Ditiro Tsa Baaposetoloi

17 Jaanong ba ne ba tsamaya ba ralala Amfipolisa le Apolonia mme ba ya kwa Thesalonika,+ kwa go neng go na le sinagoge ya Bajuda gone. 2 Fela jaaka Paulo a ne a tlhola a dira,+ o ne a tsena kwa go bone mme ka bosabata ba le bararo o ne a ba ruta ka go ba thusa go tlhaloganya Dikwalo,+ 3 a tlhalosa e bile a dirisa Dikwalo tseno go ntsha bosupi jwa gore go ne go tlhokega gore Keresete a boge+ le gore a tsosiwe mo baswing,+ a re: “Jesu yono yo ke lo bolelelang ka ene, ke Keresete.” 4 Ka ntlha ya seo, bangwe ba bone ba ne ba nna badumedi ba bo ba ikopanya le Paulo le Silase,+ mme Bagerika ba le bantsi thata ba ba neng ba obamela Modimo, le bone ba ne ba dira se se tshwanang, mmogo le basadi ba le bantsi ba ba tlotlegang.

5 Mme e re ka Bajuda ba ne ba fufega,+ ba ne ba phutha banna bangwe ba ba bosula ba ba tsamayatsamayang mo marekisetsong ba sa dire sepe mme ba simolola segongwana sa batho ba bo ba tsosa tlhakatlhano mo motseng. Ba ne ba tlhasela ntlo ya ga Jasone ba batla gore Paulo le Silase ba ntshiwe ba isiwe kwa segongwaneng seo. 6 E rile ba sa ba fitlhele, ba ne ba gogela Jasone le bakaulengwe bangwe kwa babusing ba motse, ba goa ba re: “Banna bano ba ba bakileng mathata mo* lefatsheng lotlhe ba teng le fano,+ 7 mme Jasone o ba amogetse gore e nne baeng ba gagwe. Banna bano botlhe ba ganetsa ditaelo tsa ga Kaesara, ba re go na le kgosi e nngwe, e bong Jesu.”+ 8 E rile boidiidi jwa batho le babusi ba motse ba utlwa dilo tseno, ba ne ba gakgamala; 9 mme fa ba sena go tsaya peeletso* mo go Jasone le ba bangwe, ba ne ba ba tlogela gore ba tsamaye.

10 Fa go nna bosigo, bakaulengwe ba ne ba tshabisa Paulo le Silase gore ba ye kwa Berea. Fa ba goroga koo, ba ne ba ya kwa sinagogeng ya Bajuda. 11 Jaanong ba ba kwa Berea ba ne ba iketleeleditse go ithuta go gaisa ba ba kwa Thesalonika, ka gonne ba ne ba amogela lefoko ka tlhagafalo, ba tlhatlhoba Dikwalo ka kelotlhoko letsatsi le letsatsi go bona gore a dilo tse ba di utlwileng di boammaaruri. 12 Ka jalo, ba le bantsi ba bone ba ne ba nna badumedi, mme basadi ba le bantsi ba Bagerika ba ba tseelwang kwa godimo le banna bangwe le bone ba ne ba dira jalo. 13 Mme fa Bajuda ba kwa Thesalonika ba utlwalela gore Paulo o ne a rera lefoko la Modimo le kwa Berea, ba ne ba ya koo go ya go tlhotlheletsa boidiidi jwa batho le go ba feretlha.+ 14 Foo bakaulengwe ba ne ba tshabisa Paulo ka yone nako eo ba bo ba mmuledisa* go ya kwa lewatleng,+ mme Silase le Timotheo ba ne ba sala. 15 Le fa go ntse jalo, ba ba neng ba buledisa Paulo ba ne ba tsamaya le ene go ya go fitlha kwa Athena, mme fa Paulo a sena go ba laela gore ba bolelele Silase le Timotheo+ gore ba tle kwa go ene ka bonako jo bo kgonegang, ba ne ba tsamaya.

