Motho ea Rutehileng
“JOALE, bana beso, hopolang hore na le ne le le joang mohla Molimo a le bitsang. Ho ea ka botho feela, ho ne ho se ba bangata ba lōna ba bohlale, ba matla kapa ba mali a borena.” (1 Ba-Korinthe 1:26, BPN) Joalokaha mantsoe ana a bontša, ho na le kotsi tabeng ea ho qoela bohlaleng ba lefatše kapa ho ba le boemo bo phahameng sechabeng. Lintho tse joalo e ka ba tšitiso hore motho a amohele litaba tse molemo.—Liproverbia 16:5; Mareka 10:25.
Leha ho le joalo, mehleng ea Pauluse ba bang ba neng ba le bohlale ka tsela ea nama ba ile ba amohela ’nete, ’me e mong oa bona ke Pauluse. A rutehile haholo ho bile ho bonahala hore o ne a tsoa lelapeng le hlahelletseng, Pauluse e ne e le ’moleli oa evangeli ea chesehang. Ka hona o ile a bontša hore batho ba lefatše lena ba hlahelletseng ba ka sebeletsa Jehova haeba pelo ea bona e lokile. Ba ka ba ba sebelisa bohlale ba bona tšebeletsong ea Jehova.—Luka 16:9.
Letsoalloa La Tarese
Pauluse o hlahetse Tarese, “motseng oa litletle,” joalokaha a ile a e hlalosa hamorao. (Liketso 21:39, NW) Mohlomong ke hona moo a ileng a fumana tsebo ea lipuo tse ngata—haholo-holo a tseba Segerike—e ileng ea ba le thuso e khōlō mosebetsing oa hae oa boromuoa. Bophelo Tarese bo ka be bo ile ba pepesetsa Pauluse litsela tsa Sejode haesita le mokhoa oa bophelo oa Balichaba, e leng phihlelo eo a ileng a e sebelisa lilemong tsa morao ha e le moapostola oa balichaba. O ne a tseba mokhoa oa ho fetisa ’nete ka tsela eo ba neng ba ka e utloisisa. (1 Ba-Korinthe 9:21) E le mohlala, nahana ka puo ea hae ho Baathene e tlalehiloeng ho Liketso khaolo 17. Moo, ka bohlale o ile a bua ka bolumeli ba batho ba Athene esita le ho qotsa ho tsoa ho e mong oa liroki tsa teng nehelanong ea hae ea ’nete.
Moahi oa Roma
Pauluse o ne a na le monyetla o mong oa lefatše. E ne e le moahi oa Roma, ’me o ile a sebelisa sena molemong oa ho ntšetsa pele litaba tse molemo. Ha eena le metsoalle ea hae ba le Filippi, ba ile ba otloa ’me ba kenngoa teronkong ho sa mameloa boipuello ba bona. Ho ne ho se molaong ho etsa sena ho moahi oa Roma, ’me ha Pauluse a hlahisa taba ena ho balaoli, ba ile ba mo lumella hore a lule ’me a sebeletse phutheho pele a ea sebakeng se seng.—Liketso 16:37-40.
Hamorao, ha Pauluse a le ka pel’a ’Musisi Festuse, o ile a sebelisa monyetla oa hore ke moahi oa Roma hore a ipiletse ho Cesare. Ka hona, o ile a emela litaba tse molemo ka pele ho bolaoli bo phahameng ba ’Muso oa Roma.—Liketso 25:11, 12; Ba-Filippi 1:7.
Pauluse o ne a fumane koetliso ka tsela e sebetsang eo hamorao e ileng ea ipaka e na le thuso e khōlō. O ile a rutoa ho etsa litente, mohlomong ke ntate oa hae. Ka lebaka la sena, o ne a khona ho itjara tšebeletsong ha a se na chelete. (Liketso 18:1-3) O boetse a amohela thuto e ngata ea bolumeli. O ile a hōlisoa joaloka “mofarisi, mora oa mofarisi.” (Liketso 23:6) Ka sebele, o ile a rutoa ke Gamaliele, eo e neng e le e mong oa matichere a atlehang a Bajode. (Liketso 22:3) Thuto e joalo, mohlomong ha e bapisoa le thuto ea univesithi kajeno, e bontša hore lelapa labo le ne le hlahelletse.
Pono e Loketseng
Tikoloho eo Pauluse a hōletseng ho eona e ile ea etsa hore a be le bokamoso bo khanyang tsamaisong ea Sejode. A ka be a ile a atleha haholo tsamaisong ea Sejode. Leha ho le joalo, hang ha a amohela hore Jesu ke Messia, lipakane tsa Pauluse li ile tsa fetoha. Ha a ngolla Ba-Filippi, o ile a thathamisa e meng ea menyetla eo a neng a na le eona lefatšeng ’me a re: “Empa tse neng li le moruo ho ’na, ke li entse tšenyehelo ka baka la Kreste. Ke fela ke lekanya hoba ntho tsohle ke tšenyehelo, ha li ka bapisoa le boholo ba ho tseba Jesu Kreste, Morena oa ka.”—Ba-Filippi 3:7, 8.
Motho enoa ea rutehileng haa ka a sheba morao ka tlholohelo ho seo a ka beng a ile a se etsa ka thuto ea hae ea lefatše; ’me haa ka a sebelisa “tsebo e phahameng” ho hatella ba bang. (Liketso 26:24, NW; 1 Ba-Korinthe 2:1-4) Ho e-na le hoo, e le ha a beha tumelo e felletseng ho Jehova Molimo, o ile a bua ka menyetla ea hae ea pele, a re: “Ke lebala tse ka morao, ’me ke hahamalla ho tse ka pele; ke titimela moo ho lekanntsoeng teng, e leng pheo eo re e biletsoang holimo ke Molimo, ka Jesu Kreste.” (Ba-Filippi 3:13, 14) Pauluse o ne a nka lintho tsa moea e le tsa bohlokoa.
Leha ho le joalo, Pauluse o ile a sebelisa koetliso eo tšebeletsong ea Jehova. Ha a ne a re ka Bajode, “ke paki ea bona, ea hore ba na le cheseho ho Molimo,” o ne a bua ho tsoa phihlelong ea botho. (Ba-Roma 10:2) Joaloka Mofarisi, ka sebele o ne a chesehela Molimo le Mangolo. Ka mor’a hore Pauluse a fetohe Mokreste, cheseho ea hae e ile ea kopana le tsebo e nepahetseng, ’me o ne a ka sebelisa tsebo ea hae ea pele bakeng sa sepheo se lokileng. Ka mohlala, bukeng ea Ba-Heberu, o sebelisitse tsebo e ngata ea histori ea Baiseraele le borapeli ba tempele ho bontša bophahamo ba tsamaiso ea Bokreste.
Kajeno, ba bang ba bohlale ka tsela ea nama ba boetse ba arabela litabeng tse molemo. Batho ba nang le mangolo a mefuta eohle a thuto, haesita le batho ba etsang mefuta eohle ea mosebetsi le mosebetsi ea matsoho, ba amohetse ’nete ’me ba sebelisitse koetliso ea bona ea nakong e fetileng tšebeletsong ea Jehova. Leha ho le joalo, ho sa tsotellehe mosebetsi oa bona oa boipheliso, le ka mohla Bakreste ha ba lebale ’nete ea hore litšoaneleho tsa bohlokoa ke tsa moea. Tsena ke “litaba tse fetisang ka molemo” hobane li re isa bophelong bo sa feleng.—Ba-Filippi 1:10.