FAKAMATALA ʻI HE NGATAʻANGÁ

Ko e huafa ʻo e ʻOtuá ko Sihova pea ʻoku mahinoʻi ʻoku ʻuhingá ko e “ʻOkú ne Fakatupunga ke Hoko.” Ko Sihova ʻa e ʻOtua māfimafi-aoniú, pea naʻá ne fakatupu ʻa e meʻa kotoa pē. ʻOkú ne maʻu ʻa e mālohi ke fai ha meʻa pē ʻokú ne fili ke fai.

ʻI he lea faka-Hepeluú, naʻe tohiʻi ai ʻa e huafa ʻo e ʻOtuá ʻaki ʻa e mataʻitohi ʻe fā. ʻI he faka-Pilitāniá, ʻoku fakahaaʻi eni ʻaki ʻa e YHWH pe JHVH. ʻOku ʻasi ʻa e huafa ʻo e ʻOtuá ʻi he muʻaki konga tohi faka-Hepelū ʻo e Tohi Tapú ʻo meimei tuʻo 7,000. Ko e kakai ʻi he kotoa ʻo e māmaní ʻoku nau ngāueʻaki ʻa e faʻunga kehekehe ʻo e huafa Sihová, ʻo puʻaki ia ʻi he founga ʻoku angamaheniʻaki ʻi heʻenau leá.

▸ Vahe 1, pal. 15

Ko e Faʻutohi ʻo e Tohi Tapú ko e ʻOtuá, ka naʻá ne ngāueʻaki ha kau tangata ke nau hiki ia. ʻOku meimei tatau eni mo ha tangata pisinisi ʻokú ne tala ki heʻene sekelitalí ke ne fai ha tohi ʻoku ʻi ai ʻene ngaahi fakakaukaú. Naʻe ngāueʻaki ʻe he ʻOtuá hono laumālie māʻoniʻoní ke tataki ʻaki ʻa e kau hiki Tohi Tapú ke nau hiki ʻene ngaahi fakakaukaú. Naʻe tataki kinautolu ʻe he laumālie ʻo e ʻOtuá ʻi ha founga kehekehe, ʻi he taimi ʻe niʻihi naʻá ne ʻai kinautolu ke nau mata vīsone pe maʻu ha ngaahi misi ʻa ia naʻa nau hiki leva ia.

▸ Vahe 2, pal. 5

Ko e ngaahi akonaki eni ʻi he Tohi Tapú ʻokú ne fakamatalaʻi ha moʻoni tefito. Ko e fakatātaá, ko e tefitoʻi moʻoni ko e “ngaahi feohi koví ʻokú ne maumauʻi ʻa e ngaahi anga ʻoku leleí” ʻokú ne akoʻi mai ʻoku uesia kitautolu ki he lelei pe ki he kovi ʻe he kakai ʻoku tau feohi mo iá. (1 Kolinitō 15:33) Pea ʻoku akoʻi mai ʻe he tefitoʻi moʻoni “ʻilonga ha meʻa ʻoku tō ʻe ha taha, ko e meʻa ia te ne utú foki” heʻikai lava ke tau hao mei he ngaahi nunuʻa ʻo ʻetau ngaahi ngāué.​—Kalētia 6:7.

▸ Vahe 2, pal. 12

Ko ha pōpoaki eni mei he ʻOtuá. ʻE lava ke hoko ko ha fakamatala ia ʻo fekauʻaki mo e finangalo ʻo e ʻOtuá, ko ha akonaki fakaeʻulungaanga, ko ha fekau, pe ko ha fakamaau. ʻE lava foki ke hoko ia ko ha pōpoaki fekauʻaki mo ha meʻa ʻe hoko ʻi he kahaʻú. ʻOku lahi ʻa e ngaahi kikite ʻi he Tohi Tapú kuo ʻosi fakahoko.

▸ Vahe 2, pal. 13

Ko Sīsū ʻa e tokotaha naʻe fakahoko ai ʻa e ngaahi kikite lahi ʻi he Tohi Tapú fekauʻaki mo e Mīsaiá. Sio ki he puha “Ngaahi Kikite ʻo Fekauʻaki mo e Mīsaiá.”

▸ Vahe 2, pal. 17, fakamatala ʻi laló.

Naʻe fakatupu ʻe Sihova ʻa e māmaní ke hoko ko ha ʻapi palataisi maʻá e faʻahinga ʻo e tangata ʻoku ʻofa kiate iá. Kuo ʻikai liliu ʻene taumuʻá. Kuo vavé ni ke toʻo atu ʻe he ʻOtuá ʻa e fulikivanú pea ʻoange ki hono kakaí ʻa e moʻui taʻengatá.

▸ Vahe 3, pal. 1

Ko Sētané ko e ʻāngelo ia naʻá ne kamataʻi ʻa e angatuʻu ki he ʻOtuá. ʻOku ui ia ko Sētane, ʻa ia ʻoku ʻuhingá ko e “Tokotaha-Talitekeʻi,” koeʻuhí ʻokú ne fakafepaki kia Sihova. ʻOku toe ui ia ko e Tēvolo, ʻa ia ʻoku ʻuhingá ko e “Tokotaha Lauʻikovi Loi.” Naʻe ʻoange ʻa e hingoa ko ení kiate ia koeʻuhi ʻokú ne tala ha ngaahi loi fekauʻaki mo e ʻOtuá mo kākaaʻi ʻa e kakaí.

