Ma̱ndoo makuwáánʼ kámuu mbiʼi

 1. Xú káʼnii embáyulú dí mundxaʼwamíjnalú dí nikudaminaʼ maʼni Jeobá rá.

JEOBÁ nakudaminaʼ maʼni dí ikháán’ “makuwáanʼlu kámuu mbiʼi” (Rom. 6:23). Índo̱ nundxaʼwamíjná ga̱jma̱a̱ numuu dí mitsaanʼ wéñuʼ dí guáʼthi̱i̱n, dí nandulú kuʼyáá Jeobá naʼni itháan mba̱a̱. Gundxaʼwamíjna̱ ga̱jma̱a̱ numuu rígi̱, Anu̱lú bi̱ xtáa mekhuíí nandoo kaʼyulú wéñuʼ ikha jngóo naxnúlú regalo rígi̱ mu xúʼni̱ wájímijnálú náa ikhaa.

 2. Ndiéjunʼ exkajxáánʼ mu̱ʼni̱ índo̱ nundxa̱ʼwa̱míjna̱ ga̱jma̱a̱ numuu dí nikudaminaʼ maʼni Jeobá rá.

² Dí nakudaminaʼ maxnúlú Jeobá rí makuwáánʼlú kámuu mbiʼi, nambáyulúʼ muraʼníí xkujndu. Xúniʼñánʼ ru̱ʼni̱ ñajuunʼ Jeobá maski ajndu xa̱bu̱ sia̱nʼ nandún gúradiáánʼ. Náá numuu rá. Numuu rí nduʼyáá dí á mu nakháñulú numuu rí naguájun jmbu náa Jeobá, ikhaa má gákuxáánʼlú ga̱jma̱a̱ naʼthúlú dí nda̱wa̱á xákáñulú (Juan 5:28, 29; 1 Cor. 15:55-58; Heb. 2:15). Náá numuu dí naʼni kañiiʼ a̱jkiu̱lú dí makuwáánʼlú kámuu mbiʼi rá. Guʼyáá tikhu numuu.

 3. Ndíjkha nduʼyáá dí Jeobá ma̱ndoo maʼni dí makuwáánʼ kámuu mbiʼi rá. (Salmo 102:12, 24, 27.)

³ Nduʼyáá dí Jeobá ma̱ndoo maʼni dí makuwáánʼ kámuu mbiʼi, numuu dí náa ikhaa na̱ʼkha̱ dí nandoo nduʼyalú ga̱jma̱a̱ dí ikhaa xtáa asndu kámuu mbiʼi (Sal. 36:9). Guʼyáá tikhu texto ndrígóo Biblia náa naʼthí dí Jeobá xtáa má xúʼko̱ ga̱jma̱a̱ maxtáa má xúʼko̱. Salmo 90:2 naʼthí dí ikhaa ‹xtáa asndu nákha wájyúuʼ ga̱jma̱a̱ ikhaa má gáxtáa asndu kámuu mbiʼi›. Náa Salmo 102 naʼthí ikháá kayuuʼ xúʼko̱ má ma̱ngaa (atraxnuu Salmo 102:12b, 24c, 27d). Gaʼyee Habacuc niʼnirámáʼ ga̱jma̱a̱ numuu Anu̱lú bi̱ xtáa mekhuíí: “Oh Jeobá, lá raʼkháa ikháán xtaa asndu kámuu mbiʼi ráʼ. Oh Dios ndrígóʼ, Santo ndrígóʼ, bi̱ tsikháñuu” (Hab. 1:12).

