Yéhézkiél

7 Yéhuwa nepikeun deui firman-Na ka abdi, saur-Na, 2 ”Anak manusa, ieu nu diucapkeun ku Yéhuwa, Gusti Nu Maha Agung, ngeunaan nagri Israél, ’Ahir téh geus datang! Éta nagri geus téréh tepi kana ahirna. 3 Ahir manéh geus datang. Kuring rék numplekkeun amarah Kuring ka manéh. Kuring rék ngahakiman manéh luyu jeung kalakuan manéh sarta ngahukum manéh ku lantaran tindakan manéh nu pikaijideun. 4 Kuring moal karunya moal paduli. Kuring rék ngabales manéh luyu jeung kalakuan manéh sorangan. Manéh bakal ngarasakeun balukar tina tindakan manéh nu pikaijideun. Manéh bakal nyaho yén Kuring téh Yéhuwa.’

5 ”Ieu nu diucapkeun ku Yéhuwa, Gusti Nu Maha Agung, ’Musibat bakal datang, musibat nu can pernah kajadian. 6 Ahir téh geus téréh. Ahir éta bakal datang. Éta bakal ujug-ujug narajang ka manéh. Éta téréh datang. 7 Éh penduduk ieu nagri, giliran manéh geus datang, waktuna geus téréh, poéna geus deukeut. Jalma-jalma bingung, moal kadéngé deui surak gumbira di gunung-gunung.

8 ”’Moal lila deui, Kuring rék ngabudalkeun amarah Kuring ka manéh. Kuring rék numplekkeun kabéh amarah Kuring ka manéh. Kuring rék ngahakiman manéh luyu jeung kalakuan manéh sarta ngahukum manéh ku lantaran tindakan manéh nu pikaijideun. 9 Kuring moal karunya moal paduli. Kuring rék ngabales manéh luyu jeung kalakuan manéh sorangan. Manéh bakal ngarasakeun balukar tina tindakan manéh nu pikaijideun. Manéh bakal nyaho yén nu ngahukum téh Kuring, Yéhuwa.

10 ”’Poé éta geus datang! Geus téréh! Giliran manéh geus datang. Tongkat nu rék dipaké pikeun ngahukum manéh geus siap. Musuh manéh geus beuki sombong. 11 Katelengesan geus jadi tongkat pikeun ngahukum kajahatan. Moal aya nu salamet. Kakayaan, jalma réa, atawa kadigjayaan moal aya nu nyésa. 12 Waktuna bakal datang, poéna geus téréh. Nu meuli ulah gumbira, nu ngajual ulah sedih, da kabéhanana bakal diamuk ku amarah Kuring.* 13 Naon nu geus dijual moal bakal balik deui ka nu ngajualna, sanajan manéhna hirup kénéh, sabab éta titingalian téh bakal kaalaman ku kabéh jalma. Moal aya nu bakal balik deui. Ku lantaran kasalahanana,* moal aya nu bisa nyalametkeun hirupna sorangan.

14 ”’Tarompét geus ditiup, kabéh jalma geus siap, tapi euweuh saurang-urang acan nu maju perang, lantaran Kuring ambek ka sakabéh jalma. 15 Di luar aya pedang, di jero aya wabah panyakit jeung kalaparan. Saha waé nu aya di tegalan bakal paéh ku pedang, ari nu di jero kota bakal paéh ku kalaparan jeung wabah panyakit. 16 Jalma-jalma nu salamet bakal kabur ka gunung-gunung. Kawas japati di lebak, maranéhna masing-masing bakal ngagerung nyeungceurikan kasalahanana sorangan. 17 Leungeun maranéhna kabéh bakal ngaplék, tuurna bakal baseuh.* 18 Maranéhna maraké kaén goni, sakujur awak ngadégdég. Kabéh jalma bakal diéra-éra, sirahna digarundulan kabéh.*

19 ”’Pérakna bakal dialung-alungkeun ka jalan, emasna bakal dipikaijid ku maranéhna. Boh pérak boh emas, moal bisa nyalametkeun maranéhna dina poé amarah Yéhuwa. Maranéhna moal sugema moal seubeuh, sabab éta kabéh* geus nungtun maranéhna kana dosa. 20 Padahal baheula mah maranéhna téh aragul ku perhiasan nu aralus. Éta kabéh dijieun jadi patung-patung nu pikaijideun, berhala-berhala nu pikageuleuheun. Matakna, maranéhna ku Kuring rék disina ijid ka éta kabéh.* 21 Éta kabéh* ku Kuring rék diserahkeun ka urang asing pikeun jadi jarahan sarta ka jalma jahat pikeun jadi rampasan. Éta kabéh ku maranéhna bakal dinajiskeun.

22 ”’Kuring rék nonggongan ka maranéhna.* Tempat Kuring nu buni* bakal dinajiskeun. Rampog bakal asup jeung nganajisan éta tempat.

23 ”’Siapkeun ranté,* sabab sakuliah nagri pinuh ku getih jalma-jalma nu dihukum ku cara nu teu adil, sarta kota pinuh ku katelengesan. 24 Kuring bakal ngadatangkeun jalma-jalma nu pangjahatna ti bangsa-bangsa. Imah-imah bakal direbut ku maranéhna, kasombongan jalma nu kuat bakal dieureunkeun, tempat-tempat suci bakal dinajiskeun. 25 Waktu kasangsaraan datang, maranéhna bakal néangan katengtreman, tapi moal manggih. 26 Musibat gunta-ganti, béja goréng pasusul-susul. Jalma-jalma bakal tatanya ka nabi ngeunaan titingalian. Imam bakal ngajarkeun hukum,* kokolot bakal méré naséhat, tapi nu diajarkeunana téh euweuh gunana. 27 Raja bakal sungkawa, para pamingpin bakal pegat harepan. Leungeun jalma-jalma di éta nagri bakal ngageter bakating ku sieun. Kuring rék ngabales maranéhna satimpal jeung kalakuanana sarta ngahakiman maranéhna cara maranéhna ngahakiman batur. Ku kituna, maranéhna bakal nyaho yén Kuring téh Yéhuwa.’”