‘Le se ke la Sebelisa Lefatše ka Botlalo’
“Ba tlamehang ho sebetsana le lefatše ba se ke ba tšoareha haholo ho lona. Ke bua joalo hobane lefatše kamoo re le tsebang lea feta.”—1 BA-KORINTHE 7:31, “The Jerusalem Bible.”
1, 2. (a) Ba bangata ba na le pono efe ka bokamoso ba lefatše kajeno? (b) Pauluse o itse’ng ka lefatše le ho le sebelisa?
“MOTHO o sitoa ho profeta mehlolo kapa masoabi a nakong e tlang. . . Leha ho le joalo, ka ho petetseha kapa ka mokhoa o phollatsi, ho bonahala lefatše le tsoela pele ’me le tla tsoela pele.” Ho boletse joalo mongoli ea tsebisahalang oa histori H. G. Wells lilemong tse fetileng. Ho sa tsotellehe litlokotsi tse ngata le likoluoa, ba bangata ba ikutloa hore batho ba tla rarolla mathata a bona ka mokhoa o mong, ’me lefatše, haholo kamoo re le tsebang, le tla pholoha.
2 Leha ho le joalo, moapostola oa Mokreste Pauluse, ha a ngola tlas’a tšusumetso e halalelang, o fane ka sebopeho se fapaneng ha a phehella balumeli hammoho le eena hore: “Le ba itšebeletsang ka tsa lefatše lena, ba be joale ka hoja ba sa sebetse ka tsona; hobane mokhoa oa lefatše lena oa fela.” Phetolelo e ’ngoe ke hore: “Ba tlamehang ho sebetsana le lefatše ba se ke ba tšoareha haholo ho lona. Ke bua joalo hobane lefatše kamoo re le tsebang lea feta.” (1 Ba-Korinthe 7:29-31, Bibele ea Sesotho; JB) Keletso ee e bolela’ng ho bahlanka ba Jehova Molimo kajeno?
“Lefatše Lea Feta”
3. Pauluse o buile ka eng ho 1 Ba-Korinthe khaolo ea 7, ’me lintlha tse ling tsa hae ke life moo?
3 Ho 1 Ba-Korinthe khaolo ea 7 Pauluse o ne a bua ka lenyalo har’a Bakreste. Leha a ne a buella hore bosooa ke tsela e molemo haholoanyane, a lumela hore ba kenang lenyalong ‘ha ba etse sebe.’ Empa a phaella ka hore ba tla “ba le matšoenyeho nameng,” kaha lenyalo le tsamaea le lipelaelo tse itseng. Ka mohlala, ho kula ha moratuoa ho ka tepeletsa. Le hoja Pauluse a sa ka a bolela mahloriso mona, matšoenyeho a eketsehileng a ka hlahela batho ba lenyalong haeba banyalani ba arohanngoa kapa haeba batsoali ba arohanngoa le bana ba bona.—1 Ba-Korinthe 7:25-28.
4. 1 Ba-Korinthe 7:29 e bolela eng?
4 Pauluse a boela a re: “Seo ke se bolelang, banab’eso, ke hoba, joale, nako e khutšoanyane; e le hore ba nang le basali ba be joale ka hoja ba se na bona.” (1 Ba-Korinthe 7:29) Kaha ‘nako e setseng e khutšoanyane,’ Bakreste ba lenyalong ba se ke ba ineela ka ho feletseng litokelong le litšoanelong tsa lenyalo hoo e leng bophelo bohle ba bona. Ho e-na le hoo, ba lokela ho etelletsa lithahasello tsa ’Muso pele bophelong, empa ba ntse ba phetha boikarabelo ba lenyalo. (1 Ba-Korinthe 7:3-5, 29-40) Kaha re phela “mehleng ea qetello,” re na le lebaka le feletseng la ho latela keletso ena e bululetsoeng.—2 Timothea 3:1-5.
5. “Lefatše” leo re sa lokelang ho le sebelisa ka botlalo ke eng?
5 Kaha ‘nako e setseng e khutšoanyane,’ Pauluse a re, “ba itšebeletsang ka tsa lefatše lena, ba be joale ka hoja ba sa sebetse ka tsona.” (1 Ba-Korinthe 7:29-31) Serapeng sena lentsoe la Segerike le ngotsoeng e le “lefatše” (kósmos) ha le sebetse ho batho ka ho toba, joaloka ho Johanne 3:16, empa serapeng sena le sebetsa tšobotsing ea bophelo ba batho le kaheho ea bona. Batho ba na le lihlopha tsa bona tsa lipuo, lichaba, merabe, malapa, ba ruileng le ba futsanehileng, le kaheho e likolohileng batho le ho ba ama. (1 Ba-Korinthe 14:10; Jakobo 2:5, 6; Tšenolo 7:9; 14:6) E, Pauluse o ne a bua ka tšobotsi ea bophelo ba batho le seo e nang le sona ha a re: “Ha le sebelisa lefatše, le se ke la leka ho kokona ho Iona sohle seo le ka se khonang.”—1 Ba-Korinthe 7:31, The New Testament in the Language of Today, William F. Beck.
