Le ’ne le Khothatsane ha Letsatsi le Ntse le Atamela
“[Le] khothatsane, haholo etsoe le bona letsatsi le ntse le atamela.”—BA-HEBERU 10:25.
1, 2. Ke letsatsi lefe le ntseng le atamela, ’me batho ba Jehova ba lokela ho ba le boikutlo bofe?
KAJENO ba kopanelang memong e reng, ‘Tloong le tl’o noa metsi a bophelo,’ ha ba itšehle thajana. Ha letsatsi le leholo la tlhōlo ea Jehova le ntse le atamela, ba sebelisa keletso ea Bibele: “A re lebelaneng, re tle re isane ka cheseho leratong le mesebetsing e metle. Re se ke ra ngala liphutheho tsa rōna, kamoo e leng mokhoa oa ba bang; re mpe re khothatsane, haholo etsoe le bona letsatsi le ntse le atamela.”—Ba-Heberu 10:24, 25.
2 Mangolo a profeta ka “letsatsi” leo e le “letsatsi la Jehova.” (2 Petrose 3:10, NW) Joalokaha Jehova e le Molimo o Holimo-limo, o matla ’ohle, ho hang ho ke ke ha ba le letsatsi le khanyang ho feta letsatsi la hae. (Liketso 2:20, NW) Le bolela ho tlosoa ha qoso bobusing ba hae e le Molimo bokahohleng bohle. Letsatsi leo la bohlokoa ka ho fetisisa le ntse le atamela.
3. Ke joang letsatsi la Jehova le neng le ntse le atamela ho Bakreste lekholong la pele la lilemo, hona ho thoe’ng tabeng ea rōna kajeno?
3 Moapostola Pauluse o ile a bolella Bakreste ba lekholong la pele la lilemo la Mehla ea rōna e Tloaelehileng hore letsatsi la Jehova le ntse le atamela. Ba ne ba lebelletse ho tla ha letsatsi leo, empa morao koo, letsatsi leo le ne le sa ntsane le le bohōle ba lilemo tse fetang 1 900. (2 Ba-Thessalonika 2:1-3, NW) Ho sa tsotellehe ’nete eo, ba ile ba khothatsoa hobane joang kapa joang letsatsi leo le ne le tla tla, ’me haeba Bakreste ba ne ba ka tsoela pele ho tiisetsa tumelong eo, ba ne ba tla kena letsatsing leo le hlohonolofalitsoeng. (2 Timothea 4:8) Morao koo, ho ile ha bonahala hore letsatsi leo le ntse le atamela. Ha e le tabeng ea rōna kajeno, ka sebele letsatsi la Jehova le se le atametse. Phethahatso eohle e tsotehang ea boprofeta ba Bibele e tiisa ’nete ena e thabisang. Haufinyane, lebitso la Molimo oa rōna, Jehova, le tla halaletsoa ka ho sa feleng.—Luka 11:2, BPN.
Ho Khothatsoa ke Lebitso la Molimo
4. Ho latela Tšenolo 19:6, ke mang ea fetohang Morena, hona lebitso la hae le hlokomeleha joang?
4 Lebitso la Molimo e lokela ho ba taba e thahaselloang ke lelapa lohle la batho. Today’s English Version e re: “Rorisang Molimo! Hobane Morena, Molimo oa rōna o Matla ’Ohle, ke Morena!” (Tšenolo 19:6) Ho latela phetolelo eo ea Bibele ea lekholong la bo20 la lilemo, ke Morena, Molimo o matla ’ohle. Phetolelo eo, hammoho le liphetolelo tse ling tse ngata tsa kajeno, ha e fane ka lebitso la Boleng ba bomolimo bo qalang ho busa e le Morena. Leha ho le joalo, lebitso la Molimo le akarellelitsoe phatlalatsong e reng “Alleluya!” (“Rorisang Jah” kapa, “Rorisang Jehova”) e fumanoang ho Revised Standard Version, New International Version, le phetolelo ea Moffatt ea Tšenolo 19:6. Karolong e khōlō ea Mehla ea rōna e Tloaelehileng, ha e le hantle lebitso la Molimo le ’nile la patoa liphetolelong tsa Bibele. Leha ho le joalo, joalokaha re tla bona, lebitso leo e ’nile ea e-ba khothatso e khōlō ho batho ba Molimo, mehleng ea boholo-holo esita le mehleng ea kajeno.
