Junio

Job nixtáa májánʼ wéñuuʼ; nindxu̱u̱ mbáa xa̱bu̱ bi̱ nambájxu̱u̱ májánʼ ga̱jma̱a̱ Dios, mbáa xa̱bu̱ bi̱ gíʼdoo wéñuuʼ, bi̱ gíʼdiin mbaʼin e̱ji̱i̱n ga̱jma̱a̱ bi̱ numbayíí ma̱ngaa nambájxu̱u̱n májánʼ (Job 1:​1-5). Mú káaʼ mbá mbiʼíí nindáti̱ga̱a̱ xúgíʼ rí gíʼdoo (Job 1:​13-17). Nda̱wa̱á nikháñúún mbá xúgíinʼ e̱ji̱i̱n bi̱ nindoo kaʼñún wéñuuʼ. Gundxaʼwamíjna̱lú xú káʼnii nikumu̱u̱ Job ga̱jma̱a̱ a̱ʼgiu̱u̱ índo̱ nidxawíín dí mbá gu̱wi̱i̱nʼ e̱ji̱i̱n nikháñúún, ikhiin nigawúnʼ ga̱jma̱a̱ nikúwá ngíná wéñuuʼ. Ikha jngóo Job nixkuʼturiyaʼ xtíñuu mu masngájma dí xtáa ngíná ga̱jma̱a̱ nismbati̱go̱o̱ mbayíʼ (Job 1:​18-20). Nda̱wa̱á Gixa̱a̱ niʼni rí Job mbayóo mbá nandii rí xkawiʼ wéñuuʼ (Job 2:​6-8). Xa̱bu̱ ndiyamajkuíí wéñuuʼ Job asndu nagún gúyáaʼ mu maxnún consejo (Job 31:18). Mú rí xúgi̱, bi̱ nambájxuu májánʼ gajmíi̱n, bi̱ numbayíí asndu a̱ngui̱i̱n, na̱nguá eñún guyáá (Job 19:​13, 14, 16). w22.06 21 kutriga̱ 5, 6

Índo̱ mbáa najngúun iyááʼ, ndayóoʼ maʼnimbánuu consejo rí niʼthí apóstol Pablo, rí niʼthún cristiano bi̱ kúwá náa Éfeso. Niʼthún rí manindxu̱ún “xóo mbáa xa̱bu̱ nikhi̱i̱” bi̱ naʼni rí nanigu̱u̱ʼ Dios (Efes. 4:13). Rí asndu xóo xtáa raʼthún “gágajáánʼla má xúʼko̱”. Gajkhun má dí nandaaʼ xtayáá wéñuʼ Jeobá, mú ngajua rígi̱ ma̱ndoo mba̱ja̱a̱ itháan. Xú káʼnii rá. Apóstol Pablo niʼthí mbá rí ma̱ndoo mu̱ʼni̱, nuxkamaa náa Filipenses 1:9. Pablo nindo̱ʼo̱ Jeobá rí ngajua dí niguáʼdáá Filipenses “maʼga rajoo má xúʼko̱”. Rígi̱ nandoo gáʼthúu̱n rí ngajua dí kuaʼdáá náa Dios ma̱ndoo mba̱ja̱a̱ itháan. Mú, ndayóoʼ muʼnigajma̱a̱ mu ‹muguaʼdáá mbá ku̱ma̱ kájxi̱ ga̱jma̱a̱ dí xúgíʼ gákru̱ʼu̱lú›. Rígi̱ nandoo gáʼthúu̱n, á mu rí nuniʼniniiʼ itháan Jeobá, itháan má gáʼndulú kuʼyáá ga̱jma̱a̱ itháan má gánigulú xóo xa̱bu̱ nindxu̱u̱ ma̱ngaa xóo kaʼnii eʼni. Nandulú rí Jeobá maxtáa gagi, nditháan tsíyúlú mu̱ʼni̱ dí ikhaa maxtáa ngíná. Nu̱ʼni̱ tsiakimíjna̱ mu mbuʼyáá ndiéjunʼ dí ikhaa gíʼthu̱u̱n náa ikháánʼlú ga̱jma̱a̱ nduʼyáʼ xóo mu̱ʼni̱. w22.08 2, 3 kutriga̱ 3, 4

Libro ndrígóo Apocalipsis na̱nguá ejkha̱ inún xúgíinʼ xa̱bu̱, i̱ndó na̱jkha̱ inulú ikháanʼ bi̱ ni̱ndxu̱lú xa̱bi̱i̱ Dios. Ikha jngóo tséʼniulú tsiánguá índo̱ nduʼyáá dí mangáánʼ kuwáánʼ ruʼnimbáníí kiʼtáriyaʼ dí nagui̱i̱ wéñuʼ dí naʼthí ikhí. Apóstol Juan niʼthí ga̱jma̱a̱ numuu mbiʼi rúʼko̱ índo̱ niʼthí: “Ga̱jma̱a̱ numuu espíritu santo nijkhánú nixtáá náa mbiʼi ndrígóo Tátá” (Apoc. 1:10). Juan niʼnirámáʼ ajngáa rúʼko̱ nákha mijngii tsiguʼ 96 tsiguʼ dí nirígá nda̱wa̱á. Nákhá ikhú, “mbiʼi ndrígóo Tátá” mba̱yu̱u̱ʼ mbiʼi ndiyóoʼ xóó mambanúu (Mat. 25:​14, 19; Luc. 19:12). Mú, kiʼtáriyaʼ dí na̱ʼkha̱ náa Biblia nasngájma dí mbiʼi rúʼko̱ nigi̱ʼdu̱u̱ nákha tsiguʼ 1914, índo̱ Jesús ni̱jkha̱nú ninindxu̱u̱ Rey náa mekhuíí. Asndu má nákha tsiguʼ rúʼko̱ nigi̱ʼdu̱u̱ nigumambánuu kiʼtáriyaʼ dí na̱ʼkha̱ náa Apocalipsis, dí kaʼyoo mambanúu náa xuajñuu Dios. Ikha jngóo ikháanʼlu kuwáánʼ náa “mbiʼi ndrígóo Tátá” (Apoc. 1:3). w22.05 2 kutriga̱ 2, 3

Nákha xóó xtáa xujkhú xkawi̱i̱ʼ ga̱jma̱a̱ profeta bi̱ minduwaaʼ mbá nájmi̱i̱n nijthiin náa mañu rí nakha ga̱jma̱a̱ azufre. Rígi̱ naʼni mbuʼyáá dí índo̱ kaʼníí kúwá rutañajunʼ xa̱bu̱ sia̱nʼ bugi̱, maguma gámbíin asndu kámuu. Rí naʼsngúlú. Bi̱ cristianos ndayóoʼ rí maguajún jmbu náa Dios ga̱jma̱a̱ náa Xa̱bu̱ Ñajunʼ ndrígóo (Juan 18:36). Mu ma̱ndoo mu̱ʼni̱ rígi̱ ndayóoʼ muguajún jmbu ga̱jma̱a̱ xúndawamíjna̱ náa política. Mu mu̱ʼni̱ rígi̱ maʼniulú mingíjyúuʼ numuu rí xa̱bu̱ ñajunʼ nandún dí mumbáñún, tséʼniuu á mu ga̱jma̱a̱ dí nuʼthá o dí nu̱ʼni̱. Bi̱ nuni̱ rígi̱ naguanúʼ nundrigú tsinaʼ ndrígóo xujkhú xkawi̱i̱ʼ (Apoc. 13:​16, 17). Bi̱ gáguáʼdáá tsinaʼ rígi̱ ní xándoo kaʼñúún Jeobá ga̱jma̱a̱ munimbáti̱ga̱ dí makuwá kámuu mbiʼi (Apoc. 14:​9, 10; 20:4). Gíʼdoo wéñuuʼ numuu dí muguajún jmbu, tséʼniuu á mu xa̱bu̱ ñajunʼ nutsudáánʼ mumbáñún. w22.05 10, 11 kutriga̱ 12, 13

