Kuazimia Kumtumikia Yehova!

“HURUHUSIWI kwenda kuhubiri!” “Usiwakaribishe watu wako hapa!” Wanawake wengi Wakristo husikia semi hizo na zifananazo na hizo kutoka kwa waume zao wapinzani. Lakini wanaume hao wanapokuwa wakitumikia jeshini, wake zao hukabili magumu ya pekee kwa imani yao. (Isaya 2:4; Yohana 17:16) Basi, wake hao Wakristo huwezaje kuendelea wakiwa wenye nguvu na wenye bidii kiroho katika utumishi wa Ufalme?

Uaminifu-mshikamanifu kwa Yehova Mungu pamoja na azimio la kibinafsi huwasaidia wavumilie. “Nadhani ilikuwa kuazimia kwangu sana,” aeleza Yvonne, aliye mke wa askari-jeshi. “Nilijua lazima iwe kuna njia fulani za kuepa upinzani wa mume wangu.” Kwa kweli, kulikuwako.

Mwanamke mwingine Mkristo, aliyeolewa na ofisa wa jeshi, asimulia jinsi msimamo wake wa kuazimia hata hurahisisha zaidi maisha ya mumeye. “Yeye ajua ratiba yangu na yake pia, na wanajeshi huthamini hilo,” yeye aeleza. Hata hivyo, kuendelea kwake katika utumishi wa Yehova si mwendo ulio rahisi.

Kushinda Upweke

Mara nyingi wake za wanajeshi hukabili ugumu wa kuhama kwa ghafula wakijua juu ya hilo siku chache tu kimbele ikiwa wataandamana na waume zao kwenye kituo kipya mbali na nyumbani. Kisha, wanapokuwa katika mazingira ya kigeni, ni rahisi kuhisi kutengwa. Lakini si lazima hili liwe hivyo. Wale wanaomtumikia Yehova wana faida fulani. Hiyo ni nini? Kulingana na mtume Mkristo Petro, ni ule “ushirika mzima wa ndugu.” Sasa wakiwa jumla ya mamilioni, Mashahidi wa Yehova katika nchi 231 hutenda wakiwa familia kubwa ya Kikristo, “udugu.” Waweza kuwapata karibu kila mahali.—1 Petro 2:17, kielezi-chini, NW.

Susan, aliyehama eneo la nyumbani kwake kwa ghafula, aliwasili kuishi kwenye kituo cha wanahewa ambako mumeye alipewa mgawo. Akiwa mpya katika imani na kupatwa na msongo kutoka kwa mumeye asiyeamini, wa kuacha kushiriki katika huduma ya Kikristo, yeye asimulia hivi: “Nilikwenda mara iyo hiyo kwenye mikutano ya mahali hapo, na nikiwa hapo niliweza kuketi na kuongea na akina dada wengine. Naweza kusema kwa kweli kwamba ni ushirika huo ulioniendeleza.”

Nyakati nyingine upweke husababisha mshuko wa moyo. Hata hivyo, habari njema huandaa uchangamfu unaokaribishwa. Glenys, dada mmoja Mwingereza aliyeandamana na mumeye alipohamia kituo cha ng’ambo, asimulia hivi: “Niliposhuka moyo sana, bila kutazamiwa, mtu fulani niliyemjua zamani nilipokuwa jeshini mimi mwenyewe, aliniandikia akasema kwamba yeye alikuwa amebatizwa karibuni kuwa mmoja wa Mashahidi wa Yehova. Hilo lilinipa kitia-moyo kwa wakati uliofaa kabisa.”

Jane, aliyesafiri pamoja na mumeye hadi Kenya, aliona kwamba mikutano ya Kikristo ilikuwa ndicho kichocheo maishani, hata ingawa iliongozwa katika lugha ambazo yeye hakuelewa. “Nilijua kwamba hapa ndipo Yehova alinitaka niwe,” yeye aeleza. “Nilikuwa na ndugu zangu, nao walikuwa kama dawa ya kutia nguvu. Wao walinikaribisha, nami nilihisi tulikuwa familia.”

