Babad nu Kahiji

14 Hiram raja Tirus ngirim utusan ka Daud. Manéhna gé ngirimkeun kai aras, tukang batu,* jeung tukang kai keur ngabangun istana Daud. 2 Yéhuwa ngalantarankeun karajaan Daud beuki kuat demi Israél umat-Na, jadi Daud ngarti yén Anjeunna geus ngukuhkeun manéhna salaku raja Israél.

3 Di Yérusalém, pamajikan Daud beuki loba. Manéhna gé boga leuwih loba anak lalaki jeung anak awéwé. 4 Anak-anak Daud nu lahir di Yérusalém téh nyaéta Syamua, Syobab, Natan, Sulaéman, 5 Ibhar, Élisyua, Élpélét, 6 Noga, Néfég, Yafia, 7 Élisyama, Bééliada, jeung Élifélét.

8 Waktu urang Filistin ngadéngé Daud geus dilantik jadi raja di sakuliah Israél, maranéhna kabéh daratang rék nyerang Daud. Ngadéngé kitu, bral Daud indit merangan maranéhna. 9 Geus kitu, urang Filistin nyerang penduduk Lebak Réfaim. 10 Daud nanya ka Allah, ”Abdi kedah maju ngalawan urang Filistin atanapi ulah? Gusti bakal nyerahkeun maranéhna ka abdi moal?” Yéhuwa ngajawab, ”Sok maju, Kuring pasti nyerahkeun maranéhna ka manéh.” 11 Jadi, Daud indit ka Baal-pérazim tuluy ngéléhkeun urang Filistin di dinya. Pok Daud ngomong, ”Allah nu sajati tos ngagunakeun kuring pikeun ngéléhkeun musuh-musuh kuring, kawas cai nu ngajebol témbok.” Ku kituna, éta tempat dingaranan Baal-pérazim.* 12 Urang Filistin ninggalkeun patung allah-allahna di dinya. Tuluy ku paréntah Daud, éta kabéh diduruk.

13 Teu lila ti dinya, urang Filistin daratang deui tuluy nyerang penduduk éta lebak. 14 Daud nanya deui ka Allah, tapi dijawab ku Allah nu sajati, ”Ulah nyerang maranéhna ti hareup. Muter wéh, serang ti tukang. Serang maranéhna hareupeun gumplukan rungkun baka.* 15 Waktu manéh ngadéngé sora kawas sora barisan prajurit luhureun rungkun baka, gancang serang, sabab Allah nu sajati geus aya di hareupeun manéh pikeun ngéléhkeun pasukan Filistin.” 16 Jadi, Daud ngajalankeunana percis sakumaha paréntah Allah nu sajati. Pasukan Filistin diéléhkeun ku urang Israél, ti Gibéon terus nepi ka Gézér. 17 Daud kasohor di sakuliah nagri. Ku Yéhuwa kabéh bangsa disina sarieuneun ku Daud.