▸ Vahe 3, pal. 4

Naʻe fakatupu ʻe Sihova ʻa e kau ʻāngeló ki muʻa fuoloa ia peá ne toki fakatupu ʻa e māmaní. Naʻe fakatupu kinautolú ke nau nofo ʻi hēvani. ʻOku ʻi ai ʻa e kau ʻāngelo tokolahi hake ʻi he teau milioná. (Taniela 7:10) ʻOku ʻi ai honau ngaahi hingoa mo honau ngaahi ʻulungaanga kehekehe, pea ko e kau ʻāngelo mateakí ʻoku nau fakafisi ke lotu ange kiate kinautolu ʻa e faʻahinga ʻo e tangatá. ʻOku nau maʻu ha ngaahi ngafa kehekehe pea ʻoku vaheʻi kinautolu ki ha ngāue kehekehe. Ko e niʻihi ʻo e ngāué ni ʻoku kau ai ʻa e ngāue ʻi he ʻao ʻo e taloni ʻo e ʻOtuá, ʻoatu ʻene ngaahi pōpoakí, maluʻi mo tataki ʻene kau sevāniti ʻi he māmaní, fakahoko ʻene ngaahi fakamāú, pea poupouʻi ʻa e ngāue fakamalangá. (Saame 34:7; Fakahā 14:6; 22:8, 9) ʻI he kahaʻú, te nau faitau fakataha mo Sīsū ʻi he tau ʻo ʻĀmaketoné.​—Fakahā 16:14, 16; 19:14, 15.

▸ Vahe 3, pal. 5; Vahe 10, pal. 1

Ko ha meʻa pē ʻoku tau ongoʻi, fakakaukauʻi, pe fai ʻoku fepaki mo Sihova pe ko hono finangaló ko e angahala ia. Koeʻuhi ʻoku maumauʻi ʻe he angahalá hotau vahaʻangatae mo e ʻOtuá, kuó ne ʻomai kiate kitautolu ʻa e ngaahi lao mo e ngaahi tefitoʻi moʻoni ʻe tokoniʻi ai kitautolu ke tau fakaʻehiʻehi mei he angahala ʻoku fai ʻiloʻilo paú. ʻI he kamataʻangá, naʻe fakatupu ʻe Sihova ʻa e meʻa kotoa pē ʻo haohaoa, ka ʻi he taimi naʻe fili ai ʻa ʻĀtama mo ʻIvi ke na talangataʻa kia Sihová, naʻá na faiangahala ai pea ʻikai te na kei haohaoa. Naʻá na tupu ʻo motuʻa peá na mate, pea koeʻuhi ʻoku tau maʻu tukufakaholo ʻa e angahalá meia ʻĀtama, ʻoku tau tupu foki ai ʻo motuʻa pea tau mate.

▸ Vahe 3, pal. 7; Vahe 5, pal. 3

Ko e tau eni ʻa e ʻOtuá ke fakaʻauha ai ʻa e māmani ʻo Sētané mo e fulikivanú kotoa.

▸ Vahe 3, pal. 13; Vahe 8, pal. 18

Ko e Puleʻanga ʻo e ʻOtuá ko ha founga-pule ia kuo fokotuʻu ʻe Sihova ʻi hēvani. Ko Sīsū Kalaisi ʻoku pule ko hono Tuʻí. ʻI he kahaʻú, ʻe ngāueʻaki ʻe Sihova ʻa e Puleʻangá ke ne toʻo atu ʻa e fulikivanu kotoa pē. ʻE pule mai ʻa e Puleʻanga ʻo e ʻOtuá ki he māmaní.

▸ Vahe 3, pal. 14

Naʻe fakatupu ʻe he ʻOtuá ʻa Sīsū ki muʻa ia ʻi he meʻa kotoa pē. Naʻe fekauʻi mai ʻe Sihova ʻa Sīsū ki he māmaní ke ne pekia maʻá e faʻahinga kotoa ʻo e tangatá. Hili hono tāmateʻi ʻa Sīsuú, naʻe fokotuʻu hake ia ʻe Sihova. ʻOku pule ʻa Sīsū he taimí ni ʻi hēvani ko e Tuʻi ʻo e Puleʻanga ʻo e ʻOtuá.

▸ Vahe 4, pal. 2

Naʻe kikiteʻi pe tomuʻa tala ʻe he Tohi Tapú ʻa e taimi ʻe hā ai ʻa e Mīsaiá. ʻE hoko eni ʻi he ngataʻanga ʻo ha vahaʻa taimi ʻoku ui ko e uike ʻe 69, ʻa ia naʻe kamata ʻi he taʻu 455 K.M. pea ngata ʻi he taʻu 29 T.S.