I̱mba̱ meta dí ma̱ndoo muguaʼdáá nindxu̱u̱ dí majmañulú mbá dí nuxi̱ʼ. A mu nugimíjná muʼni mbá ñajunʼ ga̱jma̱a̱ nuʼni mbáníí, makuwáánʼ xawii ga̱jma̱a̱ manirathanlú. Gundxaʼwamíjna̱ ga̱jma̱a̱ numún a̱ngiu̱lú bi̱ nuruguambáá maguma sucursal, Guʼwá náa narígá Asambleas ga̱jma̱a̱ náa Guʼwá nagimbáanʼ. A̱ngiu̱lú bugi̱ nijmañún numuu dí niñejunʼ gajmiún bi̱ nakru̱ʼu̱u̱n májánʼ. Xa̱bekha ga̱jma̱a̱ gu̱ʼu̱ kúwá rajmañún xóo muni̱ kaʼwi̱i̱ Guʼwá náa nagimbáanʼ ga̱jma̱a̱ náa narígá Asambleas. Jeobá bi̱ nindxu̱u̱ “Rey bi̱ xtáa kámuu”, ga̱jma̱a̱ Jesús bi̱ nindxu̱u̱ “Rey náa bi̱ nutañajunʼ xóo reyes”, najmiún xa̱bu̱ bugi̱ mu muni̱ ñajunʼ dí gíʼdoo numuu (1 Tim. 1:17; 6:15). Ikhaa jngóo gajmulú dí najmañulú nu̱ʼni̱ mu mu̱ʼni̱ mba̱a̱ Jeobá, raʼkháa ikháánʼ (Juan 8:54). w22.04 24 kutriga̱ 7; 25 kutriga̱ 11

Salomón nigiʼdoo wéñuuʼ ga̱jma̱a̱ nixtáa náa mbá guʼwá mitsaanʼ (1 Rey. 10:​7, 14, 15). Mú Jesús káaʼ nguátháá má nixtáa ga̱jma̱a̱, ma̱ngaa asndu goʼwóoʼ tágiʼdoo (Mat. 8:20). Maski ajndu xúʼko̱ Salomón ga̱jma̱a̱ Jesús ndiyáá awa̱án ga̱jma̱a̱ numuu rígi̱, numuu rí ku̱ma̱ ndrígu̱ún na̱ʼkha̱ náa Jeobá. Salomón ni̱jkha̱nú ndiʼyoo dí mbújkha̱a̱ ma̱ndoo muʼtsi̱ rí ndayúlú o muguaʼdáá rí nandulú. Maski ajndu Salomón nigiʼdoo wéñuuʼ, mu ni̱jkha̱nú ndiʼyoo dí rígá rí itháán gíʼdoo numuu ki xóo mbújkha̱a̱. Mbá xkri̱da, ikhaa niʼnirámáʼ: “Itháán májánʼ dí majmaʼníínʼ xóo mbáa xa̱bu̱ bi̱ májáanʼ ki xóo dí maraʼdáá wéñuuʼ” (Prov. 22:1; nota). Ma̱ngaa ni̱jkha̱nú ndiʼyoo dí raʼkháa xúgíʼ mbiʼi kúwá gagi xa̱bu̱ bi̱ nandún kuyáá mbújkha̱a̱ (Ecl. 5:​10, 12). Ma̱ngaa niʼthí rí xákumulú kuʼyáá wéñuuʼ mbújkha̱a̱ numuu dí rúʼko̱ nacha̱ naguámbá (Prov. 23:​4, 5). w22.05 21 kutriga̱ 4, 5

Rí mundxaʼwamíjna̱ xóo naʼni tsajkurámáánʼ Jeobá rí mbiʼi xúgi̱, naʼni rí mambájxúlú itháán májánʼ gajmiúlú. Ma̱ngaa rí mundxa̱ʼwa̱míjna̱ xóo gáʼni tsajkurámáánʼ nda̱wa̱á, rúʼko̱ gáʼni rí maʼndulú muʼni ñajuunʼ ga̱jma̱a̱ xúgíʼ a̱jkiu̱lú ga̱jma̱a̱ gagi. Jeobá matuxu̱u̱ mambáyulú índo̱ gáʼni gámbáa dí rígá náa numbaaʼ xkawiʼ rígi̱. Numuu rí ikhaa nindxu̱u̱ mbáa Dios jmbii ga̱jma̱a̱ ikhaa nandoo marigá dí jmbu, rúʼko̱ nandoo nduʼyáá gajkhun numuu rí nánguá maniñuuʼ xóó itháán mbiʼi mu marigá rí nandoo Gixa̱a̱ (Isa. 25:9). Xóo má Jeobá ga̱jma̱a̱ ikháanʼlu nuguaʼthi̱i̱n má xúʼko̱ rí maʼga̱nú mbiʼi rí maguma kuwáanʼlu. Nákha xóo tséʼkha̱nú mbiʼi rúʼko̱, nduʼyáá rí gíʼdoo wéñuʼ numuu rí muʼtákáñii má xúʼko̱, muʼnigajma̱a̱ ajngóo ma̱ngaa rí muʼgíʼ muʼni ga̱jma̱a̱ rí mundxa̱ʼwa̱míjna̱ xóo naʼni tsajkurámáanʼ. Á mu nuʼni xúgíʼ rígi̱, Jeobá mambáyulú muʼni ñajuunʼ ga̱jma̱a̱ gagi ma̱ngaa rí maʼngulú má xúʼko̱. w22.11 13 kutriga̱ 18, 19

Maski asndu náa Biblia na̱nguá eʼthí ga̱jma̱a̱ numuu xóo nijngúun iyááʼ Timoteo, mbáa Eunice bi̱ nindxu̱u̱ ru̱dúu̱ ra̱ʼkhá tháán nidxuu mbiʼi dí ikhaa nijngúun iyááʼ (Prov. 23:25). Maski asndu Eunice niʼniuu mingíjyúuʼ wéñuuʼ, mú niʼngo̱o̱ nimbáyúu xkri̱da ndrígóo Timoteo mu maʼndoo kaʼyoo Jeobá ga̱jma̱a̱ Jesús. Anu̱u̱ ga̱jma̱a̱ ru̱dúu̱ Timoteo tségún mbóó religión. Anu̱u̱ nindxu̱u̱ griego, ru̱dúu̱ ga̱jma̱a̱ xíñúuʼ nindxu̱ún judíos (Hech. 16:1). Mbáa Timoteo nikhi̱i̱ má índo̱ Eunice ga̱jma̱a̱ Loida ninindxu̱ún xa̱bi̱i̱ Cristo. Anu̱u̱ na̱nguá niriʼkhu̱u̱ religión ndrígóo. Timoteo nikhi̱i̱ má, ikhaa jngóo ndiyóoʼ maraʼwíí má ikhaa dí maʼni. Ndiéjunʼ gáraʼwíí maʼni xá. A̱ngiu̱lú gu̱ʼú wanii bi̱ kúwá dí mbiʼi xúgi̱ nuni̱ xó má Eunice, nandún kuñún bi̱ kúwá náa guʼwún. Rí itháan nandún muni̱ nindxu̱u̱ dí mumbañún e̱jñu̱ún mu mambaxúún májánʼ gajmiún Jeobá. Ga̱jma̱a̱ Jeobá ndaʼyamajkuu xúgíʼ tsiakii dí ikhiin nuni̱ (Prov. 1:​8, 9). Ikhaa nambáñún mbaʼiin a̱ngiu̱lú gu̱ʼú wanii mu musngúún e̱jñu̱ún rí maʼndún kuyáá ga̱jma̱a̱ dí muni̱ ñajunʼ Jeobá. w22.04 16 kutriga̱ 1-3

