Metsoalle ea ’Nete e ka re Thusa ho Tšepahalla Jehova

1. Batho ba bangata ba nka setsoalle joang?

REA tseba hore re lokela ho emela borapeli ba ’nete joaloka Lipaki Tsa Jehova. Re lokela ho tsoela pele ho loantša tšusumetso e fosahetseng ea lefatše. Sena se akarelletsa hore re se ke ra lumella moea oa lefatše hore o fetole tsela eo re nkang setsoalle ka eona. Ka mohlala, batho ba bangata ba nka ho le bohlokoa ho ba le metsoalle e mengata ho feta ho ba le metsoalle ea ’nete. Bacha ba bangata ba batla likeletso le matšeliso ho metsoalle ea bona feela. Ba bang bona ba utloa eka ha ba hloke metsoalle ho hang. Empa Jehova le Jesu ba nka setsoalle joang?

2. (a) Jesu o ile a khetha metsoalle e joang? (b) Ho ea ka Moeklesia 4:​9-12, metsoalle ea ’nete e ka re thusa joang?

² Jehova o batla hore re be le metsoalle e tla re thusa hore re mo sebeletse ka botšepehi. Mora oa hae Jesu, o ile a khetha metsoalle e joalo. Nakoana pele Jesu a shoa, o ile a babatsa baapostola ba hae ba tšepahalang, a re: “Haesale le e-na le ’na mathateng a ka.” O ne a ba nka e le metsoalle ea hae. (Luka 22:28; Joh. 15:15) Motsoalle oa ’nete ha a u tšehetse ha ho le monate feela empa le “linakong tsa mahlomola.” (Liprov. 17:17) Moeklesia 4:​9-12a e bontša hore metsoalle ea ’nete e ka re matlafatsa le ho re tšelisa. (E bale.) Ha re e-na le metsoalle e joalo, re ka lula re tšepahala le nakong eo re thulanang le liteko tse ka senyang kamano ea rona le Jehova. Haeba re etsa lintho tsa moea le metsoalle ea rona, re ka finyella lintho tse thabisang ’me setsoalle sa rona se ke ke sa fela.

3. Re tl’o hlahloba eng sehloohong see?

³ Metsoalle ea ’nete e ka thusa mocha joang hore a sebeletse Jehova ka botšepehi? Batsoali le batho ba bang ba holileng ba ka susumetsa bacha joang ho etsa lintho tse nepahetseng? A re hlahlobeng mohlala oa moprofeta Daniele, ’me re bone hore na o ile hlola mathata a neng a bonahala a le ka holimo ho matla a hae joang. Re tla boela re bone hore na Motsoalle oa Daniele oa hlooho ea khomo e leng Jehova, o ile a mo tšehetsa joang nakong eo ho neng ho se na motho ea ka mo thusang.

METSOALLE EA ’NETE E RE THUSA HO KHETHA HO SEBELETSA JEHOVA

4. Ke liteko life tseo Daniele a ileng a tobana le tsona?

⁴ Pale ea Daniele e qalile nakong eo ho neng ho le boima haholo historing ea batho ba Molimo. Baahi ba bangata ba Juda ba ne ba khaolitse ho sebeletsa Jehova. Ka lebaka leo, ka selemo sa 620 B.C.E., Jehova o ile a lumella morena oa Babilona e leng Nebukadnezare hore a buse Juda. (Dan. 1:2) Mohlomong Daniele e ne e le mocha ka nako eo. Lilemo tse seng kae hamorao, o ile a isoa botlamuoeng Babilona moo a ileng a fumana koetliso ea hore a sebeletse morena. (Dan. 1:​3-6) Daniele e mocha o ile a iphumana a le hole le hae ’me a arohane le lelapa labo.

5, 6. E ka ’na eaba ke bo-mang ba ileng ba thusa Daniele ho etsa qeto ea ho sebeletsa Jehova?