ʻOku anga-fēfē ʻetau ʻiloʻi naʻe ngata ia ʻi he taʻu 29 T.S.? Ko e uike ʻe 69 naʻe kamata ia ʻi he taʻu 455 K.M. ʻi he taimi naʻe aʻu ai ʻa Nehemaia ki Selusalema pea kamata ke toe langa ʻa e koló. (Taniela 9:25; Nehemaia 2:1, 5-8) Hangē pē ko hono ʻai ʻe he foʻi lea ko e “tōsení” ke tau fakakaukau ki he mataʻifika 12, ʻoku pehē pē hono fakamanatu mai kiate kitautolu ʻe he foʻi lea “uiké” ʻa e mataʻifika 7. Ko e ngaahi uike ʻi he kikité ni ʻoku ʻikai ko e ngaahi uike ia ʻo e ʻaho ʻe fitu ka ko e ngaahi uike ʻo e taʻu ʻe fitu, fakatatau ki he lao fakaekikite “ko e ʻaho ki he taʻu.” (Nōmipa 14:34; ʻIsikeli 4:6) ʻOku ʻuhinga ení ko e uike taki taha ko hono lōloá ko e taʻu ʻe fitu pea ko e uike ʻe 69 ʻoku tānaki ia ʻo maʻu ʻa e taʻu ʻe 483 (69 x 7). Kapau te tau lau ʻa e taʻu ʻe 483 mei he 455 K.M., te tau aʻu ai ki he taʻu 29 T.S. Ko e taʻu tofu pē eni naʻe papitaiso ai ʻa Sīsū peá ne hoko ko e Mīsaiá!​—Luke 3:1, 2, 21, 22.

Naʻe tomuʻa tala ʻe he kikite tatau pē ha toe uike ʻe taha, ʻa ia ko ha toe taʻu kehe ia ʻe fitu. ʻI he lolotonga ʻa e vahaʻa taimi ko ení, ʻi he taʻu 33 T.S., ʻe tāmateʻi ai ʻa e Mīsaiá, pea kamata ʻi he taʻu 36 T.S., ʻe malangaʻi ai ʻa e ongoongo lelei ʻo e Puleʻanga ʻo e ʻOtuá ki he ngaahi puleʻanga kotoa pē ʻo ʻikai ki he kau Siú pē.​—Taniela 9:24-27.

▸ Vahe 4, pal. 7

ʻOku akoʻi mai ʻe he Tohi Tapú ko Sihova ko e ʻOtuá ko e Tokotaha-Fakatupú ia pea naʻá ne fakatupu ʻa Sīsū ki muʻa ʻi he ngaahi meʻa kehe kotoa pē. (Kolose 1:15, 16) Ko Sīsuú ʻoku ʻikai ko e ʻOtua Māfimafi-Aoniú ia. Naʻe ʻikai ʻaupito te ne taukaveʻi naʻá ne tatau mo e ʻOtuá. Ko hono moʻoní, naʻá ne pehē: “ʻOku lahi ʻa e Tamaí ʻiate au.” (Sione 14:28; 1 Kolinitō 15:28) Ka ʻoku akoʻi ʻe he ngaahi lotu ʻe niʻihi ʻa e Tolu-Tahaʻi-ʻOtuá, ko e ʻOtuá ko e toko tolu ʻi he taha: Ko e Tamai, ko e ʻAlo, pea mo e laumālie māʻoniʻoni. ʻOku ʻikai ʻi he Tohi Tapú ʻa e foʻi lea “Tolu-Tahaʻi-ʻOtuá.” Ko ha akonaki loi eni.

Ko e laumālie māʻoniʻoní ko e ivi ngāue ia ʻo e ʻOtuá, ko hono ivi ngāue taʻehāmai ia ʻokú ne ngāueʻaki ke fai ʻa hono finangaló. ʻOku ʻikai ko ha tokotaha ia. Ko e fakatātaá, ko e muʻaki kau Kalisitiané “naʻa nau hoko ʻo fonu kotoa ʻi he laumālie māʻoniʻoní,” pea naʻe pehē ʻe Sihova: “Te u huaʻi hifo ha konga hoku laumālié ki he faʻahinga kakano kotoa pē.”​—Ngāue 2:1-4, 17.

▸ Vahe 4, pal. 12; Vahe 15, pal. 17

ʻI he taimi ʻoku lotu ai ʻa e kau Kalisitiane moʻoní ki he ʻOtuá, ʻoku ʻikai te nau ngāueʻaki ʻa e kolosí. Ko e hā hono ʻuhingá?

1. Kuo ngāueʻaki ʻa e kolosí ʻi he lotu loí ʻi ha taimi lōloa. ʻI he kuonga muʻá naʻe ngāueʻaki ai ia ʻi he lotu ki natulá pea ʻi he ngaahi ouau fakaefehokotaki fakasino fakapanganí. ʻI he lolotonga ʻa e ʻuluaki taʻu ʻe 300 hili ʻa e pekia ʻa Sīsuú, naʻe ʻikai ke ngāueʻaki ʻe he kau Kalisitiané ʻa e kolosí ʻi heʻenau lotú. Ki mui ʻaupito mai, naʻe ʻai ai ʻe ʻEmipola Konisitanitaine ʻo Lomá ʻa e kolosí ko ha fakaʻilonga ia ʻo e lotu faka-Kalisitiané. Naʻe ngāueʻaki ʻa e fakaʻilongá ni ʻi he feinga ke ʻai ke manakoa ange ʻa e lotu faka-Kalisitiané. Ka ko e kolosí naʻe ʻikai haʻane kaunga ʻe taha kia Sīsū Kalaisi. ʻOku fakamatala ʻa e New Catholic Encyclopedia: “Ko e kolosí ʻoku maʻu ia fakatouʻosi ʻi he ngaahi tōʻonga fakafonua ki muʻa ʻi he Kalisitiané mo e ʻikai Kalisitiané.”

