Hanelang “Moea oa Lefatše”

“Ha rea ka ra amohela moea oa lefatše, empa re amohetse moea o tsoang ho Molimo.”—1 BAKOR. 2:12.

1, 2. (a) Nakong e fetileng, ke hobane’ng ha ho ne ho sebelisoa lithaha merafong ea Brithani? (b) Ke kotsi efe eo Bakreste ba tobaneng le eona?

KA SELEMO sa 1911, ba boholong Brithani ba ile ba etsa molao o neng o reretsoe ho sireletsa bophelo ba batho ba sebetsang merafong ea mashala. Morafo o mong le o mong o ne o lokela ho ba le lithaha tse peli. Ka morero ofe? Haeba ho ne ho ka qhoma mollo morafong, basebetsi ba pholoso ba ne ba tla theohela ka morafong ba nkile lithaha tseo. Linonyana tsena tse nyenyane li hlōloa ke likhase tse chefo, tse kang carbon monoxide. Haeba moea o ne o ka silafala, linonyana tseo li ne li tla bontša matšoao a ho tepella, ebile li ne li tla oa sebakeng seo li lutseng ho sona. Temoso ena ea kapele e ne e le bohlokoa. Carbon monoxide ke khase e se nang ’mala e sa nkheng e bolaeang ka ho etsa hore lisele tse khubelu tsa mali li se ke tsa fetisetsa oksijene ’meleng. Haeba basebetsi ba pholoso ba ne ba sa lemosoe kotsi, ba ne ba ka akheha ba ba ba shoa ba sa lemohe ho hang hore ba kenoe ke chefo.

² Ka tsela ea moea, Bakreste ba tobane le boemo bo tšoanang le ba basebetsi ba morafong. Joang? Ha Jesu a ne a fa barutuoa ba hae mosebetsi oa ho bolela litaba tse molemo lefatšeng lohle, o ne a tseba hore o ba romela tikolohong e kotsi, e laoloang ke Satane le moea oa lefatše. (Mat. 10:16; 1 Joh. 5:19) Jesu o ne a tšoenyehile haholo ka barutuoa ba hae hoo bosiung ba pele a e-shoa, a ileng a rapela Ntate oa hae a re: “Ha ke u kōpe hore u ba ntše lefatšeng, empa ke kōpa hore u ba lebele ka lebaka la ea khopo.”—Joh. 17:15.

3, 4. Jesu o ile a fa barutuoa ba hae temoso efe, hona ke hobane’ng ha re lokela ho e thahasella?

³ Jesu o ile a lemosa balateli ba hae ka kotsi ea ho se natse lintho tse ba potolohileng ho neng ho ka qetella ho ba bolaile moeeng. Mantsoe a hae a bohlokoa haholo ho rōna, kaha re phela qetellong ea tsamaiso ea lintho. O ile a khothatsa barutuoa ba hae a re: “Le lule le falimehile . . . e le hore le ka atleha ho phonyoha lintho tsena tsohle tse reretsoeng hore li etsahale, le ho ema ka pel’a Mor’a motho.” (Luka 21:34-36) Leha ho le joalo, hoa thabisa hore ebe Jesu o ile a boela a tšepisa hore Ntate oa hae o ne a tla fana ka moea o halalelang hore o ba hopotse lintho tse itseng le ho ba thusa hore ba lule ba falimehile ba bile ba le matla.—Joh. 14:26.

⁴ Ho thoe’ng ka rōna kajeno? Na moea oo o halalelang o ntse o le teng hore o ka re thusa? Haeba ho joalo, re lokela ho etsa eng e le hore re o fumane? Moea oa lefatše ke eng, hona o sebetsa joang? Kahoo, re ka atleha joang ho hanela moea oa lefatše lee?—Bala 1 Bakorinthe 2:12.

Moea o Halalelang Kapa Moea oa Lefatše?

5, 6. Moea o halalelang o ka re etsetsa’ng, empa re lokela ho etsa’ng hore re o fumane?

