Moea oa Molimo o Sebetsa Joang Kajeno?

O NE a holofetse ho tloha ha a sa le ka pōpelong. Kamehla o ne a lula hekeng ea tempele e bitsoang E Ntle e le hore a ka kōpa limpho tsa mohau ho ba kenang ka tempeleng. Leha ho le joalo, ka lekhetlo le leng, mokōpakōpa enoa ea holofetseng o ile a fumana mpho eo e neng e le ea bohlokoa ho feta chelete e leoana e seng kae. O ile a folisoa!—Liketso 3:2-8.

Le hoja moapostola Petrose le moapostola Johanne e ne e le bona ba neng ba ‘mo phahamisitse e le hore bohato ba maoto a hae bo tiee,’ ha baa ka ba lebisa tlotla ho bona bakeng sa pholiso eo. Hobane’ng? Petrose ka boeena o ile a hlalosa: “Banna ba Iseraele, ke hobane’ng ha le makatsoa ke see, kapa ke hobane’ng ha le re talimisisa joalokaha eka ke ka matla a botho kapa boinehelo ba bomolimo re entseng hore a tsamaee?” Ka sebele, Petrose le Johanne ka bobeli ba ile ba hlokomela hore e ne e se ka matla a bona, empa ke ka moea o halalelang oa Molimo ho neng ho ka etsoa ntho e joalo.—Liketso 3:7-16; 4:29-31.

Ka nako eo, ‘mesebetsi e joalo e matla’ e ne e etsoa ho bontša hore Molimo o tšehetsa phutheho ea Bokreste e sa tsoa thehoa. (Baheberu 2:4) Empa ka mor’a hore e phethe morero oa eona, moapostola Pauluse o ile a bolela hore e ne e tla “felisoa.”a (1 Bakorinthe 13:8) Kahoo, hona joale ka phuthehong ea Bokreste ba ’nete ha re bone lipholiso tseo Molimo a laetseng hore li etsoe, ha re utloe melaetsa ea boprofeta kapa ho lelekoa ha bademona.

Leha ho le joalo, na see se bolela hore moea o halalelang oa Molimo ha o sa sebetsa? Le hanyenyane! A re hlahlobeng litsela tse ling tseo ka tsona moea oa Molimo o neng o sebetsa lekholong la pele la lilemo le tseo o ntseng o sebetsa ka tsona mehleng ea rōna.

“Moea oa ’Nete”

Mosebetsi o mong oa moea o halalelang oa Molimo ke ho fana ka boitsebiso, ho hlahisa leseling, ho senola linnete. Pejana ho lefu la hae, Jesu o ile a bolella barutuoa ba hae: “Ke na le lintho tse ngata tseo ke sa ntseng ke tla li bua ho lōna, empa ha le khone ho li jara hona joale. Leha ho le joalo, ha eo a fihla, moea oa ’nete o tla le tataisetsa ’neteng eohle.”—Johanne 16:12, 13.

“Moea oa ’nete” o ile oa tšolloa ka Pentekonta ea 33 C.E. ha barutuoa ba ka bang 120 ba neng ba bokane ka kamoreng e ’ngoe e ka holimo Jerusalema ba ne ba kolobetsoa ka moea o halalelang. (Liketso 2:1-4) Moapostola Petrose o ne a le har’a ba tlileng moketeng oo oa selemo le selemo. A tletse moea o halalelang, Petrose o ile “a ema” ’me a qaqisa, kapa a hlakisa linnete tse itseng ka Jesu. Ka mohlala, o ile a pheta kamoo “Jesu Monazaretha” a ileng a “phahamisetsoa ka letsohong le letona la Molimo.” (Liketso 2:14, 22, 33) Moea oa Molimo o ile oa boela oa susumelletsa Petrose ho bolella bamameli ba hae ba Bajuda ka sebete hore: “Ntlo eohle ea Iseraele a e tsebe kannete-nete hore Molimo o mo entse ka bobeli Morena le Kreste, Jesu enoa eo le ileng la mo khokhothela thupeng.” (Liketso 2:36) Ka lebaka la molaetsa oa Petrose o bululetsoeng ka moea, batho ba ka bang likete tse tharo ba ile ba “amohela lentsoe la hae ka pelo eohle” ’me ba kolobetsoa. Ka tsela ena, moea oa Molimo o halalelang o ile oa thusa ho ba lebisa ’neteng.—Liketso 2:37-41.

Moea oa Molimo o halalelang o ile oa boela oa sebetsa joaloka mosuoe le mohopotsi. Jesu o itse: “Mothusi, moea o halalelang, oo Ntate a tla o romela ka lebitso la ka, eo o tla le ruta lintho tsohle ’me a le hopotse lintho tsohle tseo ke le boleletseng tsona.”—Johanne 14:26.

