Maoni ya Biblia

Mungu Huchukia Talaka ya Aina Gani?

“MATATIZO yaliyoambatana na talaka yangu yalikuwa mengi,” akaandika mwanamke mmoja Mkristo ambaye mume wake alikuwa amekosa kuwa mwaminifu. “Ule wakati wa kujirekebisha si rahisi. Ilinibidi nibadilike si kiakili tu bali pia kiuchumi na kiroho. Nilijiuliza kama Yehova angebariki uamuzi wangu, nikijua kwamba Maandiko husema kwamba yeye huchukia talaka. Hilo lilikuwa hangaiko la daima.”[1]

Ndoa iishapo, matatizo hayaishi. Matatizo mapya kabisa hutokea ghafula. Hisia—mshuko wa moyo, upweke, na hatia—zitokeazo ghafula. Kukabili vita vya kisheria vya kuwatunza watoto. Mwana au binti anayelia amwone mama au baba. Matatizo ya kiuchumi yanayoleta mkazo. Kujaribu kuwezana na tamaa ya kupata ukaribu ambao ni ndoa tu iruhusuyo.[2]

Halafu maoni ya Mungu yahitaji kufikiriwa. Biblia husema kwamba Mungu ‘huchukia talaka.’ (Malaki 2:16) Je! maneno hayo yamaanisha kwamba Mungu huchukia talaka zote? Kwa hiyo je, Mkristo ahitaji kuhisi mwenye hatia kwa kutaka kutaliki mwenzi wake anapokosa kuwa mwaminifu? Ili kupata majibu, acheni tutazame hali zilizomfanya Mungu aseme kwamba yeye huchukia talaka katika siku ya Malaki.

‘Msitende Mambo ya Hiana’

Malaki alitoa unabii baada ya 443 K.W.K., karibu karne moja baada ya Wayahudi wahamishwa kurudi kutoka Babuloni. Hali zenye kuchukiza zilikuwa zimetokea katika Yuda, hasa miongoni mwa makuhani. (Malaki 2:7-9) Miongoni mwa Waisraeli kwa ujumla mazoea kama vile kusema uwongo, uzinzi, ulaghai, na uonevu yalikuwa mengi. (Malaki 3:5) Hali hizo zilizusha shaka sana hivi kwamba baadhi yao walitoa mkataa: “Kumtumikia Mungu hakuna faida.”—Malaki 3:14.

Hali ya kuzorota kwa kidini na kiadili katika siku ya Malaki ilionyeshwa pia katika kushuka kwa staha katika ndoa. Wanaume wengi Waisraeli walikuwa wakiwataliki wake za ujana wao, labda ili kuoa wanawake wapagani walio wachanga zaidi. Madhabahu ya Yehova yalifunikwa kwa machozi ya wake waliokataliwa waliokuja kwenye mahali pa ibada ili kulia na kuomboleza mbele za Mungu.—Malaki 2:13-15.

Yehova Mungu alihisije juu ya kutaliki huko? Kupitia Malaki, yeye alionya hivi: “Jihadharini roho zenu; mtu awaye yote asimtende mke wa ujana wake mambo ya hiana. Maana mimi nakuchukia kuachana, asema BWANA [Yehova, NW], Mungu wa Israeli . . . basi jihadharini roho zenu, msije mkatenda kwa hiana.” (Malaki 2:15, 16) Kulingana na Theological Wordbook of the Old Testament, neno la Kiebrania linalotafsiriwa ‘tenda kwa hiana’ lamaanisha “kutenda kwa udanganyifu, (tenda) kwa kukosa uaminifu.”[3] Kwenye Zaburi 59:5, NW, namna ya kisifa cha kitenzi hicho chatafsiriwa “wasaliti.”[4]

