ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi Isikelí—II

KO E taimí ko Tīsema 609 K.M. Kuo kamata ʻe he tuʻi Pāpiloné ʻa hono ʻākoloʻi fakaʻosi ʻo Selusalemá. ʻI he aʻu mai ki he taimi ko ʻení, kuo fakatefito ʻa e pōpoaki ʻa ʻIsikelí ki he kau fakaheeʻi ʻi Pāpiloné ʻi he kaveinga ʻe taha: ko e tō mo e ʻauha ʻa honau kolo ʻofeiná, ʻa Selusalema. Neongo ia, ʻi he taimi ko ʻení, kuo hiki ʻa e kaveinga ʻo e ngaahi kikite ʻa ʻIsikelí ki he teu fakaʻauha ʻo e ngaahi puleʻanga panganí ʻa kinautolu te nau fiefia ʻi he fakatamaki ʻe tō ki he kakai ʻa e ʻOtuá. ʻI he tō ʻa Selusalema ʻi he māhina ʻe 18 ki mui aí, ʻoku toe hoko atu ʻa e pōpoaki ʻa ʻIsikelí ki ha kaveinga foʻou: ko e fakafiefia ʻo hono toe fakafoki ʻo e lotu moʻoní.

ʻOku ʻi he Isikeli 25:​1–48:35 ʻa e ngaahi kikite fekauʻaki mo e ngaahi puleʻanga takatakai ʻi ʻIsilelí pea mo e fakahaofi ʻo e kakai ʻa e ʻOtuá.a Tuku kehe ʻa e Isikeli 29:​17-20, ʻoku fakahokohoko taimi pea toe fakahokohoko fakakaveinga ʻa e fakamatalá. Kae kehe, ko e ngaahi veesi ʻe fā ko iá ʻoku fakahokohoko fakakaveinga. ʻI he tuʻunga ko e konga ʻo e Tohi Tapu fakamānavaʻí, ʻoku ʻi he tohi Isikelí ha pōpoaki ʻa ia ko e ‘koto moʻui mo e koto malohi.’—Hepelu 4:12.

‘KO E FONUÁ ʻE HOKO ʻO HANGE KO E NGOUETAPU KO ITENÍ’

(Isikeli 25:​1–39:29)

ʻI heʻene tomuʻa ʻafioʻi ʻa ʻenau fakafeangai ki he tō ʻa Selusalemá, kuo ʻai ai ʻe Sihova ʻa ʻIsikeli ke ne kikiteʻi ʻa e ngaahi fakatamaki ʻe hoko ki ʻĀmoni, Mōape, ʻĪtomi, Filisitia, Taia mo Saitoni. ʻE faʻao fakamālohi ʻa e koloa ʻo ʻIsipité. ʻOku fakatatau ʻa ‘Felo koe tuʻi o Ijibité mo hono kakaí’ ki ha sita ʻa ia ʻe tā hifo ʻe he “heleta ʻa e Tuʻi Papilone.”—Isikeli 31:​2, 3, 12, PM; 32:​11, 12.

ʻI he māhina ʻe ono nai hili ʻa hono fakaʻauha ʻo Selusalema ʻi he 607 K.M., naʻe haʻu ha tokotaha naʻe hao mei ai ʻo ne līpooti kia ʻIsikeli: “Kuo taʻi ʻa e kolo!” Naʻe ʻikai kei “noa” pe taʻelea ʻa e palōfitá ki he kau fakahēʻí. (Isikeli 33:​21, 22) Kuo ʻi ai ʻa e ngaahi kikite ke ne talaki ʻo fekauʻaki mo e toe fakafokí. ʻE hanga ʻe Sihova ʻo “fokotuʻu ke pule kiate kinautolu ha tahaʻi tauhi, [ko ʻene] sevaniti ko Tevita.” (Isikeli 34:23) ʻE fakalala ʻa ʻĪtomi, ka ko e fonua ʻi kō atú, ʻa Siuta, ʻe hoko ia ʻo “hange ko e ngouetapu ko Iteni.” (Isikeli 36:35) ʻOku talaʻofa ʻe Sihova te ne maluʻi ʻa hono kakai ʻe toe fakafokí mei he ʻoho ʻa “Koki.”—Isikeli 38:1 (38:​2, PM).

