யோவானுக்குக் கிடைத்த வெளிப்படுத்துதல்

22 பின்பு, வாழ்வு தரும் தண்ணீர் நிறைந்த ஆற்றை அவர் எனக்குக் காட்டினார்;+ அது பளிங்குபோல் பளபளத்தது. கடவுளுடைய சிம்மாசனத்திலிருந்தும் ஆட்டுக்குட்டியானவருடைய+ சிம்மாசனத்திலிருந்தும் அது புறப்பட்டு, 2 நகரத்தின் முக்கியத் தெரு நடுவில் பாய்ந்தோடியது. ஆற்றின் இரண்டு பக்கங்களிலும் வாழ்வு தரும் மரங்கள் இருந்தன. அவை மாதத்துக்கு ஒரு தடவை என வருஷத்துக்கு 12 தடவை பழம் கொடுத்தன; அவற்றின் இலைகள் தேசத்தார் குணமாவதற்கு உதவின.+

3 அங்கே இனி எந்தச் சாபமும் இருக்காது. கடவுளுடைய சிம்மாசனமும் ஆட்டுக்குட்டியானவருடைய சிம்மாசனமும்+ அந்த நகரத்தில் இருக்கும். அவருடைய அடிமைகள் அவருக்குப் பரிசுத்த சேவை செய்வார்கள். 4 அவருடைய முகத்தை அவர்கள் பார்ப்பார்கள்.+ அவருடைய பெயர் அவர்களுடைய நெற்றிகளில் இருக்கும்.+ 5 இனி இரவு என்பதே இருக்காது.+ விளக்கோ சூரிய ஒளியோ அவர்களுக்குத் தேவைப்படாது. ஏனென்றால், கடவுளாகிய யெகோவா* அவர்கள்மீது ஒளிவீசுவார்.+ அவர்கள் என்றென்றும் ராஜாக்களாக ஆட்சி செய்வார்கள்.+

6 பின்பு, அவர் என்னிடம், “இந்த வார்த்தைகள் நம்பகமானவை, உண்மையானவை;+ தீர்க்கதரிசிகளுக்குத் தன்னுடைய வார்த்தைகளைக் கொடுக்கிற கடவுளாகிய யெகோவா,*+ சீக்கிரத்தில் நடக்க வேண்டியவற்றைத் தன்னுடைய அடிமைகளுக்குக் காட்டுவதற்காகத் தன்னுடைய தூதரை அனுப்பினார். 7 இதோ! நான் சீக்கிரமாக வருகிறேன்;+ இந்தச் சுருளில் இருக்கிற தீர்க்கதரிசன வார்த்தைகளைக் கடைப்பிடிக்கிறவன் எவனோ அவன் சந்தோஷமானவன்”+ என்று சொன்னார்.

8 யோவானாகிய நான்தான் இவற்றைக் கேட்டுக்கொண்டும் பார்த்துக்கொண்டும் இருந்தேன். நான் கேட்டும், பார்த்தும் முடித்த பின்பு, இவற்றை எனக்குக் காட்டிய தேவதூதரை வணங்குவதற்காக அவருடைய காலில் விழுந்தேன். 9 ஆனால் அவர், “வேண்டாம்! இப்படிச் செய்யாதே! உன்னைப் போலவும், தீர்க்கதரிசிகளாகிய உன் சகோதரர்களைப் போலவும், இந்தச் சுருளின் வார்த்தைகளைக் கடைப்பிடிக்கிறவர்களைப் போலவும் நானும் ஓர் அடிமைதான்; கடவுளை வணங்கு”+ என்று சொன்னார்.

10 அதோடு அவர் என்னிடம், “இந்தச் சுருளில் இருக்கிற தீர்க்கதரிசன வார்த்தைகளை முத்திரை போட வேண்டாம். ஏனென்றால், குறித்த காலம் நெருங்கிவிட்டது. 11 அநீதியைச் செய்கிறவன் தொடர்ந்து அநீதியைச் செய்யட்டும்; அசுத்தமானவன் தொடர்ந்து அசுத்தமானதைச் செய்யட்டும்; நீதியுள்ளவன் தொடர்ந்து நீதியைச் செய்யட்டும்; பரிசுத்தமுள்ளவன் தொடர்ந்து பரிசுத்தமாக நடக்கட்டும்.