6, 7. (a) ‘Mokhoa oa lefatše lee o fetoha’ joang? (b) Moapostola Johanne o hlahisitse ntlha efe mabapi le bokamoso ba lefatše?
6 Pauluse hape a supa hore Bakreste ha baa lokela ‘ho sebelisa lefatše ka botlalo’ hobane “mokhoa oa lefatše lena oa fela.” Lefatše lena le tšoana le lipono tse fetohang sethalleng. Le hoja lefatše le ka bonahala le hohela, lipapali liponong tsa Iona lia fetoha le maemo a fetoha. Batho ba hloella ‘sethalleng’ ’me ba bang ba etsa karolo ea bona ka boikhohomoso. Empa ba phakise ba tlohe le moloko oa bona e be baa lebaloa. (Moeklesia 1:4) Mehleng ea rōna, ‘lesira la sethalla le tloha le koala’ ’me le pata pono ea lefatše lena la khale! Ka sebele, “lefatše kamoo re le tsebang lea feta.”—1 Ba-Korinthe 7:31, JB.
7 Moapostola Johanne o buile joalo: “Lefatše lea feta, le eona takatso ea Iona; empa ea etsang thato ea Molimo, o hlola ka ho sa feleng.” (1 Johanne 2:15-17) Ho totobetse hore Johanne o ne a bolela hore mokhatlo o khopo oa batho o tla tloha ka ho timetsoa ke Molimo, joalokaha ho ile ha timela lefatše la pele ho Moroallo. (Ba-Heberu 11:7; 2 Petrose 2:5; 3:6) Ntho e tla felisoa le batho ba khopo ke kaheho ea hona joale ea lintho le sohle seo e fanang ka sona.
8. Le hoja lefatše le feta, Bakreste ba na le tšepo efe, ’me e lokela ho ama ho sebelisa ha rōna lefatše joang?
8 Joalokaha batho ba lokileng ba ile ba pholoha Moroallo, Jesu o bontšitse hore ba bang ba tla pholoha ‘mahlomola a maholo’ a tlang a potlakile. (Mattheu 24:21, 22, 36-39; bapisa Tšenolo 7:9-17.) Ho se ho ntse ho thomeha “lefatše le lecha,” mokhatlo oa batho ba tla phela lefatšeng lena tlas’a puso ea ’Muso. (2 Petrose 3:13; Tšenolo 21:1; bapisa Pesaleme ea 96:1.) Ka hona haeba re tšepile ho pholoha le ho ba le bophelo bo sa feleng Tsamaisong e Ncha, ke hobane’ng ha re ka neela boholo ba nako ea rōna le matla lefatšeng le fetang?
‘E le Bobebe Kamoo ho ka Khonehang’
9. Ke ka litsela life tse tsitsitseng Lipaki tsa Jehova li ka sebelisang lefatše ka nepo?
9 Re le Lipaki tsa Jehova tse phelang tsamaisong ena ea lintho, re ke ke ra ‘tsoa lefatšeng’ ho hang. (1 Ba-Korinthe 5:9, 10) Joale re ka sebelisa lefatše ka litsela tse leka-lekaneng, tse loketseng le tse lekanyelitsoeng. Ka mohlala, kaha re lefa makhetho a rōna, re tšoaneloa ke litšebeletso tse itseng tseo ‘marena a maholo, a fanang ka tsona.’ (Ba-Roma 13:1-7) Ka nepo re sebelisa litšebeletso tsa poso, sepolesa le tse ling tse molaong, tse kang litsamaiso tsa lipalangoang. Ka morero ofe? Bakeng sa ho phela hantle le ho phetha mosebetsi oa rōna oo re o filoeng ke Molimo oa ho paka ka ’Muso. Empa kaha ha rea lokela ho ‘sebelisa lefatše ka botlalo,’ lintho tsohle tse joalo li sebelisoa feela ho isa moo li sebeletsang lithahasello tsa rōna tsa Bokreste.