⁵ Moea o halalelang ha oa ka oa fanoa lekholong la pele la lilemo feela. O ntse o fumaneha le kajeno, ebile moea oa Molimo o ka re fa matla a ho etsa se nepahetseng hammoho le ho re matlafatsa tšebeletsong ea hae. (Bar. 12:11; Bafil. 4:13) Hape o ka etsa hore re be le lintho tse ratehang, tse kang lerato, mosa le molemo, e leng likarolo tsa ‘tholoana ea moea.’ (Bagal. 5:22, 23) Leha ho le joalo, Jehova Molimo ha a qobelle moea oa hae o halalelang ho batho ba sa o batleng.

⁶ Kahoo, e tla be e le ho utloahalang hore re botse, ‘Nka etsa’ng e le hore ke fumane moea o halalelang?’ Bibele e bontša hore ho na le lintho tse ’maloa tseo re ka li etsang. Ho hlakile hore na bohato ba bohlokoa ke bofe—o kōpe ho Molimo. (Bala Luka 11:13.) Bohato bo bong ba bohlokoa ke hore u ithute u be u sebelise keletso e fumanoang Lentsoeng la Molimo le bululetsoeng ke moea. (2 Tim. 3:16) ’Nete ke hore, hase ho bolela hore hafeela motho a bala Bibele, o se a fumana moea oa Molimo. Empa ha Mokreste ea tšepahalang a ithuta Lentsoe la Molimo, a ka utloisisa maikutlo a ka Lentsoeng le bululetsoeng a ba a sheba litaba ka tsela e hlahang ho lona. Ke habohlokoa hore re amohele hore Jehova o khethile Jesu e le moemeli oa Hae ebile e le eena eo Molimo a fanang ka moea oa hae ka eena. (Bakol. 2:6) Ka lebaka leo, re lokela ho latela mohlala oa Jesu le lithuto tsa hae bophelong ba rōna. (1 Pet. 2:21) Ha re leka ka matla hore re tšoane le Kreste, re tla fumana moea o halalelang haholo.

 7. Moea oa lefatše o susumetsa batho joang?

⁷ Moea oa lefatše oona o fapane, o susumetsa batho hore ba tšoane le Satane. (Bala Baefese 2:1-3.) Moea oa lefatše o sebetsa ka litsela tse ngata. Joalokaha re bona bopaki bo re potolohileng kajeno, o khothalletsa batho hore ba fetohele melao ea Molimo. O khothalletsa “takatso ea nama le takatso ea mahlo le pontšo ea mponeng ea mokhoa oa motho oa boipheliso.” (1 Joh. 2:16) O hlahisa mesebetsi ea nama e kang bohlola, bofebe, borapeli ba litšoantšo, tšebelisano le meea, poulelo, ho tlakoloha ka bohale le botahoa. (Bagal. 5:19-21) Hape o khothalletsa lipuo tsa bakoenehi tse silafatsang se halalelang. (2 Tim. 2:14-18) Ho totobetse hore ha motho a itumella hore moea oa lefatše o mo susumetse haholo, o tla tšoana le Satane haholo.

 8. Ke khetho efe eo kaofela ha rōna re lokelang ho e etsa?

⁸ Ho ke ke ha khoneha hore re phele ho se moea o re susumetsang. Motho e mong le e mong o lokela ho khetha hore na o tla susumetsoa ke eng bophelong ba hae—moea o halalelang kapa moea oa lefatše. Batho bao hona joale ba susumetsoang ke moea oa lefatše ba ka itokolla tšusumetsong ea oona ’me ba lumella moea o halalelang hore o ba tataise bophelong. Leha ho le joalo, ho boetse ho ka ’na ha etsahala se fapaneng le seo. Bao moea o halalelang o ’nileng oa ba tataisa ka nako e itseng ba ka ’na ba tšoasoa ke moea oa lefatše. (Bafil. 3:18, 19) A re ke re hlahlobeng kamoo re ka hanelang moea oa lefatše kateng.

Ela Hloko Matšoao a Pele a Lemosang

9-11. Ke matšoao afe a ka ’nang a bontša hore re inehella moea oa lefatše?

