1 Samuél
3 Samuél cicing jeung Éli, sarta ngalalayanan Yéhuwa. Harita, jarang pisan aya firman ti Yéhuwa, titingalian gé langka.
2 Hiji poé, Éli keur saré di kamarna, panonna geus teu awas, ampir teu bisa ningali. 3 Lampu di imah Allah can dipareuman. Ari Samuél keur saré di bait* Yéhuwa, tempatna peti perjangjian Allah. 4 Tuluy Yéhuwa ngageroan Samuél, dijawabna, ”Kulan?” 5 Beretek manéhna lumpat nyampeurkeun Éli tuluy ngomong, ”Kulan, Bapa? Tadi nyauran?” Tapi dijawab ku Éli, ”Henteu da, jung saré deui.” Jadi Samuél indit, saré deui. 6 Yéhuwa ngageroan deui, ”Samuél!” Samuél hudang, nyampeurkeun Éli, tuluy ngomong, ”Kulan, Bapa? Tadi nyauran?” Ceuk Éli, ”Henteu, anaking. Jung saré deui.” 7 (Harita, Samuél can bener-bener kenal ka Yéhuwa. Firman Yéhuwa gé can disingkabkeun ka manéhna.) 8 Yéhuwa ngageroan deui katilu kalina, ”Samuél!” Samuél hudang, nyampeurkeun Éli, tuluy ngomong, ”Kulan, Bapa? Tadi nyauran?”
Éli ahirna sadar nu ngageroan budak éta téh Yéhuwa. 9 Jadi Éli ngomong kieu ka Samuél, ”Jung saré deui. Engké lamun digeroan deui, témbalan kieu: ’Mangga nyarios, Yéhuwa, hamba Gusti ieu ngadangukeun.’” Samuél indit, saré deui di kamarna.
10 Yéhuwa datang sarta ngadeg di dinya, tuluy ngageroan deui kawas saacanna, ”Samuél, Samuél!” Samuél ngajawab, ”Mangga nyarios, hamba Gusti ieu ngadangukeun.” 11 Yéhuwa ngomong kieu ka Samuél, ”Aya nu rék dilakukeun ku Kuring di Israél, nu bakal ngalantarankeun saha waé nu ngadéngéna reuwas.* 12 Poé éta, Kuring rék ngalaksanakeun sakabéh nu diucapkeun ku Kuring ngeunaan Éli jeung kulawargana, ti mimiti nepi ka anggeus. 13 Manéh kudu méré nyaho Éli yén Kuring bakal ngahukum kulawargana salilana lantaran kasalahanana. Manéhna geus nyaho anak-anakna nyumpahan Allah tapi teu dicarékan. 14 Éta sababna Kuring sumpah ka kulawarga Éli yén kasalahan maranéhna moal bisa dihampura ku korban naon waé.”
15 Samuél saré nepi ka isuk, tuluy manéhna mukaan panto-panto imah Yéhuwa. Samuél sieun nyaritakeun titingalian éta ka Éli. 16 Tapi Éli ngageroan Samuél, ”Samuél, anaking.” Dijawab ku Samuél, ”Kulan?” 17 Éli nanya, ”Naon pesen ti Gusti ka Ujang? Sok caritakeun, ulah aya nu disumputkeun. Lamun aya sakecap waé pesen Gusti nu disumputkeun, Allah bakal méré hukuman nu beurat ka Ujang.” 18 Jadi ku Samuél sagalana dicaritakeun, euweuh nu disumput-sumputkeun. Ceuk Éli, ”Éta kahoyong Yéhuwa. Keun wéh sina kajadian naon nu hadé dina pandangan Anjeunna.”
19 Samuél beuki gedé jeung disarengan ku Yéhuwa. Euweuh kekecapan manéhna nu teu jadi kanyataan.* 20 Sakabéh urang Israél, ti Dan nepi ka Béér-syéba, nyaho Samuél téh dipilih jadi nabi Yéhuwa. 21 Yéhuwa terus datang ka Syilo, lantaran Yéhuwa hayang méré nyaho ngeunaan diri-Na ka Samuél, ku cara méré firman Yéhuwa ka Samuél.