2.  Naʻe ʻikai ke pekia ʻa Sīsū ʻi ha kolosi. Ko e ngaahi foʻi lea faka-Kalisi naʻe liliu ko e “kolosí” ʻoku ʻuhinga tefito ia ki ha “fuʻu pou tuʻu hangatonu,” “konga papa,” pe “fuʻu ʻakau.” ʻOku fakamatala ʻa e The Companion Bible: “ʻOku halaʻatā ke lēkooti ha meʻa ʻi he lea faka-Kalisi ʻo e [Fuakava Foʻoú] ke aʻu ʻo fakahuʻunga ai ki ha konga papa ʻe ua.” Naʻe pekia ʻa Sīsū ʻi ha fuʻu pou tuʻu hangatonu.

3.  ʻOku ʻikai fiemaʻu ʻe Sihova ke tau ngāueʻaki ha ngaahi ʻīmisi pe ngaahi fakaʻilonga ʻi heʻetau lotú.​—ʻEkisoto 20:4, 5; 1 Kolinitō 10:14.

▸ Vahe 5, pal. 12

Naʻe fekauʻi ʻe Sīsū ʻene kau ākongá ke nau kātoangaʻi ʻa e Fakamanatu ʻo ʻene pekiá. ʻOku nau fai eni ʻi he taʻu taki taha ʻi he ʻaho 14 ʻo Nīsaní, ʻa e ʻaho tatau naʻe kātoangaʻi ai ʻe he kau ʻIsilelí ʻa e Pāsová. Ko e mā mo e uaine, ʻa ia ʻokú na fakafofongaʻi ʻa e sino mo e taʻataʻa ʻo Sīsuú, ʻoku paasi takai atu ia ki he tokotaha kotoa ʻi he Fakamanatú. Ko e faʻahinga te nau pule fakataha mo Sīsū ʻi hēvaní te nau kai ʻa e maá mo inu ʻa e uainé. Ko e faʻahinga ʻoku nau maʻu ʻa e ʻamanaki ko e moʻui taʻengata ʻi he māmaní ʻoku nau kau anga-fakaʻapaʻapa ki he Fakamanatú ka ʻoku ʻikai te nau kai ʻa e maá pe inu ʻa e uainé.

▸ Vahe 5, pal. 21

Ko e foʻi lea faka-Hepelū ko e neʹphesh pe ko e foʻi lea faka-Kalisi ko e psy·kheʹ ʻi he Tohi Tapú ʻoku ʻuhinga ia (1) ko ha tokotaha, (2) ko ha manu, pe (3) ko e moʻui ʻa ha taha pe ko ha manu. Ko ha fakatātā eni ʻe niʻihi:

• Ko ha tokotaha. ʻOku pehē ʻe he Tohi Tapú ʻi he ʻaho ʻo Noá ‘naʻe fakahaofi ai ha toko valu [faka-Kalisi psy·kheʹ].’ (1 Pita 3:20) ʻOku ʻuhinga heni ʻa e foʻi lea faka-Kalisi psy·kheʹ ki he kakai​—ko Noa mo hono uaifí, mo hona foha ʻe toko tolú, mo e ngaahi uaifi ʻo e ngaahi fohá.

• Ko ha manu. “Naʻe folofola leva ʻa e ʻOtuá: ‘Ke ngaeve ʻa e ngaahi meʻamoʻui [faka-Hepelū neʹphesh] ʻi he ngaahi vaí, pea ko e ngaahi meʻamoʻui ʻoku puná [faka-Hepelū neʹphesh] ke nau puna ʻi ʻolunga he māmaní ʻi he ʻatā ʻo e langí.’ Naʻe folofola leva ʻa e ʻOtuá: ‘Ke tupu mai ʻi he māmaní ʻa e ngaahi meʻamoʻui ʻo fakatatau ki honau faʻahinga, ko e fanga manu lalata mo e fanga manu totolo mo ngaolo mo e fanga manu kaivao [faka-Hepelū neʹphesh] ʻo e māmaní ʻo fakatatau ki honau faʻahinga.’ Pea naʻe hoko ʻo pehē.”​—Sēnesi 1:20, 24.

• Ko e moʻui ʻa ha taha pe ko ha manu. Naʻe folofola ʻa Sihova kia Mōsese: “Ko e kau tangata kotoa pē naʻa nau feinga ke tāmateʻi koé [faka-Hepelū “tāmateʻi hoʻo neʹphesh”] kuo nau mate.” (ʻEkisoto 4:19) ʻI he ʻi māmani ʻa Sīsuú, naʻá ne pehē: “Ko au ʻa e tauhi-sipi leleí; ko e tauhi-sipi leleí ʻokú ne tuku atu ʻene moʻuí [faka-Kalisi psy·kheʹ] koeʻuhiā ko e fanga sipí.”​—Sione 10:11.

