LĒSONI 18
Founga ke ʻIloʻi Ai ʻa e Kau Kalisitiane Moʻoní
ʻOku pehē ʻe he laui piliona ʻo e kakaí ko e kau Kalisitiane kinautolu. Ka ʻoku ʻikai te nau maʻu kotoa ʻa e tui tatau pe ʻikai moʻuiʻaki ʻa e tuʻunga fakaeʻulungaanga tatau. Ko ia, ʻe lava fēfē ke tau ʻiloʻi ʻa e kau Kalisitiane moʻoní?
1. Ko e hā ʻa e Kalisitiane?
Ko e kau Kalisitiané ko e kau ākonga pe kau muimui ʻo Sīsū Kalaisi. (Lau ʻa e Ngāue 11:26.) ʻOku anga-fēfē ʻenau fakamoʻoniʻi ko e kau ākonga kinautolu ʻa Sīsū Kalaisi? Naʻá ne pehē: “Kapau te mou nofo maʻu ʻi heʻeku leá, ko e moʻoni ko e kau ākonga kimoutolu ʻaʻaku.” (Sione 8:31) ʻOku ʻuhinga ení ko e kau Kalisitiane moʻoní kuo pau ke nau talangofua ki he ngaahi akonaki ʻa Sīsuú. Naʻe akoʻi maʻu pē ʻe Sīsū ʻa e meʻa ʻoku leaʻaki ʻe he Tohi Tapú. Ko e faʻahinga ʻoku muimui moʻoni kiate iá ʻoku nau fai ʻa e meʻa tatau.—Lau ʻa e Luke 24:27.
2. ʻI he founga fē ʻoku fakahaaʻi ai ʻe he kau Kalisitiane moʻoní ʻa e ʻofá?
Naʻe tala ange ʻe Sīsū ki heʻene kau muimuí: “Ke mou feʻofaʻaki ʻo hangē tofu pē ko ʻeku ʻofaʻi kimoutolú.” (Sione 15:12) Naʻe anga-fēfē hono fakahaaʻi ʻe Sīsū naʻá ne ʻofa ki heʻene kau ākongá? Naʻá ne fakamoleki ʻa e taimi mo kinautolu, fakalototoʻaʻi kinautolu mo tokoniʻi kinautolu. Pea aʻu ʻo ne foaki ʻene moʻuí maʻa kinautolu. (1 Sione 3:16) ʻI he tuʻunga meimei tatau, ko e kau Kalisitiane moʻoní ʻoku nau fai ʻa e meʻa lahi ange ʻi hono akoʻi pē ʻa e ʻofá. ʻOku nau fakahaaʻi ʻi heʻenau leá mo ʻenau ngāué ʻoku nau feʻofaʻaki.
3. Ko e hā ʻa e ngāue ʻoku femoʻuekina ai ʻa e kau Kalisitiane moʻoní?
Naʻe ʻoange ʻe Sīsū ʻa e ngāue ki heʻene kau ākongá. “Naʻá ne fekauʻi atu kinautolu ke nau malangaʻi ʻa e Puleʻanga ʻo e ʻOtuá.” (Luke 9:2) Naʻe malanga ʻa e muʻaki kau Kalisitiané ʻo ʻikai ngata pē ʻi honau feituʻu faiʻanga lotú, kae toe pehē ki he feituʻu ʻe maʻu ai ʻa e kakaí pea ʻi honau ngaahi ʻapí. (Lau ʻa e Ngāue 5:42; 17:17.) ʻOku fai ʻa e kau Kalisitiane moʻoni he ʻaho ní ʻa e meʻa tatau ʻi hono malangaʻi ʻa e moʻoni ʻo e Tohi Tapú ʻi ha feituʻu pē ʻoku ʻi ai ha kakai. ʻOku nau ʻofa ki he kakaí, ko ia ʻoku nau fiefia ʻi hono ngāueʻaki honau taimí mo e iví ke vahevahe ʻa e pōpoaki ʻo e ʻamanaki mo e fakafiemālie mei he Tohi Tapú.—Maʻake 12:31.
KELI LOLOTO ANGE
Fakakaukau ki he meʻa ʻokú ne ʻai ʻo kehe ai ʻa e kau Kalisitiane moʻoní mei he kakai ʻoku ʻikai ke nau muimui ki he akonaki mo e faʻifaʻitakiʻanga ʻa Sīsuú.
4. ʻOku nau fekumi ki he moʻoni ʻo e Tohi Tapú
Naʻe fakamahuʻingaʻi ʻe he muʻaki kau Kalisitiané ʻa e Folofola ʻa e ʻOtuá
ʻOku ʻikai ko e taha kotoa ʻokú ne taku ko ha Kalisitiane ʻokú ne fakamahuʻingaʻi ʻa e moʻoni ʻo e Tohi Tapú. Huluʻi ʻa e VITIOÓ, pea lāulea leva ki he fehuʻi hokó.
Ko e hā kuo fai ʻe he ngaahi lotu ʻe niʻihi ʻoku nau taku ko e kau Kalisitiane kinautolú ke taʻofi ʻa e kakaí mei hono ako ʻa e meʻa naʻe akoʻi ʻe Sīsuú?
Naʻe akoʻi ʻe Sīsū ʻa e moʻoni mei he Folofola ʻa e ʻOtuá. Lau ʻa e Sione 18:37, pea lāulea leva ki he fehuʻi ko ení:
Fakatatau kia Sīsū, ʻe lava fēfē ke tau ʻiloʻi ʻa e kau Kalisitiane “ʻoku kau ki he moʻoní”?
