Ho Sebeletsa re le Basebetsi-’moho le Jehova Ba Mo Tšepang

“Uena motho oa lefatše, O u boleletse, ho leng molemo. ’Me ke eng seo Jehova a se batlang ho uena ha e se hore u sebetse ka tōka ’me u rate mosa le hore u ikokobetse ha u tsamaea le Molimo oa hao?”—MIKEA 6:8, NW.

 1. Ke motheong ofe oa Mangolo bahlanka bohle ba Jehova kajeno ba ka bitsoang “basebetsi-’moho” le eena?

MOAPOSTOLA oa Mokreste Johanne o ile a ngola: “Bonang! lerato leo Ntate a re ratileng ka lona le lekakang, ha re bitsoa bana ba Molimo! Re fela re le bona.” (1 Johanne 3:1) ’Me moapostola Pauluse o ile a re ka eena le ka motsoalle oa hae Apollose: “Re basebetsi-’moho le Molimo.” (1 Ba-Korinthe 3:9, NW) Lipolelo tsena ka bobeli li entsoe ke balateli ba Jesu Kreste ba tlotsitsoeng ’me li ne li bua ka bona. Empa ha ho tluoa ’neteng ea taba li sebetsa ho bahlanka bohle ba ’nete ba Molimo. Kahoo li ka ’na tsa beoa ka mantsoe a reng: ‘Bonang hore na ke lerato le lekaakang leo Ntate a re fileng lona ka hore e be re basebetsi-’moho le Jehova.’

 2. Ke hobane’ng ha ho ka etsahala hore bahlanka ba Jehova e be basebetsi-’moho le eena?

² Ho ka etsahala joang hore batho ba fokolang, ba sa phethahalang e be basebetsi-’moho le ’Mōpi e moholo, ea nang le matla le bohlale tse ke keng tsa lekanngoa, ea phethehileng ka tōka, le eo e leng mothofatso ea lerato? Hona ho ka etsahala kahobane batsoali ba rōna ba pele ba ne ba entsoe ka setšoantšo le ka ho tšoana le ’Mōpi le mosebetsi-’moho le eena, Lentsoe, kapa Logos. (Genese 1:26, 27; Johanne 1:1) Kahoo batsoali ba rōna ba pele ba ne ba neiloe tekanyo eitseng ea bohlale, tōka, matla le lerato. Ke ka hona Jehova a neng a ka re ho bahlanka ba hae ba lefatšeng ka moprofeta oa hae: “Uena motho oa lefatše, O u boleletse, ho leng molemo. ’Me ke eng seo Jehova a se batlang ho uena ha e se hore u sebetse ka tōka ’me u rate mosa le hore u ikokobetse ha u tsamaea le Molimo oa hao?”—Mikea 6:8, NW.

 3. Mikea 6:8 e fana ka moelelo ofe, ’me ho hlokoa eng ho motho pele e ka ba e mong oa basebetsi-’moho le Jehova?

³ Ha re bala mantsoe ana, “Ke eng seo Jehova a se batlang ho uena ha e se . . . ?” ho bonahala ho fanoa ka moelelo oa hore ho latelang ho bolela ka bokhutšoanyane boikarabelo ba ‘motho oa lefatše’ ho Molimo le ho batho ba bang. Hore na ke ho isa boholeng bofe hona ho hlileng ho leng joalo ho tla hlaka ha puisano ea rōna e ntse e tsoela pele. Ka sebele hase mang kapa mang feela ea ka tsamaeang le Jehova. Tlotla ena e boloketsoe ba ‘kopaneng le eena ka ho khethoa,’ kamoo ho ka boleloang kateng. (Amose 3:3, NW) Ho joalo joang? Ka hore e be motho o entse boineelo a sa itšiele letho ho Jehova ’me a tšoantšetsa hona ka kolobetso ea metsing, joalokaha ho bontšitsoe sehloohong se kapele. Kahoo, Mikea 6:8 e bolela eng ho batho baa?

