Na U Hlompha Lebitso la Kreste?

“Ke ka baka leo Molimo o phahamisitseng [Jesu] ka ho fetisisa, ’me o mo neile lebitso le holim’a mabitso ’ohle; hore lebitsong la Jesu, mangole ’ohle a ba maholimong, le lefatšeng, le ka tlase ho lefatše, a khumame, ’me maleme ’ohle a bolele hore Jesu Kreste ke Morena, e be tlotliso ea Molimo Ntate.”—BA-FILIPPI 2:9-11.

LITEMANENG tse kaholimo, moapostola Pauluse o hlalositse hlompho le tlotla tse lokelang lebitso la Jesu. Na ‘u khumama ka mangole’ ka lebitso la hae? Na u tseba ‘lebitso le ka holim’a mabitso ’ohle’ leo Jehova a mo neileng lona? Kajeno, ba makholo a limillione ba ipolela hore ke Bakreste. Na ho ka boleloa hore ba khumama ka lebitso la Jesu? A re ke re hlahlobeng lebitso leo ’me re bone hore na ho ameha eng ‘ho khumameng ka mangole’ tlotlisong ea lona.

Ke Lebitso la Mofuta Ofe?

Pele, “lebitso” le neiloeng Jesu ke lefe? Hase feela lebitso leo a le reiloeng. Batho ba bang ba ’nile ba bitsoa Jesu, kahoo lena ho hang hase ‘lebitso le ka holimo ho mabitso a mang ’ohle.’ Leha e le hore ke lebitso la Jesu ka kutloisiso ea botumo ba hae. Ke ’nete hore Jesu o ile a tsejoa e le paki e ka sehloohong ea Jehova pōpong eohle. (Tšenolo 3:14) Leha ho le joalo, o sebelelitse lebitso leo hore a iphumanele lona. ‘Lebitso lena le ka holim’a mabitso ’ohle’ ‘ka mosa’ Jehova ke eena ea le reileng Jesu.

Ke lefe lona lebitso leo? Mantsoe a mang a moprofeta Esaia a re thusa ho arabela seo. Makholo a lilemo pele Jesu a tsoaloa, Esaia o ile a ngola ka eena: “Hobane re tsoaletsoe ngoana, re neiloe mora; borena bo beiloe lehetleng la hae, ’me o tla bitsoa Moeletsi ea makatsang, Molimo o matla, Ra-bo-sa-feleng, Morena oa khotso.”—Esaia 9:6.

Mona lentsoe “bitsoa” le bolela eng? Le supa boemo bo phahameng le matla tseo Jesu a neng a tla li neoa e le hore a ka phethahatsa thato ea Ntate oa hae. Ke ka ho ela hloko le ka ho ikokobeletsa matla a maholo ana moo mangole ’ohle a lokelang ho khumama. Ha ho le joalo, a re ke re hlahlobisiseng likhau tsena tse ’nè tse boletsoeng ke Esaia.

Ke ka litsela life Jesu e leng “Moeletsi ea makatsang”?

Pele, Esaia o itse Jesu o tla bitsoa “Moeletsi ea makatsang.” O ne a tla neoa matla a ho eletsa batho ka mokhoa o makatsang. Pele Jesu a e-tla lefatšeng e ne e sentse e le Lentsoe, kapa ’muelli e moholo oa Jehova. (Johanne 1:1) Ha a le lefatšeng o buile mantsoe a ileng a isa batho bophelong bo sa feleng—keletso e makatsang ka sebele! Ke ka hona Petrose a itseng ho eena: “Ke uena ea nang le mantsoe a bophelo bo sa feleng.” (Johanne 6:68) Jesu ke eena ea ka sehloohong mocheng oa puisano ea Jehova le batho. (Tšenolo 1:1) Ke habohlokoa hore bohle kajeno ba mamele mantsoe a hae. Ke “tsela, le ’nete, le bophelo.” (Johanne 14:6) Ha ho poloko bakeng sa ba hanang ho mamela ‘Moeletsi enoa ea Makatsang.’

Ke ka kutloisiso efe Jesu e leng “Molimo o matla”?