⁹ Basebetsi ba merafong ea mashala ea Brithani bao ho builoeng ka bona pejana, ba ne ba sebelisa lithaha hore li ba lemose esale pele ha ho e-na le khase e chefo. Haeba mosebetsi oa morafong a ne a bona nonyana e oa moo e lutseng teng, o ne a tseba hore o lokela ho folofela leraha. Ka tsela ea moea, ke matšoao afe a pele a bontšang hore re susumetsoa ke moea oa lefatše?

¹⁰ Ha re ne re qala ho ithuta linnete tsa Lentsoe la Molimo ’me ka morao ho moo re nehela bophelo ba rōna ho Jehova, ho ka etsahala hore ebe re ne re bala Bibele ka cheseho. Mohlomong re ne re rapela ka matla re bile re rapela khafetsa. Hape re ne re thabela ho ea libokeng, re nka se seng le se seng sa tsona se khatholla moeeng joaloka mohloli oa metsi lehoatateng ho motho ea nyoriloeng. Seo se ile sa re thusa hore re itokolle re be re lule re lokolohile moeeng oa lefatše.

¹¹ Na re sa ntse re leka ho bala Bibele letsatsi le leng le le leng? (Pes. 1:2) Na re rapela khafetsa le ho rapela ka pelo eohle? Na re rata liboka tsa phutheho, ’me re ba teng beke le beke ho tsona kaofela? (Pes. 84:10) Kapa na re se re lahlile e meng ea mekhoa ee e metle? Ke ’nete hore e ka ’na eaba re na le boikarabelo bo bongata bo hlokang nako ea rōna le matla a rōna, ’me ho ka ’na ha e-ba thata hore re tsoele pele ka kemiso ea rōna e ntle ea lintho tsa moea. Empa haeba ha nako e ntse e feta re ile ra tlohela e meng ea mekhoa ea rōna e metle, na ho ka etsahala hore ebe re inehella moea oa lefatše? Na joale re tla ikitlaelletsa ho tsosolosa mekhoa e metle eo re neng re e-na le eona?

‘Le ka Mohla le se ke la Imeloa’

12. Jesu o ile a bolella barutuoa ba hae hore ba ‘ele mang hloko,’ hona hobane’ng?

¹² Ke eng hape eo re ka e etsang e le hore re hanele moea oa lefatše? Ha Jesu a ne a eletsa barutuoa ba hae hore ba ‘lule ba falimehile,” o ne a sa tsoa ba lemosa ka likotsi tse itseng tse tobileng. O ile a re: “Ikeleng hloko hore le ka mohla lipelo tsa lōna li se ke tsa imeloa ke ho ja ho tlōla le ho noa haholo le matšoenyeho a bophelo, ’me ka tšohanyetso letsatsi leo la e-ba holim’a lōna hang-hang joaloka leraba.”—Luka 21:34, 35.

13, 14. E ka ba ho loketseng hore re ipotse lipotso life ka ho ja le ho noa?

¹³ Nahana ka temoso eo. Na Jesu o ne a nyatsa taba ea ho thabela lijo le lino? Che! O ne a tseba mantsoe a Solomone a reng: “Kea tseba hore ha ho letho le molemo [ho bara ba batho] ho feta ho thaba le ho etsa se molemo nakong ea bophelo ba motho; le hore motho e mong le e mong a je ’me a noe le ho bona se molemo bakeng sa mosebetsi oohle oa hae o thata. Ke mpho ea Molimo.” (Moek. 3:12, 13) Leha ho le joalo, Jesu o ne a tseba hore moea oa lefatše o khothalletsa ho hloka boitšoaro linthong tsena.