‘Ho Sebelisa Tōka’

 4. Ha e le hantle, ‘ho sebelisa tōka’ ho bolela eng?

⁴ Ho tloha qalong, ho na le tlhokahalo ea ho ‘sebelisa tōka.’ Joaloka basebetsi-’moho le Jehova Molimo, re tlameha ho ba le letsoalo le letle. Ho ‘sebelisa tōka’ ha e le hantle ho bolela ho etsa ho nepahetseng, seo Molimo o se hlokang ho rōna. Hona ho bolela hore re tlameha ho phethahatsa litlamo tsa rōna, e ka sehloohong e le ho nea Jehova borapeli bo khethehileng. (Nahume 1:2, NW) Ha a mamelle ho qothisana lehlokoa le e mong. Ho hang re ke ke ra sebeletsa marena a mabeli.—1 Ba-Korinthe 10:22; Mattheu 6:24.

 5. Jesu Kreste o ile a bontša joang hore o ne a rata ho loka ’me a hloile bokhopo?

⁵ Ntle le moo, ho ‘sebelisa tōka,’ re tlameha ‘ho rata ho loka le ho hloea bokhopo,’ joalokaha Jesu Kreste a entse. Ka baka la ho rata ha hae ho loka, o ile a ipoloka e le “ea se nang molato, ea se nang letheba, ea ka hosele ho baetsalibe.” (Pesaleme ea 45:7; Ba-Heberu 7:26) Hape kahobane Jesu o ne a hloile bokhopo, e ne e le ka ho khopeha ho lokileng ha a nyatsa ka matla baeta-pele ba bolumeli ba meharo ba mehleng ea hae.—Mattheu 23:13-36; Johanne 8:44.

 6. Ke hobane’ng ha re hloka ho fetang feela hore likelello tsa rōna li amohele hore re lokela ho qoba ho thibetsoeng hobane ho le hobe?

⁶ Joalokaha ho ka bonoa mohlaleng oa Jesu, ho rata ho loka ha hoa lekana. Hape re tlameha ho hloea—e, ho nyonya, ho talima joaloka manyala, ho nena, ho ba le boikutlo bo matla ba lehloeo bakeng sa—ho hobe. Kahobane litšekamelo tsa rōna li mpe ho tloha bocheng ba rōna ’me lipelo tsa rōna li tletse thetso, li mano, re hloka ho fetang feela hore likelello tsa rōna li amohele hore ho hobe ho thibetsoe. (Genese 8:21; Jeremia 17:9) Ntle le hore re hanyetse ka matla litšekamelo tsa sebe le liteko, re tla ineela ho hoheleng ha tsona. Re tlameha ho ba le lehloeo le matla ka ho tšoanang bakeng sa ho hobe joaloka leo Finease a ileng a le bontša ha a ne a sebelisa lerumo ho hlaba monna le mosali ba neng ba kopane borapeling ba boitšoaro bo bobe ba Baale-Peore.—Numere 25:5-8.

 7. Re na le bopaki bofe ba hore Jehova ha a sebelise batho leha e le bafe ba khopo e le basebetsi-’moho le eena?

⁷ Jehova ha a batle batho leha e le bafe ba khopo e bile ha a na ho ba sebelisa e le basebetsi-’moho le eena. Hona ho hlakisoa Pesalemeng ea 50:16-18, moo re balang: “Empa Molimo o re ho molotsana: U etsa’ng, ha u bolela melao ea ka? Molomo oa hao o bolela selekane sa ka ke’ng, ha e le moo u hloile ho lauoa, u lahletse mantsoe a ka ka mor’a hao? Ha u bona lesholu, u titimela ho lona, u tloaelane le bafebi.”