Xájyúuʼ má, Jeobá magíwánʼ náa a̱jkiu̱ún xa̱bu̱ ñajunʼ dí “munimbaníí dí ikhaa nandxa̱ʼwáminaʼ”. Ndiéjunʼ gárígá rá. Dí mbá “gu̱wi̱i̱nʼ reyes”, xóo muʼthá, xa̱bu̱ ñajunʼ, munigíníi ga̱jma̱a̱ munigámbáa xúgíʼ náa kayá edxu̱u̱ religión dí mindu̱wa̱ʼ (Apoc. 17:​1, 2, 12 16). Xú káʼnii eʼyáá dí na̱jkha̱ rajngiyuu mambáa Babilonia rí Mba̱a̱ rá. Mbá dí ma̱ndoo mambáyulú muriʼña̱a̱ graxe̱ rúʼko̱ nindxu̱u̱ dí marmáʼáan a̱jkiu̱lú dí mañu dí mbiʼyuu Éufrates niñewu̱u̱n Babilonia dí nirígá nákha wajyúuʼ. Apocalipsis naʼthí dí mbaʼin wéñuuʼ bi̱ numbayíí Babilonia rí Mba̱a̱ nindxu̱u̱ xóo “iyaʼ” bi̱ nañewu̱u̱n (Apoc. 17:15). Mú, ma̱ngaa naʼthí dí iyaʼ rúʼko̱ mujndo̱o̱ʼ, rúʼko̱ nasngájma dí mbaʼin xa̱bu̱ muniñaaʼ ruyambáá náa xúgíʼ religión dí rígá náa xúgíʼ numbaaʼ (Apoc. 16:12). Rí kiʼtáriyaʼ rígi̱ xtáa má rambánuu, numuu rí mbaʼin xa̱bu̱ nuniña̱a̱ʼ religión dí ragájkhun ga̱jma̱a̱ nduyáʼ i̱ʼwáʼ náa ma̱ndoo mixtambáñuun ga̱jma̱a̱ xkujndu ndrígu̱ún. w22.07 5, 6 kutriga̱ 14, 15

Índo̱ nuʼni mba̱a̱ a̱jkiu̱lú, nusngajmá dí nuxnáa núma̱aʼ Dios ga̱jma̱a̱ numuu dí nagáwíinʼ a̱jkiu̱u̱n. Náa mbá xkri̱da dí Jesús niʼthí, niʼni mbríguii Jeobá xóo mbáa patruun bi̱ niʼni mba̱a̱ a̱jkiu̱u̱n kaʼyoo mbáa ñumbáá bi̱ tséʼngo̱o̱ gáʼni̱i̱ dí gíʼmaa. Mú, ñumbáá buʼko̱ tagáwíinʼ a̱jkiu̱u̱n kaʼyoo i̱mba̱ bi̱ na̱nguá ma gíʼmaa mba̱a̱ wéñuuʼ náa inuu (Mat. 18:​23-35). Ndiéjunʼ nindoo maʼsngúlú Jesús rá. Á mu nuxnáa núma̱aʼ ga̱jma̱a̱ numuu dí nagáwíinʼ a̱jkiu̱u̱n kaʼyulú Jeobá. Rúʼko̱ gaxkaxáanʼ mu muʼni mba̱a̱ a̱jkiu̱lú kuʼñúún eʼwíinʼ (Sal. 103:9). Niʼni mbayuuʼ tsiguʼ náa i̱yi̱i̱ʼ Bi̱ Nayejngoo niʼthí tséʼñuu ma nguáthá nuthu guʼni mba̱a̱ a̱jkiu̱lú kuʼñúún eʼwíinʼ, mu tsémbríguii ga̱jma̱a̱ xóo “eʼni mba̱a̱ a̱jkiu̱u̱n Jeobá ma̱ngaa dí nagáwiinʼ a̱jkiu̱u̱n xúgíʼ rígi̱ eʼni ga̱jma̱a̱ numuu tsigijñaʼ ndrígóo Cristo”. Ikhaa nagáwiinʼ a̱jkiu̱u̱n kaʼñúún xa̱bu̱ bi̱ nagáwiinʼ a̱jkiu̱u̱n kuñúún (Mat. 5:7). Jesús nisngájma kaʼwu rígi̱ índo̱ niʼsngúún mutájkháan xa̱bi̱i̱ eʼwíinʼ (Mat. 6:​14, 15). w22.06 10 kutriga̱ 8, 9

Jesús ni̱ʼkha̱ náa tsu̱du̱u̱ Ku̱ba̱ʼ xóo mbáa xa̱bu̱ numbaaʼ ga̱jma̱a̱ nisngájma májánʼ xóo nindxu̱u̱ Anu̱u̱ (Juan 14:9). Xóo ikhaa niʼni, nimbáyulúʼ muniʼnííʼ ga̱jma̱a̱ maʼndulú kuʼyáá Jeobá. Jesús nambáyulúʼ má xúʼko̱ ga̱jma̱a̱ kiʼsngáa ndrígóo ma̱ngaa rí xóo naxná ikha náa congregación cristiana rí mbiʼi xúgi̱. Niʼsngúlúʼ rí xóo makuwáánʼ rí naʼni maʼdxuu a̱jkiu̱u̱n Jeobá. Ga̱jma̱a̱ xúgiáanʼ ma̱ndoo mambáyulú dí nikháñuu Jesús. Índo̱ nigabi̱i̱ nixnáxi̱ eʼdiuu xóo mbá tsigijñaʼ rí mikaʼwu mu maʼni “kaʼwi̱i̱ aʼkhúlú” (1 Juan 1:7). Xúgi̱ nindxu̱u̱ mbáa Rey bi̱ nditháan xákháñún ga̱jma̱a̱ gíʼdoo wéñuuʼ tsiakii. ¡Edxu̱u̱ a̱bu̱nʼ maxtixmbi̱i̱! (Gén. 3:15). Asndu tsímáá gáʼni̱i̱ a̱jkiu̱ún xa̱bu̱ bi̱ guájun jmbu náa Dios índo̱ Gixa̱a̱ gáguma gámbáa. Mú xúgi̱ rí kuwáanʼ ruguáʼthi̱i̱n mbiʼi rúʼko̱, ndayóoʼ rí maʼngo̱o̱ a̱jkiu̱lú, xákanajkulú. Ndayóoʼ rí makumulú kuʼyáá Dios ndrígúlú ga̱jma̱a̱ xúgíʼ a̱jkiu̱lú. Bi̱ naguwáʼ náa e̱ji̱i̱n a̱ʼgu̱ muni tsajkurámíinʼ ‹xúgíinʼ xa̱bu̱ numbaaʼ›. w22.07 18 kutriga̱ 13; 19 kutriga̱ 19