10. (a) Re lokela ho thea bophelo ba rōna ho eng? (b) Jesu o tšoantšelitse bohlokoa bo boholo ba ’Muso joang? (c) Haeba lithahasello tsa ’Muso le katamelano e haufi le Jehova li bolela ho hoholo ho rōna, hoo ho tla ama ho sebelisa ha rōna lefatše joang?
10 Re ke ke ra lumella lithahasello tsa lefatše ho re busa. Ho e-na le hoo, ho hlokahala bophelo ba rōna re bo thee kamanong ea rōna le Jehova, borapeling ba rōna ho eena le tšebeletso ea rōna ho eena. Na liketso tsa rōna li senola hore ‘ho lula haufi’ le Molimo ke habohlokoa ho rōna? (Jobo 29:4) Hona na re hlokomela bohlokoa bo fetisisang ba lintho tsa moea? Jesu Kreste o tšoantšitse botle ba ’Muso oa Molimo ka “perela” ea bohlokoa hoo mohoebi ‘a rekisang sohle seo a nang le sona ho e reka.’ (Mattheu 13:45, 46) Kahoo Jesu o bontšitse hore motho ea ananelang bohlokoa ba ’nete ba ho fumana ’Muso o tla utloisisa ho arohana le eng kapa eng eo lefatše le e nkang e le ea bohlokoa hore a o fumane. Haeba ’Muso le lithahasello tsa oona, haholo-holo katamelano e haufi le Jehova, e le tsa bohlokoa hakaalo ho rōna, re tla ‘boloka kamano e ’ngoe le e ’ngoe le lefatše . . . e le bobebe kamoo re ka khonang.’—1 Ba-Korinthe 7:31, Phillips.
“Ha rea ka ra Amohela Moea oa Lefatše”
11, 12. (a) “Moea oa lefatše” ke eng? (b) Bakreste ba amohetse moea ofe, ’me o bapa joang le moea oa lefatše lee?
11 Lebaka le leng la ho se sebelise lefatše ka botlalo ke hore ho thata ho thabela katamelano e haufi le Jehova ha re ntse re e-na le “moea oa lefatše.” (1 Ba-Korinthe 2:12) Moea kapa matla a susumetsang a laolang lefatše la batho ba khopo ke a bodemona le a ikarotseng ho Molimo. Tlas’a taolo ea Diabolose, lefatše le baballa boithati le litakatso tsa nama e oeleng, ho fellang ka bora ho Jehova Molimo.—Johanne 14:30; Ba-Efese 2:1-3; 1 Johanne 5:19.
12 Moapostola Pauluse a bapisa moea oa lefatše le moea oa Molimo ’me a re ka Bakreste: “Ha e le rōna, ha rea ka ra amohela moea oa lefatše, empa re amohetse Moea o tsoang ho Molimo.” (1 Ba-Korinthe 2:12) Kaha mokhoa oa lefatše oa ho nahana le boitšoaro o hanana le tšusumetso ea moea o halalelang oa Molimo le taelo e fumanoang Lentsoeng la oona, batho ba Molimo ba tlameha ho qoba moea oa lona. Ho e-na le hoo, ba ratang Jehova ka nepo ba hlaōlela le ho boloka litholoana tsa moea o halalelang, lerato, thabo, khotso, sebete, khauho, molemo, botšepehi, bonolo le boitšoaro.—Ba-Galata 5:22, 23.
13. Johanne o ngotse eng ho 1 Johanne 4:1-6, ’me na e amana le ho sebelisa ha rōna lefatše?
13 Ho khahlisang, moapostola Johanne ea hōlileng o bontšitse hore ‘lipolelo tsa ’nete tse bululetsoeng’ ke Molimo li tlile ka phutheho ea ’nete ea Bokreste e seng ka mehlolo ea lefatše eo e seng ea Bokreste. Eaba o re: “Ea tsebang Molimo oa re utloa; eo e seng oa Molimo ha a re utloe.” Ke ’nete hore taba ea Johanne e ne e le ‘polelo e bululetsoeng.’ Empa a hlakisa hore Bakreste ha ba ‘bolele tsa lefatše.’ (1 Johanne 4:1-6) E be joale ke hobane’ng ha re ka sebelisa lefatše ka botlalo?