5, 6. (a) Ke hobane’ng ha ho ne ho hlokahala hore Moshe a tsebe lebitso la Molimo oo eena e neng e le moemeli oa oona? (b) Ha Moshe a hatisa lebitso la Molimo e tlameha e be phello e ile ea e-ba efe ho Baiseraele?
5 Rea hopola hore ha Molimo o Holimo-limo o romela Moshe sechabeng sa Iseraele se neng se entsoe makhoba naheng ea Egepeta, potso ea hore na o romiloe ke mang e ile ea hlaha likelellong tsa batho bao Moshe a neng a rometsoe ho bona. Moshe o ne a lebelletse hore sechaba sa Bajode se hlokofatsoang se ne se tla batla ho tseba lebitso la Molimo oo eena e neng e le moemeli oa oona. Ntlheng ena ho Exoda 3:15 rea bala: “Molimo oa eketsa oa re ho Moshe: U tle u re ho bana ba Iseraele: Jehova, Molimo oa bo-ntat’a lōna, Molimo oa Abrahama, Molimo oa Isaaka, Molimo oa Jakobo, o nthomile ho lōna. Ke lona lebitso la ka ka ho sa feleng, ’me ke eona khopotso ea ka melokong le melokong.”
6 E tlameha e be Baiseraele ba ile ba ikutloa ba khothetse haholo ha boitsebiso bona bo hatisoa ho bona. Molimo o le mong feela oa ’nete, Jehova, o ile oa tiisa hore o tla ba lopolla. ’Me e tlameha e be e ile ea e-ba ho khothatsang hakaakang ho ba le tebello ea ho tseba Molimo hamolemonyana ha o bontša se boleloang ke lebitso la oona la botho—o sa itšehle thajana ka boikakaso!—Exoda 3:13; 4:29-31.
7. (a) Re tseba joang hore barutuoa ba Jesu ba ne ba tseba lebitso la Molimo hantle? (b) Lebitso la Molimo le ile la patoa joang?
7 Barutuoa ba Morena Jesu Kreste le bona ba ile ba khothatsoa haholo ke lebitso la Molimo, Jehova, le seo le neng le se emela. (Johanne 17:6, 26) Nakong ea tšebeletso ea Jesu ea lefatšeng, ka sebele ha aa ka a pata lebitso la Molimo, ’me morero oa hae e ne e se hore lebitso la hae ka boeena, Jesu, e be lona le hlahellang ka holimo-limo. E bile feela ka mor’a ho qaleha ha bokoenehi bo boletsoeng esale pele tumelong ea ’nete ea Bokreste lebitso la Molimo le ileng la qala ho patoa, e, la hla la felisoa lipuisanong tsa Bakreste. (Liketso 20:29, 30) Hang ha lebitso la Mora oa Molimo le qala ho phahamisoa haholo, hore le koahele lebitso la Ntate, ba ipolelang hore ke Bakreste ba ne ba tla fumana borapeli ba bona ho Ntate bo ntse bo tsoela pele ho fetoha bo hlileng bo sa lebeng ho motho oa sebele, bo hlokang tlamahano ea lelapa, le bo sa khothatseng.
8. Ho amohela lebitso Lipaki tsa Jehova ho ’nile ha tsoela pele ho ba le phello efe ho batho ba Molimo?
8 Ka hona, ka 1931 ha Liithuti tsa Bibele tsa Machaba tse neng li kopanela le Mokhatlo oa Watch Tower li amohela lebitso Lipaki tsa Jehova hoo ho ile ha tlisa thabo e ke keng ea hlalosoa. Ha ea ka ea e-ba ho thabisang feela empa hape e ile ea e-ba ho khothatsang ka ho fetisisa. Ka lebaka lena, liithuti tsa Bibele tse neng li sa tsoa fumana lebitso le lecha li ne li ka khothatsana.—Bapisa le Esaia 43:12.