  Tānaki atu ki ai, ʻi hono fai ʻe ha taha ha meʻa ʻaki ʻene “moʻuí kotoa,” ʻoku ʻuhinga iá ʻokú ne fai loto-lelei ia pea ki he lelei taha ʻo ʻene malavá. (Mātiu 22:37; Teutalōnome 6:5) Ko e foʻi lea neʹphesh pe psy·kheʹ ʻe lava ke toe ngāueʻaki ia ke fakamatalaʻi ʻa e holi pe ʻuakai ʻa ha meʻamoʻui. Ko ha tokotaha mate pe ko ha sino kuo mate ʻe lava ke lau ia ko ha neʹphesh pe psy·kheʹ.​—Nōmipa 6:6; Palōveepi 23:2; ʻAisea 56:11; Hākeai 2:13.

▸ Vahe 6, pal. 5; Vahe 15, pal. 17

Ko e foʻi lea faka-Hepelū mo e faka-Kalisi naʻe liliu ko e “laumālie” ʻi he pulusinga faka-Tonga ʻo e Liliu Tohi Tapu Māmani Foʻoú ʻoku lava ke ʻuhinga ia ki he ngaahi meʻa kehekehe. Ka ʻoku ʻuhinga maʻu pē ki he meʻa ʻoku taʻehāmai ki he faʻahinga ʻo e tangatá, ʻo hangē ko e matangí pe ko e mānava ʻa e faʻahinga ʻo e tangatá mo e fanga manú. Ko e ngaahi foʻi leá ni ʻoku ʻuhinga nai ia ki he faʻahinga laumālie pea ki he laumālie māʻoniʻoní, ʻa ia ko e ivi ngāue ʻo e ʻOtuá. ʻOku ʻikai ke akoʻi mai ʻe he Tohi Tapú ia ʻoku hokohoko atu ʻa e moʻui ʻa ha konga mavahe ʻo ha taha ʻi he hili ʻene maté.​—ʻEkisoto 35:21; Saame 104:29; Mātiu 12:43; Luke 11:13.

▸ Vahe 6, pal. 5; Vahe 15, pal. 17

Ko e Kihená ko e hingoa ia ʻo ha teleʻa ofi ki Selusalema ʻa ia naʻe tutu mo fakaʻauha ai ʻa e vevé. ʻOku ʻikai ha fakamoʻoni ia naʻe fakamamahiʻi pe tutu moʻui ʻi he taimi ʻo Sīsuú ʻa e fanga manú pe tangatá ʻi he teleʻa ko ení. Ko ia ko e Kihená ʻoku ʻikai te ne fakahaaʻi ha feituʻu taʻehāmai ʻa ia ʻoku fakamamahiʻi mo tutu ai ʻa e kakaí ʻo taʻengata. ʻI he taimi naʻe lea ai ʻa Sīsū fekauʻaki mo e faʻahinga ʻoku lī ki Kihená, naʻá ne talanoá ʻo fekauʻaki mo e fakaʻauha fakaʻaufuli.​—Mātiu 5:22; 10:28.

▸ Vahe 7, pal. 20

Ko e lotu eni naʻe ʻoange ʻe Sīsū ki heʻene kau ākongá ʻi heʻene akoʻi kinautolu ki he founga ke lotu aí. ʻOku toe ui ia ko e Ko ʻEmau Tamai pe sīpinga lotu. Ko e fakatātaá, naʻe akoʻi ʻe Sīsū ke tau lotu ʻo peheni:

• “Ke fakamāʻoniʻoniʻi ho huafá”

  ʻOku tau lotu kia Sihova ke ne fakaʻataʻatā hono huafá, pe ongoongó, mei he loi kotoa pē. ʻOku fai ení koeʻuhi ke fakalāngilangiʻi mo fakaʻapaʻapaʻi ai ʻe he tokotaha kotoa pē ʻi hēvani pea ʻi māmani ʻa e huafa ʻo e ʻOtuá.

• “Ke hoko mai ho Puleʻangá”

  ʻOku tau lotu ke fakaʻauha ʻe he founga-pule ʻa e ʻOtuá ʻa e māmani fulikivanu ʻo Sētané, ke pule mai ki he māmaní, pea ke ne ʻai ʻa e māmaní ko ha palataisi.

• “Ke fai ho finangaló . . . ʻi māmani”

  ʻOku tau lotu ke fakahoko ʻa e taumuʻa ʻa e ʻOtuá ki he māmaní koeʻuhi ke lava ai ʻa e faʻahinga talangofua mo haohaoa ʻo e tangatá ʻo moʻui taʻengata ʻi Palataisi, ʻo hangē pē ko e meʻa naʻe fiemaʻu ʻe Sihova ʻi he taimi naʻe fakatupu ai ʻa e tangatá.