Tsumáá gúraʼwíí mbá dí nandulú muʼnimbáníí. Náá numuu rá. Numuu dí xájmáán gúʼnimbáníí xúgíʼ ga̱jma̱a̱ numuu dí xóo kuwáánʼlú. Mbá xkri̱da, apóstol Pablo niñambáá mu marigá congregación náa Tesalónica. Mú bi̱ tsíñún gúyáá nixkriya̱a̱ʼ náa xuajin rúʼko̱ (Hech. 17:​1-5, 10). Á mu niguanúu ikhí asndu migamíi maguma gíníin bi̱ kúwá náa congregación. Mú Pablo tákánajkooʼ, niraʼwíí dí maʼni, numuu dí nda̱wa̱á nikuʼmaa maʼga Timoteo mu mambáñún maʼni gujkhuʼ fe ndrígu̱ún a̱ngiu̱lú bi̱ kúwá náa Tesalónica (1 Tes. 3:​1, 2). Ra̱ʼkhá tháán nikuwíinʼ gagi a̱ngiu̱lú bugi̱. Ma̱ndoo majmañulú náa xkridoo Pablo ga̱jma̱a̱ dí nigíʼnuu náa Tesalónica. Mbáa rígá mbá meta dí nandulú muʼnimbáníí xóo mu̱ʼni̱ ñajuunʼ Jeobá, mú mbá nacha̱ naxtiʼkhuu xóo kuwáánʼ, ikhaa jngóo nánguá eʼngulú gúʼnimbáníí (Ecl. 9:11). Ndiéjunʼ gúʼni̱ rá. Ma̱ndoo muʼgimi̱jna̱ i̱mba̱ meta dí majmáán muʼnimbáníí. w22.04 25, 26 kutriga̱ 14, 15

Jeobá naxnúlu tsiakii ga̱jma̱a̱ numuu rí wíji̱ maʼni nda̱wa̱á. Guʼyáá tikhu rí na̱ʼkha̱ náa Bi̱blia dí naʼni̱i̱ a̱jkiu̱lú índo̱ nuraʼníí xkujndu. Náa Biblia eʼthí rí Jeobá naʼthúlúʼ, dí nimbá xándoo “matsíngúlú náa ngajua rí gíʼdáánʼ Dios” maski ajndu nindxu̱u̱ mbá xkujndu gakhi̱i̱ (Rom. 8:​38, 39). Ma̱ngaa naʼthúlúʼ dí “xtáa mijngii náa xúgínʼ xa̱bu̱ bi̱ nutakáñii” xóo muʼthá, naʼdxawunlú (Sal. 145:18). Jeobá naʼthúlúʼ á mu nakumulú kuʼyáá maʼngulú muraʼníí asndu xú káʼníí xkujndu rí na̱ʼkha̱nú náa inulú ga̱jma̱a̱ makuwáánʼ gagi índo̱ numíniiʼlú (1 Cor. 10:13; Sant. 1:2). Náa ajngá rawuunʼ Dios naʼni marmáʼáan a̱jkiu̱lú dí xkujndu rí kuaʼdáá nindxu̱u̱ mbá xnga̱á, índo̱ nuʼnimbrígui̱i̱ ga̱jma̱a̱ rí makuwáánʼ kámuu mbiʼi. Rí Jeobá ekudaminaʼ maxnúlúʼ (2 Cor. 4:​16-18). Jeobá nakudaminaʼ rí maʼni gámbóo náa egi̱ʼdu̱u̱ xkujndu, Gixa̱a̱ ga̱jma̱a̱ bi̱ ni̱ndxu̱ún xóo ikhaa (Sal. 37:10). Lá nindra̱ʼa̱ náa edxa̱a̱ʼ versículo ndrígóo Biblia rí maxnáaʼ tsiakii mu maʼnga̱a̱ʼ matraʼníí xkujndu rí gáʼkha nda̱wa̱á ráʼ. w22.08 11 kutriga̱ 11

Xí naxmiéjunlú dí xáʼngulú gúʼnimbáníí má xúʼko̱ ikha ndrígóo Jeobá rá. Jeobá nakudaminaʼ dí jmbu dí natani̱ mani̱ndxu̱u̱ “xóo olas ndrígóo lamáa” (Isa. 48:18). Gundxa̱ʼwa̱míjná dí kuajún náa rawuunʼ lamáa nduʼyáá xú káʼnii tsigui̱jui̱i̱ e̱ʼkha̱ ola. Ikhú tséndxaʼwa̱míjna̱lú dí mbá mbiʼi maniñu̱u̱ʼ ra̱ʼkha̱ ola numuu dí maʼni má xúʼko̱. Ndiéjunʼ gíʼmaa mu̱ʼni̱ mu jmbu dí gúʼni̱ mani̱ndxu̱u̱ xóo ola ndrígóo lamáa rá. Índo̱ gúraʼwíí mbá dí mu̱ʼni̱ ginii gundxa̱ʼwa̱míjná ndiéjunʼ dí Jeobá nandoo mu̱ʼni̱, nda̱wa̱á dí rúʼko̱ gúraʼwíí dí mu̱ʼni̱. Maski ajndu mingíjyúuʼ nindxu̱u̱ mbóoʼ dí gúraʼwíí mu̱ʼni̱, mú Anu̱lú maxtáa má xúʼko̱ xawii mambáyulú mu muʼnimbulú má xúʼko̱ ikha ndrígóo (Isa. 40:​29-31). w22.08 30 kutriga̱ 15-17

Índo̱ gájngoo mbá 1,000 tsiguʼ Gixa̱a̱ magajnáa náa kúguraʼaa magíʼ maʼninduwiinʼ xa̱bu̱ jmbiin. Ikhú xúgínʼ ma̱ndoo musngajmá rí nunimbu̱ún kuyáá Dios ga̱jma̱a̱ rí ikhaa kaʼyoo maʼtáñajunʼ (Apoc. 20:​8-10). Rí ikhiin gúraʼwí muni ikhú nambiʼñún magumaraʼmáʼ kámuu mbiʼi náa libro rí ndaʼya. Tséʼyáá nguáthi̱i̱n gánindxu̱ún xóo Adán ga̱jma̱a̱ Eva, bi̱ xúnimbu̱ún kuyáá Xa̱bu̱ Ñajunʼ ndrígio̱o̱ Jeobá. Ndiéjunʼ gugíʼníí ikhiin xá. Apocalipsis 20:15 naʼthúlúʼ: “Bi̱ na̱nguá kiʼnirámáʼ mbiʼñún náa libro rí ndaʼya nijuiʼdamiʼi̱i̱n náa mañu rí nakha”. Xa̱bu̱ bi̱ xúnimbu̱ún maguma gámbíin mbájkhu. Mbiʼin xa̱bu̱ bi̱ jmbiin manújngún náa iwáá gaʼkhu rígi̱. w22.09 23, 24 kutriga̱ 15, 16