12 “‘இதோ! நான் சீக்கிரமாக வருகிறேன். அவரவர் செய்த செயல்களுக்கு ஏற்ப அவரவருக்குப் பலன் கொடுப்பேன்.+ 13 நானே ஆல்பாவும் ஒமேகாவும்,*+ முதலும் கடைசியும், ஆரம்பமும் முடிவுமாக இருக்கிறேன். 14 வாழ்வு தரும் மரங்களின் பழங்களைச் சாப்பிடும் உரிமை கிடைப்பதற்காகவும்,+ நுழைவாசல்கள் வழியாக நகரத்துக்குள் நுழைகிற வாய்ப்புக் கிடைப்பதற்காகவும்+ தங்கள் அங்கிகளைத் துவைத்தவர்கள்+ சந்தோஷமானவர்கள். 15 நாய் போன்றவர்களும்,* ஆவியுலகத் தொடர்புகொள்கிறவர்களும், பாலியல் முறைகேட்டில்* ஈடுபடுகிறவர்களும், கொலைகாரர்களும், சிலைகளை வணங்குகிறவர்களும், பொய்யை விரும்பி பொய்யிலே புரளுகிறவர்களும்+ வெளியே இருப்பார்கள்.’

16 ‘சபைகளுடைய நன்மைக்காக இவற்றை உங்களுக்குச் சாட்சியாக அறிவிக்கும்படி இயேசுவாகிய நான் என் தூதரை அனுப்பினேன். நான் தாவீதின் வேராகவும் சந்ததியாகவும்+ இருக்கிறேன், பிரகாசமான விடியற்கால நட்சத்திரமாகவும்+ இருக்கிறேன்.’”

17 “வருக! வருக!” என்று கடவுளுடைய சக்தி அழைத்துக்கொண்டே இருக்கிறது, மணமகளும்+ அதேபோல் அழைக்கிறாள். கேட்கிற எவரும் “வருக, வருக!” என்று அழைக்கட்டும்; தாகமாயிருக்கிற எவரும் வரட்டும்;+ விருப்பமுள்ள எவரும் வாழ்வு தரும் தண்ணீரை இலவசமாக வாங்கிக்கொள்ளட்டும்.+

18 “இந்தச் சுருளில் இருக்கிற தீர்க்கதரிசன வார்த்தைகளைக் கேட்கிற எல்லாருக்கும் சாட்சியாக நான் சொல்கிறேன்: ஒருவன் இவற்றோடு எதையாவது கூட்டினால்,+ இந்தச் சுருளில் எழுதப்பட்டிருக்கிற தண்டனைகளைக் கடவுள் அவன்மேல் கூட்டுவார்.+ 19 ஒருவன் இந்தத் தீர்க்கதரிசனச் சுருளின் வார்த்தைகளிலிருந்து எதையாவது எடுத்துவிட்டால், இந்தச் சுருளில் எழுதப்பட்ட காரியங்களிலிருந்து கடவுள் அவனுடைய பங்கை எடுத்துவிடுவார்; வாழ்வு தரும் மரங்களின் பழத்தைச் சாப்பிடவோ+ பரிசுத்த நகரத்துக்குள்+ நுழையவோ அவனை அனுமதிக்க மாட்டார்.

20 இவற்றைச் சாட்சியாக அறிவிக்கிறவர், ‘ஆம், நான் சீக்கிரமாக வருகிறேன்’”+ என்று சொல்கிறார்.

“ஆமென்!* எஜமானாகிய இயேசுவே, வாருங்கள்.”

21 நம்முடைய எஜமானாகிய இயேசுவின் அளவற்ற கருணை பரிசுத்தவான்கள்மீது இருக்கட்டும்.