9. Bakreste ba ’nete ba ikutloa joang ka Eo bona e leng Lipaki tsa hae?
9 Ka baka leo, kajeno Bakreste ba ’nete ba ho fumana e le ho loketseng ho tsebahatsa Eo bona e leng Lipaki tsa hae tse boletsoeng esale pele, joalokaha le Moeta-pele oa bona Jesu Kreste a ile a mo tsebahatsa ha a le mona lefatšeng. (Tšenolo 1:1, 2) E, ba mo tsebahatsa e le eena feela eo lebitso la hae e leng Jehova.—Pesaleme ea 83:18.
Ho Tlala Thabo le Moea o Halalelang
10-12. (a) Matla a sebetsang a ne a tla ba le phello efe holim’a balateli ba Jesu? (b) Lipaki tsa Jehova tse thabileng li batla ho tšoarana joang?
10 Mantsoeng a hae ha a arohana le baapostola ba hae Jesu Kreste o ile a re: “E-eang ke hona, le rute lichaba tsohle; le ba kolobetse ka lebitso la Ntate, le la Mora, le la Moea o Halalelang; ’me le ba rute ho boloka tsohle tseo ke le laetseng tsona. ’Me bonang, ’na, ke na le lōna ka mehla eohle, ho isa bofelong ba lefatše.”—Mattheu 28:19, 20.
11 Hlokomela hore Bakreste ba neng ba sa tsoa rutoa ba ne ba lokela ho kolobetsoa ka lebitso la moea o halalelang. Moea ona o halalelang hase motho empa ke matla a sebetsang a Jehova Molimo, ao A a sebelisang ka Jesu Kreste. Ka Pentekonta, Jehova Molimo, a sebelisa Jesu, o ile a tšollela matla ana a sebetsang holim’a balateli ba Jesu Kreste ba inehetseng. (Liketso 2:33, NW) Ba ile ba tlala moea ona o halalelang, ’me e ’ngoe ea lipontšo, kapa litholoana tsa moea o halalelang ke thabo. (Ba-Galata 5:22, 23; Ba-Efese 5:18-20) Thabo ke tšobotsi e susumetsang. Barutuoa ba lokela ho tlala thabo ea moea o halalelang. Thapelo eo moapostola Pauluse a ileng a e etsa ke e loketseng haholo: “Joale, Molimo oa tšepo o le tlatse ka thabo eohle le ka khotso eohle tumelong, tšepo ea lōna e tle e ekeletsoe ka matla a Moea o Halalelang.”—Ba-Roma 15:13.
12 Li tletse moea ona o thabisang, kajeno Lipaki tsa Jehova, ho akarelletsa “bongata bo boholo ba batho,” li tla batla, e, li tla susumelletseha ho khothatsana har’a tsamaiso ena ea lintho e hlokang botsoalle. Tumellanong le hoo, moapostola Pauluse o ile a bua ka “phapanyetsano ea khothatso.”—Tšenolo 7:9, 10; Ba-Roma 1:12, NW; 14:17.
Mabaka ’Ohle a ho Khothala
13. Re na le mabaka afe a ho khothala le ho khothatsana?
13 Ha e le mona Bakreste ba iphumana ba le ka har’a tsamaiso ena ea lintho, eo ’musi esita le molimo oa eona e leng mohanyetsi oa ntho e ’ngoe le e ’ngoe e lokileng, ba tla batla ho khothatsana ka har’a phutheho ea Bokreste ea lefatše ka bophara, e tletseng moea o halalelang oa Jehova Molimo. (Ba-Heberu 10:24, 25; Liketso 20:28, NW) Re na le mabaka ’ohle a ho khothala. E, re leboha hakaakang hore e be re na le tsebo e nepahetseng ea Jehova le Mora oa Hae le matla a sebetsang ao ba a sebelisang, e leng moea o halalelang! Re leboha hakaakang bakeng sa tšepo eo ba fanang ka eona! Ka hona borapeli ba rōna bo tletse thabo. Moapostola Pauluse o ile a bolella Bakreste bao a neng a lebisitse lengolo la hae ho bona hore ba lokela ho khothatsana le ho matlafatsana tumelong ea bona e halalelang ka ho fetisisa. Ba ne ba lokela ho etsa sena ‘haholo etsoe ba ne ba bona ka tsela ea tšoantšetso hore letsatsi le ntse le atamela.’ Ho feta moo, ha mebuso ea lipolotiki ea lefatše lena e felisa Bokreste ka lebitso, hammoho le malumeli a mang kaofela a bohata, boemo boo bo tla hloka hore re khothatsane ka ho eketsehileng.