Náa congregación dí nirígá nákha siglo timbá nikúwi̱i̱n tikhunʼ bi̱ nithi má xúʼko̱ dí gíʼmaa muthu xtóo xuyuuʼ tsáʼkhún xa̱bu̱ bi̱ nanindxuún cristianos bi̱ na̱nguá nindxu̱ún judío, mbáa numuu dí xúʼko̱ xa̱bu̱ xúthi dí raʼkhí jma̱a̱ numún (Gál. 6:12). Maski ajndu apóstol Pablo tánigu̱u̱ʼ ga̱jma̱a̱ numuu xóo nindxaʼwamíjna̱, na̱nguá má nirikhún, dí phú niʼni ni̱jkha gaʼtamíjná gajmíin apóstoles ga̱jma̱a̱ bi̱ kuya̱ edxu̱u̱ náa Jerusalén (Hech. 15:2). Xóo niʼnimbánuu xkujndu rígi̱ niʼni dí marigá má xúʼko̱ tsímáá ga̱jma̱a̱ gagi náa congregación (Hech. 15:​30, 31). Á mu naku̱mu̱u̱ mbá xkujndu gakhi̱i̱, ma̱ndoo mu̱ʼni̱ marigá má xúʼko̱ dí tsímáá á mu nuʼthúún dí muxnulú ikha a̱ngiu̱lú bi̱ Jeobá nigruigi̱i̱n mu muñewa̱a̱n náa guʼwá nagimbáanʼ. Nuxkamaa ikha dí nagájnuu náa Biblia i̱yu̱lúʼ ga̱jma̱a̱ ikha dí naxnúlú xuajñuu Jeobá. Mu̱ʼni̱ marigá dí tsímáá náa nagimbáanʼ, á mu nuʼgíʼ nuʼnimbáníí xúgíʼ ikha rúʼko̱ ga̱jma̱a̱ tséʼni i̱ndó dí nandulú ikháánʼ. w22.08 22 kutriga̱ 8, 9

Xúgínʼ xa̱bu̱ ndayóoʼ mbáa bi̱ nambáxu̱u̱ ga̱jma̱a̱ mu maʼthúu̱n xóo xtáa nguáná. Mú nguáná rúʼko̱ naʼni mingíjyúuʼ. Mbáa na̱nguá eguʼwunlú muʼthán nimbáa xóo ekumulúʼ. O á mu nuʼthá mú nda̱wa̱á nduʼyáá dí bi̱ nambájxu gajmiúlú niʼthúún eʼwíinʼ dí niʼtháán, rúʼko̱ naʼni dí magawúnlú wéñuʼ. Mú, ra̱ʼkhá tháán edxu̱lúʼ índo̱ nduʼyáá dí mbáa tséʼthi dí ragíʼmaa majuiʼthá. Bi̱ kuya̱ edxu̱u̱ bi̱ najmiin nuyejxi̱i̱ ngo̱ʼo̱o̱ ajngáa dí ragíʼmaa mawáán, a̱ngiu̱lú nduyáá rí ni̱ndxu̱ún asndu “xóo náa ma̱ndoo matarkaʼwuminaʼ índo̱ naxnúu giñá mbiʼ” (Isa. 32:2). Nduʼyáá dí ma̱ndoo muʼtámíjná gajmiúlú ikhiin asndu ndiéjunʼ má numuu rí nduʼyáá dí xúthún eʼwíinʼ dí guʼthúún. Ni má ikháanʼ na̱nguá etsudiin muthulú mbá dí xáʼyóoʼ muthi. Ma̱ngaa, nduʼyáá dí guaʼdáá wéñuʼ numún guʼñún bi̱ kuya̱ edxu̱u̱ numuu rí ikhiin na̱nguá ethún ajmbiu̱ún muthúún dí xáʼyóoʼ mbuyáá. Rí phú gajkhun, ra̱ʼkhá tháán májánʼ nindxu̱u̱ dí bi̱ kuya̱ edxu̱u̱ xúthúún guʼñún xkujndu ndrígu̱ún eʼwíinʼ a̱ngiu̱lú dí nutamijná gajmiún. w22.09 11 kutriga̱ 10, 11

Ma̱ndoo mbuʼyáá gajkhun rí Jeobá maʼni káwíin xa̱bi̱i̱ bi̱ nuni rí jmbu índo̱ garigá “ga̱ʼkhu̱ rí majphú mba̱a̱” (Mat. 24:21; Dan. 12:1). Maʼni rígi̱, índo̱ mbá grupo xa̱bu̱, Gog ndrígóo Magog, muni rí xúgíʼ numbaaʼ mawiñunʼ kuñún xa̱bi̱i̱ Jeobá bi̱ nuni rí jmbu, asndu mangiin muwi̱i̱n bi̱ mbá 193 bi̱ kúwá náa Naciones Unidas. Jeobá bi̱ nindxu̱u̱ itháan Mba̱a̱ xáʼniuu mingíjyúuʼ rígi̱ gajmíi̱n ejército ndrígio̱o̱ bi̱ kúwá mekhuíí. Jeobá naʼthí: “Mani rí magúʼdoo numuʼ ga̱jma̱a̱ mani kaʼwi̱i̱ mbiʼyuʼ ga̱jma̱a̱ mani rí muninuwúnʼ náa mbaʼa xuajin; ga̱jma̱a̱ xúʼko̱ mbuyáá rí ikhúúnʼ ni̱ndxu̱ʼ Jeobá” (Ezeq. 38:​14-16, 23). Xkujndu rí maʼni Gog ndrígóo Magog mani̱ndxu̱u̱ rí marigá iwáá náa Armagedón, ikhú Jeobá maʼni gámbíin xúgíinʼ “reyes bi̱ kúwá náa xúgíʼ Ku̱ba̱ʼ” (Apoc. 16:​14, 16; 19:​19-21). Mú, i̱ndó “xa̱bu̱ jmbiin makuwá náa tsu̱du̱u̱ Ku̱ba̱ʼ, ga̱jma̱a̱ xa̱bu̱ bi̱ nda̱a̱ aʼkhúún maguanún ikhí” (Prov. 2:​21, nota). w22.10 16, 17 kutriga̱ 16, 17

Ikháánʼlú tséʼngulú gúʼyáá ndiéjunʼ dí rígá náa awúu̱n a̱jkiu̱ún, i̱ndó Jeobá naʼngo̱o̱ ndaʼyoo ndiéjunʼ dí endoo maʼni (Prov. 16:2). Ikhaa nandoo kaʼñúún xúgíinʼ enii xa̱bu̱ tséʼniuu má náa eguwáʼ o náa nigaji̱i̱n. Ikhaa naʼtáñajunlú rígi̱: “Gurmbáʼtáá a̱jkia̱la” (2 Cor. 6:13). Gíʼmaa maʼndulú kuʼñúún xúgíinʼ a̱ngiu̱lú bi̱ nu̱ʼni̱ ñajuunʼ Dios gajmiúlú, raʼkháa muʼthá numún. Ní má tséʼthá numún bi̱ na̱nguá kúwi̱i̱n náa congregación. Mbá xkri̱da, tséʼthá numún bi̱ kuʼñúún bi̱ na̱nguá kúwi̱i̱n náa dí gajkhun ní má tséndxaʼwamíjna̱ dí nditháan xáguánú mani̱ndxu̱ún Testigos. Á mu nundxa̱ʼwa̱míjnalú rúʼko̱ nuxujxímijnálú ga̱jma̱a̱ nakumulú dí ikháánʼ nindxu̱lú itháan májáanʼ xa̱bu̱ ki xóo eʼwíinʼ. Jeobá xtáa ragíʼthu̱u̱n xóó dí xúgíinʼ xa̱bu̱ náa “xúgíʼ xuajen” murtangamijnáá (Hech. 17:30). Nditháan xámbumulú dí Jeobá ndaʼyoo dí nindxu̱u̱ ra̱májáanʼ mbáa bi̱ naku̱mu̱u̱ dí itháan májáanʼ ki xóo eʼwíinʼ. Á mu nu̱ʼni̱ dí májánʼ dí Jeobá naʼthí, makuwáanʼlu gagi ga̱jma̱a̱ manindxu̱lú mbá xkrida náa eʼwíinʼ. Rúʼko̱ gáʼni dí maʼndún kuyulú ikháánʼ ga̱jma̱a̱ maʼndún kuyáá Dios ndrígúlú. w22.08 31 kutriga̱ 20-22