‘Ho Ipoloka Lefatšeng re se na le Lethebanyana’
14. Bakreste ba tlotsitsoeng le metsoalle e ineetseng ea bona ba totobala joang e se ‘karolo ea lefatše’?
14 Mosebetsi le liketso tse ling li tlama Lipaki tsa Jehova hore li ‘sebetsane le lefatše’ ka litsela tse itseng. Empa re se ke ‘ra tšoareha haholo ho Iona’ ka lebaka le leng hape. (JB) Jesu o itse balateli ba hae hase ‘karolo ea lefatše.’ (Johanne 17:14) Jehova o lokiselitse pholoho ka Kreste lefatšeng lena le tlas’a taolo ea Satane. (Ba-Kolosse 1:13, 14) Ka ho mamela ’nete e senotsoeng ea Lentsoe la Jehova, Bakreste ba tlotsitsoeng ba halalelitsoe, ba khetheloa ho sebelisoa tšebeletsong ea Molimo. Kahoo bona, hammoho le metsoalle ea bona e ineetseng ea “bongata bo boholo” ba qoolleha ‘e se karolo ea lefatše’ le sa tšoarellang ’neteng ea Jehova. (Tšenolo 7:9; Johanne 17:16, 17; Jakobo 1:18; 1 Petrose 1:22) Ekaba ho sa lokelang hakaakang hore batho ba joalo ba sebelise lefatše ka botlalo!
15. Ho ea ka Jakobo 1:27, borapeli bo hloekileng bo seng litšila bo hloka eng?
15 Ho ‘se be karolo ea lefatše’ ho hloka ho se nke lehlakore litsekisanong le lipolotiking tsa lefatše. (Mattheu 22:21; Johanne 18:36, 37) Balateli ba tlotsitsoeng ba Kreste le metsoalle ea bona e ineetseng ba tlameha ho qoba le bofebe ba moea ka botsoalle le lefatše. Ba lokela ho hloeka boitšoarong le moeeng. (Ba-Efese 4:25-32; Jakobo 4:4) Ho rapela Jehova ka mokhoa o hloekileng le o seng litšila, re tlameha ho ‘ipoloka re se na le lethebanyana lefatšeng’ ka ho se nke maikutlo, lipuo le boitšoaro tse tloaelehileng har’a batho ba baetsalibe ba ikarotseng ho Molimo. (Jakobo 1:27) Re tlameha ho lokoloha litšileng tsa lefatše, pefong, mererong e sa lokang, le tse joalo. E, bohlokoa ba ‘ho ipoloka re se na le lethebanyana lefatšeng’ ke lebaka le leng la bohlokoa la ho se ‘sebelise lefatše ho fumana ho Iona sohle seo re ka se khonang.’—Beck.
Ho Lula ‘re Halalela ho Molimo oa Rōna’
16. Ke hobane’ng ha Baiseraele ba ne ba tlameha ho iketsetsa “litjellane mephethong ea liaparo” tsa bona tsa kaholimo?
16 Batho ba Jehova ba fapane le lefatše mabapi le tšepo, litakatso, le ho lumellana le thato ea Molimo o halalelang oa bona. (Exoda 39:30) Ba lokela ho ipaka ba halalela ho Molimo. Kahoo, batho ba Iseraele oa boholo-holo ba ne ba lokela ho etsa “litjellane mephethong ea liaparo tsa bona,” ka leqhoele le leputsoa ka holim’a litjellane. Ba ne ba etsa hona hore ba se ke ba tšoana le Bamoabe, Baegepeta kapa ba bang le ho hopotsoa hore ba khethehe joaloka batho ba Jehova le hore ba lokela ho mamela eena ba ipake ba ‘halalela ho Molimo oa bona.’ (Numere 15:37-41) Takatso ea ho ‘halalela ho Molimo oa bona’ e lokela ho re susumelletsa ho ba seli ho sebeliseng lefatše.
17. Sepheo sa lefatše sa ho fumana leruo se ka ’na sa bea kamano ea rōna le Jehova kotsing joang?
17 Lipheo tsa lefatše li akarelletsa leruo, botumo le liketso tse sa haheng moeeng tse ka ’nang tsa senya tumelo ea Mokreste. Ka mohlala, ho phehelloa ha lintho tsa nama le letlotlo, haeba ho lumelloa ho nka sebaka sa pele bophelong ba rōna, ho ka ba ha re eka hore re etse liphoso molemong oa boithati, kahoo re bea kamano ea rōna le Jehova kotsing. (Liproverbia 28:20; bapisa Jeremia 5:26-28; 17:9-11.) Ka sebele, batho ba sebelisang lefatše ho isa moo ba fetolang ho phehella lintho tse bonahalang ntho e khōlō ba kotsing ea ho ameha mekhoeng ea bolotsana le ho felloa ke tumelo ea bona ka lebaka la ho hlokomoloha litaba tsa moea. Motho e mong ea atlehang khoebong kapa ea ruang a ka ’na a keneloa ke ‘boikhohomoso,’ ka makōkō a nka hore maikutlo a hae a phahametse keletso ea phutheho ea Molimo. (1 Timothea 6:9, 10, 17) Ena ruri hase tsela ea ho lula re ‘halalela ho Molimo oa rōna.’