 8. Ke ketsahalo efe e hatisang thohako eo re ka e tlisang ka ho ineela ho etsa ho fosahetseng?

⁸ Re ka ’na ra ipoloka re tšoarehile tšebeletsong ea Jehova, re bolela litaba tse molemo tsa ’Muso oa Molimo. Empa haeba re sa ele hloko ka ho fetisisa ho sebelisa boitšoaro, re ka ’na ra oela sebeng ka baka la mefokolo ea nama ’me ra tlisa thohako lebitsong la Jehova. Ka hona, lilemong tse seng kae tse fetileng moholo e mong o ile a feba le khaitseli ea hae moeeng e neng e e-na le monna ea sa lumelang. Bosiung boo ka bona ho neng ho phatlalatsoa ho khaoloa ha eo e neng e le moholo, monna oa khaitseli eo ea neng a khobohetsoe o ile a ikakhela ka Holong ea ’Muso a tšoere sethunya se senyenyane ’me a thunya batho ba babeli ba neng ba le molato. Ha ho ea ileng a shoa ho bona, empa letsatsing le hlahlamang hona e ne e le tsona litaba tse leqepheng le qalang la koranta e khōlō ka ho fetisisa United States! Ruri ho etsa ho fosahetseng ho tlisa thohako.—Liproverbia 6:32.

 9. Ho latela Liproverbia 4:23, re tlameha ho boloka eng, hona hobane’ng?

⁹ Kahoo, ka ho loketseng, rea eletsoa: “Boloka pelo ea hao ka ho fetisisa, hobane ke eona mehloli ea bophelo.” (Liproverbia 4:23) E, re tlameha ho ikhalemela mabapi le hore na seo re lumellang lipelo tsa rōna tsa tšoantšetso ho lula ho sona ke sefe. Ka bongata bo ntseng bo eketseha, thelevishine, limakasine, le mekhoa e meng ea ho phatlalatsa litaba li bontša lintho tse litšila, ho akarelletsa libuka tsa bootsoa. Ka hona, re tlameha ho ba ba hloaeang haholo mabapi le seo re se shebellang, re se mamelang, le seo re se balang. Ho laola monahano oa motho ke ha bohlokoa haholo! Ka mohlala, ho ka ’na ha e-ba bobebe ho thabisoa ke ho nahana ka litoro tsa botona le botšehali ka likelellong tsa rōna, lintho tseo re neng re ke ke ra nahana ho leka ho li etsa bophelong ba sebele. (Mattheu 5:28) Empa hangata monahano o joalo o qetella ka liketso tse mpe. Ho e-na le ho lumella likelello tsa rōna hore li lule litabeng tse joalo, a re ke re bontšeng tholoana ea moea o halalelang ea boitšoaro ’me menahano ea rōna e lule linthong tse thathamisitsoeng ho Ba-Filippi 4:8.—Ba-Galata 5:22, 23.

“U Rate Mosa”

10, 11. (a) Ho ka etsoa khethollo efe pakeng tsa ho tšepahala le botšepehi bo nang le boitelo? (b) Mora oa Molimo o ile a bontša ho tšepahala le botšepehi bo nang le boitelo joang?

¹⁰ Tlhokahalo ea bobeli e boletsoeng ho Mikea 6:8 ke hore re “rate mosa.” “U rate botšepehi bo nang le boitelo” ke tsela eo The New English Bible e balehang ka eona mona. Mongolo o botlaaseng ba leqephe ho New World Translation Reference Bible o bontša hore lentsoe la Seheberu cheʹsedh, le fetoletsoeng e le “mosa,” le ka boela la fetoleloa e le “mosa o lerato” kapa “lerato le nang le botšepehi bo nang le boitelo.” Ho latela baetsi ba libuka tse hlalosang mantsoe, “botšepehi bo nang le boitelo bo na le moelelo oa khanyetso e tiileng molekong ofe kapa ofe oa ho furalla kapa ho eka.” “Botšepehi bo nang le boitelo bo ekelletsa ho ho tšepahala khopolo ea ho batla ho ema le motho le ho batla ho mo loanela kapa ho ema le ntho e ’ngoe eitseng le ho batla ho e loanela, esita le har’a mathata a boima.” Ka ho thahasellisang, ka Mangolong re boetse re fumana phapang e nyenyane tšebelisong ea mantsoe ana. Ka mohlala, ha ho mohla polelo “botšepehi bo nang le boitelo” e sebelisoang bakeng sa lintho tse sa pheleng. Empa polelo “ho tšepahala” e sebelisoa joalo ka makhetlo. Ke ka hona khoeli e bitsoang “paki eo e tšepahalang e maholimong.” (Pesaleme ea 89:37, TLP) Hape, mantsoe a Molimo le ’ona a boleloa e le a tšepahalang, ke hore, ao ho ka itšetlehoang ka ’ona.a (Tšenolo 21:5; 22:6) Leha ho le joalo, botšepehi bo nang le boitelo bo sebelisoa feela ho Jehova le bahlanka ba hae ba amohelehang. Tumellanong le hoo, mabapi le Jehova, rea bala: “Ho motho ea iteletseng ho tšepahala u tla sebetsa ka botšepehi bo nang le boitelo.”—2 Samuele 22:26, NW.