▸ Vahe 8, pal. 2

Naʻe tokonaki mai ʻe Sihova ʻa e huhuʻí ke fakahaofi ai ʻa e faʻahinga ʻo e tangatá mei he angahalá mo e maté. Ko e huhuʻí ko e totongi ia naʻe fiemaʻu ke fakatau fakafoki mai ʻaki ʻa e moʻui haohaoa fakaetangata naʻe fakamoleki ʻe he ʻuluaki tangatá, ʻe ʻĀtama, pea ke fakaleleiʻi ʻaki ʻa e vahaʻangatae ʻo e tangatá mo Sihova ʻa ia kuo maumauʻí. Naʻe fekauʻi mai ʻe he ʻOtuá ʻa Sīsū ki māmani koeʻuhi ke ne pekia maʻá e kau angahalá kotoa. Koeʻuhi ko e pekia ʻa Sīsuú, ʻoku maʻu ai ʻe he faʻahinga kotoa ʻo e tangatá ʻa e faingamālie ke moʻui taʻengata pea hoko ʻo haohaoa.

▸ Vahe 8, pal. 21; Vahe 9, pal. 13

Ko e kikite ʻi he Taniela vahe 4 ʻoku akoʻi mai ai naʻe fokotuʻu ʻe he ʻOtuá ʻa hono Puleʻangá ʻi he 1914.

Ko e kikité: Naʻe ʻoange ʻe Sihova kia Tuʻi Nepukanesa ha misi fakaekikite fekauʻaki mo ha fuʻu ʻakau ʻa ia naʻe tā hifo. ʻI he misí, naʻe haʻi takatakai ʻa e ukamea mo e kopa ʻi he tefito ʻo e fuʻu ʻakaú ke taʻofi ʻa ʻene tupú ʻi ha vahaʻa taimi ko e “kuonga ʻe fitu.” ʻI he hili iá, ʻe toe tupu ʻa e fuʻu ʻakaú.​—Taniela 4:1, 10-16.

ʻUhinga ʻo e kikité kiate kitautolú: ʻOku fakafofongaʻi ʻe he fuʻu ʻakaú ʻa e pule ʻa e ʻOtuá. ʻI he ngaahi taʻu lahi, naʻe ngāueʻaki ai ʻe Sihova ʻa e ngaahi tuʻi ʻi Selusalemá ke nau pule ki he puleʻanga ʻIsilelí. (1 Kalonikali 29:23) Ka naʻe hoko ʻo taʻefaitōnunga ʻa e ngaahi tuʻi ko iá, pea naʻe ngata ʻa ʻenau pulé. Naʻe fakaʻauha ʻa Selusalema ʻi he taʻu 607 K.M. Naʻe kamata ai ʻa e “kuonga ʻe fitu.” (2 Tuʻi 25:1, 8-10; ʻIsikeli 21:25-27) ʻI he pehē ʻe Sīsū, “ʻe tāmalaki ʻa Selusalema ʻe he ngaahi puleʻangá kae ʻoua kuo kakato ʻa e taimi kotofa ʻo e ngaahi puleʻangá,” naʻá ne lea ai ʻo fekauʻaki mo e “kuonga ʻe fitu.” (Luke 21:24) Ko ia naʻe ʻikai ke ngata ʻa e “kuonga ʻe fitu” ʻi he taimi naʻe ʻi māmani ai ʻa Sīsuú. Naʻe talaʻofa ʻe Sihova te ne fakanofo ha Tuʻi ʻi he ngata ʻa e “kuonga ʻe fitu.” Ko e pule ʻa e Tuʻi foʻou ko ení, ʻa Sīsū, ʻe ʻomai ai ʻa e ngaahi tāpuaki lahi ki he kakai ʻa e ʻOtuá ʻi he māmaní kotoa, ʻo taʻengata.​—Luke 1:30-33.

Ko e lōloa ʻo e “kuonga ʻe fitu”: Ko e “kuonga ʻe fitu” naʻe feʻunga ia mo e taʻu ʻe 2,520. Kapau te tau lau ʻa e taʻu ʻe 2,520 mei he taʻu 607 K.M., te tau aʻu ai ki he taʻu 1914. Ko e taimi ia naʻe fakanofo ai ʻe Sihova ʻa Sīsū, ko e Mīsaiá, ko e Tuʻi ʻo e Puleʻanga ʻo e ʻOtuá ʻi hēvaní.

ʻOku anga-fēfē ʻetau maʻu ʻa e fika ko e 2,520? ʻOku pehē ʻe he Tohi Tapú ko e taʻu ʻe tolu mo e kongá ʻoku tatau ia mo e ʻaho ʻe 1,260. (Fakahā 12:6, 14) Ko ia ai, ko e “kuonga ʻe fitu” ko e liunga ua ia ʻo e fika ko iá, pe ko e ʻaho ʻe 2,520. Ko e ʻaho ʻe 2,520 ʻoku tatau ia mo e taʻu ʻe 2,520 koeʻuhí ko e lao fakaekikite “ko e ʻaho ki he taʻu.”​—Nōmipa 14:34; ʻIsikeli 4:6.

▸ Vahe 8, pal. 23

ʻOku lave ʻa e Tohi Tapú ki he ʻāngelo-pule pē ʻe taha, pea ko hono hingoá ko Maikeli.​—Taniela 12:1; Sute 9.

