Seo Lerato (Agape)—Le Seng Sona le Seo le Leng Sona

Ekeletsang . . . kamehong ea lōna ea boena lerato.”—2 PETROSE 1:5, 7, NW.

 1. (a) Bibele e fana ka tšobotsi efe e le ea bohlokoa bo boholo? (b) Ke mantsoe afe a mane a Segerike ao hangata a fetoleloang e le “lerato,” ’me ke lefe leo ho buuoang ka lona ho 1 Johanne 4:8?

HAEBA ho na le tšobotsi kapa bokhabane eo Lentsoe la Molimo, Bibele, le e nkang e le ea bohlokoahali, ke lerato. Ka Segerike, puo ea pele ea Mangolo a Bakreste, ho na le mantsoe a mane ao hangata a fetoleloang e le “lerato.” Lerato leo re amehileng ka lona hona joale hase eʹros (lentsoe le sa fumanoeng Mangolong a Segerike a Bakreste), le thehiloeng khoheling ea botona le botšehali; leha e le hore ke la stor·geʹ, boikutlo bo theiloeng kamanong ea mali; kapa phi·liʹa, lerato le mofuthu la botsoalle le thehiloeng lipakaneng tsa botsoalle, le tšohliloeng sehloohong se fetileng. Ho e-na le hoo, ke a·gaʹpe—lerato le thehiloeng molao-motheong, leo ho ka boleloang hore le bolela se tšoanang le ho hloka boithati, lerato leo moapostola Johanne a neng a bua ka lona ha a ne a re: “Molimo o lerato.”—1 Johanne 4:8.

 2. Ho ’nile ha boleloa eng e loketseng ka lerato (a·gaʹpe)?

² Mabapi le lerato (a·gaʹpe) lena, Moprofesa William Barclay o re ho New Testament Words ea hae: “Agapē e amana le kelello: hase boikutlo feela bo hlahang ka lipelong tsa rōna ho se letho le bo memang [joalokaha ho ka ba joalo ka phi·liʹa]; ke molao-motheo oo re phelang ka oona ka morero. Agapē e amana haholo-holo le thato. Ke tlhōlo, khapo, le ho finyella ho hong. Ha ho motho eo ka tlhaho a kileng a rata lira tsa hae. Ho rata lira tsa motho ke tlhōlo ea tšekamelo le maikutlo tsohle tsa tlhaho. Agapē ena . . . ha e le hantle ke matla a ho rata se sa rateheng, ho rata batho bao re sa ba rateng.”

 3. Jesu Kreste le Pauluse ba ile ba beha khatiso efe ho lerato?

³ E, har’a lintho tse khethollang borapeli bo hloekileng ba Jehova Molimo ho mefuta e meng eohle ea borapeli ke khatiso eo bo e behang mofuteng ona oa lerato. Ka ho nepahetseng Jesu Kreste o ile a bolela litaelo tse peli tse khōlō: “Ea pele ke hore, . . . ‘U tlameha ho rata Jehova Molimo oa hao ka pelo ea hao eohle le ka sephefumolohi sa hao sohle le ka kelello ea hao eohle le ka matla a hao ’ohle.’ Ea bobeli ke ena, ‘U tlameha ho rata moahisani oa hao joalokaha u ithata.’ Ha ho na taelo e khōlō ho feta tsena.” (Mareka 12:29-31, NW) Moapostola Pauluse o ile a hatisa lerato ka tsela e tšoanang khaolong ea 13 ea 1 Ba-Korinthe. Ka mor’a ho hatisa hore lerato ke tšobotsi ea sehlooho e ke keng ea behelloa ka thōko, o ile a phetha ka ho re: “’Me joale, tse tharo tsena lia sala: tumelo, le tebello, le lerato; empa e kholo ho tsona ke lerato.” (1 Ba-Korinthe 13:13) Ka nepo Jesu o ile a re lerato e tla ba letšoao le khethollang la balateli ba hae.—Johanne 13:35.