Tali ki he Ngaahi Fehuʻi Fakatohitapú:

29:​8-​12​—Ko fē taimi naʻe fakalala taʻu ʻe 40 ai ʻa ʻIsipité? ʻI he hili ʻa hono fakaʻauha ʻo Selusalema ʻi he 607 K.M., naʻe hola ʻa e toenga ʻi Siutá ki ʻIsipite neongo ʻa e fakatokanga ʻa e palōfita ko Selemaiá. (Selemaia 24:​1, 8-10; 42:​7-22) Naʻe ʻikai hoko moʻoni ia ko ha haoʻanga kiate kinautolu koeʻuhi naʻe faitau ʻa Nepukanesa mo ʻIsipite ʻo ne ikunaʻi ia. Naʻe hoko nai ʻa e fakalala taʻu ʻe 40 ʻo ʻIsipité ʻi he hili ʻa e ikuna ko iá. Neongo ʻa e ʻikai ʻomai ʻe he hisitōlia fakamāmaní ha fakamoʻoni ʻo e fakalala ko ʻení, ʻoku lava ke tau tuipau naʻe hoko ia koeʻuhí ko Sihova ʻa e Tokotaha-Fakahoko ʻo e kikité.—Aisea 55:11.

29:18​—Naʻe anga-fēfē ʻa e “tula ʻa e ʻulu kotoa pe, pea mafohifohi ʻa e uma kotoa pe”? Naʻe fuʻu lahi mo faingataʻa ʻa hono ʻākoloʻi ʻo e kolo tuʻu loto fonua ko Taiá ʻo tula ai ʻa e ʻulu ʻo e kau tau ʻa Nepukanesá ʻi he mamili ʻi honau ngaahi tataá pea naʻe mafohifohi honau umá ʻi hono fata ʻa e ngaahi naunau ki he langa ʻo e ngaahi tauá mo e kolotaú.—Isikeli 26:​7-12.

Ngaahi Lēsoni kia Kitautolu:

29:​19, 20. Koeʻuhi ko e hao ʻa e kau Taiá ki he kolo ʻi honau motú mo e lahi taha ʻo ʻenau koloá, naʻe siʻi ʻaupito ai ʻa e koloa vete naʻe maʻu ʻe Tuʻi Nepukanesa mei Taiá. Neongo naʻe hoko ʻa Nepukanesa ko ha pule pangani hīkisia mo siokita, naʻe fakapaleʻi ia ʻe Sihova ʻi heʻene ngāué ʻaki hono ʻoange ʻa ʻIsipite ko e “totongi ki heʻene [kau] tau.” ʻIkai ʻoku totonu ke tau faʻifaʻitaki ki he ʻOtua moʻoní ʻaki hono totongi ʻa e tukuhaú ki he puleʻangá koeʻuhi ko e ngaahi ngāue ʻoku nau fakahoko maʻa kitautolú? ʻOku ʻikai ke hanga ʻe he tōʻonga ʻa e kau maʻu mafai fakamāmaní pe ko e founga ʻo ʻenau ngāueʻaki ʻa e tukuhaú ʻo toʻo ʻa e fatongia ko ʻení.—Loma 13:​4-7.

33:​7-9. Ko e kalasi leʻo ʻi onopōní—ʻa e toenga ʻo e kau paní—mo honau ngaahi kaungāmeʻá ʻoku ʻikai ʻaupito totonu ke nau tau holomui mei hono malangaʻi ʻa e ongoongo lelei ʻo e Puleʻangá mo e fakatokanga ki he kakaí fekauʻaki mo e “mamahi lahi” ʻoku ene ke hokó.—Mātiu 24:21.

33:​10-​20. Ko hotau fakamoʻuí ʻoku fakatuʻunga ia ʻi heʻetau tafoki mei he ngaahi ʻalunga halá pea talangofua ki he meʻa ʻoku fiemaʻu ʻe he ʻOtuá. Ko e moʻoni, ʻoku “fakafuofua” totonu ʻa e ʻalunga ʻo Sihová.

36:​20, 21. Koeʻuhi ko e ʻikai te nau moʻui ʻo fakatatau ki he tuʻunga naʻa nau ʻiloa aí, ʻa ia, ko e ‘kakai ʻa Sihová,’ naʻe fakalieliaʻi ʻe he kau ʻIsilelí ʻa e huafa ʻo e ʻOtuá ʻi he haʻohaʻonga ʻo e ngaahi puleʻangá. ʻOku ʻikai ʻaupito totonu ke tau hoko ko e kau lotu kia Sihova ʻi he lau pē.