Moea o halalelang o ne o sebetsa e le mosuoe joang? Moea oa Molimo o ile oa hopotsa barutuoa lintho tseo ba neng ba ile ba li utloa ho Jesu empa ba ne ba sa li utloisisa ka ho feletseng. Ka mohlala, baapostola ba ne ba tseba hore nakong ea teko ea hae, Jesu o ile a bolella ’musisi oa Judea oa Moroma, Ponse Pilato, hore: “’Muso oa ka hase karolo ea lefatše lena.” Empa, nakong ea ha Jesu a nyolohela leholimong ka mor’a matsatsi a fetang 40, baapostola ba ne ba ntse ba e-na le pono e fosahetseng ea hore ’Muso o ne o tla hlongoa mona lefatšeng. (Johanne 18:36; Liketso 1:6) Ho bonahala hore baapostola ba ne ba sa khone ho utloisisa ka ho feletseng moelelo oa mantsoe a Jesu ho fihlela ka mor’a ho tšolloa ha moea oa Molimo o halalelang ka Pentekonta ea 33 C.E.

Moea oa Molimo o ne o boetse o sebetsa e le mohopotsi ha o ba hopotsa lithuto tse fapa-fapaneng tsa Jesu. Ka mohlala, boprofeta bo mabapi le lefu la Kreste le tsoho ea hae bo ile ba e-ba le moelelo o mocha ka thuso ea moea o halalelang. (Matheu 16:21; Johanne 12:16) Ho hopola ha baapostola lithuto tsa Jesu ho ile ha ba nolofalletsa ho ba le sebete sa ho emela boemo ba bona ka pel’a marena, bo-’maseterata le baeta-pele ba bolumeli.—Mareka 13:9-11; Liketso 4:5-20.

Ho ekelletsa moo, moea o halalelang oa Molimo o ile oa thusa ho tataisetsa Bakreste ba pele tšebeletsong ea masimo a behang. (Liketso 16:6-10) Moea oa Molimo o ile oa boela oa susumelletsa Bakreste ba pele ho kopanela ho ngoleng Lentsoe la Molimo, Bibele, molemong oa moloko oohle oa batho. (2 Timothea 3:16) Joale, ho hlakile hore moea o halalelang o ne o sebetsa ka litsela tse sa tšoaneng lekholong la pele la lilemo. O ne o sa fanoe feela ka morero oa ho etsa mehlolo.

Moea o Halalelang Mehleng ea Rōna

Ka ho tšoanang, moea o halalelang o ’nile oa sebetsa molemong oa Bakreste ba ’nete mehleng ea rōna. Sena se ile sa totobala sehlopheng se senyenyane sa liithuti tsa Bibele Allegheny, Pennsylvania, U.S.A., halofong ea ho qetela ea lekholo la bo19 la lilemo. Liithuti tsena tsa Bibele tse khothetseng li ne li lakatsa ho tseba “’nete.”—Johanne 8:32; 16:13.

Setho se seng sa sehlopha sena, Charles Taze Russell, se ile sa bua tjena mabapi le ho batla ’nete ea Mangolo: “Ke ile ka rapela . . . hore ke nolofalletsoe ho tlosa leeme leo e ka ’nang ea e-ba tšitiso pelong ea ka le kelellong ea ka le hore moea oa hae o halalelang o ke o ntataisetse kutloisisong e nepahetseng.” Molimo o ile a hlohonolofatsa thapelo ena e etsoang ka boikokobetso.

Ha Russell le basebetsi-’moho le eena ba ntse ba fuputsa Mangolo ka khothalo, lintho tse ngata li ile tsa hlaka. Russell o ile a hlalosa: “Re fumane hore ka lilemo tse makholo-kholo, lihlotšoana tsa bokhelohi tse sa tšoaneng le mekha li ne li arolelane lithuto tsa Bibele, tsa li tsoaka le likhopolo le liphoso tse itseng tsa batho.” Sena se ile sa fella ka seo a ileng a re ke “ho beha ’nete sebakeng se fosahetseng.” Ka sebele, linnete tsa Mangolo li ne li patiloe tlas’a qubu ea lithuto tsa bohetene tse neng li khukhunetse Bokreste-’mōtoana ka makholo a lilemo. Empa Russell o ne a ikemiselitse ho tseba ’nete le ho e phatlalatsa.