Lintho Tseo Lerato le Seng Tsona

 4. Ho 1 Ba-Korinthe 13:4-8 Pauluse o bolela litšobotsi tse fosahetseng le tse nepahetseng tse kae tsa lerato?

⁴ Ho se ho hlahisitsoe ntlha ea hore ho bonolo ho bolela seo lerato le seng sona ho feta ho bolela seo le leng sona. Seo e batla e le ’nete, hobane moapostola Pauluse khaolong ea hae e buang ka lerato, 1 Ba-Korinthe 13, litemaneng 4 ho ea ho 8, o bolela lintho tse robong tseo lerato le seng tsona le lintho tse supileng tseo le leng tsona.

 5. “Poulelo” e hlalosoa joang, ’me ke joang e sebelisoang ka kutloisiso e nepahetseng ka Mangolong?

⁵ Ntho ea pele eo Pauluse a reng lerato ha le eona ke hore “ha le boulele.” Ho hlokahala hore seo se hlalosoe haholoanyane hobane ho na le likarolo tse nepahetseng le tse fosahetseng tsa poulelo. Buka e hlalosang mantsoe e hlalosa “boulela” e le “ho se mamelle tlholisano” hape e le “ho batla boinehelo bo khethehileng.” Kahoo, Moshe o ile a re ho Exoda 34:14 (NW): “U se ke ua khumamela molimo o mong, hobane Jehova, eo lebitso la hae e leng ho Boulela ke Molimo ea boulelang.” Ho Exoda 20:5 (NW), Jehova o re: “’Na Jehova Molimo oa hao ke Molimo ea batlang boinehelo bo khethehileng.” Ka tsela e tšoanang, moapostola Pauluse o ile a ngola: “Ke le boulela ka poulelo ea Molimo.”—2 Ba-Korinthe 11:2.

 6. Ke mehlala efe ea Mangolo e bontšang lebaka leo lerato le sa bouleleng ka lona?

⁶ Leha ho le joalo, ka kakaretso, “poulelo” e fetisa maikutlo a fosahetseng, e leng lebaka leo ka lona e thathamisitsoeng har’a mesebetsi ea nama ho Ba-Galata 5:20. (NW) E, poulelo e joalo e na le boithati ’me e fehla lehloeo, ’me lehloeo le fapane le lerato. Poulelo e ile ea etsa hore Kaine a hloee Abele ho ea bohōleng ba ho ’molaea, ’me e ile ea etsa hore baholoane ba Josefa ba leshome ba mo hloee ho isa bohōleng ba ho batla ho ’molaea. Lerato ka ho boulela ha le honohele thepa kapa menyetla ea ba bang, joalokaha Morena Akabe ka ho boulela a ile a honohela serapa sa merara sa Nabothe.—1 Marena 21:1-19.

 7. (a) Ke ketsahalo efe e bontšang hore Jehova ha a thabele boikhantšo? (b) Ke hobane’ng ha lerato le sa ikhantše esita le ka ho se nahane?

⁷ Pauluse o re bolella hape hore lerato “ha le na boikhantšo.” Ho ikhantša ho bontša ho hloka lerato, hobane ho etsa hore motho a ipehe boemong bo phahametseng ba ba bang. Jehova ha a thabisoe ke baikhantši, joalokaha ho ka bonoa kamoo a ileng a kokobetsa Morena Nebukadnezare ha a ne a ikhantša. (Daniele 4:30-35) Ho ikhantša hangata ho etsoa ho sa nahanoa ka lebaka la ho khahlisoa haholo ke seo motho a se finyeletseng kapa seo a nang le sona. Ba bang ba ka ba le tšekamelo ea ho ithorisa ka katleho ea bona tšebeletsong ea Bokreste. Ba bang ba tšoana le moholo ea ileng a utloa a tlamehile ho letsetsa metsoalle ea hae ho e bolella ka hore o rekile koloi e ncha eo theko ea eona e ka bang R150 000. Seo sohle ke ho hloka lerato hobane se hlahisa moikhantši a phahametse bamameli ba hae.