36:​25, 37, 38 (PM). Ko e palataisi fakalaumālie ʻoku tau maʻu ʻi he ʻaho ní ʻoku fonu ʻi he “faga sibi maonioni.” Ko ia ai, ʻoku totonu ke tau feinga ke tauhi ia ke maʻa.

38:​1-​23. He fakafiemālie ē ke ʻiloʻi ʻe fakahaofi ʻe Sihova ʻa hono kakaí mei he ʻoho ʻa Koki ʻo e fonua ko Mēkokí! Ko e Kokí ko e hingoa ia ʻoku ʻoange maʻá e “ʻeiki ʻo e maama ko eni,” ʻa Sētane ko e Tēvoló, ʻi he hili hono seʻe hifo mei hēvaní. ʻOku ʻuhinga ʻa e fonua ko Mēkokí ki he feituʻu ʻo e foʻi māmaní, ʻa ia ʻoku fakangatangata ki ai ʻa Sētane mo ʻene kau tēmenioó.—Sione 12:31; Fakahā 12:​7-12.

“ʻAI HO LOTO KI HE MEʻA KOTOA TE U FAKAHA ATU”

(Isikeli 40:1–​48:35)

Ko e taʻu hono 14 ʻeni hili hono taaʻi ʻa e kolo ko Selusalemá. (Isikeli 40:1) ʻOku kei toe ʻa e taʻu fakaheeʻi ʻe nimangofulu-mā-ono. (Selemaia 29:10) ʻOku ofi ʻa ʻIsikeli ʻi he taimi ko ʻení ki hono taʻu 50. ʻI ha vīsone, ʻoku ʻomai ai ia ki he fonua ko ʻIsilelí. ʻOku tala ange kiate ia: “Hakoʻi-tangata, ke ke sioʻaki ho mata, pea fanongo ʻaki ho telinga, pea ʻai ho loto ki he meʻa kotoa te u fakaha atu.” (Isikeli 40:​2-4) He fiefia ē kuo pau ʻoku ʻi ai ʻa ʻIsikelí ʻi hono maʻu ha vīsone fekauʻaki mo ha temipale foʻoú!

Ko e temipale lāngilangiʻia ʻoku sio ki ai ʻa ʻIsikelí ʻoku ʻi ai hono ngaahi matapā ʻe 6, loki kai ʻe 30, Potu Tapú, Potu Toputapú, ʻōlita papa mo ha ʻōlita ki he ngaahi feilaulau tutú. ʻOku “hu ki tuʻa” mei he temipalé ha kiʻi tafenga vai ʻoku hoko ko ha tafenga vai mālohi. (Isikeli 47:1) ʻOku toe maʻu ʻe ʻIsikeli ha vīsone ʻo kau ki he vahevahe fakamatakali ʻo e fonuá—ʻo lele ʻa e ʻinasi taki taha mei hahake ki hihifo fakataha mo e konga ʻe taha ki hono puleʻi ʻo e ngaahi meʻá ʻi he vahaʻa ʻo e ʻinasi ʻo Siuta mo Penisimaní. Ko e “potu tapu ʻo Sihova” mo e “kolo” naʻe ui ko Sihova-Samá ʻoku tuʻu ia ʻi he konga ko ʻení.—Isikeli 48:​9, 10, 15, 35.

Tali ki he Ngaahi Fehuʻi Fakatohitapú:

40:3–​47:12​—Ko e hā ʻoku fakafofongaʻi ʻe he temipale ʻi he vīsoné? Ko hono moʻoní, ko e temipale lahi fakaʻulia ko eni naʻe sio ki ai ʻa ʻIsikeli ʻi he vīsoné naʻe ʻikai ʻaupito ke langa ia. Naʻá ne fakatātaaʻi ʻa e temipale fakalaumālie ʻa e ʻOtuá—ʻa ʻene fokotuʻutuʻu hangē ha temipale maʻá e lotu maʻá ʻi hotau ʻahó ni. (Isikeli 40:2; Maika 4:1; Hepelu 8:2; 9:​23, 24) Ko e vīsone fekauʻaki mo e temipalé ʻoku fakahoko ia lolotonga ʻa e “kuonga fakamui,” ʻi hono sivi ʻa e tuʻunga-taulaʻeikí. (2 Timote 3:1; Isikeli 44:​10-16; Malakai 3:​1-3) Kae kehe, ʻe fakahoko fakaʻosi ia ʻi Palataisi. Naʻe tokonaki ʻe he temipale fakaevīsoné maʻá e kau fakaheeʻi Siú ha talaʻofa ʻe toe fakafoki ʻa e lotu maʻá pea ko e fāmili Siu taki taha ʻe ʻi ai honau tofiʻa ʻi he fonuá.