⁵ Ke’ng e ileng ea thusa Daniele ho itokisetsa liteko tseo a neng a tla tobana le tsona Babilona? Bibele e re bolella hore Daniele “o ile a etsa qeto ka pelong ea hae” hore o tla latela melao ea Molimo. (Dan. 1:8) E tlameha ebe ho na le motho ea ileng a ruta Daniele melao ena le ho mo thusa ho etsa qeto ea ho sebeletsa Jehova e sa le mocha. Na o thusitsoe ke batsoali ba hae? Ho thahasellisang ke hore lebitso Daniele le bolela “Moahloli oa ka ke Molimo.” Mohlomong lebitso lena le bontša kamoo batsoali ba Daniele ba neng ba labalabela hore a sebeletse Jehova le ho latela tataiso ea hae kateng.—Deut. 6:​6, 7.

⁶ E ka ’na eaba Daniele o ile a boela a khothatsoa ke mosebetsi o neng o etsoa ke moprofeta Jeremia. Ke hobane’ng ha ho utloahala ho etsa qeto eo? Hlokomela lintlha tsena: Jeremia o ile a khethoa ke Jehova ka 647 B.C.E. ’me a qala tšebeletso ea hae pele Daniele a hlaha. (Jer. 1:2) Hangata Jeremia o ne a isa molaetsa oa Jehova lelapeng la borena le ho banna ba bang ba hlomphehang, ’me e ka ’na eaba lelapa labo Daniele le ne le le teng moo. (Jer. 1:​17, 18; Dan. 1:​3, 6) Ha re na bonnete ba hore Jeremia le Daniele e ne e le metsoalle. Empa mohlomong ha Daniele a sa le mocha, o ne a tloaelane le boprofeta ba Jeremia, bo akarelletsang boo a ileng a bo sebelisa lilemo tse mashome hamorao. (Jer. 25:11; 29:10; Dan. 9:​1, 2) E tlameha ebe Daniele o ne a nka Jeremia e le monna ea ileng a ba sebete le ho tšepahalla Jehova, le hoja a ne a phela har’a batho ba neng ba sa mo sebeletse.

7, 8. Batsoali le Bakreste ba bang ba holileng ba ka thusa bacha joang kajeno ho lule ba tšepahalla Jehova?

⁷ Ke taba e utloahalang ho lumela hore batsoali ba Daniele, moprofeta Jeremia kapa bahlanka ba bang ba tšepahalang ba Jehova ba ile ba e-ba le tšusumetso e ntle ho eena. E tlameha ebe ba ile ba mo thusa hore a be le setsoalle se haufi le Jehova.

⁸ Le kajeno, batsoali ba ka ba le tšusumetso e ntle ho bana ba bona. Haeba u motsoali, ipotse: ‘Na bana ba ka ba itokiselitse ho tobana le liteko tse amanang le ho se nke lehlakore? Ba tla etsa’ng haeba ba lekeha ho etsa ntho e fosahetseng sekolong kapa Inthaneteng? Na ba itokiselitse ho emela borapeli ba ’nete nakong ea mahlomola a maholo?’ Thusa bana ba hao ho rata Jehova ka ho tebileng le ho mo tšepa. U ka etsa seo joang? Lula u buisana le bona ka Jehova, ba rute ho nka karolo libokeng, ’me u sebetse le bona tšimong. Bacha ba rua molemo haholo ha ba qeta nako le batho ba tšoanang le Jeremia, ba behang mohlala o motle oa tumelo le botšepehi.

METSOALLE EA ’NETE EA RE THUSA HA RE TOBANA LE LITEKO

9. Ke boemo bofe bo kotsi boo Daniele le bacha ba bang ba Baheberu ba ileng ba iphumana ba le ho bona?

⁹ Ha Daniele le bacha ba bang ba Baheberu ba isoa botlamuoeng, ba ile ba tobana le liteko tseo ba neng ba e-s’o ka ba tobana le tsona ha habo bona. Hang-hang, Bababilona ba ile ba ba qobella ho etsa lintho joaloka bona. Bacha bana ba ne ba boetse ba tl’o koetlisetsoa ho sebeletsa phaleising ea morena. Empa koetliso ena e ne e tla etsa hore ba tobane le maemo a neng a tla leka botšepehi ba bona ho Jehova.

