ያእቆብ ዓቢ ስድራቤት ኣለዎ

ነዚ ኣብዚ ስእሊ ዘሎ ዓቢ ስድራቤት እሞ ርኣዮ። እዚኣቶም እቶም 12 ደቂ ያእቆብ ኢዮም። ኣዋልድ እውን ነይረንኦ ኢየን። ኣስማት ናይ ገለ ካብዞም ደቁ ትፈልጦዶ፧ ብዛዕባ ገለ ካብኣቶም እስከ ንማሃር።

ልያ ንሮቤል: ንስምኦን: ንሌዊ: ከምኡውን ንይሁዳ ወለደት። ራሄል ምንም ከም ዘይወለደት ምስ ረኣየት: ኣዝያ ጐሃየት። ስለዚ ቢልሃ ግዝእታ ንያእቆብ ሃበቶ: ቢልሃ ኸኣ ዳንን ንፍታሌምን ዝስሞም ክልተ ኣወዳት ወለደት። ብድሕርዚ ልያ እውን ዚልጳ ግዝእታ ንያእቆብ ሃበቶ: ዚልጳ ኸኣ ንጋድን ንኣሴርን ወለደት። ኣብ መወዳእታ ልያ ተወሰኽቲ ክልተ ኣወዳት: ይሳኮርን ዛብሎንን ወለደት።

ኣብ መወዳእታ ራሄል ወዲ ክትወልድ ከኣለት። ዮሴፍ ኢላ ድማ ጸውዓቶ። ጸኒሕና ብዛዕባ ዮሴፍ ብዙሕ ክንምሃር ኢና: ምኽንያቱ ውሩይ ኰይኑ ኢዩ። እዚኣቶም እቶም ያእቆብ ምስ ላባን ኣቦ ራሄል እንዳተቐመጠ ከሎ ዝወለዶም 11 ደቁ ኢዮም።

ያእቆብ ኣዋልድ እውን ወሊዱ ኢዩ: መጽሓፍ ቅዱስ ግን ስም ናይ ሓንቲ ካብኣተን ጥራይ ኢዩ ዝህብ። ስማ ኸኣ ዲና ኢዩ።

ያእቆብ ንላባን ገዲፉ ናብ ከነኣን ክምለስ ዝወሰነሉ ግዜ በጽሐ። ስለዚ ነቲ ዓቢ ስድራቤቱን ዓቢ መጓሰ ኣባጊዑን ከብቱን ብሓደ ኣኪቡ ነቲ ነዊሕ ጕዕዞ ጀመረ።

ያእቆብን ስድራቤቱን ናብ ከነኣን ምስ ተመልሱ ድሕሪ ቝሩብ: ራሄል ካልኣይ ወዲ ወለደት። ኣብ ጕዕዞ ኸለዉ ኢዩ ነይሩ። ብዙሕ ተጻዕረት: ኣብ መጨረሽትኡ ኸኣ ክትወልድ ከላ ሞተት። እቲ ንእሽቶ ወዲ ግን ደሓን ኰነ። ያእቆብ ከኣ ቢንያም ኢሉ ስም ኣውጽኣሉ።

ስም ናይቶም 12 ደቂ ያእቆብ ክንዝክሮ የድልየና ኢዩ: ምኽንያቱ ህዝቢ እስራኤል ብምሉኡ ካብኣቶም ኢዩ መጺኡ። እቶም 12 ነገድ እስራኤል ስሞም ካብቶም 10 ደቂ ያእቆብን ክልተ ደቂ ዮሴፍን ኢዩ ተወሲዱ። ኵሎም እዞም ኣወዳት እዚኣቶም ምስ ተወልዱ: ይስሃቅ ንብዙሕ ዓመታት ጸንሐ: ብዙሓት ደቂ ደቂ ስለ ዝነበርዎ ኸኣ ተሓጒሱ ክኸውን ኣለዎ። እንተዀነ ግን: ንዲና ጓል ወዱ እንታይ ከም ዘጓነፋ እስከ ንርአ።