 8. (a) Boikutlo ba Jehova ke bofe mabapi le ba ikhohomosang? (b) Ke hobane’ng ha lerato le sa itšoare ka tsela eo?

⁸ Re boetse re bolelloa hore lerato “ha le ikhohomose.” Motho ea ikhohomosang, kapa ea ikakasang, o iphahamisetsa ka holimo ho ba bang ka ho hloka lerato. Boikutlo bo joalo ba kelello ke booatla bo boholo hobane “Molimo o hanela baikhohomosi, empa o hauhela ba ikokobetsang.” (Jakobo 4:6) Lerato le itšoara ka tsela e fapaneng le eo ka ho feletseng; le nka ba bang ba le phahametse. Pauluse o ile a ngola ho Ba-Filippi 2:2, 3: “Le ke le phethise thabo ea ka, ka ho ba le khopolo e le ’ngoe, le lerato le le leng, le moea o le mong, le ho ikutloa ho le hong feela. Le se ke la etsa letho ka khang, leha e le ka boithoriso ba lefeela, empa e mong le e mong, ka boikokobetso, a lekanye hobane ba bang ba mo fetisa.” Boikutlo bo joalo ba kelello bo etsa hore ba bang ba ikutloe ba phutholohile, ha motho ea ikhohomosang ka lebaka la likhang a etsa hore ba bang ba ikutloe ba sa phutholoha.

 9. Ke hobane’ng ha lerato le sa itšoare ka tsela e soabisang?

⁹ Pauluse o tsoela pele ho re lerato “ha le etse ho soabisang.” Buka e hlalosang mantsoe e hlalosa “ho soabisang” e le “se sa khahleng ka ho feletseng kapa se nyatsehang mekhoeng kapa boitšoarong.” Motho ea itšoarang ka tsela e soabisang (ka ho hloka lerato) o hlokomoloha maikutlo a ba bang. Liphetolelo tse ngata tsa Bibele li fetolela Segerike e le “ho hloka mekhoa.” Motho ea joalo o hloile se nkoang se nepahetse ’me e le khetho e lokileng. Ka sebele, ho nahanela ba bang ka lerato ho ka bolela ho qoba lintho tsohle tse se nang mekhoa kapa tse soabisang, lintho tse nyatsehang le tse ka nyarosang.

Lintho tse ling Tseo Lerato le Seng Tsona

10. Ke ka tsela efe lerato le sa ipatleleng tsa lona?

¹⁰ Re boetse re bolelloa hore lerato “ha le ipatlele tsa lona,” ke hore, ha ho e-na le taba e amang lithahasello tsa rōna tsa botho le tsa ba bang. Sebakeng se seng moapostola o re: “Ha ho e-so ho be motho ea kileng a hloea nama ea hae le ka mohla o le mong; empa o ee a e fepe, a e baballe.” (Ba-Efese 5:29) Leha ho le joalo, ha lithahasello tsa rōna li phehisana le tsa e mong ’me ho se melao-motheo ea Bibele e amehang, re lokela ho etsa joalokaha Abrahama a ile a etsa ka Lota, ka lerato re fe motho e mong khetho.—Genese 13:8-11.

11. Hore lerato ha le halefe ho bolela’ng?

¹¹ Hape lerato ha le khopisehe kapele. Kahoo Pauluse o re bolella hore lerato “ha le halefe.” Ha le fele pelo kapele. Le bonahatsa boitšoaro. Haholo-holo batho ba lenyalong ba lokela ho nka ka ho teba keletso ena ea ho itebela khahlanong le ho kharuma ka ho hloka mamello kapa ho tlatsetsana lerata. Ho na le maemo ao ho leng bonolo ho halefa, e leng lebaka leo ka lona Pauluse a ileng a utloa ho hlokahala hore a eletse Timothea: “Mohlanka oa Morena ha a tšoanela ho loana; empa e ka khona a be mosa ho bohle, a lokele ho ruta, a mamelle ka sebete”—e, ha a halefe—“a rute ka bonolo ba hanyetsang.”—2 Timothea 2:24, 25.