Ko Maikeli ʻa e Taki ʻo e kau tau ko e kau ʻāngelo faitōnunga ʻa e ʻOtuá. ʻOku pehē ʻe he Fakahā 12:7: “Ko Maikeli mo ʻene kau ʻāngeló naʻa nau faitau mo e talākoní . . . mo ʻene kau ʻāngeló.” ʻOku pehē ʻi he tohi Fakahaá ko e Taki ʻo e kau tau ʻa e ʻOtuá ko Sīsū, ko ia ai, ko e Maikelí ko ha toe hingoa ia ʻe taha ʻo Sīsū.​—Fakahā 19:14-16.

▸ Vahe 9, pal. 4

Ko e kupuʻi lea ko ení ʻoku ʻuhinga ia ki he vahaʻa taimi ʻa ia ʻe hoko ai ʻa e ngaahi meʻa lalahi ʻi he māmaní ki muʻa pē pea fakaʻauha ʻe he Puleʻanga ʻo e ʻOtuá ʻa e māmani ʻo Sētané. Ko e kupuʻi lea meimei tatau, hangē ko e “fakaʻosiʻosi ʻo e fokotuʻutuʻu lolotongá” mo e “ʻi heni ʻa e Foha ʻo e tangatá,” ʻoku ngāueʻaki ia ʻi he kikite ʻa e Tohi Tapú ʻo ʻuhinga iá ki he vahaʻa taimi tatau. (Mātiu 24:3, 27, 37) Ko e “ngaahi ʻaho fakaʻosí” naʻe kamata ia ʻi he taimi naʻe kamata pule ai ʻa e Puleʻanga ʻo e ʻOtuá ʻi hēvani ʻi he 1914 pea ʻe ngata ʻi he taimi ʻe fakaʻauha ai ʻi ʻĀmaketone ʻa e māmani ʻo Sētané.​—2 Tīmote 3:1; 2 Pita 3:3.

▸ Vahe 9, pal. 5

ʻI hono toe fakamoʻui ʻe he ʻOtuá ha tokotaha kuo mate, ʻoku ui ia ko e toetuʻu. Ko e toetuʻu ʻe hiva ʻoku lave ki ai ʻi he Tohi Tapú. Ko ʻIlaisiā, ʻIlaisa, Sīsū, Pita, mo Paula naʻa nau fakahoko kotoa ʻa e ngaahi toetuʻu. Ko e ngaahi mana ko ení naʻe malava pē iá koeʻuhi ko e mālohi ʻo e ʻOtuá. ʻOku talaʻofa mai ʻe Sihova ʻe toetuʻu “fakatouʻosi ʻa e māʻoniʻoní mo e taʻemāʻoniʻoní” ki he moʻui ʻi he māmaní. (Ngāue 24:15) ʻOku toe lave ʻa e Tohi Tapú ki ha toetuʻu ki hēvani. ʻE hoko eni ʻi he taimi ʻe toetuʻu ai ʻa e faʻahinga kuo fili, pe pani, ʻe he ʻOtuá ke nau moʻui ʻi hēvani fakataha mo Sīsū.​—Sione 5:28, 29; 11:25; Filipai 3:11; Fakahā 20:5, 6.

▸ Vahe 9, pal. 13

Ko e tōʻonga fakatēmenioó pe fakahaʻele faʻahikehé ko e tōʻonga kovi ia ʻo e feinga ke fetuʻutaki mo e ngaahi laumālié, ʻo fai fakahangatonu pe fakafou ʻi ha tokotaha kehe, hangē ko ha toketā fakafaʻahikehe, ko ha tokotaha fetuʻutaki fakafaʻahikehe, pe ko ha tokotaha ʻilo fakafaʻahikehe. Ko e kakai ʻoku nau tōʻongaʻaki ʻa e fakahaʻele faʻahikehé ʻoku nau fai ení koeʻuhí ʻoku nau tui ki he akonaki loi ʻoku moʻui atu ʻa e ngaahi laumālie ʻo e tangatá ʻi he maté ʻo nau hoko ko e ngaahi faʻahikehe mālohi. ʻOku feinga foki ʻa e fanga tēmenioó ke tākiekina ʻa e faʻahinga ʻo e tangatá ke nau talangataʻa ki he ʻOtuá. Ko e ʻasitalolosiá, tongafisí, faimaná, tōʻonga fakafaimaná, tui fakafaʻahikehé, ko e meʻa fakamēsikí, mo e mālohi mahulu hake ʻi natulá ko e konga foki ia ʻo e tōʻonga fakatēmenioó. Ko e ngaahi tohi lahi, ngaahi makasini, ngaahi fakamatala fakaʻasitalolosia, ngaahi faiva, ngaahi fakatātā, pea naʻa mo e ngaahi hivá ʻokú ne ʻai ʻa e fanga tēmenioó, faimaná, mo e mālohi mahulu hake ʻi natulá ke hā ngali ʻikai hano maumau pe hā fakafiefia. Ko e ngaahi tōʻonga fakafonua lahi ʻi he putú, hangē ko e ngaahi feilaulau ʻoku fai maʻá e kau maté, ngaahi kātoanga putu, mo e ngaahi ouau maʻá e uitoú, mo e ngaahi ouau ʻāpoó, ʻoku kau foki ki ai ʻa e fetuʻutaki mo e fanga tēmenioó. ʻOku faʻa ngāueʻaki ʻe he kakaí ʻa e faitoʻo kona tapú ʻi heʻenau feinga ke ngāueʻaki ʻa e mālohi ʻo e fanga tēmenioó.​—Kalētia 5:20; Fakahā 21:8.

