ʻOfa mo e Fakamaau Totonu ʻi ʻIsileli ʻo e Kuonga Muʻá (Konga 1 ʻo e 4)

1-2. (a) Ko e hā ʻoku tau loto kotoa ke maʻú? (e) Ko e hā ʻe lava ke tau fakapapauʻí?

ʻOKU tau loto kotoa ke ʻofaʻi kitautolu. Pea ko kitautolu kotoa ʻoku tau loto ke fai mai ha fakafeangai totonu. Kapau ʻe hokohoko hono ʻikai ke fakahaaʻi mai ʻa e ʻofá mo e fakamaau totonú, te tau ongoʻi taʻeʻaonga nai mo tuēnoa.

² ʻOku ʻiloʻi ʻe Sihova ʻoku tau fakaʻamua ʻa e ʻofá pea hoholi ki he fakamaau totonú. (Saame 33:5) ʻOku lava ke tau fakapapauʻi ʻoku ʻofa lahi hotau ʻOtuá ʻiate kitautolu pea ʻokú ne loto ke fakafeangai totonu mai ʻa e niʻihi kehé kiate kitautolu. ʻOku hā mahino eni ʻi heʻetau sivisiviʻi ofi ʻa e Lao naʻe ʻoange ʻe Sihova ki he puleʻanga ʻIsilelí fakafou ʻia Mōsese. Kapau ʻokú ke ongoʻi lōmekina koeʻuhi kuo ʻikai fakafeangai atu ʻa e niʻihi kehé ʻi he ʻofa mo e fakamaau totonu, fakakaukau angé ki he anga hono fakahaaʻi mai ʻe he Lao ʻa Mōseséb ʻa e tokanga ʻa Sihova ki heʻene kakaí.

 3. (a) Hangē ko ia ʻoku fakamatalaʻi ʻi he Loma 13:8-10, ko e hā ʻoku tau ʻiloʻi ʻi he taimi ʻoku tau ako ai ʻa e Lao ʻa Mōsesé? (e) Ko e hā ʻa e ngaahi fehuʻi ʻe tali ʻi he kupu ko ení?

³ ʻI he taimi ʻoku tau ako ai ʻa e Lao ʻa Mōsesé, ʻoku tau ʻiloʻi ʻa e ngaahi ongoʻi māfana ʻa hotau ʻOtua ʻofá, ʻa Sihova. (Lau ʻa e Loma 13:8-10.) ʻI he kupu ko ení, te tau sivisiviʻi ʻa e niʻihi ʻo e ngaahi lao naʻe ʻoange ki ʻIsilelí pea tali ʻa e ngaahi fehuʻi ko ení: Ko e hā ʻoku lava ai ke tau pehē naʻe faʻu ʻa e Laó makatuʻunga ʻi he ʻofá? Ko e hā ʻoku lava ai ke tau pehē naʻe pouaki ʻe he Laó ʻa e fakamaau totonú? Naʻe anga-fēfē fiemaʻu ki he kau maʻu mafaí ke ngāueʻaki ʻa e Laó? Pea ko hai naʻe tautefito hono maluʻi ʻe he Laó? Ko e tali ki he ngaahi fehuʻi ko iá ʻe lava ke ʻomai ai ha fakafiemālie, ʻomai ha ʻamanaki pea tohoakiʻi kitautolu ke toe ofi ange ki heʻetau Tamai ʻofá.​—Ngā. 17:27; Loma 15:4.

 4. (a) Ko e hā ʻoku lava ai ke tau pehē ko e Lao ʻa Mōsesé naʻe faʻu makatuʻunga ʻi he ʻofa? (e) Hangē ko ia ʻoku hiki ʻi he Mātiu 22:36-40, ko e hā ʻa e fekau naʻe fakamamafaʻi ʻe Sīsuú?

⁴ ʻOku lava ke tau pehē ko e Lao ʻa Mōsesé naʻe faʻu ia makatuʻunga ʻi he ʻofa koeʻuhí ko e ʻofá ʻokú ne tākiekina ʻa e meʻa kotoa ʻoku fai ʻe Sihová. (1 Sio. 4:8) Naʻe fakatefito ʻe Sihova ʻa e ngaahi tuʻutuʻuni kotoa ʻi he laó ʻi ha fekau tefito ʻe ua​—ko e ʻofa ki he ʻOtuá mo e ʻofa ki ho kaungāʻapí. (Liv. 19:18; Teu. 6:5; lau ʻa e Mātiu 22:36-40.) Ko ia ʻoku lava ke tau ʻamanekina ko e fekau taki taha ʻi he fekau laka hake ʻi he 600 naʻe faʻuʻaki ʻa e Laó ʻoku fakahaaʻi ai ha tafaʻaki ʻo e ʻofa ʻa Sihová. Tau vakai angé ki ha ngaahi fakatātā.

5-6. Ko e hā ʻoku finangalo ʻa Sihova ke fai ʻe he ongo meʻa malí, pea ko e hā ʻoku lāuʻilo ki ai ʻa Sihová? ʻOmai ha fakatātā.