12. (a) Ke ka tsela efe lerato le sa hopoleng bobe? (b) Ke hobane’ng ha ho se bohlale ho hopola bobe?

¹² Ha Pauluse a tsoela pele ka lintho tseo lerato le seng tsona, oa eletsa: “Lerato . . . ha le hopole bobe.” Seo ha se bolele hore lerato ha le hlokomele ho utloisoa bohloko. Jesu o ile a bontša kamoo re lokelang ho sebetsana le maemo ha re utloisitsoe bohloko ka ho tebileng. (Mattheu 18:15-17) Empa lerato ha le re lumelle hore re lule re koetlile likhopiso, ho jara motho ka pelo. Ho se hopole bobe ho bolela ho tšoarela le ho lebala ka hona hang ha taba e sebelitsoe ka tsela ea Mangolo. E, u se ke ua itlhokofatsa kapa ua itšulafaletsa ka ho tsoela pele u nahana ka phoso, u hopola bobe!

13. Ho se thabele bokhopo ho bolela’ng, hona ke hobane’ng ha lerato le sa etse joalo?

¹³ Ho feta moo, re bolelloa hore lerato “ha le thabele bokhopo.” Lefatše le thabela bokhopo, joalokaha ho ka bonoa ka ho ata ha libuka, libaesekopo, le mananeo a TV tse mabifi le tsa boitšoaro bo litšila. Ho thaba hoo ho joalo kaofela ke ha boithati, ke ho se tsotelle melao-motheo ea ho loka ea Molimo kapa boiketlo ba ba bang. Ho thaba ho joalo ha boithati kaofela ke ho jalla nameng ’me hamorao ho tla kotula ho bola nameng.—Ba-Galata 6:8.

14. Ke hobane’ng ha ho ka boleloa ka tieo hore le ka mohla lerato ha le ka ke la timela?

¹⁴ Ntho ea ho qetela eo lerato le sa e etseng ke ena: “Lerato ha le ka ke la timela le ka mohla o le mong.” Tabeng ea pele, le ka mohla lerato ha le hlōlehe kapa ha le fele hobane Molimo o lerato, ’me ke “Morena oa bo-sa-feleng.” (1 Timothea 1:17, NW) Ho Ba-Roma 8:38, 39, rea tiisetsoa hore le ka mohla lerato la Jehova ho rōna le ke ke la hlōleha: “Ke tsebisisa ruri hore, leha e le lefu, leha e le bophelo, leha e le mangeloi, leha e le borena, leha e le mebuso e matla, leha e le ntho tse leng teng joale, leha e le tse tlang ho tla, leha e le boholimo, leha e le botlase, leha e le sebopuoa se seng, ha ho letho le tla tseba ho re arohanya le lerato la Molimo, le leng ho Jesu Kreste, Morena oa rōna.” Hape, le ka mohla lerato ha le hlōlehe hobane le ka mohla ha le haelle. Lerato le ka finyella litlhoko tsa boemo bofe kapa bofe, le phephetso efe kapa efe.

Lintho Tseo Lerato le Leng Tsona

15. Ke hobane’ng ha Pauluse a beha tšoaneleho ea sebete e le ea pele lethathamong la litšoaneleho tse nepahetseng tsa lerato?

¹⁵ Joale ha Pauluse a e-tla ka lehlakoreng la lintho tse nepahetseng, lintho tseo lerato le leng tsona, oa qala: “Lerato le sebete.” Ho ’nile ha boleloa hore ho ke ke ha e-ba le ntho e kang botsoalle ba Bokreste ho se na sebete, ke hore, ho se na ho mamellana. Ho joalo hobane bohle ha rea phethahala, ’me ho se phethahale ha rōna le mefokolo ea rōna ke teko ho batho ba bang. Hase feela moapostola Pauluse a thathamisang ntlha ena pele mabapi le seo lerato le leng sona!