¹⁴ Re ka kholiseha joang hore moea oa lefatše ha oa foufatsa likelello tsa rōna mabapi le kotsi ea ho ja ho tlōla le ho noa haholo? Re ka ’na ra ipotsa: ‘Ke etsa joang ha ke bala keletso ea Bibele kapa e ka har’a lingoliloeng tsa rōna e buang ka bonyollo? Na ke atisa ho hlokomoloha keletso ena ka hore ha e hlokahale kapa e feteletsa lintho, mohlomong ke bile ke emela liketso tsa ka?a Ke talima keletso e buang ka joala joang, ’me haeba ke bo noa, na ke bo noa ka ho lekanyetsa e le hore joang kapa joang ke qobe “ho inehella botahoa”? Na ke khella keletso eo fatše, ’me ke nahana hore ka tsela e itseng ha e nkame? Haeba ba bang ba bolela hore ba tšoenyehile ka tsela eo ke noang ka eona, na kea ikemela kapa kea halefa? Na ke khothalletsa ba bang hore ba se ke ba natsa keletso eo ea Bibele?’ Ka sebele, boikutlo ba motho ke bona bo bontšang hore na o ineheletse moea oa lefatše kapa che.—Bapisa Baroma 13:11-14.

Qobang ho Bipetsoa ke Matšoenyeho

15. Jesu o ile a lemosa ka ntho efe eo batho ba tloaetseng ho e etsa?

¹⁵ Bohato bo bong ba bohlokoa ba ho hanela moea oa lefatše ke ho laola matšoenyeho. Jesu o ne a tseba hore kaha ha rea phethahala, re tloaetse ho tšoenyeha ka lintho tse sa reng letho. Ka lerato, o ile a re ho barutuoa ba hae: “Khaotsang ho tšoenyeha.” (Mat. 6:25) Hoa utloahala hore re amehile ka litaba tsa bohlokoa tse kang ho khahlisa Molimo, ho phetha boikarabelo ba rōna ba Bokreste le ho lokisetsa malapa a rōna lintho tseo a li hlokang. (1 Bakor. 7:32-34) Joale ke eng eo re ka ithutang eona temosong ea Jesu?

16. Moea oa lefatše o ama batho ba bangata joang?

¹⁶ Moea oa lefatše o khothalletsang pontšo ea mponeng ea mokhoa oa motho oa boipheliso, o etsa hore batho ba bangata ba tšoenyehe ka tsela e kotsi bophelong ba bona. Lefatše le batla hore re lumele hore chelete e fana ka tšireletso le hore se bontšang hore na motho ke oa bohlokoa hakae, hase seo a leng sona moeeng, empa ke hore na o na le matlotlo a mangata hakae le hore na ke a boleng bofe. Ba thetsitsoeng ke leshano lena ba tla sehla ka thata hore ba fumane maruo ’me ba lula ba tšoenyehile ka hore ba fumane lintho tsa morao-rao, tse khōlōhali le tse tsoetseng pele ka ho fetisisa. (Liprov. 18:11) Maikutlo ao a sothehileng a baka matšoenyeho a bipetsang ho hōla ha motho moeeng.—Bala Matheu 13:18, 22.

17. Re ka qoba ho bipetsoa ke matšoenyeho joang?

¹⁷ Re ka qoba ho bipetsoa ke matšoenyeho haeba re mamela taelo ena ea Jesu: “Joale, le ’ne le batle ’muso pele le ho loka ha [Molimo].” Jesu o re tiisetsa hore haeba re etsa sena, re tla ekelletsoa lintho tseo re hlileng re li hlokang. (Mat. 6:33) Re bontša joang hore re lumela tšepiso ee? Tsela e ’ngoe ke ka ho batla ho loka ha Molimo pele—e leng ho latela melao ea Molimo ea se nepahetseng litabeng tsa lichelete. Ka mohlala, ha re batle ho bua leshano ha re tlatsa liforomo tsa lekhetho kapa ho bua le leshano le lenyenyane feela litabeng tsa khoebo. Re etsa sohle seo re ka se khonang ho lefa lintho tseo re tšepisitseng hore re tla li lefa ’me mabapi le ho lefa likoloto, re etsa hore ‘E ea rōna e bolele E.’ (Mat. 5:37; Pes. 37:21) Botšepehi bo joalo bo ka ’na ba se ke ba etsa hore motho e be morui, empa bo khahlisa Molimo, bo etsa hore motho a be le letsoalo le hloekileng ’me bo etsa hore a se ke a tšoenyeha haholo.