14. Ke bo-mang ba lokelang ho khothatsana, hona joang?
14 Le hoja baholo ba etella pele ho khothatseng mohlape liphuthehong tsa habo bona ka ho fapana, ho hlokahala hore Bakreste bohle ba khothatsane, feela joalokaha Ba-Heberu 10:25 e lemosa. Ha e le hantle, ena ke tlhokahalo ea Bokreste. Haeba u setho sa phutheho, na u fana ka khothatso ee? U ka ’na ua ipotsa, ‘Nka fana ka eona joang? Nka etsa’ng?’ Taba ea pele, ka ho ba teng ha hao feela libokeng le ka ho tšehetsa ha hao tokisetso eo ea Bokreste, na baena le bo-khaitseli ba bang kaofela ha ba khothale, feela joalokaha mohlomong le uena u khothala ha u bona ba bang ba e-ba teng ka botšepehi libokeng tsa phutheho? Le bona ba ka khothatsoa ke mohlala oa hao oa ho tiisetsa ka botšepehi. Ka ho tsoela pele ha hao tseleng ea Bokreste ho sa tsotellehe mathata a boima a bophelo, le ka mohla u sa khathale, u ka beha mohlala o susumetsang.
Loantša ho Nyahamisoa ke Diabolose
15. Ke hobane’ng ha Diabolose a “halefile hampe,” hona o halefetse bo-mang?
15 Hase rōna feela ba tsebang hore letsatsi la Jehova le atametse. Satane Diabolose le eena o tseba hoo. Tšenolo 12:12 e re bolella hore hona joale lefatše le malimabe “hobane Diabolose o theohetse ho lōna a halefile hampe, ka ho tseba hobane nako ea hae ha e sa le ekae.” Joalokaha Tšenolo 12:17 e bontša, khalefo ea hae e khōlō e lebisitsoe ho “ba bolokileng litaelo tsa Molimo, ba nang le bopaki ba Jesu.” Ntle le tika-tiko—Diabolose o batla ho re nyahamisa! ’Me oa tseba hore na a ka leka ho etsa hoo joang. O tseba mefokolo le mathata a rōna, ’me o nka monyetla ka ’ona.
16. Ke hobane’ng ha Satane a sebelisa ho nyahama e le sebetsa?
16 Ke hobane’ng ha Diabolose a sebelisa ho nyahama e le sebetsa? Hobane hangata hoa sebetsa. Esita le motho ea ’nileng a mamella khanyetso e tobileng le mahloriso a ka ’na a hlaseloa ke ho nyahama. Satane o batla ho soma Jehova Molimo le ho leka ho paka hore a ka etsa hore batho ba furalle ho Mo sebeletsa. (Liproverbia 27:11; bapisa le Jobo 2:4, 5; Tšenolo 12:10.) Haeba a ka u nyahamisa, a ka etsa hore u khoehlise tšebeletsong ea hao ho Molimo; a ka ba a etsa hore u khaotse, u felloe ke mafolo-folo a ho bolela litaba tse molemo tsa ’Muso.—2 Ba-Korinthe 2:10, 11; Ba-Efese 6:11; 1 Petrose 5:8.