 4. Ndíjkha dí na̱nguá gíʼmaa maxmiéjuanʼ á mu naʼniaaʼ miʼskhaa makrua̱ʼa̱a̱ʼ dí Jeobá nixtáa má xúʼko̱ rá.

⁴ Lá naʼniaaʼ miʼskhaa makrua̱ʼa̱a̱ʼ dí Jeobá ‹nixtáa má xúʼko̱› ráʼ.(Is. 40:28.) Raʼkháa má i̱ndó ikháán ekuma̱a̱ʼ xúʼko̱ kaʼnii. Elihú niʼthí ga̱jma̱a̱ numuu Dios: ‹na̱nguá eʼngo̱o̱ gákru̱ʼu̱lú nguátá tsiguuʼ› (Job 36:26). Dí na̱nguá eʼngo̱o̱ gákru̱ʼu̱lú mbóo káʼnii na̱nguá eyoo gáʼthúu̱n dí ragájkhun. Mbá xkri̱da, mbáa na̱nguá ekru̱ʼu̱lú kájndii xú káʼnii ñajunʼ aguʼ, mú rúʼko̱ na̱nguá eyoo gáʼthúu̱n dí nda̱a̱. Ikhaa má kayuuʼ, mbáa xáʼga̱nú makru̱ʼu̱lú kájndii xú káʼnii Jeobá na̱nguá nigumaa ga̱jma̱a̱ dí xákhañuu, mú rúʼko̱ na̱nguá eyoo gáʼthu̱u̱n dí ikhaa na̱nguá xtáa má xúʼko̱. Dí gajkhun ga̱jma̱a̱ numuu bi̱ Niʼniánʼlu na̱nguá xtiʼkhuu ga̱jma̱a̱ numuu dí nakru̱ʼu̱lú ikháánʼ (Rom. 11:33-36). Ikhaa nixtáa nákha ginii, nákha xóo tsígumaa numbaaʼ, xó má a̱jkha̱ʼ ga̱jma̱a̱ mbá xúgíʼ dí rígá náa mekhuíí. Náa Biblia naʼthí: ‹Ikhaa nindxu̱u̱ bi̱ niʼni ku̱ba̱ʼ, bi̱ niʼni ga̱jma̱a̱ tsiaki̱i̱ ndrígóo, naʼthí xóo: niʼni itháán mba̱a̱ mekhuíí› (Jer. 51:15; Hech. 17:24). Guʼyáá imbo̱o̱ʼ numuu dí maʼni kañiiʼ a̱jkiu̱lú dí makuwáánʼ kámuu mbiʼi.

 5. Ndiéjunʼ dí ma̱ndoo makánún timbíin xa̱bu̱ gajmii rá.

⁵ Xúgíʼ dí Jeobá niʼniwíi náa tsu̱du̱u̱ ku̱ba̱ʼ maʼga̱nú makañúu, mú xa̱bu̱ xákáñuu numuu dí ikhiin nixnún makuwá kámuu mbiʼi. Mú, Jeobá niʼthúu̱n Adán: “Ragíʼmaa miʼtsu xndúu ixi̱ ku̱ma̱ dí májánʼ ga̱jma̱a̱ dí ra̱májánʼ, numuu rí índo̱ gíʼtsu xndúu ixi̱ rúʼko̱, gajkhun rí makhañáaʼ” (Génesis 2:17) Á mu Adán ga̱jma̱a̱ Eva ninimbu̱ún kuyáá Jeobá xákháñún. Mbáa maʼga̱nú má mbá mbiʼi dí Dios maxnún má dí muphu̱u̱ “xndúu ixi̱ ku̱ma̱ dí májánʼ”. Rígi̱ masngájmún dí makuwíin ‹kámuu mbiʼi› (Gén. 3:22).e

6, 7. a) Ndiéjunʼ i̱ʼwáʼ esngájma dí na̱nguá nigumáánʼlú mu makhañúlú rá. b) Ndiéjunʼ nandaaʼ matani̱ ikháán índo̱ gáraxtaa kámuu mbiʼi rá. (Atayáá xtiʼkhuu.)