10. Teko ea pele ea botšepehi eo bacha ba Bajuda ba ileng ba tobana le eona ke efe?

¹⁰ Teko ea bona ea pele ea botšepehi e ne e ka bonahala eka ha e re letho. Morena o ile a laela hore Daniele le bacha ba bang ba tlileng botlamuoeng ba je lijo tse neng li jeoa tafoleng ea morena. Lijo tsena li ne li akarelletsa lijo tseo Molao oa Moshe o neng o re ha lia hloeka. (Dan. 1:​5, 8) Bacha bana ba ka be ba ile ba batla ho ikemela ka ho se mamele Molao oo, etsoe e ne e le batlamuoa ’me ba se na bolokolohi ba ho etsa lintho tseo ba li batlang. Ba ka be ba ile ba boela ba ipehela lebaka la hore ha se bohlale ho se mamele morena kapa ho mo halefisa. Ba ne ba tla etsa’ng?

11. Daniele le metsoalle ea hae ba ile ba thusana joang? (Sheba setšoantšo.)

¹¹ Har’a bacha ba Baheberu ba ileng ba khethoa hore ba koetlisoe, ke ba bane feela, e leng Daniele, Shadrake, Meshake le Abednego bao tlaleho ea Bibele e bontšang hore ba ile ba lula ba tšepahalla Jehova. Metsoalle ena e mene e ile ea thusana ho hanela liteko le ho lula e tšepahala. Kaofela ha eona e ile ea hana ho ja lijo tsa morena ’me ea paka hore e tšepahalla Jehova. Jehova o ile a hlohonolofatsa metsoalle ena ka lebaka la sena.—Dan. 1:​6-12, 17.

12. Ke eng e ka thusang bacha ho atleha ho hlola liteko mehleng ee?

¹² Na ka linako tse ling lithaka tsa hao li u hatella hore u etse ntho eo u tsebang hore e fosahetse? Daniele le metsoalle ea hae ba ile ba thusana ho etsa qeto e nepahetseng. Joaloka bacha bao ba tšepahalang, khetha metsoalle e ikemiselitseng ho lula e tšepahalla Jehova le ho hana tšusumetso ea lefatše lena. (1 Joh. 2:​15-17) Metsoalle ea ’nete e ka u thusa ho lula u tšepahala “linthong tse nyenyane” le hore u bone ha Jehova a u hlohonolofatsa a bile a u tšehetsa. (Luka 16:10) Hape ha u tšepahala le “linthong tse nyenyane” u tla khona ho tšepahala le ha u tobana le liteko tse kholo hamorao bophelong.

METSOALLE EA ’NETE E RE THUSA HO HLOLA MATHATA A BONAHALANG EKA A KA HOLIMO HO MATLA A RONA

13. Daniele le metsoalle ea hae ba ile ba kopana le bothata bofe boo ho neng ho bonahala eka bo ka holimo ho matla a bona?

¹³ Metsoalle ea ’nete e thusana ho hlola mathata a ka bonahalang a le ka holimo ho matla a eona. Nahana ka bothata boo Daniele le metsoalle ea hae ba ileng ba kopana le bona ha Morena Nebukadnezare a ne a lorile toro e ileng ea mo tšoenya. O ne a batla ho tseba hore na e bolela’ng. Kahoo, o ile a bitsa baprista ba maselamose le baloi ba Babilona. Ho e-na le ho ba joetsa hore na o lorile eng e le hore ba mo hlalosetse toro ea hae, morena o ile a tsitlella hore baeletsi ba hae ba mo bolelle pele hore na o lorile eng ebe ba mo hlalosetsa hore na toro eo e bolela’ng. Ho ne ho se motho ea ka khonang ho etsa joalo. (Dan. 2:​3, 9-11) Haeba ba ne ba sa khone ho e hlalosa, ba ne ba tla bolaoa. Daniele le metsoalle ea hae e ne e le ba bang ba banna ba bohlale ba neng ba le kotsing ea ho bolaoa. Nakong eo kaofela, Daniele le metsoalle ea hae e meraro ba ile ba tšehetsana.