Tséʼniulú ma tsiánguá dí tikhuin xa̱bu̱ tsíñún gudxawíín dí nuʼtáraʼa, numuu dí nda̱wa̱á xa̱bu̱ muniulúʼ itháan gakhii (Dan. 11:44; 2 Tim. 3:12; Apoc. 16:21). Mú, nduʼyáá gajkhun dí Jeobá ma gámbáyulú. Xú káʼnii eʼyáá rá. Numuu dí ikhaa nimbañúún má xúʼko̱ xa̱bi̱i̱ mu munimbaníí ñajunʼ dí ikhaa nixnúún, maski ajndu gakhii nikumu̱ún ikhiin. Guʼyáá tikhu dí nigíʼnuu profeta Ezequiel, ikhaa niʼtaruʼúún judíos bi̱ nijkha kiʼdiin náa Babilonia. Xkáʼnii nindxu̱ún xa̱bu̱ bi̱ maʼgá gáʼtáruʼúún Ezequiel rá. Jeobá niʼthí dí judíos buʼko̱ “tsénimbu̱ún”, “xkujdiin” ga̱jma̱a̱ “tsédxuun mbá kayuuʼ”. Ra̱ʼkhá tháán ra̱míjíinʼ xóo tsúwáʼ ga̱jma̱a̱ ra̱ʼkhá xkawiinʼ xóo xi̱yúʼ. Ikha jngóo Jeobá niʼthúu̱n Ezequiel mbaʼa nuthu: “Xámiñaaʼ” (Ezeq. 2:​3-6). Timbá dí nimbáyúu Ezequiel mu majmaa maʼnimbánuu ñajunʼ dí nikhánáá ikhaa nindxu̱u̱ dí Jeobá nikungua̱a̱nʼ, ragajma, espíritu santo nixnúu tsiakii, ragajtsú, niguxnuu ajngá rawuunʼ Dios. w22.11 2 kutriga̱ 1, 2

Mbaʼaa dí Jeobá niʼniwíi náa tsu̱du̱u̱ ku̱ba̱ʼ maʼga̱nú mambáa o makañún, mú xa̱bu̱ xákáñún numuu dí ikhiin nixnún makuwá kámuu mbiʼi. Jeobá ma̱ngaa niʼniánʼ mu manigulú makuwáánʼ má xúʼko̱. Xó má eʼthí náa Biblia, Dios “nigíwanʼ náa a̱jkiu̱ún xa̱bu̱ mu maʼndún makuwá kámuu mbiʼi” (Ecl. 3:11). Numuu rúʼko̱ dí makañúlú nduʼyáá xóo mbáa bi̱ kuʼyálú sia̱nʼ (1 Cor. 15:26). Gundxa̱ʼwa̱míjna̱ ga̱jma̱a̱ numuu rígi̱. Á mu ikháanʼ naʼñulú gakhi̱i̱ wéñuʼ nandii dí asndu natigáánʼ kayuuʼ. Lá muguaʼthi̱i̱n dí magudiánʼ ráʼ. Na̱nguá, rí phú nu̱ʼni̱ nindxu̱u̱ dí najkualú náa guʼwá thana, mu xúʼko̱ muxnulú thana mu mu̱ʼni̱ gajmiúlú nandii. Lá ragájkhun dí nu̱ʼni̱ asndu káʼniín mu xákañulúʼ ráʼ. Xúʼko̱. Índo̱ nakháñuu mbáa bi̱ nandulú kuʼyáá, tséʼñuu á mu nindxu̱u̱ tikhu xa̱bu̱ú o níkhi̱i̱ má, mú ndajyúuʼ wéñuʼ dí mambumulú kuʼyáá (Juan 11:​32, 33). Gajkhun má, nduʼyáálú dí bi̱ Niʼniwáánʼ nandoo kaʼyulú wéñuʼ, na̱nguá niʼniáánʼ xúʼkhiín, numuu dí ikhaa niʼniánʼ mu makuwáánʼ má xúʼko̱. w22.12 3 kutriga̱ 5; 4 kutriga̱ 7

Mbaʼin a̱ngiu̱lú mbáa naʼniún nandii, namíñún o naku̱mu̱ún dí kúwá ndajkhuíín. Gu̱ʼni̱ asndu xó má eʼngo̱o̱ mu muʼtámijná gajmiúlú ikhiin. Mbá nandii ma̱ndoo maʼni rí xándoo gúʼyamijná gajmiúlú a̱ngiu̱lú. Mbáa ikháanʼ makumulú xóo má nikumu̱u̱ apóstol Juan índo̱ nindoo mbaʼyaminaʼ ga̱jma̱a̱ bi̱ nimbájxu̱u̱ ga̱jma̱a̱ bi̱ mbiʼyuu Gayo (3 Juan 13, 14). Mú ikhaa ndiʼyoo dí xándoo mbaʼyoo mbá nacha̱. Ikha jngóo niʼni xó má niʼngo̱o̱ mu makunguanʼ mbooʼ carta. Á mu naʼniaaʼ nandii xándoo midxu̱ʼ gátañu̱u̱ a̱ngiu̱lú, atayáʼ i̱mba̱ xóo maratamijná gajmiáanʼ. Índo̱ nuʼtámijná gajmiúlú a̱ngiu̱lú nayambáá mu xákumulú rí kuwáanʼ ndajkuánʼ ga̱jma̱a̱ nakuwáánʼ itháan gagi. Á mu nakumulú dí naxmiéjunlú wéñuʼ rá. Guʼtámijná gajmiúlú a̱ngiu̱lú bi̱ kuya̱ edxu̱u̱ ga̱jma̱a̱ gundrígú tsiakii rí gúxnulú (Isa. 32:​1, 2). w22.12 17, 18 kutriga̱ 6, 7

Náa Biblia naʼthúlú ma̱ngaa dí mbayuuʼ mbiʼi nixuda̱ʼ ajua̱nʼ náa rajkhúu José ga̱jma̱a̱ niruʼwajmaa ga̱jma̱a̱ cadena náa aphuu (Sal. 105:​17, 18). Ra̱ʼkhá tháán gakhi̱i̱ xóo nixtáa numuu dí nákhi ginii ninindxu̱u̱ mbáa bi̱ nikumu̱ún kuyáá ga̱jma̱a̱ nda̱wa̱á nixtáa náa guʼwá ejua̱a̱nʼ. Lá niraʼníí mbóoʼ xkujndu dí niʼni maxmiéjunlú ga̱jma̱a̱ nikumulú rí mámbá mbiʼi na̱jkha̱ raʼni itháán gakhi̱i̱ maski ajndu niʼtájkáanlu má wéñuuʼ ráʼ. Rúʼko̱ xúgiáanʼ ma̱ndoo maguaʼnilu. Jeobá tsíguijithun mu xúraʼníí nimbá tsáʼkhá náa numbaaʼ rígi̱ numuu dí Gixa̱a̱ nindxu̱u̱ bi̱ xtáa raʼtáñajunʼ (1 Juan 5:19). Mú ma̱ndoo mbuʼyáálu gajkhun dí Jeobá xtáa má xúʼko̱ xawii mbaʼyoo xúgííʼ dí naguáʼníílu ga̱jma̱a̱ dí naʼni maxmiéjunlú (Mat. 10:​29-31; 1 Ped. 5:​6, 7). Ma̱ngaa ikhaa nixná ajngóo: “Nditháan xániʼñáánʼ ga̱jma̱a̱ nimbá miʼtsu xániʼñátíga̱a̱n” (Heb. 13:5). Jeobá ma gámbáyulú mu maʼngulú muraʼníí xkujndu dí nakumulú dí nándáa dí ma̱ndoo muʼni. w23.01 16 kutriga̱ 7, 8