18. Jesu o re behetse mohlala ofe o motle, ’me re rua molemo joang ha re mo etsisa?

¹⁸ Se amehang tabeng ea ho batla ’Muso pele ke ho tseba hore na ke sefe se tlang pele bophelong ba rōna. Nahana ka mohlala oa Jesu. Ka linako tse ling, o ne a apara seaparo sa boleng bo botle. (Joh. 19:23) O ne a thabela ho ja le ho noa veine a e-na le metsoalle e metle. (Mat. 11:18, 19) Empa matlotlo le boithabiso e ne e mpa e le lintho tse natefisang bophelo ba hae feela, e ne e se tsona lintho tse ka sehloohong. Lijo tsa Jesu e ne e le ho etsa thato ea Jehova. (Joh. 4:34-36) Bophelo e ba bo khotsofatsang hakaakang ha re latela mohlala oa Jesu! Re thabela ho thusa batho ba sithabetseng hore ba tšelisoe ke Mangolo. Sena se etsa hore phutheho e re rate e be e re tšehetse. Re bile re thabisa pelo ea Jehova. Ha re tseba hore na ke sefe se tlang pele bophelong ba rōna, ha re laoloe ke matlotlo le menyaka. Ho e-na le hoo lintho tsena ke bahlanka, kapa lisebelisoa, tse re thusang ha re sebeletsa Jehova. ’Me ha re chesehela mosebetsi o tšehetsang ’Muso oa Molimo, ho ke ke ha e-ba bonolo hore moea oa lefatše o re hlōle.

Le ’Ne le ‘Behe Likelello Linthong Tsa Moea’

19-21. Re ka tsoela pele re ‘behile likelello moeeng’ joang ’me ke hobane’ng ha re lokela ho etsa seo?

¹⁹ Ha ho letho leo motho a ka le etsang a sa ka a nahana ka lona pele. Lintho tseo batho ba bangata ba reng ke liketso tsa booatla hangata li susumetsoa ke ho nahana ka lintho tsa nama. Kahoo, moapostola Pauluse o re hopotsa hore ho hlokahala hore re lebele menahano ea rōna. O ile a ngola a re: “Ba tumellanong le nama ba beha likelello tsa bona linthong tsa nama, empa ba tumellanong le moea ba li beha linthong tsa moea.”—Bar. 8:5.

²⁰ Re ka etsa joang hore menahano ea rōna hammoho le liketso tsa rōna li se ke tsa laoloa ke moea oa lefatše? Re lokela ho sefa lintho tse kenang likelellong tsa rōna, re loanele ho thibela mashano a lefatše ka hohle kamoo re ka khonang. Ka mohlala, ha re khetha boithabiso, ha re batle hore menahano ea rōna e silafatsoe ke mananeo a khothalletsang boitšoaro bo bobe kapa mabifi. Rea hlokomela hore moea oa Molimo o halalelang, kapa o hloekileng, o ke ke oa lula kelellong e litšila. (Pes. 11:5; 2 Bakor. 6:15-18) Ho phaella moo, re lumella moea oa Molimo hore o kene likelellong tsa rōna ka hore kamehla re bale Bibele, re rapele, re thuise re be re be teng libokeng. Hape, re sebetsa le moea oo ha re etsa mosebetsi oa Bokreste oa boboleli kamehla.

²¹ Ka sebele, re lokela ho hanela moea oa lefatše le litakatso tsa nama tseo o li khothalletsang. Empa ho loketse hore re etse boikitlaetso bo matla joalo, hobane joalokaha Pauluse a bolela, “ho beha kelello nameng ho bolela lefu, empa ho beha kelello moeeng ho bolela bophelo le khotso.”—Bar. 8:6.

[Mongolo o botlaaseng ba leqephe]

Na U sa Hopola?

• Re lokela ho etsa’ng hore re fumane moea o halalelang?

• Moea oa lefatše o ka ’na oa re ama ka litsela life?

• Re ka hanela moea oa lefatše joang?

[Setšoantšo se leqepheng la 21]

Pele u e-ea mosebetsing kapa sekolong, rapella moea o halalelang

[Litšoantšo tse leqepheng la 23]

Re lokela ho boloka likelello tsa rōna li hloekile, re be le mekhoa e metle litabeng tsa khoebo ’me re be ba itekanetseng mekhoeng