Jane ni mmoja tu wa wale wengi walio katika hali hiyo aliyevumbua watu wa ukoo wa kiroho ambao hata hakuwa amejua alikuwa nao!—Marko 10:29, 30.

Wenye Uthabiti Wakati Wakabilipo Upinzani

“Msidhani ya kuwa nimekuja kuleta amani duniani,” Yesu akaonya. “La! sikuja kuleta amani, bali upanga.” (Mathayo 10:34) Yeye alimaanisha nini? Hata katika familia, ambamo amani ingetazamiwa, kwaweza kuwa “kutupwa kwa ghafula kwa upanga,” aeleza A. T. Robertson katika Word Pictures in the New Testament. ‘Adui za mtu,’ Yesu akasema, “ni wale wa nyumbani mwake.” (Mathayo 10:36) Maneno hayo huthibitika kuwa kweli kama nini wakati mwenzi wa ndoa anapoonyesha uhasama kuelekea kweli!

Diane alipoanza kujifunza Biblia pamoja na Mashahidi wa Yehova, mumeye, aliyekuwa ofisa wa kikosi cha wanahewa, hakupendezwa hata kidogo. Hilo liliathirije ndoa yao? “Ilikuwa kama nguzo ya barafu kati yetu,” aeleza Diane. “Tulikuwa tumekuwa na ndoa yenye furaha. Kwa ghafula tulikuwa twaishi tu katika nyumba ileile.” Basi, yeye alishughulikaje na hilo? “Usadikisho na azimio la kibinafsi ndiyo mambo yaliyokuwa ya maana halisi, pamoja na msaada kutoka kwa Yehova na roho yake.” Diane alizingatia moyoni kielelezo cha Biblia cha nabii Danieli.

Alipohamishwa Babiloni na kupewa chakula kisichokubalika kwa mtumishi wa Mungu, Danieli “aliazimu moyoni mwake ya kuwa hatajitia unajisi kwa chakula cha mfalme.” Ndiyo, Danieli alifanya uamuzi wenye utambuzi. Aliazimia moyoni mwake asijinajisi kamwe kwa kula chakula hicho. Kisha ni nguvu zilizoje alizoonyesha “[alipoendelea kumwomba, NW] yule mkuu wa matowashi ampe ruhusa asijitie unajisi”! Tokeo likawa nini? Yehova alibariki msimamo wake wa kuazimia.—Danieli 1:8, 9, 17.

Leo vilevile huenda mume asiyeamini akaamuru kwamba mke wake aache kuhudhuria mikutano ya kutaniko. Mke apaswa kuitikiaje? Jane alijipata mwenyewe katika hali hiyo. Yeye aeleza hivi: “Singeweza kuacha kamwe kwa sababu ya msongo huo. Nilijua singeweza kuridhiana. Nililazimika kuonyesha jinsi mikutano ilivyokuwa ya maana kwangu.” Yehova alibariki azimio lake alipoendelea kuhudhuria.

“Mume wangu alijaribu kunizuia nisiende mikutanoni, lakini hilo halikudumu kwa muda mrefu,” asimulia Glenys. “Bado nilienda. Niliporudi nyumbani, nyakati nyingine alinipiga, na nyakati nyingine hakusema lolote.” Lakini, yeye alishughulika na hali hiyo, akitoa sala mara kwa mara. Pia, wazee wawili wa kutaniko walisali pamoja naye kwa ukawaida, jambo lililomtia moyo sana aendelee kuhudhuria.—Yakobo 5:13-15; 1 Petro 2:23.