40:3–​43:17​—Ko e hā ʻa e meʻa ʻoku mahuʻinga fekauʻaki mo hono fua ʻo e temipalé? Ko hono fua ʻo e temipalé ko ha fakaʻilonga ia ko e taumuʻa ʻa Sihova fekauʻaki mo e lotu maʻá kuo pau ke fakahoko.

43:​2-4, 7, 9​—Ko e hā ʻa e “ngaahi ʻangaʻanga ʻo honau ngaahi tuʻi” ʻa ia naʻe pau ke fakamavaheʻi mei he temipalé? ʻOku pau pē naʻe ʻuhinga ʻa e ngaahi ʻangaʻangá ki he ngaahi ʻaitolí. Naʻe ʻuliʻi ʻe he kau taki ʻo Selusalemá mo hono kakaí ʻa e temipale ʻo e ʻOtuá ʻaki ʻa e ngaahi ʻaitolí—ʻo aʻu, ʻo ʻai kinautolu ko honau ngaahi tuʻi.

43:​13-​20​—Ko e hā ʻoku fakatātaaʻi ʻe he ʻōlita naʻe sio ki ai ʻa ʻIsikeli ʻi he vīsoné? Ko e ʻōlita fakaefakatātaá ko e finangalo ia ʻo e ʻOtuá ʻo fekauʻaki mo e feilaulau huhuʻi ʻa Sīsū Kalaisí. Koeʻuhí ko e tokonaki ko ʻení, ʻoku talaki ai ʻa e kau paní ʻoku nau māʻoniʻoni pea ko e “fuʻu kakai lahi” ʻoku nau maʻa mo taʻehamele ʻi he vakai mai ʻa e ʻOtuá. (Fakahā 7:​9-14; Loma 5:​1, 2) Mahalo ko e ʻuhinga ia ʻoku ʻikai hā ai ʻi he temipale he vīsoné ʻa e “tukuga vai lahi” ʻo e temipale ʻo Solomoné—ʻa ia ko ha fuʻu pēsoni vai naʻe ngāueʻaki ʻe he kau taulaʻeikí ke nau kaukau ai.—1 Tuʻi 7:​23-26, PM.

44:​10-​16​—Ko hai ʻoku fakafofongaʻi ʻe he kalasi taulaʻeikí? ʻOku tomuʻa fakatātaaʻi ʻe he kalasi taulaʻeikí ʻa e kulupu ʻo e kau Kalisitiane pani ʻi hotau ʻaho ní. Ko hono fakamaʻa kinautolú naʻe hoko ia ʻi he 1918 ʻi he taimi naʻe ʻafio ai ʻa Sihova ko e tokotaha “sivi mo fakamaʻa” ʻi hono temipale fakalaumālié. (Malakai 3:​1-5) Ko e faʻahinga naʻe maʻa pe fakatomalá naʻe lava ke nau hokohoko atu ʻi honau monū fisifisimuʻá. Hili iá, naʻe pau ke nau ngāue mālohi ke tauhi kinautolu ke ‘taʻe hanau ʻila mei mamani,’ ʻo nau hoko ai ko e ngaahi faʻifaʻitakiʻanga ki he “fuʻu kakai lahi,” ʻa ia ʻoku fakafofongaʻi ʻe he ngaahi matakali ʻikai taulaʻeikí.—Semisi 1:27; Fakahā 7:​9, 10.