18. Ke hobane’ng ha re sa lokela ho ba le sepheo sa lefatše sa ho fumana lintho tse bonahalang ka bongata?
18 Ka nepo Jesu a re: “Iketsetseng metsoalle ka matlotlo a sa lokang; hore, etlere mohla a hlokahalang, ba [Ntate oa lōna oa leholimo, Jehova Molimo le Jesu Kreste] le amohele meahong e sa feleng.” (Luka 16:9) Ka hona, leha re hloka lintho tse ling tse bonahalang ’me re ka sebelisa lintho tse joalo ho ntšetsa pele lithahasello tsa ’Muso le ho iketsetsa Metsoalle ea leholimo, lipheo tsa lefatše tsa ho fumana lintho ka bongata li se ke tsa lumelloa ho silafatsa lipelo tsa rōna.—Luka 12:34.
19. Re lokela ho talima sepheo sa lefatše sa ho finyella hlompho joang?
19 Sepheo se seng sa lefatše ke sa ho iphumanela boemo, botumo kapa hlompho. Hangata hona ho hloka lilemo tsa thuto e telele, ho ba ea phahameng motseng le tse joalo. Empa batho ba batlang ho hlomphuoa Mangolo a ba tšoantša le ba jang mahe a linotši haholo, ho ka ba nyokholosang. Ke ka hoo re balang: “Ho khora linotši tse ngata hampe ha ho monate; ho joalo ba ipatlelang hlompho, ba imeloa ke eona.” (Liproverbia 25:16, 27) Ka ho tšoanang, ho rapela bahale ba lefatše le linaleli ha ho lumelloe ke mangolo, ena ke ntho eo batsoali ba Bakreste ka linako tse ling ba ka e fumanang e hlokahala hore ba e bontše bana ba bona ka mosa. (Bapisa Liketso 12:21-23.) Ka sebele, ho ba le pono e loketseng ka litaba tse tjena hoa hlokahala haeba re lakatsa ho lula re ‘halalela ho Molimo oa rōna’ le ho qoba ho sebelisa lefatše ka botlalo.
Se ‘k’a Sebelisa Lefatše ka Botlalo’
20, 21. Ke hobane’ng ha re sa lokela ho sebelisa lefatše ka botlalo?
20 Ka hona, he, re le lipaki tse tšepahalang tsa Jehova, ha rea lokela ho sebelisa lefatše ka botlalo. Re ‘se ke ra tšoareha haholo ho Iona’ hobane (1) ‘nako e saletseng e khutšoanyane’; (2) “lefatše kamoo re le tsebang lea feta”; (3) re lokela ho thea bophelo ba rōna kamanong ea rōna ea bohlokoa le Jehova; (4) re lokela ho bonahatsa moea oa Molimo, e seng oa lefatše; (5) ho hlokahala re “hloke le lethebanyana lefatšeng”; ’me (6) re tlameha ho lula re ‘halalela ho Molimo oa rōna.’
21 Re ka etsa hona hohle feela ka thuso ea Jehova. (Bapisa Zakaria 4:6.) Kaha re na le tšepo e babatsehang ea ’Muso, ha rea lokela ho batla ho sebelisa lefatše ka botlalo, joalokaha eka seo le fanang ka sona ke sohle seo re nang le sona. Empa ke eng e ka hlang ea re thusa ho hana litsela le litakatso tsa lefatše?
Na u sa hopola?
◻ Ke “lefatše” lefe le boleloang ho 1 Ba-Korinthe 7:31?
◻ Kaha ‘mokhoa oa lefatše lena oa fela,’ Bakreste ba lokela ho talima tšebeliso ea lefatše joang?
◻ Bakreste ba ka sebelisa lefatše ka nepo ho fella kae?
◻ “Moea oa lefatše” ke eng, empa barati ba Jehova ba bonahatsa moea ofe?
◻ Batho ba Jehova ba fapana joang le lefatše mabapi le lipheo?
[Setšoantšo se leqepheng la 18]
Mohoebi a rekisa sohle ho reka ‘perela e le ’ngoe ea bohlokoa’
[Setšoantšo se leqepheng la 20]
Litjellane liaparong tsa bona li ne li hopotsa Baiserele hore ba lokela ho ipaka ba halalela ho Jehova. Takatso ea ho ‘halalela ho Molimo oa rōna’ e lokela ho re etsa ba seli ho sebeliseng lefatše