakreste ba ineele ho sebeliseng “puo . . . e pholosang, e se nang ho nyatsuoa.”—Tite 3:2; 2:8.
Mesebetsi e Khahlisang Molimo
“Ka molomo ba bolela hore ba tseba Molimo, empa ba o latola ka liketso” tsa bona. (Tite 1:16) Batšoenyi liphuthehong tsa Kreta ba ne ba tšoaneloa ke tlhaloso ena. Ha ho bapisoa, ka makhetlo a mane Pauluse o hatisa bohlokoa ba “mesebetsi e metle.” (Tite 2:7, 14; 3:8, 14) Ho bea mohlala mosebetsing o motle ka ho fetisisa, Pauluse a supa “polelo eo ke e laetsoeng ka taelo ea Molimo.” (Tite 1:3) Jesu o laetse balateli bohle ba hae mosebetsi ona oa bohlokoa; kahoo o lokela ho ba qalehong ea letoto la rōna la “mesebetsi e metle.”—Mattheu 28:19, 20.
Ho hong ho akarelletsoang ‘mesebetsing e metle’ e tla ba ho iteka ha bo-ntate ho hōlisa “bana ba lumelang.” Ho basali, e tla akarelletsa “ho hlokomela malapa a bona, . . . le ho ikokobeletsa banna ba bona, esere lentsoe la Molimo la nyefoloa.” Ba sebetsang khirong, le hoja ba se ba se bokhobeng, ba ka sebelisa motheo o ho Tite 2:9, 10 ka hore ka hlompho ba mamele benghali ba bona. Hape, Bakreste ba hlokoa ho “utloa lihloho le marena, ho ea ka melao,” le “ho lokela mesebetsi eohle e metle.”—Tite 1:6; 2:5, Testamente e Ncha le Lipesalema; 3:1.
Ho Boloka Boikutlo bo Nepahetseng
Ho ne ho hlokahala hore Bakreste ba Kreta ba be le boikutlo bo nepahetseng ka baetsalibe ba lefatše, e seng ho ba nyefola empa “ba etsetse batho bohle ka mosa oohle.” Ho hlokahala re etse joalo le kajeno. Ho seng joalo, boiteko ba rōna ho thusa hore ba amohele molaetsa oa ’Muso bo tla hlōleha. Hape, joalokaha ho bile joalo Kreta ea khale, ho hlokahala re alose hore na re tloaelana le bo-mang. Ke joang ho ka etsahalang hore re utloe taelo ea “ho tela ho se tšabe Molimo le litakatso tsa lefatše, re tle re phele nakong ea joale . . . ka borapeli”?—Tite 3:2; 2:12.
Moapostola Pauluse o boletse hore, “khale re ne re le lithoto, re le ba hanang ho utloa, ba lahlehileng.” Na Jehova o ne a tlamehile ho re pholosa boemong bona ba boetsalibe? Che, ‘hase ka mesebetsi e lokileng e entsoeng ke rōna, empa e bile ka mohau oa oona o re pholositseng.’ Ka ho lumela maling a tšolotsoeng a Kreste, Bakreste ba tšoareloa libe tsa bona tsa nakong e fetileng ’me ba amohela tšepo ea “bophelo bo sa feleng” e babatsehang. Oo ke “mohau” o sa tšoanelang o phahameng ka ho fetisisa le lebaka le matla la ho qoba litakatso tse fosahetseng le ho itloaetsa puo e hahang, mesebetsi e metle le boikutlo bo mohau ho bao re ahisaneng le bona.—Tite 3:3-7.
Tite e tlameha e be o ile a leboha hakaakang thuso ena e lerato kabelong e thata ea hae! Ha ho pelaelo ea hore o ile a bala lengolo la Pauluse a ba a ’na a le pheta ka makhetlo a mangata, a le qotsa hangata ha a ruta leha a eletsa. Ba limillione kajeno ba sebelisa lengolo lena le bululetsoeng joalo ka molemo o moholo ho bona le ba bang. Se ka ho lona ruri ke se setle le se molemo.