Nyakati nyingine wakubwa wa mume waweza kumsonga amzuie mke wake asihubiri habari njema. Diane aliona kwamba ilikuwa lazima amweleze mumeye waziwazi yale mambo aliyotanguliza kwanza. “Nilikuwa tayari,” yeye akasema, “kupatwa na matokeo yoyote kwa sababu ya kuendelea kuhubiri.” Msimamo huo unafanana kama nini na ule wa mitume! (Matendo 4:29, 31) Hata hivyo, alikuwa mwangalifu sana katika kazi yake ya kuhubiri. Yeye asimulia hivi: “Nilikuwa nikipanga vikusanyiko vya kunywa kahawa na kumtolea kila mtu aliyekuwapo kitabu Kweli.”—Mathayo 10:16; 24:14.

Ujitiisho Bila Kuridhiana

Ingawa wao husononeshwa na mkazo wa kindoa, wake Wakristo hutazamia mbele kwenye wakati ujao na kumtegemea Yehova. Hilo huwasaidia wadumishe maoni yenye usawaziko. Wao huwapa waume zao utegemezo wowote wawezao kutoa bila kuridhiana imani yao. Kwa kufanya hivyo, wao wafuata shauri hili la Petro lililopuliziwa: “Ninyi wake, watiini waume zenu.” (1 Petro 3:1) Katika The Amplified New Testament, agizo hilo la kimtume lasomwa hivi: “Jitiisheni kuwa wa pili kwao na wenye kuwategemea, na jipatanisheni nao.” Ona jinsi Jane alivyofuata shauri hilo. “Mume wangu aliniambia kwamba ni lazima yale niliyotaka kufanya yasiingilie kazi-maisha yake,” yeye aeleza. “Kwa hiyo nilijaribu kupata njia ambazo ningeweza kumsaidia.”

Wake wengine Wakristo wamekubali kuhudhuria vikusanyiko vya kijamii ambako waume zao wamealikwa. Lakini wao bado huazimia kutoridhiana kamwe imani yao. Jane alichukua wakati kuongea na mumeye juu ya jambo hili. Alieleza mumeye kwa fadhili kwamba angependa sana kuhudhuria lakini hakutaka kuwapo kwake kumwaibishe. “Nilijua kwamba pindi kwa pindi wote wanaokuwapo hutazamiwa wainuke na kunywa kwa heshima ya mtu au jambo fulani. Nilikuwa nimejifunza kwamba uaminifu wastahili kumwendea Yehova pekee, na kunywa kwa heshima ya mtu au jambo fulani kuliitia ndani zaidi ya kuonyesha heshima tu. Mume wangu aling’amua jinsi hali hiyo ingaliweza kuleta aibu, basi alisema tu: ‘Usije!’ Mimi nikatii.”

Kwa upande mwingine, Glenys aliandamana na mumeye kwenye kikusanyiko cha jinsi hiyo, lakini aliwatazama maofisa kwenye vichwa vya meza. Alipowaona wakijitayarisha kuwaomba watu wanywe kwa heshima ya mtu au jambo fulani, yeye aliondoka kwa busara kwenda msalani! Ndiyo, wanawake hao walijipatanisha wenyewe na hali lakini hawakuridhiana kamwe.

‘Kuvutwa Pasipo Lile Neno’

“Nikiboresha uwezo wangu mwenyewe nikiwa mke, mume wangu ataona kwamba kweli inanibadili,” akasababu Yvonne. Kwa hiyo alisoma na kusoma tena ile sura katika kitabu Maisha ya Jamaa yenye kichwa “Mke Anayependwa Sana.”a “Nilikazia fikira hasa habari chini ya kichwa kidogo ‘Waliaji, Wenye Chokochoko (Kusumbua-sumbua)!’ Lakini nilipata kwamba kadiri nilivyojaribu kuongea na mume wangu, ndivyo mambo yalivyozidi kuwa mabaya.” Lakini mwishowe alifanikiwa katika kumsaidia mume wake amtumikie Yehova. Jinsi gani? Kwa kutumia ile kanuni ipatikanayo kwenye 1 Petro 3:1, kwamba waume waweza ‘kuvutwa pasipo lile neno.’