5. ʻOku nau malangaʻi ʻa e moʻoni ʻo e Tohi Tapú
Naʻe malanga ʻa e muʻaki kau Kalisitiané ki he niʻihi kehé
Ki muʻa ke hāʻele hake ʻa Sīsū ki hēvaní, naʻá ne ʻoange ki hono kau muimuí ha ngāue ʻoku nau kei fai pē he ʻahó ni. Lau ʻa e Mātiu 28:19, 20 mo e Ngāue 1:8, pea lāulea leva ki he fehuʻi ko ení:
Ko e hā hono lahi ʻe aʻu ki ai hono fai ʻa e ngāue fakamalangá?
6. ʻOku nau ngāueʻaki ʻa e meʻa ʻoku nau malangaʻí
Ko e hā naʻá ne fakatuipauʻi ha tangata ko Tom kuó ne maʻu ʻa e lotu moʻoní? Huluʻi ʻa e VITIOÓ, pea lāulea leva ki he ongo fehuʻi hokó.
ʻI he vitioó, ko e hā naʻá ne ʻai ʻa Tom ke ʻikai toe fie kau ki ha lotú?
Ko e hā ʻokú ne tuipau ai kuó ne maʻu ʻa e moʻoní?
Kapau ʻoku taku ʻe ha taha ʻokú ne muimui kia Sīsū, kuo pau ke ne fakahaaʻi ia ʻi heʻene ngaahi ngāué. Lau ʻa e Mātiu 7:21, pea lāulea leva ki he fehuʻi ko ení:
Fakatatau kia Sīsuú, ko e hā ʻoku ʻikai feʻunga ai pē ke pehē ʻoku tau muimui kiate iá?
7. ʻOku nau feʻofaʻaki
Naʻe feʻofaʻaki ʻa e muʻaki kau Kalisitiané
Kuo ʻai moʻoni ʻe he kau Kalisitiané ʻenau moʻuí ke ʻi ha tuʻunga fakatuʻutāmaki maʻa honau kaungā-Kalisitiané? Huluʻi ʻa e VITIOÓ, pea lāulea leva ki he ongo fehuʻi hokó.
ʻI he vitioó, ko e hā naʻá ne ueʻi ʻa Tokoua Lloyd ke tuku ʻene moʻuí ke ʻi ha tuʻunga fakatuʻutāmaki maʻa Tokoua Johansson?
ʻOkú ke pehē naʻe fakahaaʻi ʻe heʻene tōʻongá ko ha Kalisitiane moʻoni ia?
Lau ʻa e Sione 13:34, 35, pea lāulea leva ki he ongo fehuʻi ko ení:
ʻOku anga-fēfē ʻa e fakafeangai ʻa e kau ākonga ʻa Sīsuú (kau Kalisitiane moʻoní) ki he kakai ʻo e matakali kehé?
ʻI he lolotonga ʻo ha tau, ʻe ueʻi ʻe he ʻofá ʻa e Kalisitiané ke ne fai ʻa e hā?
ʻOKU PEHĒ ʻE HE NIʻIHI: “ʻOku lotu ʻa e kau Kalisitiane kotoa ki he ʻOtua tatau, tatau ai pē pe ko e hā ʻa e siasi ʻoku nau kau ki aí.”
Ko e hā ha konga Tohi Tapu ʻe lava ke ke ngāueʻaki ke fakamoʻoniʻi pe ko hai ʻa e kau Kalisitiane moʻoní?
FAKANOUNOU
Ko e kau Kalisitiane moʻoní ʻoku nau talangofua ki he ngaahi akonaki ʻa e Tohi Tapú, fakahaaʻi ʻa e ʻofa feilaulauʻi-kitá, pea malangaʻi ʻa e moʻoni ʻo e Tohi Tapú.
Fakamanatu
ʻOku makatuʻunga ʻi he hā ʻa e ngaahi tui ʻo e kau Kalisitiane moʻoní?
Ko e hā ʻa e ʻulungaanga ʻoku ʻiloʻiʻaki ʻa e kau Kalisitiane moʻoní?
Ko e hā ʻa e ngāue ʻoku fai ʻe he kau Kalisitiane moʻoní?
AKO LAHI ANGE
Ako lahi ange ki ha kakai ʻoku nau fai honau lelei tahá ke muimui ki he faʻifaʻitakiʻanga mo e ngaahi akonaki ʻa Sīsū Kalaisí.
Sio ki he meʻa naʻá ne ʻai ha tāupoʻou ki muʻa ke ne maʻu ʻa e fāmili fakalaumālie moʻoní.
“Naʻa Nau Ngāueʻaki ʻa e Tohi Tapú ke Tali ʻa e Fehuʻi Kotoa Pē!” (Ko e Taua Leʻo, Mē 1, 2014)
Ako ki he founga hono fakahāhā ʻe he kau Kalisitiane moʻoní ʻa e ʻofa ki honau kaungālotu ʻoku fiemaʻu tokoní.
Konga mei he—Tokoniʻi Hotau Fanga Tokouá ʻi he Tō ha Fakatamaki (3:58)
Sio angé ki he founga ʻoku fakahoko ai ʻe he kau muimui moʻoni ʻo Sīsū he ʻaho ní ʻa e meʻa tatau mo ia naʻe fai ʻe he muʻaki kau Kalisitiané, pea ko e meʻa ia naʻe pehē ʻe Sīsū ʻe ʻiloʻiʻaki ʻene kau muimuí.
“Ko e Hā ʻa e Fakaʻilonga ʻo e Lotu Faka-Kalisitiane Moʻoní?” (Toʻo mei he Ko e Taua Leʻo)