14. Daniele le metsoalle ea hae ba ile ba tšehetsana joang? (Sheba litšoantšo.)

¹⁴ Daniele o ile a ea ho morena eaba ka bohlale o mo kopa nako e eketsehileng ea ho mo fumanela karabo. Ka mor’a moo, Daniele o ile a ea ho metsoalle ea hae. Ha tlaleho ea Bibele e re bolella hore na ho ile ha etsahala’ng ka mor’a moo, e re: “A ba kopa hore ba rapele Molimo oa leholimo, ba mo kope hore a ba hauhele ’me a ba senolele sephiri sena e le hore Daniele le metsoalle ea hae ba se ke ba bolaoa.” (Dan. 2:18) Jehova o ile a mamela lithapelo tsa bona tse tsoang botebong ba pelo, eaba o senolela Daniele toro le tlhaloso ea eona. Ka lebaka leo, Daniele le metsoalle ea hae ha baa ka ba bolaoa, ’me morena o ile a ba fa maemo a hlomphehang pusong ea hae.—Dan. 2:​19, 47-49.

15. Re ithuta eng tlalehong ee? (Bagalata 6:2)

¹⁵ Tlaleho ena ea Bibele e na le lithuto tsa bohlokoa. Ea pele, ha u hloke ho loantšana le liteko u le mong. Le ka mohla u se ke oa soabela ho kopa thuso kapa oa nahana hore batho ba bang ba tla u khella fatše haeba u e kopa. Ea bobeli, u se ke oa tšaba ho kopa ba bang hore ba u rapelle. (2 Bakor. 1:11) Nahanisisa ka kamoo thapelo e tsoang pelong e leng matla kateng. “Ea Utloang thapelo” a ka re thusa ho sebetsana le mathata ao ho bonahalang eka a ka holimo ho matla a rona. (Pes. 65:2; Baef. 3:20) Ha re na le metsoalle e sebeletsang Jehova, re ka kholiseha hore e tla re tšehetsa le ho re thusa ho mamella mathata ao re ka kopanang le ’ona bophelong.—Bala Bagalata 6:2.

MOTSOALLE OA ’NETE EA KA U TŠEHETSANG BOEMONG LEHA E LE BOFE

16. Daniele o ile a tobana le teko efe ha a se a holile?

¹⁶ Jehova ke Motsoalle oa ’nete ea ka re tšehetsang boemong leha e le bofe, le haeba re ka iphumana re le bang. Ha Daniele a se a holile, mohlomong a le ka holimo ho lilemo tse 90, Babilona e ne e se e busoa ke Bamede le Bapersia. O ne a se a sebeletsa Morena Dariuse. Banna ba bang ba neng ba sebetsa moreneng, ba ile ba monela Daniele hobane a ne a le boemong bo phahameng. Kahoo, ba ile ba rera ho mo bolaea. Ba ile ba qhekella morena e le hore a etse molao o neng o tla thibela batho ho rapela mang kapa mang ntle le eena. Daniele ha aa ka a mamela molao oo, kahoo o ile a lahleloa ka har’a sekoti sa litau. Ha a le ka moo, ho ne ho bonahala eka o mong, ha ho motho ea ka mo thusang ho loantšana le teko eo. Empa na kannete o ne a le mong?—Dan. 6:​4-16.