Náa Kiʼniraʼmáʼ naʼthúlú dí Dios xániñulú á mu rígá mbóoʼ náa nakiéʼkulu. Israelitas nikiéʼkhúún má xúʼko̱ náa Jeobá, mú ikhaa niʼni mba̱a̱ a̱jkiu̱u̱n kaʼñúún índo̱ nisngajma dí gajkhun nitanga̱a̱ a̱jkiu̱ún. Cristianos bi̱ nikúwíin nákha siglo timbá ma̱ngaa ndiyáá xú kaʼnii Jeobá ra̱ʼkhá tháán nindoo kaʼñún. Mbá xkri̱da, ikhaa niʼni dí apóstol Pablo maʼthúún dí muni̱ mba̱a̱ a̱jkiu̱ún ga̱jma̱a̱ muni̱ maʼnii a̱jkiu̱u̱n mbáa xa̱bu̱ bi̱ gajkhun natanga̱a̱ a̱jkiu̱u̱n ga̱jma̱a̱ aʼkhá mbiiʼ dí niʼni (2 Cor. 2:​6, 7; 1 Cor. 5:​1-5). Naʼni̱i̱ a̱jkiu̱lú mbuʼyáá dí Jeobá nindoo kaʼñún má xúʼko̱ xa̱bi̱i̱ bi̱ nikiéʼkúún, nimbáñun ma̱ngaa naxprígún ga̱jma̱a̱ niʼthúún dí matangi̱ín náa ikhaa. Ikhaa naʼthúlú dí xúʼko̱ má gáʼni xúgi̱ ma̱ngaa (Sant. 4:​8-10). Biblia naʼsngúlú rí Dios nindxu̱u̱ májáanʼ, najmañuu wéñuuʼ ga̱jma̱a̱ nandoo kaʼyulú. Náa libro rígi̱ ma̱ngaa nasngájma dí Jeobá nandoo dí muniʼníiʼ ga̱jma̱a̱ dí mambájxulú gajmiúlú. w23.02 7 kutriga̱ 16, 17

Dí narígá náa numbaaʼ nambánuu profecía dí na̱ʼkha̱ náa Biblia, ikhaa jngóo májánʼ má nindxu̱u̱ dí maxmiéjunlú mbuʼyáá dí narígá. Jesús niʼthí mbaʼa dí ma̱ndoo mambáyulú mbuʼyáá dí gárígá índo̱ gártumuu mbiʼi mambáa xúgíʼ dí rígá náa numbaaʼ ndrígóo Gixa̱a̱ (Mat. 24:​3-14). Mu muguaʼdáá mbá fe gujkhuʼ apóstol Pedro niʼthí dí gíʼmaa mbuʼyáá xú káʼnii embánuu profecía dí na̱ʼkha̱ náa Biblia (2 Ped. 1:​20, 21). Ikhaa nambáyulú mbuʼyáá awa̱án índo̱ guʼnigajmaa profecía. Ikhaa naxkajxáánʼ mu ‹makuwáanʼlu xawii mu mbuʼyáá índo̱ gáʼkha̱ mbiʼi ndrígóo Jeobá› (2 Ped. 3:​11-13). Raʼkháa numuu dí nandulú mbuʼyáá “náá mbiʼi ga̱jma̱a̱ náá hora” gáʼkha̱a̱ kayóo Armagedón. Mumuu dí nandulú majmulú májánʼ mbiʼi dí xóó naguanúu mu dí gúʼni “manindxu̱u̱ kaʼwu ga̱jma̱a̱ rí maxnúu gamajkhu Dios” (Mat. 24:36; Luc. 12:40). Dí phú nandulú muʼthá, dí xúgííʼ dí gúʼni̱ gíʼmaa mani̱ndxu̱u̱ numuu dí nandulú kuʼyáá Jeobá. Mu majmáán muʼnilú rígi̱ gíʼmaa mbuʼyáá ndiéjuunʼ dí phú kuwáanʼlu ruʼni̱. w23.02 16 kutriga̱ 4, 6

Rígá tikhu rí ndayóoʼ muni̱ “eʼwíinʼ mugu̱” mu xúʼko̱ ma̱ndoo makuwíin kámuu mbiʼi náa tsu̱du̱u̱ ku̱ba̱ʼ mitsaanʼ. Ikháánʼlú nusngajmá rí nandulú kuʼyáá índo̱ nuʼniu̱u̱n rí májánʼ a̱ngui̱i̱n Cristo bi̱ kaxtaʼwíin. Ikhaa manda̱ʼa̱a̱ʼlú cuenta rí xóo niʼñu̱u̱n a̱ngui̱i̱n (Mat. 25:​31-40). Mbá rí xóo mumbáñún a̱ngui̱i̱n Cristo nindxu̱u̱ dí muʼtáraʼa ga̱jma̱a̱ gagi ga̱jma̱a̱ dí mumbáñún xa̱bu̱ mu mani̱ndxu̱ún xa̱bi̱i̱ Dios (Mat. 28:​18-20). Na̱nguá má eyooʼ makuwáánʼ náa ku̱ba̱ʼ nuxi̱ʼ mu manindxu̱lú mbáa xa̱bu̱ bi̱ nandoo Jeobá magiʼdaa ikhí. Asndu nákha xúgi̱ ma̱ndoo mu̱ʼni̱ tsiakimíjna̱ mu manindxu̱lú mbáa xa̱bu̱ májánʼ náa dí xóo nuʼthá ga̱jma̱a̱ rí xóo nu̱ʼni̱ ma̱ngaa dí xúʼyáʼ dí muguaʼdáá wéñuʼ. Ndayóoʼ manindxu̱lú xa̱bu̱ jmbii náa Jeobá, náa ajmbiu̱lú o aʼgiu̱lú ga̱jma̱a̱ náa a̱ngiu̱lú. Á mu asndu nákha xúgi̱ nu̱ʼni̱ rí nandoo Dios xáʼniulú miʼskhaa mu̱ʼni̱ dí májánʼ náa Ku̱ba̱ʼ nuxi̱ʼ ma̱ngaa ma̱ndoo muʼnimi̱jna̱ muguaʼdáá cualidad dí nasngájma rí kuwáánʼ ruʼniratamijná mu makuwáánʼ ikhí. w22.12 11, 12 kutriga̱ 14-16

