“U Tla ba le ’Na Paradeiseng”

HA SE ne se leketlile thupeng ea polao, se e-shoa ke bohloko bo boholo, senokoane se ile sa kōpa monna ea pel’a sona ka phehello: “Jesu, u nkhopole ha u fihla ’musong oa hao.” Jesu, esita le hoja le eena a ne a e-shoa ke bohloko bo fetelletseng, o ile a arabela: “Kannete ke re ho uena kajeno, U tla ba le ’na Paradeiseng.” (Luka 23:42, 43, NW) Eo ke tšepo e khothatsang hakaakang e ka fuoang motho ea shoang!

Leha ho le joalo, na u hlokometse, hore New World Translation—phetolelo e qotsitsoeng serapeng se fetileng—e beha letšoao ka mor’a lentsoe “kajeno” ha e fetolela mantsoe ana a Jesu? Sena se fetisa khopolo ea hore esita le letsatsing la ho shoa ha hae, Jesu o ne a khona ho tšepisa senokoane seo bophelo Paradeiseng. Ka lehlakoreng le leng, The New English Bible e ngola letšoao mantsoeng a Jesu ka tsela ena: “Ke u bolella sena: kajeno u tla ba le ’na Paradeiseng.” Liphetolelo tse ling tse ngata li lumellana le The New English Bible, e fetisang khopolo ea hore Jesu le senokoane se shoang ba ne ba ea Paradeiseng letsatsing lona leo. Ke hobane’ng ha ho e-na le phapang? ’Me ke letšoao lefe le nepahetseng?

Ha e le hantle, ho ne ho se na matšoao libukeng tsa pele-pele tsa Segerike tse ngotsoeng ka letsoho. Kahoo, ha mokhoa oa ho ngola matšoao o hlaha, bakopitsi ba Bibele le bafetoleli ba ile ba lokela ho a kenya ho latela kutloisiso ea bona ea ’nete ea Bibele. Joale, na phetolelo ea neano e nepahetse? Na Jesu Kreste le sesenyi ba ile Paradeiseng ka lona letsatsi leo ba shoeleng ka lona?

Che, ho latela Bibele, ba ile sebakeng seo ka Segerike se bitsoang Haʹdes ’me ka Seheberu se bitsoa Sheʹol, tseo ka bobeli li lebisitseng lebitleng le tloaelehileng la batho. (Luka 18:31-33; 24:46; Liketso 2:31) Mabapi le ba leng sebakeng seo, Bibele e re: “Ha e le bafu, ha ba tsebe letho ho hang . . . Ha ho na mosebetsi leha e le ho rera leha e le tsebo leha e le bohlale Sheʹol [Haʹdes, ka Segerike], e leng sebaka seo u eang ho sona.” Ho hang hase paradeise!—Moeklesia 9:5, 10, NW.

Jesu ha aa ka a tsosoa Hades pele ho letsatsi la boraro. Joale, nakong ea libeke tse ka bang tse tšeletseng o ile a iponahatsa ka makhetlo a ’maloa ho balateli ba hae ho potoloha naha ea Palestina. Ho e ’ngoe ea liketsahalo tseo, Jesu o ile a bolella Maria: “Ha ke e-so ho nyolohele ho Ntate.” (Johanne 20:17) Kahoo, esita le ka nako eo o ne a e-s’o ho fihle sebakeng se ka bitsoang paradeise.—Tšenolo 2:7.

Lekholong la boraro la lilemo C.E.—ha ho kopanngoa ha thuto ea Bokreste le filosofi ea Segerike ho ne ho etsahala ka potlako—Origen o ile a qotsa mantsoe a Jesu ha a ne a re: “Kajeno u tla ba le ’na Paradeiseng ea Molimo.” Lekholong la bone la lilemo C.E., bangoli ba kereke ba ile ba hanyetsana ka ho behoa ha letšoao ka mor’a lentsoe “kajeno.” Sena se bontša hore mokhoa oa neano oa ho bala mantsoe a Jesu o na le histori e telele. Empa se boetse se bontša hore esita le lekholong la bone la lilemo C.E., ba bang ba ne ba bala mantsoe a Jesu ho latela kamoo a fetoletsoeng ka teng ho New World Translation.

Le kajeno, le hoja bafetoleli ba bangata ba beha letšoao ho Luka 23:43 ho latela neano ea kereke, ba bang ba le beha joaloka New World Translation. Ka mohlala, phetolelong ea Sejeremane ea Moprofesa Wilhelm Michaelis, mantsoe a Jesu a baleha tjena: “Kannete, ke o neha tiiso ena kajeno lena: U tla (ka tsatsi le leng) ba hammoho le ’na Paradeiseng.”

Joale, mantsoe a Jesu a ne a bolela eng ho sesenyi? Mohlomong se ile sa utloa ka litlaleho tsa hore Jesu ke Morena ea tšepisitsoeng. Ha ho pelaelo hore, se ne se tseba tlotla e reng “morena oa Bajode” eo Pilato a neng a e ngotse a ba a e fanyeha holim’a hlooho ea Jesu. (Luka 23:35-38) Le hoja baeta-pele ba bolumeli ba ile ba hana Jesu ka manganga, senokoane sena se bakileng se ile sa bontša tumelo ea sona, ha se re: “Jesu, u nkhopole ha u fihla ’musong oa hao.” Se ne se sa lebella ho busa le Jesu, empa se ne se batla ho fumana molemo pusong ea Jesu. Kahoo, Jesu, esita le letsatsing leo le thata ka ho fetisisa, o ile a tšepisa hore mofosi enoa o tla ba le eena Paradeiseng.

Paradeiseng efe? Ka Bibeleng, Paradeise ea mathomo e ne e le serapa sa Edene se kang tšimo e ntle eo e ileng ea lahlehela batsoali ba rōna ba pele. Bibele e tšepisa hore Paradeise eo ea lefatše e tla khutlisoa ka tlas’a ’Muso oa Molimo, oo Jesu e leng Morena oa ’ona. (Pesaleme ea 37:9-11; Mikea 4:3, 4) Kahoo, Jesu o tla ba le mofosi eo le ba bang ba se nang palo ba shoeleng ha a ba tsosa lebitleng a ba tsosetsa bophelong paradeiseng lefatšeng le ho fumana monyetla oa ho ithuta ho etsa thato ea Molimo le ho phela ka ho sa feleng.—Johanne 5:28,29; Tšenolo 20:11-13; 21:3, 4.