Mbaheberu

13 Za nen hemen u doon ayol a en er ne mba anmgbianev mba sha tsombor nahan. 2 De hungur nen u ngohol ior sar sar ga, gadia ka u eren nahan la yange mbagenev nenge sha mbatyomov doo doo kpa ve fa ga ye. 3 Umbur nen mba ve lu ken purusu* la, er i wuhe ne a ve imôngo nahan, kua mba i lu nzughul a ve la, er ne ayol a en kpa ne lu ken iyol shon i môm a ve yô.* 4 Ivese i̱ lu kwagh u icivirigh hen ior cii, shi gambe u ivesegh kpa i̱ de hôngor a mi ga, gadia Aôndo una ôr mbaeren idya* man mba nzughul a ivese sha idya* ijir. 5 De lu nen ior mba soon inyaregh ga, akaa a ne lu a mi la a̱ kuma ne. Gadia a kaa ér: “Mayange me undu u ga, shi mayange me kende u ga.” 6 Nahan se fatyô u lun a vangertiôr taveraa, kaan ser: “Yehova* ka orwasen mo; me cia ga. Ka nyi je or a ereme?”

7 Umbur nen mba ve lu hemen hen atô wen, mba ve ôron ne mkaanem ma Aôndo la, nengen nen kwagh u dedoo u a dugh ken ieren ve la, nahan dondo nen ikyav i jighjigh ve u nan la.

8 Yesu Kristu gem ga, er nyen lu la, kape nyian kpa a lu je la, shi una lu nahan gbem sha won.

9 I de tsumen a ven sha atesen agen wue wue ga, sha ci u hemba kan a inja u or a̱ zua a ishimataver sha erdoo u sha mhôôn, a u nana̱ zua a mi sha kwaghyan* la, gadia kwaghyan wasen mba ve veren ishima sha mi la ga.

10 Se mba a atse a nan nagh, a mba ve eren icighantom ken tenti la ve lu a ian i yan kwagh u a lu sha a ga yô. 11 Gadia yange i tôô inyam i uzendenya mba pristi u vesen a nyer a awambe a ve ken icighanjiir, a za ne nagh ku isholibo a mi la, i due a mi ken afo kera, i za nande ken akôngo. 12 Sha nahan yô, Yesu kpa yange ya ican ken akôngo a gar, sha er una wanger ior sha awambe a a lu a na iyol na yô. 13 Nahan yô, se za nen hen a na ken akôngo a afo la, se ya nen ihyeen i un kpa yange ya la, 14 gadia se mba a gar heen u una lu gbekeke ga, kpa se mba keren u a lu van la sha gbashima. 15 Se naan nen Aôndo nagh ku iwuese ken a na, ka ityamegh ki ityumbujôôv yase, ki ki pasen kwagh u iti na ken igbar la je la, se eren nahan hanma shighe cii. 16 Heela tseegh ga, de hungur nen u eren kwagh u dedoo man u nan ior akaa a ne lu a mi la ga, gadia iniav mbin nahan doo Aôndo tsung je.

17 Ungwan nen imo i mba ve lu hemen hen atô wen la, keghen nen iyol u lumun hemen ve, gadia mba kuran ne,* shi ka u vea va ôr Aôndo kwagh u ve er yô, sha er vea er kwagh ne saan saan, a iyolkpen shio yô, gayô kwagh la una va ne a ican.

18 Eren nen msen sha ci wase her, gadia se na jighjigh ser se mba a imoshima i wang;* sar se u eren akaa cii sha mimi. 19 Kpa hemban cii je yô, m ngu kaan a ven mer eren nen msen sha er me hide hen a ven fefa yô.

20 Nahan Aôndo u bem, u a nder Ter wase Yesu, orkuran iyôngo u hemban, u a ne nagh sha awambe a ikyuryan i been mayange ga la shin ku la, 21 a̱ wa ne ago iyol sha hanma kwagh u dedoo sha er ne er ishima na yô, shi a̱ er kwagh u a nenge ér a hemba doon la ken a vese sha ikyev i Yesu Kristu. Icivir i̱ lu i na zan zan gbem sha won. Amen.

22 Anmgbianev, m ngu kaan a ven mer, kegh nen ato zulee sha kwaghôron u taver asema ne, gadia m nger ne ka washika u tiônôô tsô. 23 M soo u pasen ne mer i dugh anmgbian wase Timoteu ken purusu kera. Aluer a va fele yô, me lu vea na imôngo zum u me va u va nengen a ven la.

24 Sugh nen mba ve lu hemen hen atô wen la cii man uicighanmbaiorov cii, sha ci wam. Anmgbianev mba ken Italia mba sughun ne.

25 Aôndo a̱ za hemen u tesen ne cii erdoo u sha mhôôn.