¹¹ Mora oa Molimo o ne a tšepahala a bile a na le botšepehi bo nang le boitelo ho Jehova leholimong. Ha a le lefatšeng, o ile a feta har’a liteko e le motho Jesu Kreste ’me a paka ka kutlo ea hae hore o ne a tšepahala a bile a iteletse ho tšepahala ha e ntse e le motho. Sena se bontšoa ke Ba-Heberu 5:7-9, moo re balang: “Ke Jesu eo, mehleng ea nama ea hae, ea kileng a hlahisa, ka mohoo o moholo le ka meokho, merapelo ea hae e bohloko ho ea neng a ka tseba ho mo loela lefung; ’me eitse hobane a utluoe, ka baka la borapeli ba hae, leha e ne e le Mora, o ithutile kutlo ka tse bohloko tse mo hlahetseng. ’Me joale, ha a phethehile, o entsoe moetsi oa poloko e sa feleng ho bohle ba mo utloang.”

Liteko tsa Botšepehi bo Nang le Boitelo

12. Ka linako tse ling, botšepehi ba rōna bo nang le boitelo bo ka ’na ba lekoa ke eng, ’me ba bang ba ’nile ba itšoara joang litekong tse joalo?

¹² Botšepehi bo nang le boitelo ho Jehova Molimo bo hloka hore hape re itelle ho tšepahala ho bahlanka ba hae ba lefatšeng, Bakreste-’moho le rōna. Moapostola Johanne o hlakisa sena hantle ha a re hopotsa: “Ea sa rateng ngoan’abo, eo a ’monang, ha a ka ke a rata Molimo eo a e-song ho ’mone.” (1 Johanne 4:20, TLP) Mefokolo ea ho se phethahale ea ba bang e ka ’na ea leka botšepehi ba rōna bo nang le boitelo ntlheng ena. Ka mohlala, ha ba khopisitsoe, ba bang ba ’nile ba bontša bofokoli botšepehing ba bona bo nang le boitelo ho mokhatlo o hlophisitsoeng oa Jehova ka ho ngala liboka tsa Bokreste. Teko e ’ngoe ea botšepehi ba rōna bo nang le boitelo e hlaha haeba bao Jehova a ba sebelisang ho etella pele ba fosa kahlōlong. Nako le nako, ba bang ba sebelisitse liphoso tse joalo e le boikemelo ba ho jara motho ka pelo le ba ho ikarola mokhatlong o hlophisitsoeng oa Jehova o bonahalang. Empa na tsela ea bona e lokafalitsoe? Le hanyenyane!

13. Ke hobane’ng ha ho ikarola mokhatlong o hlophisitsoeng oa Jehova ho sa lokafatsoe, ’me ke menyetla efe e itlhahisang bakeng sa ba joalo ba koenehang?