16. Ke ka litsela life litho tsa lelapa li ka bontšanang mosa?

¹⁶ Pauluse o re lerato le boetse le “mosa.” Ke hore, lerato lea thusa, le nahanela ba bang. Mosa o itlhahisa linthong tse khōlō le tse nyenyane. Mosamaria ea nang le moea oa boahisani ka sebele o ne a bontša mosa ho monna ea hlasetsoeng ke linokoane. (Luka 10:30-37) Lerato le thabela ho re “ke kōpa.” Ho re, “Fetisa bohobe boo” ke taelo. Ho felehetsa seo ka “ke kōpa” ho se etsa kōpo. Banna ba mosa ho basali ba bona ha ba mamela keletso e ho 1 Petrose 3:7: “Ka mokhoa o joalo, le lōna banna, le phelisane le bona ka hlokomelo, ka ho re, mosali ke pitsa e fetisang ka ho fokola, ’me le ba hlomphe, etsoe e le majalefa hammoho le lōna a mohau oa bophelo, merapelo ea lōna e tle e se ke ea sitisoa.” Basali ba mosa ho banna ba bona ha ba ba bontša “tlhompho e tebileng.” (Ba-Efese 5:33, NW) Bo-ntate ba mosa ho bana ba bona ha ba latela keletso e ho Ba-Efese 6:4: “Lōna bontat’a bana, le se ke la halefisa bana ba lōna; le mpe le ba hōlise ka ho ba laea le ka ho ba rutela Moreneng.”

17. Ke litsela life tse peli tseo ka tsona lerato le thabang le ’nete?

¹⁷ Lerato ha le thabele bokhopo empa “le thabela ’nete.” Lerato le ’nete lia tsamaisana—Molimo o lerato, ’me ka nako e tšoanang ke “Molimo oa ’nete.” (Pesaleme ea 31:5) Lerato le thabela ho bona ’nete e hlōla ’me e pepesa bohata; ka lehlakoreng le leng sena se ikarabella bakeng sa keketseho e khōlō ea lenane la barapeli ba Jehova e ntseng e etsahala kajeno. Leha ho le joalo, kaha ’nete e bapisoa le bokhopo, khopolo e ka boela ea e-ba hore lerato le thaba le ho loka. Lerato le thabela tlhōlo ea ho loka, joalokaha barapeli ba Jehova ba laeloa ho etsa ha Babylona e Moholo e oa.—Tšenolo 18:20.

18. Ke ka kutloisiso efe lerato le mamellang lintho tsohle?

¹⁸ Pauluse o boetse o re bolella hore lerato “le mamella tsohle.” Joalokaha Kingdom Interlinear e bontša, khopolo ke hore lerato le koahela tsohle. Ha le ‘hlahatse phoso’ ea ngoan’abo motho, joalokaha ba khopo ba na le tšekamelo ea ho etsa joalo. (Pesaleme ea 50:20; Liproverbia 10:12; 17:9) E, khopolo mona e tšoana le e ho 1 Petrose 4:8: “Lerato le apesa libe tse ngata.” Ka ho hlakileng, ho tšepahala ho ka etsa hore motho a se koahele libe tse tebileng khahlanong le Jehova le khahlanong le phutheho ea Bokreste.

19. Ke ka tsela efe lerato le lumelang lintho tsohle?

¹⁹ Lerato “le lumela tsohle.” Lerato le na le maikutlo a nepahetseng, eseng a fosahetseng. Sena ha se bolele hore lerato le thetsoa habonolo. Ha le potlakele ho lumela lipolelo tsa bohelehele. Empa hore motho a be le tumelo ho Molimo, o tlameha ho ba le takatso ea ho lumela. Kahoo lerato ha lea tlala lipelaelo, ha le tšoae liphoso ho feta tekanyo. Ha le hane ho lumela joaloka motho ea sa lumeleng hore Molimo o teng, eo ka ho hatella feela a reng ha ho na Molimo, leha e le hore le tšoana le motho ea reng ha ho na bopaki ba hore Molimo o teng, eo ka ho hatella feela a tiisang hore ho ke ke ha etsahala hore re tsebe moo re tsoang teng, lebaka leo re leng teng ka lona, le hore na bokamoso bo tla ba joang. Lentsoe la Molimo le re fa tiisetso mabapi le lintho tsena tsohle. Lerato le boetse le loketse ho lumela hobane lea tšepa, ha le belaele ho feta tekanyo.