Njia ambayo kwayo wanawake Wakristo hutunza familia zao yaweza sana kupendekeza Ukristo kwa wengine. “Nilijaribu kufanya kweli iwe yenye kuvutia sana kadiri iwezekanavyo,” asimulia Diane. “Nilipokwenda kwenye mikutano, mume wangu alikuwa akihisi ameachwa, kwa hiyo nilihakikisha nimewafunza watoto wawe wenye mwenendo mwema hasa walipowasili nyumbani. Nilijaribu pia kuelekeza uangalifu zaidi kwake tuliporudi nyumbani.” Mtazamo wa mume wake ulibadilika hatua kwa hatua alipoitikia ufikirio wenye fadhili wa familia yake.

Watumishi wa Yehova walio wenzi waweza kusaidia pia. Jane asimulia kwamba mumeye alifurahia ushirika wa wamishonari Mashahidi katika Kenya. “Wao walifanya urafiki naye na kuongea juu ya mchezo wa mpira, nao walikuwa wakaribishaji-wageni sana. Kwenye pindi kadhaa, tulialikwa kwenye makao mbalimbali ya mishonari ili kula milo.” Mume wake alieleza hivi baadaye: “Nilianza kuona imani ya Jane kwa njia tofauti kabisa. Marafiki wake walikuwa watu wenye akili sana walioweza kusema juu ya mambo tofauti-tofauti.” Hali kadhalika, mumeye Diane alibadili maoni yake juu ya kweli. Gari alilokuwa akiendesha lilipoharibika, Shahidi mmoja mchanga alimsaidia. “Hilo lilinivutia sana,” yeye asema.

Bila shaka, si wenzi wa ndoa wote wanaovutwa kwenye kweli. Iweje basi? Yehova huandaa msaada kuwawezesha waaminifu wavumilie. (1 Wakorintho 10:13) Fikiria kitia-moyo cha Glenys kwa wale waliomo katika hali kama zake: “Usitie shaka kamwe hata kidogo kwamba Yehova ndiye Yule aliyeanzisha ndoa na kwamba yeye ataka waume na wake wakae pamoja. Basi iwe ni nini ambacho huenda mume akafanya au ni upinzani gani huenda ukapata kutoka kwa wale wakuzungukao, Yehova hatakuruhusu kamwe utikisike.” Ingawa mume wake hamwabudu Yehova bado, mtazamo wake kumwelekea yeye na kweli umelainika.

‘Panda kwa Machozi; Vuna kwa Shangwe’

Kwa kweli, wanawake hao Wakristo wameazimia kumtumikia Yehova. Ikiwa wewe umo katika hali kama hizo, fanya azimio lako pia. Kumbuka himizo hili: “Mche BWANA, Mungu wako, umtumikie yeye; ambatana naye.”—Kumbukumbu la Torati 10:20.

“Ingawa mtu anakwenda zake akilia, azichukuapo mbegu za kupanda. Hakika atarudi kwa kelele za furaha [shangwe, NW], aichukuapo miganda yake,” ajulisha mtunga-zaburi. (Zaburi 126:6) “Kwa kweli unalia machozi sana ujaribupo kumwonyesha mwenzi wako kweli, ama kimyakimya ama kwa maneno,” akiri Shahidi mmoja. “Lakini mwishowe unalia kwa shangwe kwa sababu hata ikiwa haikubali kweli, Yehova hukubariki kwa jitihada unayofanya.”

Wote wanaomtumikia Yehova kwa uaminifu ujapokuwa upinzani nyumbani hujipatia pongezi halisi. Wao hustahili utegemezo na upendo. Na wadumishe msimamo wao usioridhiana, wakiazimia kumtumikia Yehova!

[Maelezo ya Chini]

[Picha katika ukurasa wa 28]

Funzo lenye sala huimarisha azimio la Kikristo