¹³ Ke hobane’ng ha batho ba joalo ba sa lokafatsoe hore ba ka siea mokhatlo o hlophisitsoeng oa Molimo? Hobane Lentsoe la oona lea re tiisetsa: “Ba ratang molao oa [Jehova] ba na le khotso e kholo, ha ho khopiso ho bona.” (Pesaleme ea 119:165) Ho feta moo, re laeloa hore re “ratane ka phehello, hobane lerato le apesa libe tse ngata.” (1 Petrose 4:8; Liproverbia 10:12) Ho feta moo, ha re re motho o ne a lokela ho ikarola ho batho ba Jehova, o ne a ka ea hokae? Na ha aa talimana le tseko e tšoanang le eo baapostola ba Jesu ba neng ba thulane le eona ha a ne a ba botsa hore na le bona ba ne ba batla ho mo siea? Ka nepo moapostola Petrose o ile a arabela: “Morena, re ka ea ho mang? ke uena ea nang le mantsoe a bophelo bo sa feleng.” (Johanne 6:68) Ha ho kae kapa kae moo re ka eang ha e se ho “Babylona e moholo,” ’muso oa lefatše oa bolumeli ba bohata, kapa lihlopheng tsa “sebata” sa bopolotiki sa Satane. (Tšenolo 13:1; 18:1-5) Ka kakaretso, batho ba koenehetseng botšepehi ba bona ba siileng mokhatlo o hlophisitsoeng o bonahalang oa Jehova ba entse setsoalle le “Babylona e moholo” e nyelisang Molimo.

“U Ikokobetse Ha U Tsamaea le Molimo oa Hao”

14, 15. (a) Lentsoe la Sesotho “ikokobetsa” le na le meelelo efe? (b) Re amehile ka moelelo ofe oa “ikokobetsa” moo, ’me e le ka mabaka afe? (c) Ke hobane’ng ha Bakreste ba lokela ‘ho lekanyetsa ka ho leka-lekaneng matla a bona le bohlokoa ba bona’?

¹⁴ Lentsoe la Sesotho “ikokobetsa” le na le meelelo e mengata. Le ka supa ho se nang boikaketsi, “ho nang le boholo bo lekanyelitsoeng, bongata, kapa ho pharalla.” Kapa le ka ba le moelelo oa bohloeki, “ho mamela melao ea moaparo le boitšoaro.” (1 Timothea 2:9) Hape ho na le moelelo oa “ikokobetsa” oo re amehileng haholo ka oona, ke hore, motho a ele hloko mefokolo ea hae kapa “ho lekanyetsa ka ho leka-lekaneng matla a motho kapa bohlokoa ba hae.” Le ka mohla re ke ke ra ba basebetsi-’moho le Jehova haeba re inahana ho tlolisa, re memela tlhokomelo ho rōna ho e-na le ho memela tlhokomelo e ka sehloohong ho Jehova Molimo.

¹⁵ ‘Ho lekanyetsa ka ho leka-lekaneng matla a rōna kapa bohlokoa ba rōna’ ho bonahala e le moelelo oo re lokelang ho o matahanya le lentsoe la Seheberu le fetoletsoeng e le “ikokobetsa” ho Mikea 6:8. Hona ho bonahala ka tsela eo lentsoe le sebelisitsoeng ka eona sebakeng se le seng feela seo le hlahang ho sona Mangolong a Seheberu. Ho Liproverbia 11:2 ha le bapisoe le litšila tsa botona le botšehali empa le boikhohomoso, bo tlisoang ke hore motho a inahane ho tlolisa. Moo rea bala: “Ha ho hlaha boikhohomoso, eba lihlong lia hlaha le tsona; empa bohlale bo ho ba ikokobetsang.” Ho ikokobetsa ho tsamaea le ho tšaba Jehova, ’me le hona ho tsamaea le bohlale. (Pesaleme ea 111:10) Motho ea ikokobetsang o tšaba Jehova hobane a hlokomela hore na ke phapang e khōlō hakaakang e pakeng tsa hae le Molimo, pakeng tsa ho loka ha Jehova le matla a hae le ho se phethahale ha hae le mefokolo ea hae. Kahona, motho ea ikokobelitseng o sebeletsa polokeho ea hae ka tšabo le ka thothomelo.—Ba-Filippi 2:12.