17. Ho ea ka Daniele 6:​19-23, ho ba le setsoalle se matla le Jehova ho ile ha thusa Daniele joang?

¹⁷ Daniele 6:​19-23 e hlalosa tsela e mohlolo eo Daniele a ileng a pholosoa ka eona. (E bale.) Ha a le ka sekoting sa litau, Daniele o ile a thusoa ke Motsoalle ea matla ka ho fetisisa eo motho a ka bang le eena, e leng Jehova Molimo, ea ileng a mo pholosa litleneng tsa litau. Ka mor’a ketsahalo ena, Daniele o ile a re ho morena: “Molimo oa ka o rometse lengeloi eaba le koala melomo ea litau . . . hobane o mphumane ke se na molato.” (Dan. 6:22) Tumelo e matla eo Daniele a neng a e-na le eona ho Motsoalle oa hae oa hlooho ea khomo, Jehova, e ile ea mo thusa nakong eo bophelo ba hae bo neng bo le tsietsing.

18. Ke hobane’ng ha ho le bohlokoa ho atamela haufi le Jehova, hona re ka etsa seo joang? (Sheba litšoantšo le lebokose le reng “Jehova ke Ntate oa Rona, Molimo oa Rona le Motsoalle.”)

¹⁸ Ho ka etsahala hore le uena u iphumane u le hole le metsoalle le ba lelapa, mohlomong hobane u fumane kabelo e u isang sebakeng se hole, u ile oa tlameha ho falla kapa u ikutloa u se na matla hobane u kula. Hape ho ka etsahala hore ebe u teronkong. Maemo a fapaneng bophelong a ka etsa hore u ikutloe eka ha u na mang oee! Boemong bo joalo ho bohlokoa ho hopola hore metsoalle ea Jehova, ha ho mohla e se nang mang oee! Jehova ka boeena o tšepisa ho re sireletsa le ho re hlokomela ho sa tsotellehe hore na re hokae. (Pes. 139:​7-10) Tšepa hore Jehova oa u bona ebile o tla u thusa.

METSOALLE EA BOPHELO BOHLE

19. Ke hobane’ng ha re lokela ho ba le metsoalle ea ’nete hona joale? (1 Bathesalonika 5:​2, 11)

¹⁹ Ho bohlokoa ho ba le metsoalle ea ’nete mehleng ena. Metsoalle ea ’nete e re thusa ho etsa liqeto tse nepahetseng ha re ntse re atamela “letsatsi la Jehova.” Ea re khothatsa ebile ea re matlafatsa. (Bala 1 Bathesalonika 5:​2, 11.) Ha moapostola Petrose a hlokomela hore “qetello ea lintho tsohle e atametse,” o ile a re: “Ka holimo ho tsohle, le ratane haholo.”—1 Pet. 4:​7, 8.

20. Ha u batla metsoalle ea ’nete u lokela ho sheba batho ba joang, hona ho tla ba le liphello life haeba re etsa khetho e nepahetseng?

²⁰ Metsoalle ea ’nete ke mpho e tsoang ho Jehova, ’me hona joale re e hloka ho feta leha e le neng pele. Kahoo, joaloka Daniele, etsa metsoalle. Sheba batho ba tšoanang le Jeremia ka phuthehong ea heno, ba ka u susumelletsang ho etsa lintho tse ntle le ho u tataisa. Itloaetse batho ba tla u thusa hore u lule u ikemiselitse ho tšepahalla Jehova. Ka boikokobetso, kopa batho ba bang hore ba u rapelle ha ho hlokahala. Ka holim’a tsohle, hopola hore Motsoalle oa hao oa hlooho ea khomo ke Jehova. Ha ho mohla a tla u tlohela. (Baheb. 13:5) Haeba Jehova e le Motsoalle oa hlooho ea khomo oa rona kaofela, re tla thusana ho lula re mo tšepahalla, ebile re tla lula re le metsoalle ka ho sa feleng.