Surat nu Kahiji keur Sidang Jamaah di Korintus
3 Dulur-dulur, baheula kuring teu bisa ngomong ka aranjeun kawas ka manusa rohani,+ tapi kawas ka manusa jasmani, nu kawas orok+ kénéh dina nuturkeun Al-Masih. 2 Aranjeun kudu dibéré susu, lain kadaharan nu teuas-teuas, sabab aranjeun can kuat. Sabenerna, ayeuna gé aranjeun can kuat kénéh.+ 3 Aranjeun masih kénéh dikawasaan ku pikiran jasmani.+ Aranjeun pasirik-sirik jeung paraséa. Lain éta téh nyirikeun pikiran jasmani?+ Ari kitu mah kalakuan aranjeun téh sarua wéh jeung jalma-jalma di dunya. 4 Lamun nu hiji ngomong, ”kuring muridna Paulus”, ari nu séjén ngomong, ”kuring muridna Apolos”,+ atuh kalakuan aranjeun téh euweuh bédana jeung batur?
5 Mémangna saha Apolos téh? Saha Paulus téh? Urang duaan mah ngan saukur palayan+ nu ngajalankeun tugas ti Gusti, supaya aranjeun jadi murid Isa. 6 Kuring nu melakna,+ Apolos nu nyéborna,+ tapi nu ngajadikeunana mah Allah. 7 Ku kituna, nu penting mah lain saha nu melak saha nu nyébor, tapi Allah nu ngajadikeunana.+ 8 Nu melak jeung nu nyébor téh boga tujuan nu sarua, tapi masing-masing bakal meunang ganjaran nu saimbang jeung pagawéanana.+ 9 Urang duaan téh batur gawé Allah, ari aranjeun mah lahan nu digarap ku Allah, wangunan Allah.+
10 Allah méré welas asih nu taya bandingna* ka kuring, éta sababna kuring masang pondasi+ siga tukang wangunan nu ahli,* tapi nu séjén ngawangun luhureun éta pondasi. Unggal jalma kudu ati-ati ngawangunna. 11 Moal aya nu bisa masang pondasi séjén pikeun ngaganti pondasi nu geus dipasang, nyaéta Isa Al-Masih.+ 12 Luhureun éta pondasi, aya nu ngawangun maké emas, pérak, batu permata, kai, jukut garing, atawa jarami. 13 Tapi, engké aya waktuna pagawéan unggal jalma bakal kanyahoan hasilna, da bakal diuji ku seuneu.+ Alus goréngna bakal kanyahoan sanggeus diuji ku seuneu. 14 Lamun nu diwangun ku manéhna teu kaduruk ku seuneu, manéhna bakal meunang ganjaran. 15 Sabalikna lamun éta béak kaduruk, manéhna bakal rugi. Sanajan kitu, manéhna bakal salamet, tapi kawas jalma nu luput ti jero seuneu.
16 Aranjeun teu terang kitu yén aranjeun téh bait Allah?+ Teu terang aya kawasa suci Allah dina diri aranjeun?+ 17 Lamun aya nu ngancurkeun bait Allah, manéhna bakal diancurkeun ku Allah. Bait Allah téh suci, nya aranjeun nu jadi éta bait téh.+
18 Ulah ngabobodo manéh. Lamun di antara aranjeun aya nu ngarasa bijaksana dina pandangan ieu dunya,* mending kénéh jadi jalma bodo ngarah jadi bijaksana dina pandangan Allah. 19 Sabab kabijaksanaan ieu dunya mah dianggap kabodoan ku Allah, sakumaha aya ayat nu nyebutkeun, ”Anjeunna ngajiret jalma bijaksana ku kapinteranana sorangan.”+ 20 Ayat séjénna nyebutkeun, ”Yéhuwa* terang yén pipikiran jalma anu bijaksana téh euweuh hartina.”+ 21 Jadi, ulah ngagulkeun manusa, da sagalana gé geus jadi milik aranjeun. 22 Paulus, Apolos, Kéfas,*+ ieu dunya, kahirupan, maot, hal-hal nu aya ayeuna, atawa nu bakal datang, kabéh milik aranjeun. 23 Aranjeun téh milik Al-Masih,+ ari Al-Masih milik Allah.