Esaia hape a bolela esale pele hore Jesu e tla ba “Molimo o matla.” Pele a e-tla lefatšeng e ne e le “molimo” ka kutloisiso ea hore ke “setšoantšo sa Molimo o sa bonoeng, letsibolo la tsohle tse hloliloeng.” (Johanne 1:1; Ba-Kolosse 1:15) Hoba a shoe e le motho le hoba a tsosoe e le moea o sa shoeng, ke molimo ka kutloisiso ea hore ka ’mele “botlalo kaofela ba bomolimo bo ahile ka ho eena.”—Ba-Kolosse 2:9; 1 Timothea 6:15, 16.

Leha ho le joalo, ho na le matla a amanang le khau ea “Molimo o matla.” Ka Bibeleng ho na le batho ba bang ba neng ba bitsoa melimo. Hobane’ng? Hobane ba ne ba sebeletsa joaloka baahloli sechabeng sa Iseraele. (Pesaleme ea 82:1-6) Jesu, “Molimo o matla,” ke Moahloli e moholo ea khethiloeng ke Jehova. Ke eena ea hlalositseng hore na hona ho bolela eng: “Ntate ha a ahlole motho le a mong, empa o neile Mora kahlolo eohle, hore bohle ba hlonephe Mora, joale ka ha ba hlonepha Ntate.”—Johanne 5:22, 23.

Har’a mesebetsi ea kahlolo e beiloeng mahetleng a Jesu ke oa ho ahlola phutheho ea hae—ba shoeleng pele a khutla ka matla a ’Muso le ba ntseng ba phela nakong ea ho ba teng ha hae ‘bofelong ba lefatše.’ (Mattheu 24:3) Hape o ahlola le lichaba kajeno, o khetha “linku” ho “lipōli.” Ho phaella moo, ke eena ea tla okamela kahlolo ea batho bohle ea letsatsi la lilemo tse sekete kamor’a Harmagedone. Ke “Molimo o matla” ka sebele!—Mattheu 25:31-46; Tšenolo 11:18; 1 Petrose 4:17; Tšenolo 20:4, 5, 13.

Ke hobane’ng ha ka nepo Jesu a bitsoa “Ra-bo-sa-feleng”?

Hape Jesu e ne e tla ba “Ra-bo-sa-feleng.” Hoo ho ne ho tla etsahala joang? Adama ke eena ntate oa pele oa moloko oa motho. Leha ho le joalo, a lahleheloa ke monyetla oa ho ba “ra-bo-sa-feleng” ha a sitoa. O ne a ke ke a hlola a nea bana ba hae lefa la bophelo bo sa feleng. Jesu, ka lehlakoreng le leng, ha a ka a sitoa. ’Me ka ho etsa bophelo ba hae bo se nang sebe sehlabelo bakeng sa batho, a phetla tsela e isang bophelong bo sa feleng bakeng sa ba neng ba tla bontša hore baa lumela. (Johanne 3:16; 1 Johanne 2:2) Ke ka tsela eo a tlang ho ba nea bophelo bo sa feleng boo Adama a sitiloeng ho ba nea bona. Ka lebaka leo, Bibele e mo bitsa “Adama oa morao,” “moea o phelisang.” (1 Ba-Korinthe 15:45) Ke ka nepo a bitsoang “Ra-bo-safeleng” oa moloko oa motho oa kamoso o phethahetseng.

Jesu o phethahatsa karolo ea “Morena oa Khotso” joang?

Qetellong, Esaia a re lebitso la Jesu e tla ba “Morena oa khotso.” E ne e tla ba Morena ea tlisetsang bafo ba hae khotso. (Pesaleme ea 72:6, 7) Jesu hoba a tsohe o bontšitse hore na matla a hae a namme hakae ha a re: “Ke neiloe borena bohle leholimong le lefatšeng.” (Mattheu 28:18) Matla ana a maholo a ne a akarelletsa hore a buse e le Morena holim’a phutheho ea hae ho tloha ka 33 C.E. le holim’a ’Muso oa Molimo ho tloha ka 1914. (Ba-Kolosse 1:13; Tšenolo 11:15) Jesu o tla tlisa khotso lefatšeng lena ka ho timetsa lira tsa Molimo le ka ho busa ka toka holim’a batho ba lokileng.—Pesaleme ea 37:10, 11; 72:7, 8; Daniele 2:44.

