Mga Bilang
12 At nagsalita sina Miriam at Aaron laban kay Moises dahil sa asawa niyang Cusita, dahil kumuha siya ng isang Cusita bilang asawa.+ 2 Sinasabi nila: “Sa pamamagitan lang ba ni Moises nagsasalita si Jehova? Hindi ba nagsasalita rin siya sa pamamagitan natin?”+ At naririnig sila ni Jehova.+ 3 Si Moises ang pinakamaamo sa lahat ng tao*+ sa ibabaw ng lupa.
4 Agad namang sinabi ni Jehova kina Moises, Aaron, at Miriam: “Pumunta kayong tatlo sa tolda ng pagpupulong.” Kaya pumunta silang tatlo. 5 At bumaba si Jehova sa haliging ulap+ at tumayo sa pasukan ng tolda at tinawag sina Aaron at Miriam. Lumapit silang dalawa. 6 Sinabi niya: “Pakisuyo, pakinggan ninyo ang sasabihin ko. Kung may propeta si Jehova sa gitna ninyo, magpapakilala ako sa kaniya sa isang pangitain,+ at makikipag-usap ako sa kaniya sa isang panaginip.+ 7 Pero iba sa lingkod kong si Moises! Sa kaniya ipinagkatiwala ang aking buong sambahayan.*+ 8 Nakikipag-usap ako sa kaniya nang mukhaan.*+ Malinaw kong sinasabi ang mga gusto kong sabihin, at hindi sa pamamagitan ng mga bugtong; nakikita niya ang anyo ni Jehova. Kaya bakit hindi kayo natakot na magsalita laban sa aking lingkod, laban kay Moises?”
9 Kaya galit na galit sa kanila si Jehova, at iniwan niya sila. 10 Lumayo ang ulap sa ibabaw ng tolda, at si Miriam ay biglang nagkaroon ng ketong na kasimputi ng niyebe!+ Pagtingin ni Aaron kay Miriam, nakita niyang nagkaketong ito.+ 11 Agad na sinabi ni Aaron kay Moises: “Parang awa mo na, panginoon ko! Pakiusap, huwag mong hayaang maparusahan kami dahil sa kasalanang ito! Maling-mali ang ginawa namin. 12 Pakiusap, huwag mo siyang hayaan na manatiling gaya ng isang sanggol na ipinanganak na patay at agnas na ang kalahati ng laman!” 13 Nakiusap si Moises kay Jehova: “O Diyos, pakiusap, pagalingin mo siya! Pakiusap!”+
14 Sumagot si Jehova kay Moises: “Kung duraan siya ng kaniyang ama sa mismong mukha niya, hindi ba mapapahiya siya nang pitong araw? Ibukod ninyo siya nang pitong araw sa labas ng kampo,+ at pagkatapos ay puwede na siyang papasuking muli.” 15 Kaya ibinukod si Miriam sa labas ng kampo nang pitong araw,+ at nanatiling nagkakampo ang bayan hanggang sa papasuking muli si Miriam. 16 Pagkatapos, umalis ang bayan sa Hazerot+ at nagkampo sa ilang ng Paran.+