17. Liphello tse mpe tsa ho nyahama li ile tsa bonahala joang nakong ea Moshe?
17 Liphello tse mpe tsa ho nyahama li ka hlokomeloa tabeng ea Baiseraele ha ba le Egepeta ea boholo-holo. Ka mor’a hore Moshe a buisane le Faro, mohatelli eo o ile a eketsa mejaro ea bona le khatello ea hae holim’a bona haholo. Molimo o ile oa bolella Moshe hore a kholise Baiseraele hore ka sebele O ne o tla ba lopolla, o ba fetole sechaba sa Oona, o ba pholose, ’me o ba kenye naheng e tšepisitsoeng. Moshe o ile a bolella bara ba Iseraele sena. Empa Exoda 6:9 (BPN) ea tlaleha: “Ha baa ka ba mo mamela, ka baka la ho nyahama lipelo, le ka baka la bokhoba bo thata.” Karabelo ena ea bona e ile ea ba ea nyahamisa Moshe hoo a neng a se a sa batle ho bua le Faro joalokaha a laetsoe, ho fihlela ha Jehova a fa Moshe kholiseho ’me a mo khothatsa.—Exoda 6:10-13.
18. Ke hobane’ng ha ho e-na le tlhokahalo e khōlō ea hore batho ba Molimo ba loantše ho nyahama ho bakoang ke Diabolose?
18 Satane Diabolose o tseba hantle phello e mpe eo ho nyahama ho ka bang le eona ho mohlanka oa Molimo. Ho joalokaha Liproverbia 24:10 (BPN) e re: “Haeba u nyahama pelo mohl’a litsietsi, u fela u fokolloa ke matla.” Kaha re phela ka hare-hare ho nako ea bofelo, ho hlokahala hore re matlafale ’me re tiee matla moeeng. Ho se ho ntse ho le hobe ka ho lekaneng hore e be re lokela ho loantša ho se phethahale, mefokolo, le liphoso tsa rōna tse ka ’nang tsa re sitisa ho tsoela pele; empa ha e le mona Satane a leka ho nka monyetla ka liphoso tsena, re hloka thuso.
Itšetlehe ka Tieo ka Sehlabelo sa Kreste
19. Ke eng e tla re thusa ho loantša ho nyahama, hona hobane’ng?
19 Thuso e khōlō ntlheng ena ke tokisetso ea topollo eo Jehova a entseng hore e fumanehe ka Jesu Kreste. Re ka ba bahlōli ka hore re itšetlehe ka tieo ka topollo. Ho nyenyefatsa tokisetso ena ho kotsi. E, re ntse re tla etsa liphoso, kapa re sitoe, hafeela re ntse re sa phethahala. Empa ha ho hlokahale hore re nyahame e be rea emisa, re ikutloa hore ha ho sa na tšepo, eaba re oela lerabeng la Satane. Rea tseba hore re na le sehlabelo se felletseng sa sebe. Topollo eo e khona ho tlosa libe. Haeba re le ba “bongata bo boholo ba batho,” re tlameha ho ba le tumelo le tšepo tse felletseng tsa hore re ka hlatsoa liaparo tsa rōna tse telele ’me ra li soeufatsa maling a Konyana.—Tšenolo 7:9, 14.
20. Tšenolo 12:11 e bontša joang hore mohlohlelletsi e moholo oa ho nyahama, Diabolose, a ka hlōloa?
20 Ho Tšenolo 12:10 Satane o hlalosoa e le ‘monģosi oa banab’abo rōna . . . ea ba nģosang pel’a sefahleho sa Molimo motšehare le bosiu.’ Re ka hlōla monģosi ea khopo le mohlohlelletsi e moholo hakaalo oa ho nyahama joang? Temana ea 11 khaolong eona eo e fana ka karabelo: “Ba mo hlōtse ka mali a Konyana, le ka lentsoe la bopaki ba bona; [’me] ha ba ka ba re letho ka bophelo ba bona, ho isa lefung.” Kahoo ho hlokahala hore batho ba Jehova ba lule ba e-na le kholiseho e felletseng sehlabelong sa topollo, maling a Konyana. Ipoloke u e-na le khothatso e matla e tlisoang ke ho fana ka bopaki, ho arolelana litaba tse molemo tsa ’Muso oa Molimo ka mehla le e mong le e mong eo u ka khonang ho li arolelana le eena.