20. Ke joang lerato le amanang le tšepo?

²⁰ Moapostola Pauluse o tsoela pele ho re tiisetsa hore lerato “le tšepa tsohle.” Kaha lerato le na le maikutlo a nepahetseng, eseng a fosahetseng, le na le tšepo e matla ho sohle se tšepisitsoeng Lentsoeng la Molimo. Rea bolelloa: “Ea lemang o tšoanetse ho lema ka tšepo, le ea polang a pole a ntse a tšepile hobane le eena o tla ja.” (1 Ba-Korinthe 9:10) Joalokaha lerato le tšepeha, le boetse le na le tšepo, ka linako tsohle le lebella tse molemohali.

21. Ke tiiso efe ea Mangolo e teng ea hore lerato le jara tsohle?

²¹ Qetellong, rea tiisetsoa hore lerato “le jara tsohle.” Le khona ho etsa joalo ka lebaka la seo moapostola Pauluse a re bolellang sona ho 1 Ba-Korinthe 10:13: “Ha le e-so ho ka le hlaheloa ke moleko o sa lekaneng motho; empa Molimo oa tšepeha, o ke ke oa lumela hore le hlaheloe ke moleko o ka le sitang; empa moleko ha o le teng, o tla le etsetsa le sebaka sa ho tsoa ho oona, le tle le tsebe ho o jara.” Lerato le tla etsa hore re talime mehlala e mengata e ka Mangolong ea bahlanka ba Molimo ba ileng ba mamella, ’me ea ka sehloohong ho bona e leng Jesu Kreste, joalokaha re hopotsoa ho Ba-Heberu 12:2, 3.

22. Joaloka bana ba Molimo, ke tšobotsi efe ea bohlokoa bo boholo eo ka linako tsohle re tlamehang ho ameha ka ho e bonahatsa?

²² Kannete, lerato (a·gaʹpe) ke tšobotsi ea bohlokoahali eo rōna joaloka Bakreste, Lipaki tsa Jehova, re lokelang ho e hlaolela, mabapi le seo le seng sona hape le seo le leng sona. Joaloka bana ba Molimo, e se eka ka linako tsohle re ka ameha ka ho bonahatsa tholoana ena ea moea oa Molimo. Ho etsa joalo ke ho ba joaloka Molimo, hobane, hopola, “Molimo o lerato.”

Na U sa Hopola?

◻ Jesu Kreste le Pauluse ba bontša bohlokoa bo boholo ba lerato joang?

◻ Ke ka kutloisiso efe lerato le sa bouleleng?

◻ Ke joang lerato le ‘mamellang lintho tsohle’?

◻ Ke hobane’ng ha ho ka boleloa hore le ka mohla lerato ha le ka ke la timela?

◻ Ke ka litsela life tse peli lerato le thabang le ’nete?

[Lebokose le leqepheng la 21]

LERATO (AGAPE)

Seo le Seng Sona Seo le Leng Sona

1. Ha le boulele 1. Sebete

2. Ha le ikhantše 2. Mosa

3. Ha le ikhohomose 3. Le thaba le ’nete

6. Ha le halefe 6. Le tšepa lintho tsohle

7. Ha le hopole bobe 7. Le jara lintho tsohle

8. Ha le thabele bokhopo

[Litšoantšo tse leqepheng la 18]

Jehova o ile a kokobetsa Nebukadnezare ka lebaka la ho ikhantša