Nanigulúʼ dí Jesús nindxu̱u̱ Rey ndrígulú numuu rí ikhaa nindxu̱u̱ ra̱ʼkhá tháán májáanʼ bi̱ maʼtáñajunʼ. Mínaaʼ má Jeobá niʼnirataa ga̱jma̱a̱ nigíiʼ mani̱ndxu̱u̱ Rey (Isa. 50:​4, 5). Atatsaʼwáminaʼ ga̱jma̱a̱ numuu xóo nisngájma Jesús dí nandoo kaʼyulú dí niʼni gínáminaʼ ga̱jma̱a̱ numulú (Juan 13:1). Numuu dí Jesús nindxu̱u̱ Rey ndrígulú, ikhaa kaʼyoo dí maʼndulú kuʼyáá. Ikhaa niʼthí dí xa̱bu̱ bi̱ nandún kuyáá (bi̱ Jesús ndaʼñún xóo migiuuʼ) nusngajma rígi̱ índo̱ nunimbún kiʼtáñajunʼ ndrígóo (Juan 14:15; 15:​14, 15). ¡Ra̱ʼkhá tháán mitsaan dí ma̱ndoo mambájxulú gajmiulúʼ A̱ʼdióo Jeobá! Ikháán natayáá dí Jesús nindxu̱u̱ mbáa xa̱bu̱ wabaaʼ ga̱jma̱a̱ ndaʼyaridoo májánʼ Anu̱u̱. Nijmañaʼ xu káʼnii nixnúún ganitsu bi̱ nixkidxu̱u̱n niʼni a̱jkiu̱ún bi̱ nikáwabiinʼ asndu niʼni thanún bi̱ nindoo káñún (Mat. 14:​14-21). Ma̱ngaa natayáá dí nayéjkha̱ edxu̱u̱ náa xuajñuu Jeobá di mbiʼi xúgi̱ (Mat. 23:10). Ma̱ngaa natayáá rí índo̱ magiʼi mani̱ndxu̱u̱ xa̱bu̱ ñajunʼ ndrígóo Dios maʼni rí mitsaan ga̱jma̱a̱ numún xa̱bu̱ nda̱wa̱á. Xú káʼnii gándoo gatasngajmá dí nandaaʼ xtayáá xáʼ. Índo̱ natayaridáá xkridoo. Ikha jngóo rí ma̱ndoo matani nindxu̱u̱ dí maraxnaxíminaʼ náa Jeobá ga̱jma̱a̱ majnguáanʼ iyááʼ. w23.03 4 kutriga̱ 8, 10

Jeobá raʼkháa i̱ndó niʼniriyaʼ mekhu ga̱jma̱a̱ xúgíʼ dí rígá ikhí rí nagui̱i̱ wéñuuʼ ma̱ngaa niʼni ku̱ba̱ʼ ga̱jma̱a̱ lamáa, rígá mbaʼa wéñuuʼ rí ma̱ndoo majmañulú náa xúgíʼ rígi̱ (Sal. 104:​24, 25). Ma̱ngaa atatsaʼwáminaʼ rí xú káʼnii Dios niʼniwáánʼlú ikháanʼ. Niʼniwáánʼ rí ma̱ndoo manigulúʼ mbuʼyáá xúgíʼ dí nigumawíi ma̱ngaa nixnúlú maguaʼdáá mbá witsu rí mambáyulúʼ: Xóo idulú, cháʼwunlú, dí mbuʼyáá á mu manigulúʼ rí naʼphu̱ o naʼwan, rí nandoo nduʼya xi̱ʼ ga̱jma̱a̱ rí nandoo makumulú xkáʼnii nindxu̱u̱ dí nuru̱ʼgua̱. Náa Biblia naʼtulúʼ i̱mba̱ numuu ndíjkha rí gíʼmaa muyejxi̱i̱ xúgíʼ dí rígá, numuu rí nambáyulúʼ muniʼniiʼ itháan rí xú káʼnii nindxu̱u̱ Jeobá (Rom. 1:20). Mbá xkri̱da rí xú káʼnii nigumawíi xúgíʼ dí rígá nasngájma rí Dios gíʼdoo wéñuuʼ ku̱ma̱ ga̱jma̱a̱ rí xú káʼnii rígá mixtiʼkhu enii ganitsu nandoo nduʼyáá dí ikha nandoo kaʼyulú wéñuuʼ. Náa xúgíʼ rí ikhaa niʼniwíi nambáyulú muniʼniiʼ itháán májánʼ ga̱jma̱a̱ naxkaxáanʼ muʼgua kanuu itháán mijngii náa ikhaa. w23.03 16 kutriga̱ 4, 5

Mámbá mbiʼi maʼgá raʼni itháán gakhi̱i̱ náa numbaaʼ dí kuwáanʼlú ga̱jma̱a̱ muraʼníí tsáʼkhá náa mbaʼyóoʼ musngajmá á mu dí gajkhun guaʼdáá mbóo fe gujkhuʼ. Mbáa tikhuin xa̱bu̱ muni̱ dí maʼni a̱jma̱ a̱jkiu̱lú numuu dí muthulú dí Biblia tséʼthí dí gajkhun ga̱jma̱a̱ dí Jeobá tágruigi̱i̱n ñumbáá bi̱ jmbi̱i̱ mu muxna ikhaa náa xuajñuu. Á mu ikháanʼ nuʼnimbulú dí Ajngá rawuunʼ Dios naʼthí dí gajkhun maʼgúlú muraʼníí xúgííʼ tsáʼkhá rúʼko̱. Muraʼwíí muʼnimbulú ikha ndrígóo Jeobá asndu náa iwáá mbiʼi (Sal. 119:112). Xátiyulú muʼthúún eʼwíinʼ dí gajkhun ga̱jma̱a̱ muxnúnlú tsiaki̱i̱ dí munimbaníí má xúʼko̱ consejo dí kagu̱ Biblia (Sal. 119:46). Ma̱ngaa maʼngulú ‹muraʼníí xúgíʼ ga̱jma̱a̱ gagi› tsáʼkhá dí itháán gakhi̱i̱ xóo dí muni̱ gínáanʼlu (Col. 1:11; Sal. 119:​143, 157). Nambáyulú dí gajkhun mu mbuʼyáá dí rígá mbóoʼ dí kuáʼti̱i̱n ga̱jma̱a̱ naʼni muʼnimbulú ikha dí na̱ʼkha̱ ikhí, ma̱ngaa naʼthúlú dí índo̱ gáʼtañajunʼ Xa̱bu̱ ñajunʼ ndrígóo Dios ra̱ʼkhá tháán mitsaan gakuwáanʼlu. w23.01 7 kutriga̱ 16, 17

Mbruʼun rí makhañúu Jesús, ikhaa mba̱yu̱u̱ʼ niʼtájkháan ga̱jma̱a̱ numún xa̱bi̱i̱, nindo̱ʼo̱o̱ Anu̱u̱ rí mañewu̱u̱n náa xa̱bu̱ Xkawi̱i̱ʼ (Juan 17:15). ¡Xúʼko̱ nisngájma dí nindoo kaʼñún! Maski má inuu mamínuuʼ wéñuuʼ mú nixmiéjuunʼ rí makuwíin májánʼ xa̱bi̱i̱. Xó má niʼni Jesús, xúʼko̱ gíʼmaa muʼni mangáánʼ raʼkháa i̱ndó maxmiéjunlú kuʼyamijná i̱ndó ikháánʼ. Gíʼmaa muʼtájkáan ga̱jma̱a̱ numún a̱ngiu̱lú. Xúʼko̱ gusngajmá rí nuʼnimbulú kiʼtáñajunʼ ndrígóo Jesús dí maʼndulú kuʼyamijná ga̱jma̱a̱ musngajmáá Jeobá rí gajkhun nandulú kuʼñúún a̱ngiu̱lú. Nduʼyáá má rí índo̱ nuríyaʼ mbiʼi muʼtájkáan ga̱jma̱a̱ numún xa̱bi̱i̱ Jeobá, na̱nguá nindxu̱u̱ mbiʼi ndíí. Náa Biblia naʼthí dí “índo̱ xa̱bu̱ jmbii naʼtájkáan gíʼdoo wéñuuʼ tsiakii” (Sant. 5:16). Ndayóoʼ rí muʼtájkáan ga̱jma̱a̱ numún a̱ngiu̱lú numuu rí nuraʼníí mbaʼa ga̱ʼkhu̱ rí mingíjyúuʼ. w22.07 23, 24 kutriga̱ 13-15