21. Ke joang re ka ’nang ra kopanela mosebetsing oa Diabolose oa ho nyahamisa baena ba rōna re sa ikemisetsa?
21 Ka linako tse ling, mohlomong re bile re sa ikemisetsa, re ka kopanela mosebetsing oa Diabolose oa ho nyahamisa baena ba rōna. Joang? Ka ho ba ba nyatsa-nyatsang haholo, ba lebelletseng ho hongata haholo ho ba bang, kapa ka ho iketsa ba lokileng ka ho fetisisa. (Moeklesia 7:16) Kaofela ha rōna re na le likhaello le mefokolo. A re se keng ra nka monyetla ka tsona joaloka Diabolose. Ho fapana le hoo, a re bueng ka tsela e khothatsang ka baena ba rōna le batho ba Jehova joaloka sehlopha se hlophisitsoeng. Re batla ho tsoela pele ho matlafatsana le ho qoba ho tepelletsana.
Ho Khothatsana ha Letsatsi le Ntse le Atamela
22, 23. (a) Ke hobane’ng ha re sa lokela ho tlohella taba ho baholo hore e be bona feela mehloli ea khothatso? (b) Balebeli ba ka khothatsoa joang ka phuthehong ea Bokreste?
22 Re lokela ho ba le boikemisetso bo matla ba ho khothatsana ka mehla ha letsatsi le ntse le atamela. Khothatsa ba bang ka mohlala oa hao oa botšepehi le ka mantsoe a tšelisang. Etsisa Jehova le Morena Jesu Kreste ntlheng ena. U se ke ua tlohela taba ho baholo ba phutheho hore e be bona feela mohloli oa khothatso. Etsoe baholo ka bobona ba hloka khothatso. Ba na le mefokolo feela joaloka karolo e ’ngoe kaofela ea mohlape, ’me ba lokela ho loana le mathata a tšoanang a ho hlokomela malapa a bona lefatšeng le ntseng le tsoela pele ho senyeha. Ho phaella moo, ba na le seo Pauluse a ileng a se hlalosa e le ho tšoenyeha ka liphutheho. (2 Ba-Korinthe 11:28, 29, NW) Mosebetsi oa bona o boima—ba hloka khothatso.
23 U ka fana ka khothatso e khōlō ho ba maemong a bolebeli ka phuthehong ea Bokreste ka ho sebelisana le bona. Joale u tla be u latela keletso ea Ba-Heberu 13:17 (NW): “Utloang ba etelletseng pele har’a lōna ’me le ikokobetse, hobane ba lebetse liphefumolohi tsa lōna joaloka ba tla fana ka tlaleho; e le hore ba ka etsa sena ka thabo eseng ka ho tletleba, hobane sena se ne se tla le ntša kotsi.”
24. Nakong ena ea ho nyahama, re lokela ho tsoela pele ho etsa’ng, hona hobane’ng?
24 Re phela nakong ea ho nyahama. Joalokaha Jesu a boletse esale pele, lipelo tsa batho li tepellelitsoe ke tšabo le tebello ea lintho tse tlelang lefatše leo ho ahiloeng ho lona. (Luka 21:25, 26, NW) Ha e le mona ho e-na le mathata a mangata hakana a bakang khatello le a tepelletsang, le ’ne le “khothatsane, haholo etsoe le bona letsatsi le ntse le atamela.” Latela keletso e ntle ea moapostola Pauluse e ho 1 Ba-Thessalonika 5:11 (BPN): “Le ke le tšelisane, ’me le matlafatsane, joalokaha le fela le etsa.”
U ne U Tla Arabela Joang?
◻ Ke hobane’ng ha Bakreste ba lokela ho tsoela pele ho khothatsana haholo ho feta pele?
◻ Ho tseba lebitso la Molimo ho ’nile ha khothatsa batho ba Jehova joang?
◻ Re le batho ka bomong re ka khothatsana ka litsela life?
◻ Ke hobane’ng ha re tlameha ho qoba ho kopanela mosebetsing oa Diabolose oa ho nyahamisa baena ba rōna?
[Setšoantšo se leqepheng la 17]
Baholo ba etella pele ho khothatseng mohlape ka liphuthehong tsa habo bona