⁶ Raʼkháa tháán mitsaanʼ nindxu̱u̱ dí tikhun científico niʼngu̱u̱n ndiyáá xóo kaʼnii edxu̱lúʼ maʼngo̱o̱ magujxi̱i̱ mbaʼa dí ejmañulú. Náa mbóo revista dí nigájnuu 2010 ni̱ʼkha̱ raʼthí xú káʼnii ngáñulú ma̱ndoo magujxi̱i̱ itháán rí 3 millones dí hora dí ndajyúuʼ mbóoʼ video. Video rígi̱ mbáa mbaʼyúlú mbuʼyáá mbá 300 tsiguʼ, mbá asndu na̱nguá embrigui ga̱jma̱a̱ xóo kaʼyoo. Mú nasngájma dí Jeobá niʼni ngáñulú mu ma̱ndoo maguxi̱i̱ itháán mbaʼa kaʼnii, ki xóo rí ma̱ndoo majmañulú mbá 70 o káaʼ 80 tsiguʼ (Sal. 90:10).

⁷ Jeobá ma̱ngaa niʼniánʼ mu manigulú makuwáánʼ má xúʼko̱. Xó má eʼthí náa Biblia, Dios “nigíwanʼ náa a̱jkiu̱ún xa̱bu̱ mu maʼndún makuwá kámuu mbiʼi” (Eclesiastés 3:11). Numuu rúʼko̱ dí makañúlú nduʼyáá xóo mbáa bi̱ kuʼyálú sia̱nʼ (1 Cor. 15:26). Gundxa̱ʼwa̱míjna̱ ga̱jma̱a̱ numuu rígi̱. Á mu ikháanʼ naʼñulú gakhi̱i̱ wéñuʼ nandii dí asndu natigáánʼ kayuuʼ. Lá muguaʼthi̱i̱n dí magudiánʼ ráʼ. Na̱nguá, rí phú nu̱ʼni̱ nindxu̱u̱ dí najkualú náa guʼwá thana, mu xúʼko̱ muxnulú thana mu mu̱ʼni̱ gajmiúlú nandii. Lá ragájkhun dí nu̱ʼni̱ asndu káʼniín mu xákañulúʼ ráʼ. Xúʼko̱. Índo̱ nakháñuu mbáa bi̱ nandulú kuʼyáá, tséʼñuu á mu nindxu̱u̱ tikhu xa̱bu̱ú o níkhi̱i̱ má, mú ndajyúuʼ wéñuʼ dí mambumulú kuʼyáá (Juan 11:32, 33). Gajkhun má, nduʼyáálú dí bi̱ Niʼniwáánʼ nandoo kaʼyulú wéñuʼ, na̱nguá niʼniáánʼ xúʼkhiín, numuu dí ikhaa niʼniánʼ mu makuwáánʼ má xúʼko̱. Mú kuaʼdáá i̱ʼwáʼ numuu dí ikháánʼ ma̱ndoo muʼnimbulúʼ dí kaʼyulú makuwáánʼ kámuu mbiʼi. Guʼyáá tikhu dí Jeobá niʼni ga̱jma̱a̱ dí ndiʼkhún maʼni rí nasngájma dí nikudaminaʼ maʼni nákhi ginii táxtiʼkhuu.

 8. Xú káʼnii embáyulú Isaías 55:11 ga̱jma̱a̱ numuu dí nikudaminaʼ maʼni Jeobá rá.

⁸ Maski ajndu Adán ga̱jma̱a̱ Eva nixudami̱jná aʼkhá, ga̱jma̱a̱ numuu rúʼko̱ xúgiánʼ ikháánʼ nakháñulú, mú rúʼko̱ tárikhoo Jeobá mu maʼnimbánuu dí nindoo (atraxnuu Isaías 55:11).f Mú Jeobá xóó nandoo dí makuwáánʼlu kámuu mbiʼi. Xóo eʼyáá rá. Nduʼyáá ga̱jma̱a̱ xúgíʼ rí eʼni ga̱jma̱a̱ dí eʼthí mu maʼnimbánuu dí nikudaminaʼ.