Ka Zion’s Watch Tower and Herald of Christ’s Presence, Russell le basebetsi-’moho le eena ba ile ba e-ba sebete ho nyatsa lithuto tsa bohata tsa bolumeli tse neng li senya Molimo lebitso. Ba ile ba lemoha hore—ho fapana le maikutlo a bolumeli a tloaelehileng—moea oa shoa, hore lefung re ea lebitleng, le hore Jehova ke eena feela Molimo oa ’nete, ka lebaka leo hase karolo ea Boraro-bo-bong.

Leha ho le joalo, joalokaha u ka inahanela, ho pepesoa ho joalo ha lithuto tsa bohata ho ile ha halefisa baruti ba Bokreste-’mōtoana. Ka lebaka la ho labalabela ho tsoela pele ba le boemong boo ho bona ba nang le tšusumetso, baruti ba bangata ba Mak’hatholike le ba Maprostanta ba ile ba hlophisa matšolo a reretsoeng ho nyelisa Russell. Empa eena le basebetsi-’moho le eena ha baa ka ba tela. Ka kholiseho ba ile ba itšetleha ka moea oa Molimo bakeng sa tataiso. Russell o ile a re: “Morena oa rōna o kholisehile hore . . . moea o halalelang oa Ntate, o rometsoeng ka lebitso le ka kōpo e tiileng tsa Jesu eo e leng Molopolli, ’Muelli le Hlooho ea rōna, e tla ba morupeli oa rōna.” ’Me o ile oa fela oa rupela! Liithuti tsena tsa Bibele tse tšepahalang li ile tsa tsoela pele ho noa metsi a sa tsoakoang a ’nete a tsoang Bibeleng le ho a phatlalatsa lefatšeng ka bophara.—Tšenolo 22:17.

Hona joale, ka nako e fetang lilemo tse lekholo, mokhatlo oa kajeno oa Lipaki tsa Jehova o lutse o arabela ka potlako tataisong ea moea o halalelang oa Molimo. Ha moea oa Jehova o ntse o fahlolla Lipaki moeeng mohato ka mohato, li ikemiselitse ho etsa liphetoho tse hlokahalang hore li iphaphathe le kutloisiso e nakong.—Liproverbia 4:18.

“Le Tla ba Lipaki Tsa Ka”

Jesu o ile a khetholla ponahatso e ’ngoe ea moea o halalelang oa Molimo ha a ne a re ho barutuoa ba hae: “Le tla fuoa matla mohla Moea o Halalelang o tlang ho lōna, ’me le tla ba lipaki tsa ka . . . ho isa karolong e hōle-hōle ea lefatše.” (Liketso 1:8) Tšepiso ea Jesu ea ho fa barutuoa ba hae “matla” le “moea o halalelang” e le hore ba ka etsa mosebetsi oo Molimo a ba abetseng oona e ntse e sebetsa le kajeno.

E le sehlopha, Lipaki tsa Jehova li tsebahala haholo ka mosebetsi oa tsona oa ho bolela. (Bona lebokose.) Ka sebele, Lipaki tsa Jehova li bolela molaetsa oa ’nete linaheng le lihlopheng tsa lihlekehleke tse fetang 230. Tlas’a maemo ’ohle ao ho ka nahanoang ka ’ona, ho akarelletsa le a behang bophelo ba tsona kotsing libakeng tse tsekolotsoeng ke ntoa, ka sebete li phahamisa mantsoe a tsona li tšehetsa ’Muso oa Molimo. Cheseho ea tsona bakeng sa tšebeletso ea Bokreste e fana ka bopaki bo matla ba hore moea o halalelang oa sebetsa kajeno. ’Me ho totobetse hore Jehova Molimo o hlohonolofatsa boiteko ba tsona.

Ka mohlala, selemong se fetileng ho sebelisitsoe lihora tse fetang hōle limilione tse sekete boboleling ba litaba tse molemo tsa ’Muso oa Molimo. Liphello e bile life? Batho ba ka bang 323 439 ba ile ba tšoantšetsa boinehelo ba bona ho Molimo ka ho kolobetsoa metsing. Ho ekelletsa moo, ba sa tsoa thahasella ba ile ba khanneloa lithuto tse 4 433 884 beke le beke. Ka kakaretso ho tsamaisitsoe libuka tse 24 607 741, limakasine tse 631 162 309 le libukana tse 63 495 728. Ke bopaki bo matla hakaakang ba hore moea oa Molimo oa sebetsa!