▸ Vahe 10, pal. 10; Vahe 16, pal. 4

Ko Sihova ʻa e ʻOtua Māfimafi-Aoniú, pea naʻá ne fakatupu ʻa e ʻunivēsí kotoa. (Fakahā 15:3) Ko e ʻuhinga ia ʻoku ʻOʻona ai ʻa e meʻa kotoa pē peá ne maʻu ʻa e tuʻunga-hau, pe mafai kakato, ke pule ki heʻene fakatupú. (Saame 24:1; ʻAisea 40:21-23; Fakahā 4:11) Kuó ne faʻu ʻa e ngaahi lao ki he meʻa kotoa pē kuó ne fakatupú. ʻOku toe maʻu foki ʻe Sihova ʻa e mafai ke fakanofo ʻa e niʻihi kehe ke nau hoko ko e kau pule. ʻOku tau poupouʻi ʻa e tuʻunga-hau ʻo e ʻOtuá ʻi heʻetau ʻofa mo talangofua kiate iá.​—1 Kalonikali 29:11.

▸ Vahe 11, pal. 10

Ko ha fakatōtama ʻoku fai ʻosi fakakaukauʻi pē ia ke ʻai ke mate ha kiʻi tama teʻeki fanauʻi. ʻOku ʻikai ko ha fakatuʻutāmaki eni pe ko e tupu mei ha fakafeangai fakanatula ʻa e sino fakaetangatá. Mei he taimi ʻo e feitamaʻí, ko ha kiʻi tama ʻoku ʻikai ko ha konga pē ia ʻo e sino ʻo e faʻeé. Ko e kiʻi tamá ko ha tokotaha mavahe ia.

▸ Vahe 13, pal. 5

Ko e founga fakafaitoʻo eni ʻa ia ʻoku huhu ai ʻa e toto kakató pe taha ʻo hono ngaahi konga tefito ʻe faá ki he sino ʻo ha tokotaha mei ha tokotaha kehe pe mei ha toto kuo tuku tauhi. Ko e konga tefito ʻe fā ʻo e totó ko e pelesimā, sela toto kulokula, sela toto hinehina, mo e peletileti.

▸ Vahe 13, pal. 13

ʻI he Tohi Tapú, ko e foʻi lea ki he “akonaki” ʻoku ʻikai ko ha toe foʻi lea pē ia ʻe taha ki he tauteá. ʻI he taimi ʻoku akonakiʻi ai kitautolú, ʻoku fakahinohinoʻi, akoʻi, mo fakatonutonu ai kitautolu. Ko Sihová ʻoku ʻikai ʻaupito ke ne ngaohikoviʻi pe anga-fakamamahi ki he faʻahinga ʻokú ne akonakiʻí. (Palōveepi 4:1, 2) ʻOku fokotuʻu ʻe Sihova ha faʻifaʻitakiʻanga fakaʻofoʻofa ki he ngaahi mātuʻá. Ko e akonaki ʻokú ne faí ʻoku mātuʻaki ola lelei ʻo hoko moʻoni ai ha tokotaha ʻo ʻofa ʻi he akonakí. (Palōveepi 12:1) ʻOku ʻofa ʻa Sihova ʻi hono kakaí, pea ʻokú ne akoʻi kinautolu. ʻOkú ne ʻoange kiate kinautolu ʻa e fakahinohino ke fakatonutonu ʻa e ngaahi fakakaukau halá pea tokoniʻi ai kinautolu ke nau ako ke fakakaukau mo tōʻongaʻaki ha founga ʻoku fakahōifua kiate ia. Ki he ngaahi mātuʻá, ʻoku kau ʻi he akonakí ʻa hono tokoniʻi ʻenau fānaú ke nau mahinoʻi ʻa e ngaahi ʻuhinga ʻoku totonu ai ke nau talangofuá. ʻOku toe ʻuhinga iá ko hono akoʻi kinautolu ke nau ʻofa kia Sihova, pea ke nau ʻofa foki ʻi heʻene Folofolá, ʻa e Tohi Tapú, pea mahinoʻi ʻa hono ngaahi tefitoʻi moʻoní.

▸ Vahe 14, pal. 13

ʻOku nau taʻehāmai, ko e ngaahi meʻamoʻui laumālie fulikivanu ʻoku nau maʻu ʻa e ngaahi mālohi mahulu hake ʻi natula. Ko e fanga tēmenioó ko e kau ʻāngelo fulikivanu kinautolu. Naʻa nau hoko ʻo fulikivanu ʻi heʻenau ʻai kinautolu ko e ngaahi fili ʻo e ʻOtuá ʻi heʻenau talangataʻa kiate iá. (Sēnesi 6:2; Sute 6) Naʻa nau kau ʻi he angatuʻu ʻa Sētane kia Sihová.​—Teutalōnome 32:17; Luke 8:30; Ngāue 16:16; Sēmisi 2:19.

▸ Vahe 16, pal. 4