Ho Ananela Lebitso la Jesu

Kahoo hoa bonahala hore ‘lebitso le ka holim’a mabitso a mang ’ohle’ le ama boemo, matla kapa borena tseo Molimo o li neileng Jesu. Ruri le phahametse mabitso a mang ’ohle kaha ha ho sebopuoa se seng se neiloeng matla a phahameng hakaalo. Ke Jesu feela eo ho itsoeng ka eena: “Ha ho poloko ho e mong; hobane ha ho lebitso le leng tlas’a leholimo, leo batho ba le neiloeng, leo re ka bolokehang ka lona.” (Liketso 4:12) ’Me ke Jesu feela ea neng a ka re: “Ekare ha le kōpa ntho ka lebitso la ka, ke tla e etsa.”—Johanne 14:14.

Ka lebaka leo, moapostola Pauluse a tsoela pele: “Hore lebitsong la Jesu, mangole ’ohle a ba maholimong, le lefatšeng, le ka tlase ho lefatše, a khumame.” (Ba-Filippi 2:10) E, le bona “ba maholimong,” mangeloi a tšepahalang, a ananela boemo ba hae bo phahameng le matla. (Ba-Heberu 1:4-6) ‘Ba ka tlase ho lefatše’ ba tla ithuta ka “lebitso” la Jesu ha ba kopanela tsohong ea lefatšeng. Ke feela bakeng sa ba ‘khumamang ka mangole’ ka ho hlonepha matla ao a a filoeng ke Molimo ba tsositsoeng ba tla ipaka ba ‘tsohetse bophelo.’—Johanne 5:29; Tšenolo 20:12.

‘Ba lefatšeng’ le bona—ke hore, rōna ba phelang—re tlameha ho ‘khumama ka mangole’ ka lebitso la Jesu haeba re lakatsa ho fumana bophelo bo sa feleng. Hona ho bolela ho mamela Jesu, Moeletsi ea makatsang, le ho sebelisa keletso ea hae. (Mattheu 7:24, 25) Ho bolela ho bontša hore re lumela ho eena e le hore re ka tšoareloa libe. Ka hona o tla qetella e le Ra-bo-sa-feleng oa rōna.

Haholo-holo, hoo ho bolela hore hona joale re tlotlise Jesu, Morena le Moahloli ea khethiloeng ke Molimo le ho ba bafo ba hae. Re tlameha ho ipaka ka liketso tsa rōna ho baena ba Morena re le “linku”—e seng “lipōli.” Re tlameha ho bolela litaba tse molemo ka ’Muso oa ‘Morena enoa oa Khotso’ ho ba bang. (Mattheu 24:14; 25:34-40) ’Me re tlameha ho ea ka melao ea ’Muso oa hae ha re ntse re sa nke lehlakore litabeng tsa lichaba tsa lefatše lena.—Jakobo 2:8; 1 Ba-Korinthe 6:9, 10; Johanne 15:19.

Jehova o memme babusi ba lefatše hore ba ikokobeletse Jesu. (Pesaleme ea 2:10-12) Leha ho le joalo, baa hana ’me mabakeng a mangata ba hanyetsa Bakreste ba ikokobeletsang eena. Kahoo, ‘ho khumama ka mangole’ ka lebitso la Jesu ha ho bonolo kamehla. Jesu ka boeena o itse: “Le tla hlouoa ke lichaba ka baka la lebitso la ka.”—Mattheu 24:9.

Bakreste ba tšepahalang ba hlouoe joalo ha ba tsitlella ho tlotlisa Jesu le ho bontša hlompho e loketseng bakeng sa matla a maholo le borena tsa Kreste. Leha ho le joalo, ke tokelo e thabisang le e tšepisang meputso e meholo ho fumanoa har’a bao ho buuoang ka bona ho Ba-Filippi 2:11: “Maleme ’ohle a bolele hore Jesu Kreste ke Morena, e be tlotliso ea Molimo Ntate.”