Babolai Baa Ahloloa
HA Kinshasa e utloela ka lipeho tsa lipolao tse sehlōhō, matona a ’muso a nka mehato ea ho tiisa hore ho etsoa toka. Baholo ba ’muso ba lebohuoa haholo ka sena.
Literaka le masole a romeloa sebakeng seo. Babolai ba lika-liketsoa ’me ba tlisoa pel’a lekhotla le leholo la Kindu, Kivu.
Ho ahlola taba ea babolai bana ho ne ho se bonolo, hobane baahloli ba ’nile ba talimana le litšoso le likhatello tsa ho senngoa ha toka. Ba ne ba neoa tjotjo hore ba sothe toka. Ha ho etsoa kahlolo, ba ile ba amohela le lengolo leo ho sa tsejoeng mongoli oa Iona le bolelang hore Kimbilikiti o tla iphetetsa ho bona.
Taba e khahlisang ke hore, esita leha baqosuoa ba le pel’a lekhotla ba ile ba tsitlella ho bolela hore Kimbilikiti ke moea le hore moea ona o ba susumelletsa ho nka bohato. Ha nyeoe e ntse e mametsoe, Moahloli Tumba ka bohlale a lokisetsa hore liphala tsa Kimbilikiti li letsoe ka tsela eo molumo oa tsona o tlang ho utluoa feela ke ba leng ka tlung ea lekhotla. Moahloli Tumba o ne a lekanya hore haeba Kimbilikiti ke moea, lerata la molumo oa liphala le ke ke la ama batho ba Rega ba neng ba le ka tlung ea lekhotla. Phello? Ha melumo ena ea mohlolo e utloahala, mofere-fere oa e-ba teng tlung ea lekhotla. Basali ba baleha ke ho tšoha, ba tšaba hore ho ka etsahala hore ba bone Kimbilikiti ’me ba bolaoe. Banna ba jeoa ke lihlong ’me ba tsoa ka tlung ea lekhotla, ba siea baqosuoa feela, le ba sebetsang khotla, le babohi ba bang bao e seng ba morabe oa Rega. Ka baka leo Kimbilikiti a pepesoa hape e le leqheka la tumelakhoela le neng le bolokile batho ba Rega botlamuoeng.
Lekhotla la Kindu la ahlolela ba tšeletseng ba neng ba ikarabella ka ho toba ka lipolao lefu. Bongata bo bong ba ahloleloa chankaneng le ho lefisoa chelete. Ho feta moo, ha laeloa hore ba lefe chelete e itseng bakeng sa bahlolohali ba shoetsoeng. (Boipiletso bakeng sa likahlolo ba etsetsoa lekhotleng le phahameng Bukavu, Kivu.)
Bohato bo ikarabellang ba baholo ba ’muso bo re hopotsa mantsoe a moapostola Pauluse: “Hobane ba busang ha ba tšabehe ho ba etsang hantle, empa ba tšabeha ho ba etsang hampe. . . . [Morena] ke mohlanka oa Molimo, . . . le mophetetsi ea romiloeng ho otla ea etsang bobe.” (Ba-Roma 13:1-4) Ka baka leo Lipaki tsa Jehova li ntse li tsoela pele ho etsa “liqelo, ho rapela, le lithapello, le liteboho, [ho] bohle ba baholong, hore re tle re iphelele khotsong le boiketlong ka borapeli bohle le ka bokhabane.” Pauluse a eketsa: “Hobane hoo ke ho molemo, ho khahlehang ho Molimo, ’Moloki oa rōna, o ratang hoba batho bohle ba bolokehe, ’me ba fihle tsebong ea ’nete.”—1 Timothea 2:1-4.
Ka baka la liketsahalo tse etsahetseng Pangi, re kholisehile hore batho ba bangata ba pelo li tšepahalang ba Rega ba tla ‘fihla tsebong ea ’nete’ ’me kahoo ba lokolloe botlamuoeng ba thetso ea tumelakhoela. Lipaki tsa Jehova li tla ’ne li tsoele pele ho batla batho bana hammoho le batho ba bang ba pelo li tšepahalang lefatšeng lohle. Ka sebele re thabela ho sebelisa tumelo le ho abelana le barati bohle ba toka ’nete ea ’Muso, esita le ho fihla likarolong tse hōle haholo tsa Afrika.