16 Jaanong fa Paulo a ntse a ba letetse kwa Athena, o* ne a simolola go tenega fa a bona gore motse o ne o tletse medingwana. 17 Ka jalo, o ne a simolola go ruta Bajuda mo sinagogeng le batho ba bangwe ba ba neng ba obamela Modimo teng, a ba thusa go tlhaloganya Dikwalo, e bile letsatsi le letsatsi o ne a dira jalo le ka batho ba a neng a kopana le bone kwa marekisetsong. 18 Mme baitsefilosofi bangwe ba Baepikuria le ba Basetoika ba ne ba simolola go ganetsana le ene, mme bangwe ba bone ba ne ba re: “Motho yo o ratang go balabala yono o batla go reng?” Ba bangwe ba ne ba re: “Go lebega a bua ka medimo e sele.” Ba ne ba bua jalo ka gonne o ne a rera dikgang tse di molemo ka Jesu le ka tsogo ya baswi.+ 19 Ka jalo, ba ne ba mo tshwara ba bo ba mo isa kwa Areopago ba re: “A o ka re tlhalosetsa gore thuto eno e ntšha e o e rutang e kaya eng? 20 Gonne o re bolelela dilo tse re iseng re tsamaye re di utlwe, mme re batla go itse gore dilo tseno di kaya eng.” 21 Tota e bile, Baathena botlhe le batswakwa ba ba nnang* koo ba ne ba dirisa nako ya bone ya boiketlo ba sa dire sepe, fa e se go bolela kgotsa go reetsa sengwe se sesha. 22 Jaanong Paulo o ne a ema mo gare ga Areopago+ a bo a re:

“Banna ba Athena, ke a bona gore mo dilong tsotlhe lo bonala lo boifa medimo* thata go farologana le batho ba bangwe.+ 23 Ka sekai, fa ke ne ke feta fano mme ke leba ka kelotlhoko dilo tse lo di obamelang, ke ne ka bona le sebeso se mo go sone go neng go kwadilwe go twe ‘Go Modimo Yo o Sa Itsiweng.’ Ka jalo, se lo se obamelang lo sa se itse, ke sone se ke lo bolelelang ka sone. 24 Modimo yo o dirileng lefatshe le dilo tsotlhe tse di mo go lone, ene yono, yo e leng Morena wa legodimo le lefatshe,+ ga a nne mo ditempeleng tse di dirilweng ka diatla;+ 25 e bile ga a lebelela gore batho ba mo direle jaaka e kete o tlhoka sengwe,+ ka gonne ene ka boene o naya batho botlhe botshelo le mohemo+ le dilo tsotlhe. 26 Mme o dirile batho ba ditšhaba tsotlhe go tswa mo mothong a le mongwe+ gore ba nne mo godimo ga lefatshe lotlhe,+ e bile o ne a tlhoma nako ya dilo di le dintsi a bo a beela batho melelwane ya gore ba nne kae.+ 27 Modimo o dirile seno ka gonne o batla gore batho ba leke ka natla go mo itse mme ba tla kgona go mo itse,+ ka gonne tota ga go thata go mo itse. 28 Gonne ka ene re na le botshelo, re a tshikhinyega e bile re gone, fela jaaka bangwe ba baboki ba lona ba ile ba re, ‘Gonne gape re bana* ba gagwe.’

29 “Ka jalo, e re ka re le bana* ba Modimo,+ ga re a tshwanela go akanya gore Modimo o tshwana le sengwe se se dirilweng ka gauta kgotsa selefera kgotsa leje, se batho ba ileng ba se akanya ba bo ba se betla ka botswerere.+ 30 Ke boammaaruri gore Modimo o ile a itlhokomolosa dinako tseo tsa fa batho ba ne ba se na kitso;+ mme gone jaanong o bolelela batho botlhe gongwe le gongwe gore ba ikwatlhaye. 31 Ka gonne o tlhomile letsatsi le mo go lone a ikaeletseng go atlhola+ lefatshe ka tshiamo a dirisa monna yo a mo tlhomileng. O ne a tsosa monna yono mo baswing e le go tlhomamisetsa batho botlhe gore ruri letsatsi leo le tla tla.”+

32 Jaanong e rile ba utlwa a bua ka tsogo ya baswi, bangwe ba ne ba simolola go sotla,+ mme ba bangwe bone ba ne ba re: “Re tla go reetsa gape mo nakong e e tlang.” 33 Ka jalo, Paulo o ne a ba tlogela, 34 mme banna bangwe ba ne ba tsamaya le ene mme ba nna badumedi. Mo go bone go ne go na le Dionisio, yo e neng e le moatlhodi wa kgotlatshekelo ya Areopago, le mosadi yo o neng a bidiwa Damarise, le batho ba bangwe.