Kidung Agung
5 ”Enéng pangantén Engkang,
Engkang tos aya di kebon Engkang.
Emur* sareng pepelakan seungit tos diala ku Engkang.
Madu tina sayang nyiruan tos diuyup,
Cianggur sareng susu gé tos dileueut.”
”Batur-batur, sok geura dalahar,
Sok ngarinum nepi ka marabok ku cinta!”
2 ”Abdi saré, tapi haté mah henteu,
Kaimpikeun kakasih ngetrokan panto.
Saurna, ’Japati Engkang, kadeudeuh Engkang nu sampurna,
Bukakeun pantona, Néng!
Sirah Engkang baseuh ku ciibun,
Buuk kulimis ku ciibun nu turun peuting-peuting.’
3 Abdi tos teu dimantel,
Naha kedah dianggo deui?
Sampéan gé tos diwasuh,
Naha kedah kokotoran deui?
4 Waktu kakasih abdi narik leungeunna tina liang panto,
Haté téh meni dag-dig-dug.
5 Abdi hudang rék mangmukakeun panto keur kakasih abdi.
Emur nyakclakan tina leungeun abdi,
Minyak emur tina ramo abdi
Nyakclakan kana gagang panto.
6 Bray panto téh dibuka keur kakasih abdi,
Sihoréng anjeunna tos teu aya.
Haté meni sedih pisan lantaran anjeunna tos angkat.*
Ku abdi ditéangan, tapi teu kapanggih.
Digeroan, tapi teu ngajawab.
7 Abdi kapanggih ku para panjaga nu ngurilingan kota.
Maranéhna nareunggeulan jeung ngaraheutan abdi.
Soléndang* abdi gé dirampas ku para panjaga kota.
8 Wanoja-wanoja Yérusalém, aranjeun kudu sumpah:
Lamun panggih jeung kakasih abdi,
Béjakeun ka anjeunna, abdi téh teu daya bakating ku cinta-cintana.”
9 ”Anjeun mojang nu panggeulisna,
Naon leuwihna kakasih anjeun tibatan nu lian?
Naon unggulna kakasih anjeun tibatan nu lian
Nepi ka abdi sadaya kudu sumpah?”
10 ”Kakasih abdi téh nya kasép nya kuat.*
Ti antara sapuluh rébu lalaki, anjeunna nu pangunggulna.
11 Mastakana kawas emas murni.
Rambutna hideung meles kawas manuk gagak,
Ombak-ombakan kawas tangkal palem.*
12 Socana téh kawas japati di sisi aliran cai,
Nu keur mandi cisusu,
Eunteup di sisi kolam nu caina pinuh.*
13 Pipina kawas taman nu dipelakan pepelakan seungit,
Lir tumpukan pepelakan seungit.
Biwirna lir kembang bakung nu ngeclakkeun minyak emur.
14 Ramona kawas emas nu dihias ku batu krisolit.
Patuanganana kawas gading nu gugurilapan dihias ku batu sapir.
15 Sampéanna kawas tihang marmer nu tatapakanana emas murni.
Anjeunna kasép kawas daérah Lébanon, dedeganana kawas tangkal aras.
16 Biwirna téh amis lir madu.
Sagala ngeunaan anjeunna matak narik ati.
Tah, kitu kakasih abdi nu dipikacinta ku abdi téh, wanoja-wanoja Yérusalém.”