Moea oa Molimo le Uena

Ha motho a arabela hamolemo litabeng tse molemo, a etsa hore bophelo ba hae bo lumellane le litekanyetso tsa Molimo, ’me a bontša tumelo tokisetsong ea thekollo, o bulehetsoe ke monyetla oa ho ba boemong bo hloekileng ho Molimo. Ho ba joalo moapostola Pauluse o itse: ‘Molimo o kenya moea o halalelang oa hae ho lōna.’—1 Bathesalonika 4:7, 8; 1 Bakorinthe 6:9-11.

Ho ba le moea oa Molimo ho fella ka litlhohonolofatso tse ngata tse molemo. Litlhohonolofatso tsa mofuta ofe? Ea pele, Lentsoe la Molimo le bululetsoeng le re: “Litholoana tsa moea ke lerato, thabo, khotso, tiisetso, mosa, molemo, tumelo, bonolo, [le] boitšoaro.” (Bagalata 5:22, 23) Ka lebaka leo, moea o halalelang oa Molimo ke matla a maholo a khothalletsang se molemo, a nolofalletsang motho ho bontša litšoaneleho tsa bomolimo.

Ho ekelletsa moo, haeba u bala Bibele ’me u sebelisa seo u ithutang sona, moea oa Molimo o ka u thusa ho hōla bohlaleng, tsebong, temohisisong, maikutlong le matleng a ho nahana. Morena Solomone o ile a fumana ‘bohlale le kutloisiso e khōlō haholo, le kelello e ngata’ hobane a ne a batla ho khahlisa Molimo ho e-na le batho. (1 Marena 4:29) Kaha Jehova o ile a fa Solomone moea o halalelang, ka sebele a ke ke a o tima ba ratang ho mo khahlisa kajeno.

Moea o halalelang oa Molimo o boetse o thusa Bakreste ho loantša Satane le bademona, tsamaiso ena e khopo ea lintho, le litšekamelo tsa boetsalibe tsa nama ea bona e fokolang. Hoo ho ka khoneha joang? Moapostola Pauluse oa araba: “Bakeng sa lintho tsohle ke na le matla ka lebaka la ea mphang bonatla.” (Bafilippi 4:13) Moea o halalelang o ka ’na oa se ke oa tlosa liteko kapa meleko; leha ho le joalo, o ka u thusa ho li mamella. Ka ho itšetleha ka moea oa Molimo, re ka fumana “matla a ka ’nģane ho se tloaelehileng” a ho sebetsana le bothata leha e le bofe kapa tsieleho.—2 Bakorinthe 4:7; 1 Bakorinthe 10:13.

Ha u hlahloba bopaki bohle, ha ho na pelaelo ea hore moea o halalelang oa Molimo oa sebetsa kajeno. Moea oa Jehova o matlafatsa bahlanka ba hae hore ba fane ka bopaki mabapi le merero ea hae e hlollang. O tsoela pele ho senola mahlaseli a leseli la moea, ’me o matlafatsa tumelo ea rōna, o re thusa ho lula re tšepahala ho ’Mōpi oa rōna. Re leboha hakaakang hore ebe Molimo o lutse a tšepahala tšepisong ea hae ka ho fa bahlanka ba hae ba tšepahalang moea o halalelang kajeno!

[Mongolo o botlaaseng ba leqephe]

[Lebokose le leqepheng la 10]

Seo ba Bang ba se Buang ka Lipaki Tsa Jehova

“Le hoja likereke tse ling li hira litsebi hore li hohele batho hore ba tle likerekeng kapa hore li sebetsane le litaba tsa kajeno tse kang bosodoma le ho ntšoa ha limpa, Lipaki tsona ha li sekisetse lefatšeng le fetohang. Ka tsela e laolehileng li tsoela pele ka letšolo la tsona la ho bolela Lefatšeng ka bophara.”—The Orange County Register ea Orange County, California, U.S.A.

“Tabeng ea ho phatlalatsa tumelo, ke malumeli a seng makae feela a chesehang . . . joaloka Lipaki tsa Jehova.”—The Republic ea Columbus, Indiana, U.S.A.

“Ke tsona feela tse bolelang ‘litaba tse molemo’ ka ntlo le ntlo, tse sebelisang melao-motheo ea Bibele.”—Życie Literackie, Poland.

“Ka letšolo la ho bolela le leholo ka ho fetisisa le kileng la e-ba teng, Lipaki tsa Jehova li isitse molaetsa oa Jehova lefatšeng lohle.”—News-Observer, Tamaqua, Pennsylvania, U.S.A.

[Litšoantšo tse leqepheng la 9]

Moea o halalelang oa Molimo o re fahlolla moeeng,

. . . o hōlisa litšoaneleho tse ntle tsa Bokreste,

. . . ’me oa re tšehetsa mosebetsing oa ho bolela lefatšeng ka bophara