Lithuto Tse Tsoang Mangolong: Joele 1:1-3:21

Bitsa Lebitso la Jehova ’me u Bolokehe!

“HAEBA seoa sena se ke ke sa laoloa, se tla nama ho ea Afrika Bochabela “le Bochabela bo Haufi. E ka ba koluoa.” Ke kamoo ho boletseng mosebeletsi e moholo oa Mokhatlo oa Lijo le Temo oa Machaba a Kopaneng mabapi le likokoanyana tse meharo tse hlasetseng Afrika leboea bophirimela ka libillione hona joale—tsie.

Hoo e ka bang ka selemo sa 820 B.C.E., moprofeta oa Molimo Joele o ile a bua ka seoa se tšoanang. Ka mantsoe a hlakileng a nepahetseng ka ho phethahetseng le a bontšang ntho ea ’nete, o ile a hlalosa kamoo sechaba sa Juda se neng se tla hlaseloa ke koluoa ea likokoanyana. Leha ho le joalo, seoa seo e ne e le tšoantšetso ea ntho e ’ngoe ea bohlokoa haholoanyane ho feta tšokelo ea tikoloho. E ne e le mohoo oa “letsatsi la Jehova”! Moloko oa rōna o talimane le ‘letsatsi leo le tšabehang haholo-holo’ le bohale bohle ba lona bo tšabehang. Ho na le tšepo efe ea hore poloko e tla ba teng? Hona ke eng eo re ka ithutang eona bukeng ea boprofeta ea Joele?

Tlhaselo a Sisimosang ea Likokoanyana

Pako ea hlokahala bakeng sa ho bolokeha nakong ea letsatsi le tšabehang haholo-holo la Jehova. Ka mahlo a Joele, re bona koluoa ha naha e hlobolisoa limela ke lihlopha-hlopha tsa bookholane, litsie, marutle, le seongoane. Baprista, maqheku, le baahi ba bang ba Juda ba phehelloa hore ba bake ba “hooeletse ho Jehova” hore a ba thuse. Matlo a polokelo a entsoe lesupi, ’me meliko e qhaqhiloe ha e fetoha e hlokang lijo. Liphoofolo tsa hae li lelera ke pherekano e li tšoereng, li batla lekhulo empa li sa le fumane. Ke letsatsi le lekaakang la tšenyo le tsoang ho Ea Matla ’Ohle!—1:1-20.

Ho atamela ha letsatsi la Jehova ho lokela ho re susumelletsa ho kopanela liketsong tse halalelang le mesebetsing ea bomolimo. (2 Petrose 3:10-12) Joele o re nolofaletsa ho le bona e le letsatsi la lefifi, maru, le lefifi le letšo. Litsie ke selelekela se tšosang sa letsatsi leo. Moo li fetileng teng, naha ea Juda e neng e ka Edene e fetoha lefeella le se nang letho. Ho sisimosang hape, ke molumo oa litsie, hobane li luma joaloka koloi ea ntoa le joaloka mollo o bohale o jang matlakala. Ha litsie li tsoela pele “joalo ka sechaba se matla se itokiselitseng ntoa,” li hloa marako, li phallela metseng, ’me li kena ka matlung. Haesita le letsatsi, khoeli, le linaleli lia fifala nakong ea ‘letsatsi le tšabehang haholo-holo la Jehova.’—2:1-11.

Tsela ea Poloko

Bakeng sa poloko, re lokela ho lumela hore ‘Jehova ke Molimo ’me ha ho o mong.’ Jehova oa eletsa: “Khutlelang ho ’na ka pelo tsohle tsa lona.” Ba baholo le bacha ba phehelloa ho phuthehela phuthehong e mahlonoko ho ikōpela mohau oa bomolimo. Molimo o tla bontša qenehelo, o etse matšeliso bakeng sa tšenyo ea likokoanyana, ’me o hlohonolofatse batho ba oona ka nala. Ba amohelang boemo ba Jehova e le eena Molimo feela oa ’nete le Mohloli oa poloko ba ke ke ba hlajoa ke lihlong.—2:12-27.