16. Ke mangolo afe a mang a bontšang hore na ke hobane’ng ha Bakreste ba lokela ho ikokobetsa?

¹⁶ Ho na le mabaka a mangata haholo ao ka ’ona basebetsi-’moho le Jehova ba lokelang ho ikokobetsa! Ho sa tsotellehe bohlale boo re ka ’nang ra ba le bona, matla a ’mele ao e ka ’nang eaba re a fuoe, kapa hore na ke leruo le lekaakang la lintho tse bonahalang leo e ka ’nang eaba re na le lona, ha re na mabaka a ho ithorisa. (Jeremia 9:23) Hobane’ng? Ka baka la molao-motheo o boletsoeng ho 1 Ba-Korinthe 4:7: “Hobane ke mang ea u khethang ho e mong? ’Me u na le eng eo u sa kang ua e fuoa? ’Me ekare ha u e filoe, u ka ithorisa joang, joale ka hoja u sa ka ua e fuoa?” Hape ha re na lebaka leha e le lefe la ho ithorisa ka baka la litholoana tsa tšebeletso ea rōna, hobane ke eng seo re se balang ho 1 Ba-Korinthe 3:6, 7? Mono Pauluse o itse: “’Na, ke hlomile, Apollose eena o noselitse, empa Molimo ke oona o melisitseng. Ha ho le joalo, ea nang le taba hase ea hlomang, leha e le ea nosetsang, empa e le Molimo o melisang.” Mantsoe a Jesu ho Luka 17:10 le ’ona a lokela ho re thusa ho ipoloka re ikokobelitse, hobane o itse: “Etlare ha le entse ntho tsohle tseo le li laetsoeng, le re: Re bahlanka ba se nang thuso, hobane re entse seo re neng re tšoanetse ho se etsa.”

17. Ke hobane’ng ha kannete ho ikokobetsa e le tsela e bohlale?

¹⁷ Ruri ho ikokobetsa ke tsela e bohlale. Boikokobetso bo etsa hore re khone ho khotsofala kae kapa kae moo re neiloeng tlotla ea ho sebeletsa teng. Haeba re ikokobelitse, ka boiphahamiso re ke ke ra leka ho etsa mponeng empa re tla khotsofalla ho itšoara joaloka “e monyenyane.” (Luka 9:48) Joale re tla boela re be le boikutlo ba mopesaleme, ea ileng a phatlalatsa hore: “Tsatsi le le leng le luloang mabaleng a ntlo ea hao, le fetisa matsatsi a mang a sekete a luloang hosele. Ho lula mathuleng a ntlo ea Molimo oa ka kea ho rata ho fetisa ho lula litenteng tsa bakhopo.” (Pesaleme ea 84:10) Ntle le moo, haeba re ikokobetsa, re tla ba le lerato le tla re susumeletsa ho etella pele ho bontša hlompho ho ba bang.—Ba-Roma 12:10.

Boikokobetso Boa Lokela ho Bacha

18. (a) Ke hobane’ng ha boikokobetso bo loketse bacha haholo-holo? (b) Tlhokahalo ea boikokobetso e pakoa ke tlaleho efe e amang bacha ba mehleng ea kajeno?