45:1; 47:13–​48:29​—Ko e hā ʻoku fakafofongaʻi ʻe he “fonua” mo hono ʻinasí? ʻOku fakafofongaʻi ʻe he fonuá ʻa e feituʻu ngāue ʻo e kakai ʻa e ʻOtuá. Tatau ai pē pe ʻoku ʻi fē ha tokotaha lotu ʻa Sihova, ko e tokotaha ko iá ʻokú ne ʻi he fonua kuo toe fakafokí kehe pē ke ne pouaki ʻa e lotu moʻoní. Ko hono vahevahe ʻinasi ʻo e fonuá ʻe fakahoko fakaʻosi ia ʻi he māmani foʻoú ʻi he taimi ʻe maʻu ai ʻe he tokotaha faitōnunga taki taha ha tofiʻa.—Aisea 65:​17, 21.

45:​7, 16​—Ko e hā ʻoku fakatātaaʻi ʻe he hapai naʻe fai ʻe he kakaí ki he tuʻunga-taulaʻeikí mo e ʻeiki ʻo e kakaí? ʻI he temipale fakalaumālié, ʻoku ʻuhinga tefito ʻeni ia ki he poupou fakalaumālie—ko hono ʻoatu ha tokoni mo hono fakahāhā ha laumālie fetokoniʻaki.

47:​1-5​—Ko e hā ʻoku fakatātaaʻi ʻe he vai ʻo e vaitafe ʻi he vīsone ʻa ʻIsikelí? ʻOku fakatātaaʻi ʻe he vaí ʻa e ngaahi tokonaki fakalaumālie ʻa Sihova ki he moʻuí, ʻo kau ai ʻa e feilaulau huhuʻi ʻo Kalaisi Sīsuú mo e ʻilo ki he ʻOtuá ʻoku maʻu ʻi he Tohi Tapú. (Selemaia 2:13; Sione 4:​7-26; Efeso 5:​25-27) ʻOku fakaʻaʻau pē ke loloto ʻa e vaitafé ke ʻi ai ha feituʻu feʻunga ki he faʻahinga foʻou ʻoku tafe mai ʻa ia ʻoku nau tali ʻa e lotu moʻoní. (Aisea 60:22) ʻE tafe ʻi he vaitafé ʻa e vai mālohi taha ʻo e moʻuí lolotonga ʻa e Taʻu ʻe Taha Afé, pea ʻe kau ki hono ngaahi vaí ʻa e mahino lahi ange ʻoku maʻu mei he “ngaahi tohi” ʻa ia ʻe fakaava ʻi he taimi ko iá.—Fakahā 20:12; 22:​1, 2.

47:12​—Ko e hā ʻoku fakafofongaʻi ʻe he ngaahi ʻakau mohu fuá? ʻOku fakafofongaʻi ʻe he ngaahi ʻakau fakaefakatātaá ʻa e ngaahi tokonaki fakalaumālie ʻa e ʻOtuá ki hono toe fakafoki ʻa e tangatá ki he tuʻunga haohaoá.

48:​15-​19, 30-​35​—Ko e hā ʻoku fakafofongaʻi ʻe he kolo ʻi he vīsone ʻa ʻIsikelí? ʻOku tuʻu ʻa “Sihova-Sama” ʻi he fonua “ngofua,” ʻo hā mei ai ʻoku pau pē ʻokú ne fakafofongaʻi ha meʻa ʻi heni he māmaní. ʻOku ngalingali ʻoku fakafofongaʻi ʻe he koló ʻa e tuʻunga puleʻi ʻi heni he māmaní ʻa ia ʻoku maʻu ʻaonga mei ai ʻa e faʻahinga ʻe faʻuʻaki ʻa e “fonua foʻou” māʻoniʻoní. (2 Pita 3:13) Ko e ʻi ai ko ia hono ngaahi matapā ʻi he tafaʻaki taki taha ʻoku fakatātaaʻi ai ʻa e faingofua ke hū ki aí. Ko e kau ʻovasia ʻi he kakai ʻa e ʻOtuá ʻoku fiemaʻu ke nau fotungofua.

Ngaahi Lēsoni kia Kitautolu:

40:​14, 16, 22, 26. Ko e ngaahi tā tongitongi ʻo e ʻulu paame ʻi he ngaahi hūʻanga ʻo e temipalé ʻoku fakahaaʻi ai ko e faʻahinga pē ʻoku nau faitotonu fakaeʻulungāangá ʻoku ʻatā ke nau huú. (Sāme 92:12) ʻOku akoʻi mai kiate kitautolu ʻe he meʻá ni ʻe fakahōifua pē kia Sihova ʻetau lotú kapau te tau faitotonu.