 9. Ndiéjunʼ nikudaminaʼ maʼni Dios rá. (Daniel 12:2, 13.)

⁹ Jeobá nikudaminaʼ makujxi̱ín xa̱bu̱ bi̱ nikháñún ga̱jma̱a̱ maxnáa mbujuáaʼ dí mbuya (Hech. 24:15; Tito 1:1, 2). Job ndiʼyoo gajkhun rí Jeobá makujxi̱ín bi̱ nikháñún (Job 14:14, 15). Gaʼyee Daniel ndiʼyoo dí xa̱bu̱ bi̱ nikháñún matujxi̱ín ga̱jma̱a̱ makuwá mbu̱júu̱ʼ (Sal. 37:29; atraxnuu Daniel 12:2g, 13).h Judío bi̱ nikúwá nákha mbiʼi rí nixtáa Jesús mangiin ndiyáá rí Jeobá ma̱ndoo maxnún makuwá kámuu mbiʼi xa̱bi̱i̱ bi̱ naguájun jmbu (Luc. 10:25; 18:18). Jesús ma̱ngaa niʼthí mbaʼa nuthu ga̱jma̱a̱ numuu rígi̱, rí asndu Jeobá má nikujxi̱i̱ náa majñúnʼ wajinʼ (Mat. 19:29; 22:31, 32; Luc. 18:30; Juan 11:25).

10. Ndiéjunʼ esngájmulú dí nigabi̱ín xa̱bu̱ nákha wájyúuʼ rá.

¹⁰ Jeobá nindxu̱u̱ bi̱ niʼni dí mbuʼyalú ga̱jma̱a̱ bi̱ gíʼdoo tsiakii mu makujxi̱ín bi̱ nikháñun. Ikhaa nixnuu tsiakii gaʼyee Elías mu makuxi̱i̱ a̱ʼdióo mbáa a̱ʼgú xuáʼa bi̱ na̱ʼkha̱ náa xuajen Sarepta (1 Rey. 17:21-23). Ga̱jma̱a̱ tsiguʼ nda̱wa̱á Dios nimbáyúu gaʼyee Eliseo mu makuxi̱i̱ a̱ʼdióo a̱ʼgu̱ bi̱ na̱ʼkha̱ náa xuajen Sunem (2 Rey. 4:18-20, 34-37). Xúgíʼ rígi̱ nasngájma dí Jeobá gíʼdoo tsiakii mu makujxi̱ín bi̱ nikháñún. Índo̱ Jesús nixtáa náa tsu̱du̱u̱ ku̱ba̱ʼ nisngájma kaʼwu dí anu̱u̱ nixnúu tsiakii mu maʼni ikhaa má kayuuʼ (Juan 11:23-25, 43, 44). Jesús xtáa mekhuíí xúgi̱ ga̱jma̱a̱ “Nijuixnájxi̱ xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ”. Ikha jngóo ma̱ndoo maʼnimbánuu dí “xúgíinʼ bi̱ kúwá náa iñá wa̱jinʼ” matangi̱ín makuwá mbu̱júu̱ʼ mú xúgi̱ rá makuwíin kámuu mbiʼi (Mateo 28:18; Juan 5:25-29).

11. Xú káʼnii embáyulú dí nikháñuu Jesús rá.

¹¹ Náá numuu dí Jeobá niniñuuʼ dí makhañúu ga̱jma̱a̱ mamínuuʼ A̱ʼdióo bi̱ nandoo kaʼyoo wéñuʼ rá. Jesús niriʼña̱a̱ rígi̱ índo̱ niʼthí: “Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíí mu xúʼko̱ bi̱ gágiʼdoo fe náa ikhaa xákháñuu, maxtáa kámuu mbiʼi” (Juan 3:16). Índo̱ Dios nixnáxi̱i̱ a̱ʼdióo mu maʼtsiwáánʼlú náa aʼkhá, ikhaa naʼni dí ikháánʼlú ma̱ndoo makuwáánʼlu kámuu mbiʼi (Mat. 20:28). Apóstol Pablo niʼthí itháan kaʼwu ga̱jma̱a̱ numuu ajngáa rígi̱: “Xó má rí nakháñulú na̱ʼkha̱ ga̱jma̱a̱ numuu mbáa xa̱bu̱, xúʼko̱ má rí magabi̱ín bi̱ nikháñún na̱ʼkha̱ ga̱jma̱a̱ numuu mbáa xa̱bu̱. Ga̱jma̱a̱ numuu Adán xúgíinʼ nakháñún, xúʼko̱ má ga̱jma̱a̱ numuu Cristo xúgíinʼ mbuya” (1 Corintios 15:21, 22).