Poloko ea rōna e itšetlehile hape ka ho bitsa lebitso la Jehova ka tumelo. Pele ho ‘letsatsi le leholo le le tšabehang haholo-holo la Jehova,’ Molimo o tla ‘tšollela moea oa oona holim’a nama ea mefuta eohle.’ Ba baholo le bacha, banna le basali, ba tla etsa mosebetsi oa ho profeta. Ka hona, ba bangata ba tla ithuta hore ‘e mong le e mong ea bitsang lebitso la Jehova o tla bolokeha.’—2:28-32.

Kahlolo Holim’a Lichaba

Jehova o tla boloka batho ba hae ba tšepahalang ha a liha kahlolo holim’a lichaba. (Bapisa Ezekiele 38:18-23; Tšenolo 16:14-16.) Tire, Sidone, le Filistia li tlameha ho lefa bakeng sa ho tšoara batho ba Molimo hampe le ho ba rekisa bokhobeng. Jehova o tla khutlisa ba hapiloeng ba Juda le Jerusalema, ’me o qholotsa lira tsa hae, o re: “Itlhatsoeng ntoa!” Empa hase letho ha ba bapisoa le Molimo, o ba lihelang kahlolo “khohlong ea Josafate” ea tšoantšetso. Le hoja leholimo le lefatše li tla sisinyeha, Jehova e tla ba setšabelo bakeng sa batho ba hae. Ba tšepahalang ba tla pholoha kahlolo e tla oela lichaba ’me ba tla thabela bophelo tlas’a maemo a paradeise.—3:1-21.

Lithuto tse ka hopoloang: Pako e hlokahala esale pele haeba motho a tla bolokoa nakong ea letsatsi le tšabehang haholo-holo la Jehova. Ho atamela ha letsatsi leo ho lokela ho re susumelletsa ho kopanela liketsong tse halalelang le mesebetsing ea bomolimo. Ha e le hantle, poloko ea rōna e itšetlehile ka ho lumela hore Jehova ke eena Molimo a inotši, ’me haeba re bitsa lebitso la hae ka tumelo, o tla re boloka ha a lihela lichaba kahlolo.

Boprofeta ba Joele bo re fa ntho e ’ngoe ea bohlokoa e eketsehileng eo re ka nahanang ka eona. E, ‘letsatsi le leholo le le tšabehang haholo-holo la Jehova’ le haufi bo tšosang! Batho ba lokela ho lemosoa. Joaloka litsie tsa boprofeta ba Joele, Lipaki tsa Jehova Ii senya Bokreste-’mōtoana ka ho qophella ho pepesa ho nyopa ha bona moeeng. Hona ho tsosa khalefo le khanyetso ea baeta-pele ba bona, empa litšitiso leha e le life tse kang lerako tseo bo lekang ho li bea tseleng ea litsie tsa tšoantšetso li ipaka li sa sebetse. Jehova o tšolletse moea oa hae holim’a batho ba hae, a ba hlomella hore ba phatlalatse likahlolo tsa hae. Ka baka leo, nakong e khutšoanyane e saletseng pele ho letsatsi le tšabehang haholo-holo la Molimo, a re beng le kabelo e feletseng ho thuseng ba bang ho ‘bitsa lebitso la Jehova e le hore ba ka bolokeha.’

[Lebokose le leqepheng la 30]

LITEMANA TSA BIBELE LIA HLAHLOBJOA

○ 1:2—Joele o ile a buisana le “maqheku” a neng a ile a khelosa sechaba. Kaha “baahi ba lefatše” ba ne ba ile ba latela ketello-pele eo ea bohata, le bona ba ne ba ikarabella mahlong a Jehova. Kajeno, baeta-pele ba bolumeli ba Bokreste-’mōtoana ka ho tšoanang ba khelositse mehlape ea bona. Ho tšoana le Joele, Lipaki tsa Jehova li ’nile tsa tobisa melaetsa ho sehlopha seo sa baruti. Leha ho le joalo, batho ka kakaretso ba lokela hore ba bolelloe Lentsoe la Molimo hobane le bona ba tla ikarabella ho Jehova.—Esaia 9:15-17; Ba-Roma 14:12.