¹⁸ Ke ho loketseng haholo-holo hore bacha ba Bakreste ba ikapese seaparo sa boikokobetso. Elihu o ile a ba behela mohlala o motle hakaakang. Le hoja a ne a e-na le likarabelo tse loketseng, o ne a utloisisa ho ema ka hlompho ho fihlela banna ba hōlileng ba buile. (Jobo 32:6, 7) Hangata bacha ba sekamela ho ba le boikutlo ba ho itšepa, ba sa ele hloko mefokolo ea bona. Kahobane ba na le matla a ’mele ’me ba bokelletse tsebo e itseng, ba ka ’na ba sekamela ho khella ba baholo ho bona tlaase. Empa tsebo ha e bolele ntho e tšoanang le bohlale, kaha bona e le ho sebelisoa ha tsebo. Mohlala o totobetseng ke tlaleho e soabisang eo bacha ba kajeno ba e etsang United States. Moo, karolo ea 63 lekholong ea batho ba tšoaroang bakeng sa litlōlo tse khōlō tsa molao ke e amang batho ba bacha ho fihlela ho ba lilemo li 24, ’me karolo ea 30 lekholong ea ba tšoaroang e le ea ba katlaase ho lilemo tse 18. Ho boetse ho tlalehoa hore “ho khanna motho a tahiloe kapa a thotofalitsoe ke lithethefatsi ke sesosa se seholo sa lefu har’a Maamerika a lilemo tse 15 ho ea ho tse 24.” Naheng eo, “manyalo a ntseng a eketseha ka bongata a bacha ba tlaase lilemong a fella ka tlhalo,” empa ho tlalehoa hore “manyalo e ka ba a tšoarellang haholoanyane haeba monyali le monyaluoa ba e-na le lilemo tse seng kae tse eketsehileng tsa bohlale tseo ba li fetileng ha ba ea aletareng.”

19. Ke keletso efe ea Mangolo eo bacha ba etsang hantle ha ba e tebisa pelong?

¹⁹ Joale, keletso ea Lentsoe la Molimo ke e bohlale hakaakang! Ka ho loketseng, e laela bacha ho hlonepha bo-ntat’a bona le bo-’m’a bona, ba ba utloe linthong tsohle. (Ba-Efese 6:1-3; Ba-Kolosse 3:20) Bacha ba lokela ho tebisa lipelong haholo-holo keletso ena e bohlale: “U tšepe Jehova ka pelo ea hao eohle, u se ke ua itšepa hlalefo ea hao. U mo kenye mererong ea hao eohle, ’me u tla u tsamaisa litseleng tsohle tsa hao.”—Liproverbia 3:5, 6.

20. Ke meputso efe eo batho bohle ba ineetseng le ba kolobelitsoeng ba ka e lebellang haeba ba utloa Mikea 6:8?

²⁰ Ke meputso efe eo kaofela re ka e lebellang haeba, kamor’a ho paka ho tšepa ha rōna Jehova ka boineelo le kolobetso ea metsing, re ‘sebelisa tōka, re bontša lerato le nang le botšepehi bo nang le boitelo, ’me re tsamaea ka boikokobetso le Molimo oa rōna’? Habohlokoa ka ho fetisisa, re tla amoheloa ke Jehova ka baka la ho phetha lintho tseo a li hlokang ’me ka hona re tla thabisa pelo ea hae ka ho kopanela ho tlotlisa lebitso la hae le leholo le lokeloang ke tšabo. (Liproverbia 27:11) Ho feta moo, re tla hlokomela bophelong ba rōna ka borōna ’nete ea molao-motheo oa hore “borapeli bo thusa kahohle, bo tsoe bo e-na le pallo ea bophelo ba joale le ea bo tlang ho tla.”—1 Timothea 4:8.

[Mongolo o botlaaseng ba leqephe]

Likarabo Tsa Hao Ke Life?

◻ Tumellanong le Mikea 6:8, ho hlokahala eng ho ‘sebelisa tōka’?

◻ Ho itella ho tšepahala ho Jehova ho na le bohlokoa bofe kamanong ea rōna le Bakreste ’moho le rōna?

◻ Ke hobane’ng ha re lokela ‘ho tsamaea ka boikokobetso le Molimo’?

◻ Ke hobane’ng ha boikokobetso bo loketse haholo-holo bakeng sa bacha ba Bakreste?

[Setšoantšo se leqepheng la 17]

Na u lebela pelo ea hao ka ho hloaea seo u se shebellang, u se mamelang, le seo u se balang?

[Setšoantšo se leqepheng la 18]

Petrose o ne a tseba hore ho ne ho se kae kapa kae moo a neng a ka ea teng hobane Jesu o ne a e-na le “mantsoe a bophelo bo sa feleng.” Na u ikemiselitse ka ho tšoanang ho lula u iteletse ho tšepahala ho mokhatlo o hlophisitsoeng oa Jehova?