44:23. He houngaʻia ē ko kitautolu koeʻuhi ko e ngaahi ngāue kuo fakahoko ʻe he kalasi taulaʻeiki ʻi onopōní! ʻOku tamuʻomuʻa ʻa e “tamaioeiki agatonu mo boto” ʻi hono tokonaki mai ʻo e meʻakai fakalaumālie taimi totonu ʻa ia ʻokú ne tokoniʻi kitautolu ke tau ʻiloʻi ʻa e faikehekehe ʻi he meʻa ʻoku taʻemaʻá mo e meʻa ʻoku maʻa ʻi he vakai ʻa Sihová.—Mātiu 24:​45, PM.

47:​9, 11. Ko e ʻiló—ʻa e konga mātuʻaki mahuʻinga ʻo e vai fakaefakatātaá—kuó ne fakahoko ha fakamoʻui fakaofo ʻi hotau taimí. Ko fē pē feituʻu ʻoku maʻu aí, ʻokú ne fakamoʻui fakalaumālie ʻa e kakaí. (Sione 17:3) ʻI he tafaʻaki ʻe tahá, ko e faʻahinga ʻoku ʻikai te nau tali ʻa e vai foaki-moʻuí ʻe “tuku pe ke maʻu ʻe he masima”—ʻa ia ko honau fakaʻauha tuʻuloa. He mātuʻaki mahuʻinga ē ke tau fai hotau lelei tahá ke “tofa totonu ʻa e folofola ʻo e moʻoni.”—2 Timote 2:15.

“Te U ʻAi ke Tapuha Hoku Hingoa Lahi”

Hili ʻa hono toʻo ʻa e tuʻi fakaʻosi ʻi he laine ʻo Tēvitá, naʻe fakaʻatā ʻe he ʻOtua moʻoní ha vahaʻa taimi lōloa ke matolo atu ki muʻa ke haʻu ʻa e Tokotaha “ʻoku oʻona totonu,” ʻa e tuʻunga-tuʻí. Kae kehe, naʻe ʻikai ke siʻaki ʻe he ʻOtuá ʻa ʻene fuakava mo Tēvitá. (Isikeli 21:27; 2 Samiuela 7:​11-16) ʻOku lau ʻa e kikite ʻa ʻIsikelí ki he “ʻeku sevaniti ko Tevita,” ʻa ia ʻe hoko ko ha “tauhi” mo ha “tuʻi.” (Isikeli 34:​23, 24; 37:​22, 24, 25) Ko e tokotaha ko ʻení ʻoku ʻikai ko ha toe taha ka ko Sīsū Kalaisi ʻi hono tuʻunga-pule he Puleʻangá. (Fakahā 11:15) ʻE hanga ʻe Sihova ʻo ʻai ke ‘tapuha hono hingoa lahí’ fakafou ʻi he Puleʻanga Faka-Mīsaiá.—Isikeli 36:23.

ʻIkai fuoloa mei heni, ʻe fakaʻauha ʻa e faʻahinga kotoa ʻoku nau fakalieliaʻi ʻa e huafa māʻoniʻoni ʻo e ʻOtuá. Ka ko e faʻahinga ʻoku nau fakatāpuhaaʻi ʻa e huafa ko iá ʻi heʻenau moʻuí ʻi he lotu ʻi ha tuʻunga fakahōifua kia Sihová te nau maʻu ʻa e moʻui taʻengatá. Ko ia ai, tau ngāue ʻaonga kakato ʻaki ʻa e ngaahi vai ʻo e moʻuí ʻa ia ʻoku tafe lahi mai ʻi hotau ʻahó ni pea ʻai ʻa e lotu moʻoní ko e meʻa tefito tonu ia ʻi heʻetau moʻuí.

[Fakamatala ʻi lalo]

[Fakatātā ʻi he peesi 9]

Ko e temipale lāngilangiʻia ʻi he vīsone ʻa ʻIsikelí

[Fakatātā ʻi he peesi 10]

Ko e hā ʻoku fakafofongaʻi ʻe he vaitafe ʻo e moʻui ʻi he vīsone ʻa ʻIsikelí?

[Maʻuʻanga]

Pictorial Archive (Near Eastern History) Est.