Kukiwa na habari kama hiyo, twaweza kuelewa vema zaidi maneno kwenye Malaki 2:16: ‘Amechukia kutaliki.’ Yehova huchukia aina ya talaka inayotia ndani kutaliki kivivi-hivi mwenzi wa mtu ili kuchukua mwingine. Kwa kielelezo, mtu anayefanya uzinzi halafu anamtaliki mke wake asiye na hatia dhidi ya mapenzi yake au amkaza mke amtaliki yeye ili aweze kuoa mtu mwingine kungekuwa kwa kweli kumtenda mke wake mambo ya hiana. Mtu kumtenda mwenzi wake asiye na hatia kwa njia hiyo ya udanganyifu, isiyo ya uaminifu ni dhambi mbaya sana machoni pa Mungu. Mwanamume anayetumia miaka bora zaidi katika maisha ya mwanamke halafu amtupilia mbali, labda kwa kupendelea mwanamke mchanga zaidi, ni msaliti kwa kweli.a

Hata hivyo, vipi juu ya mwenzi asiye na hatia anayechagua kumtaliki mwenzi wake ambaye amefanya uzinzi? Je! Mungu huchukia talaka za aina hiyo pia?

Kielelezo cha Mungu Mwenyewe

Je! kweli Mungu aweza kujua vile mtu ahisivyo akabiliwapo na uamuzi wa kama atamtaliki au hatamtaliki mwenzi wake aliye mzinzi? Kusema kwa ufananisho, Yehova alijiona mwenyewe kuwa ameoa taifa la kale la Israeli kupitia agano lake pamoja nao. (Isaya 54:1, 5, 6; 62:1-6; Yeremia 31:31, 32) Akiwa mume, Yehova alikuwa mwaminifu sikuzote, bila kugeuza urafiki wake kwa mataifa mengine. (Zaburi 147:19, 20; Amosi 3:1, 2) Lakini vipi juu ya Israeli? Taifa hilo lilithibitika kuwa mke wa aina gani?

Likiwa zima, tena na tena taifa hilo lilithibitika kuwa lisilo jaminifu kwa lile agano, hatimaye likifikia ile hali inayoelezwa katika sala iliyorekodiwa kwenye Danieli 9:5, 6: “Tumefanya dhambi, tumefanya ukaidi, tumetenda maovu, tumeasi, naam, hata kwa kuyaacha maagizo yako na hukumu zako; wala hatukuwasikiliza watumishi wako, manabii, ambao kwa jina lako walisema na wafalme wetu, na wakuu wetu, na baba zetu, na watu wote wa nchi.” Machoni pa Yehova, kukosa uaminifu huko kulikuwa sawa na mke kufanya uzinzi.—Yeremia 3:1.

Baada ya karne nyingi za subira na ustahimilivu, Yehova alifanya nini? Kwa kuchukua hatua kubwa ya kihukumu, akitupilia kwanza makabila ya kaskazini halafu makabila ya kusini nje ya nchi yao hadi katika utumwa, Yehova ni kama alijitaliki kutoka kwa taifa hilo. (Yeremia 3:8; Danieli 9:11, 12) Kwa hiyo kwa kufikiria kielelezo chake mwenyewe, Yehova Mungu angechukizwaje mwenzi asiye na hatia achaguapo kumtaliki mwenzi ambaye amekosa uaminifu kwa kiapo cha ndoa?

Ndoa ni mpango mtakatifu machoni pa Mungu, na wale wanaoingia katika mpango huo hawapaswi kuchukua vivi-hivi kiapo walichotoa. (Waebrania 13:4) Lakini ikiwa mwenzi wa mtu si mwaminifu kwa kiapo hicho kwa kufanya “uasherati,” Mungu humpa mwenzi aliye mwaminifu haki ya kuamua kama atasamehe au kutafuta talaka. (Mathayo 19:9) Huo ni uamuzi mgumu, ambao ni yule mwenzi asiye na hatia pekee apaswaye kufanya. Ikiwa yule mwenzi mwaminifu aamua kuvunja ndoa hiyo, yeye hapaswi kuhisi mwenye hatia kwa sababu ya kutafuta talaka. Kumbuka kwamba Yehova huchukia, si talaka zote, bali aina ya talaka inayohusu mtu kutupilia mbali mwenzi wake kwa njia isiyo ya kimaandiko ili achukue mwingine.b

[Maelezo ya Chini]

[Hisani ya Picha katika ukurasa wa 20]

Historic Costume in Pictures/ Dover Publications, Inc., New York