12. Ndiéjunʼ gáʼni Reino mu magumambánúu dí niʼthí Jeobá maʼni náa ikháánʼlú rá.

¹² Jesús niʼsngúún discípulos ndrígóo rí munda̱ʼa̱ dí ma̱ʼkha̱ Reino ndrígóo Dios ga̱jma̱a̱ maguma dí nandoo Anu̱u̱ náa tsu̱du̱u̱ ku̱ba̱ʼ (Mat. 6:9, 10). Ga̱jma̱a̱ numuu rúʼko̱ Jeobá nigíiʼ A̱ʼdióo mu mani̱ndxu̱u̱ Rey mesiánico ma̱ngaa ndawiín gajmíin a̱ngiu̱lú bi̱ nindxu̱ún 144 mil mu mumbayíí Jesús mu maʼnimbánuu rí nandoo Anu̱u̱ (Apoc. 5:9, 10).

13. a) Ndiéjunʼ eʼni Jeobá dí mbiʼi xúgi̱ rá. b) Ndiéjunʼ gándoo gúʼni̱ ikháan rá.

¹³ Náa mbiʼi rí kuwáánʼ, Jeobá xtáa ragímbíin “mbaʼin xa̱bu̱” ga̱jma̱a̱ naʼniratiin mu makuwá náa Reino ndrígóo (Apoc. 7:9, 10; Sant. 2:8). Maski ajndu xa̱bu̱ numbaaʼ nuni̱ wajímijná ga̱jma̱a̱ numuu dí nawiñunʼ kuyamijná ma̱ngaa ga̱jma̱a̱ numuu guerra, bi̱ kúwáánʼ náa grupo ríge̱ nuʼnimíjna muniʼñánʼ xúgíʼ dí nawiyulúʼ kuʼyamijná. Xóo muʼthá, kuwáánʼlú nuriʼkhui̱i̱ espada mu maʼni̱i̱ arado (Miq. 4:3). Ikháánʼlú na̱nguá xuʼdámijna̱ náa guerra náa rí mbaʼin xa̱bu̱ nakháñun, itháan dí nu̱ʼni̱ nindxu̱u̱ rí numbáñún xa̱bu̱ maguánú “mbuyáá gajkhun rí kuáʼti̱i̱n nindxu̱u̱ rí makuwíin májánʼ nda̱wa̱á” (1 Timoteo 6:19). Numuu rí númbáyíílú Reino ndrígóo Dios mbáa muraʼníí mbaʼa xkujndu gajmiúlú bi̱ kúwá náa guʼwúlú o ga̱jma̱a̱ numuu mbújkha̱a̱, mú Jeobá gáxnulú xúgíʼ rí gáʼyulúʼ (Mat. 6:25, 30-33; Luc. 18:29, 30). Xúgi̱ ríge̱ nasngájmulú dí Reino ndrígóo Dios nindxu̱u̱ gajkhun ga̱jma̱a̱ maʼnimbánuu xúgíʼ dí nikudaminaʼ maʼni Jeobá.

14, 15. Xú káʼnii gáʼnimbánuu Jeobá dí nikudaminaʼ índo̱ gáʼni gámbóo mbá kayuuʼ rí nakháñulú rá.

¹⁴ Jesús xtáa má raʼtáñajun’ náa mekhuíí ga̱jma̱a̱ maʼnimbánuu xúgíʼ dí nikudaminaʼ maʼni Jeobá (2 Cor. 1:20). Nákha 1914 Jesús xtáa má raʼngo̱o̱ náa naxmínaʼ gajmíi̱n xa̱bu̱ sia̱nʼ ndrígóo (Sal. 110:1, 2). Nánguá má mba̱yu̱u̱ʼ dí ikhaa gajmíi̱n bi̱ 144 mil maʼngu̱u̱n mbá kayuuʼ índo̱ gúnigámbíin xúgíinʼ xa̱bu̱ sia̱nʼ bi̱ kúwá náa tsu̱du̱u̱ ku̱ba̱ʼ (Apoc. 6:2).