○ 2:1-10, 28—Baiseraele ba ile ba lemosoa hore haeba ba ka hlompholla Molimo, litsie le libōpuoa tse ling li ne li tla ja lijalo tsa bona. (Deuteronoma 28:38-45) Kaha Mangolo ha a tlalehe hore Kanana ho ile ha e-ba le tlhaselo ea likokoanyana ea boholo bo boletsoeng ke Joele, ho hlakile hore seoa seo a se hlalositseng e ne e le sa tšoantšetso. Ka ho totobetseng, boprofeta bo ile ba qala ho phethahatsoa ka Pentekonta ea 33 C.E., ha Jehova a qala ho ‘tšollela moea oa hae’ holima balateli ba Jesu, ba ileng ba hlokofatsa balumeli ba bohata ka molaetsa oa bona oo ba o neiloeng ke Molimo. (Liketso 2:1, 14-21; 5:27-29) Lipaki tsa Jehova joale li etsa mosebetsi o tšoanang oa ho ripitla.

○ 2:12, 13—Mehleng ea boholo-holo, ha motho a hahola liaparo e ne e le pontšo e bonoang ea masoabi. (Genese 37:29, 30; 44:13) Empa hona ho ne ho ka etsoa ka mokhoa o sa tieang, ka boikaketsi. Joele o ile a hlakisa hore lipontšo tsa masoabi tse joalo tse bonoang li ne li sa lekana. Ho ne ho hlokahala hore batho ba ‘hahole lipelo tsa bona’ ka ho bontša pako e tlohang pelong.

○ 2:31, 32—Jehova o ile a fana ka monyetla oa paleho timetsong bakeng sa ba tšepahalang mehleng ea Joele. Hona joale, ‘mehleng ea qetello,’ Molimo o nolofatsa hore poloko e fumanehe ka Jesu Kreste. (2 Timothea 3:1; Ba-Roma 5:8, 12; 6:23) Leha ho le joalo, ke lebitso la Jehova leo batho ba baetsalibe ba lokelang ho le bitsa bakeng sa poloko ea ka ho sa feleng. Hona ho bolela ho tseba lebitso la Molimo, ho le hlompha ka botlalo, le ho itšetleha ka ho feletseng ka Ea bitsoang ka lebitso leo. Ba bitsang lebitso la Jehova ka tsela eo ka tumelo ‘ba tla bolokeha’ ha Molimo o liha kahlolo ea oona holim’a lichaba nakong ea ‘letsatsi le leholo le le tšabehang haholo-holo.’—Sofonia 2:2, 3; 3:12; Ba-Roma 10:11-13.

○ 3:2, 14—Sebaka sa tšoantšetso sa ho liha kahlolo ea bomolimo mohla “letsatsi la Jehova” se bitsoa ‘khohlo ea kahlolo.’ Hape se bitsoa ‘khohlo ea Josafate.’ Hona ke ho loketseng, kaha lebitso Josafate le bolela “Jehova Ke Moahloli:” Nakong ea puso ea Morena Josafate, Molimo o ile oa lopolla Juda le Jerusalema mabothong a Moabe, Ammone, le libaka tsa lithaba tsa Seire, o etsa hore a ferekane ’me a bolaeane. (2 Likronike 20:1-30) Mehleng ea rōna, ‘khohlo ea Josafate’ e sebeletsa e le sehatelo sa veine sa tšoantšetso seo ho sona lichaba li thumakanngoang joaloka merara ka lebaka la ho tšoara batho ba Jehova hampe.

○ 3:6—Tire, Sidone, le Filistia li ne li le molato oa ho rekisa batho ba Juda le Jerusalema bokhobeng ho Bagerike. Ho ka ’na ha etsahala hore e be Bajode ba bang ba neng ba hapiloe ke lichaba tse ling ba ile ba oela matsohong a bahoebi ba makhoba ba Tire, Sidone le Filistia. Ho hobe ka ho fetisisa, mohlomong lichaba tsena li ile tsa etsa makhoba ka Bajode ba neng ba batlile setšabelo lireng tsa bona. Ho sa tsotellehe hore na boemo e ne e le bofe, Molimo o ile oa etsa hore bao ba neng ba hoeba ka bophelo ba batho ba ikarabelle bakeng sa ho tšoara batho ba oona hampe. Hona ho bontša se letetseng lichaba tse hlorisang bahlanka ba Jehova kajeno.

[Tlhaloso ea Moo Setšoantšo se Nkiloeng Teng e leqepheng la 31]

Polokelo ea Litsǒantšo (Near Eastern History) Est.