¹⁵ Índo̱ Jesús gáxtáa raʼtáñajunʼ mbá míi tsiguʼ ikhaa makuxi̱ín xa̱bu̱ bi̱ nikháñún ga̱jma̱a̱ mambáñun xúgíinʼ xa̱bu̱ bi̱ munimbu̱ún mu mani̱ndxu̱ún kaʼwiin. Náa iwáá tsáʼkhá dí gárígá, xa̱bu̱ bi̱ Jeobá gáʼñún dí nindxu̱ún jmbiin “mundrigúu ku̱ba̱ʼ ga̱jma̱a̱ makuwá kámuu mbiʼi ikhí” (Sal. 37:10, 11, 29). “Dí nakháñulú bi̱ nindxu̱u̱ xóo mbáa bi̱ sia̱nʼ gajmiúlú bi̱ naguanúu iwáá kayuuʼ, maguma gámbáa” (1 Cor. 15:26). ¡Ra̱ʼkhá tháán mitsaanʼ ganindxu̱u̱!

16. Náá numuu dí nuraʼwíí mu̱ʼni̱ ñajuunʼ Jeobá rá.

¹⁶ Xó má ndiʼyáálú, dí guáʼthi̱i̱n makuwáánʼlú kámuu mbiʼi, na̱ʼkha̱ raʼthí náa ajngá rawuunʼ Dios. Rí kuáʼthi̱i̱n nambáyulú muguajún gújkhúʼ náa mbiʼi mingíjyúuʼ ríge̱. Á mu nandulú dí Jeobá ma̱ndoo kaʼyulú, ndayóoʼ muguajún gújkhúʼ náa ikhaa ga̱jma̱a̱ náa Jesús, raʼkháa i̱ndó ga̱jma̱a̱ numuu dí maʼnikawáánʼ, nu̱ʼni̱ ríge̱ ga̱jma̱a̱ numuu dí nandulúʼ kuʼñúún ga̱jma̱a̱ xúgíʼ a̱jkiu̱lú (2 Cor. 5:14, 15). Rí nandulú kuʼyáá Jeobá naxkajxáánʼ mbuʼyaridáá xkridoo ga̱jma̱a̱ muʼthún eʼwíinʼ ga̱jma̱a̱ numuu rí kua̱ʼthi̱i̱n (Rom. 10:13-15). Índo̱ nu̱ʼni̱ tsiakimíjna̱ muniʼñáánʼ ru̱ʼni̱ dí i̱ndó nanigu̱lú ikháánʼ ga̱jma̱a̱ nani̱ndxu̱lú mbáa bi̱ nanigu̱u̱ʼ maxná dí gíʼdoo, Jeobá itháán manigu̱u̱ʼ mambajxúu ga̱jma̱á nindxu̱lú (Heb. 13:16).

17. Ndiéjunʼ gúraʼwíí muʼnilú mbámbáa dí ikháánʼlú rá. (Mateo 7:13, 14.)

¹⁷ Ikháánʼlú rá. Lá makuwáánʼ kámuu mbiʼi ráʼ. Jeobá naʼthúlú dí ma̱ndoo makuwáánʼ kámuu mbiʼi, mú ikháánʼ ndayóoʼ mu̱ʼni̱ tsiakimíjna̱ mu̱ʼgua̱ má xúʼko̱ náa kamba̱a̱ dí na̱jkha̱ kaguánʼ mu makuwáánʼ kámuu mbiʼi (atraxnuu Mateo 7:13, 14). Rí xúgi̱, xú káʼnii gánindxu̱u̱ vida ndrígulú índo̱ gákuwáanʼ kámuu mbiʼi rá. Rúʼko̱ gúʼyáá náa imbo̱o̱ʼ artículo.