⁵ Hoko ʻo mateaki ki ho hoa malí, pea tokangaʻi hoʻo fānaú. ʻOku finangalo ʻa Sihova ki he ongo meʻa malí ke na fakatupulekina ʻa e ʻofa mālohi ʻe lava ke tuʻuloa. (Sēn. 2:24; Māt. 19:3-6) Ko e tonó ʻa e taha ʻo e hia taʻeʻofa taha ʻe lava ke fakahoko ʻe ha tokotaha. ʻI ha ʻuhinga lelei, ko e fekau hono fitu ʻi he Fekau ʻe Hongofulú naʻe tapui ai ʻa e tonó. (Teu. 5:18) Ko ha faiangahala ia “ki he ʻOtuá” pea ko e tā ia ʻoku oʻo ki ha hoa mali. (Sēn. 39:7-9) Ko ha taha ʻoku maʻukovia ʻi he tonó te ne ongoʻi nai ʻa e mamahi hono lavakiʻi iá ʻi ha laui hongofuluʻi taʻu.

⁶ ʻOku lāuʻilo lelei ʻa Sihova ki he anga ʻo e fefakafeangaiʻaki ʻa e ongo meʻa malí. Naʻe tautefito ʻene loto ke fakafeangai lelei ki he ngaahi uaifi ʻIsilelí. Ko ha husepāniti naʻá ne fakaʻapaʻapaʻi ʻa e Laó te ne ʻofa ʻi hono uaifí pea heʻikai te ne veteʻi ia ʻi ha ngaahi ʻuhinga launoa. (Teu. 24:1-4; Māt. 19:3, 8) Ka ʻo kapau ʻe malanga hake ha palopalema mafatukituki peá ne veteʻi hono uaifí, kuo pau ke ne ʻoange kiate ia ha tohi vete. Naʻe maluʻi ʻe he tohi ko ení ha fefine mei hano tukuakiʻi hala ki he ʻulungaanga taʻetāú. Pehē foki, ki muʻa ke lava ʻo ʻoange ʻe he husepānití ʻa e tohi veté ki hono uaifí, naʻe pau ke ne kumi tokoni ki he kau mātuʻa ʻo e koló. ʻI he foungá ni, ʻe maʻu ai ʻe he kau mātuʻá ha faingamālie ke feinga ke tokoni ki he ongo meʻa malí ke fakahaofi ʻena nofo malí. ʻI hano veteʻi ʻe ha tangata ʻIsileli hono uaifí ʻi ha ʻuhinga siokita, naʻe ʻikai maʻu pē ke kau mai ʻa Sihova ki ai. Kae kehe, naʻá ne vakai ki he loʻimata ʻo e uaifí, pea naʻá ne ongoʻi ʻa ʻene mamahí.​—Mal. 2:13-16.

7-8. (a) Ko e hā naʻe fekauʻi ʻe Sihova ki he ngaahi mātuʻá ke nau faí? (Sio ki he fakatātā ʻi he takafí.) (e) Ko e hā ʻa e lēsoni ʻoku tau akó?

⁷ ʻOku toe fakahaaʻi ʻi he Laó ʻoku tokanga lahi mai ʻa Sihova fekauʻaki mo e lelei ʻa e fānaú. Naʻe fekauʻi ʻe Sihova ki he ngaahi mātuʻá ke ʻikai ngata pē ʻenau tokonaki ʻa e ngaahi fiemaʻu fakamatelie ʻa e fānaú kae pehē foki ki heʻenau fiemaʻu fakalaumālié. Naʻe fiemaʻu ke ngāueʻaki ʻe he ngaahi mātuʻá ʻa e faingamālie kotoa pē ke tokoniʻi ʻenau fānaú ke nau houngaʻia ʻi he Lao ʻa Sihová pea ako ke ʻofa kiate ia. (Teu. 6:6-9; 7:13) Ko e taha ʻo e ngaahi ʻuhinga naʻe tauteaʻi ai ʻe Sihova ʻa e kau ʻIsilelí koeʻuhí naʻa nau ngaohikoviʻi ʻa e niʻihi ʻenau fānaú ʻi ha founga fakalilifu. (Sel. 7:31, 33) Naʻe pau ke vakai ʻa e ngaahi mātuʻá ki he fānaú, ʻo ʻikai ko ha meʻa pē ʻe lava ke liʻaki pe ngaohikoviʻi, ka ko ha tofiʻa, ko ha meʻaʻofa meia Sihova ke koloaʻaki.​—Saame 127:3.

⁸ Lēsoní: ʻOku lāuʻilo ʻa Sihova ki he anga ʻo e fefakafeangaiʻaki ʻa e ongo meʻa malí. Ko hono finangaló ke ʻofa ʻa e ngaahi mātuʻá ʻi heʻenau fānaú, pea ʻe fai ʻe he ngaahi mātuʻá ha fakamatala ki he founga ʻo ʻenau fakafeangai ki heʻenau fānaú.

9-11. Ko e hā naʻe ʻomai ai ʻe Sihova ʻa e lao ke tapui ʻa e mānumanú?

⁹ ʻOua ʻe mānumanu. Ko e fekau fakaʻosi ʻi he Fekau ʻe Hongofulú naʻe tapui ai ʻa e mānumanú, pe ko hono fakatupulekina ha holi fehālaaki ki he koloa ʻa ha taha kehe. (Teu. 5:21; Loma 7:7) Naʻe ʻoange ʻe Sihova ʻa e lao ko ení ke akoʻi ha lēsoni mahuʻinga​—ko hono kakaí kuo pau ke nau maluʻi honau lotó, ʻa ia, ko ʻenau fakakaukaú, ongoʻí mo e ngaahi fakaʻuhingá. ʻOkú ne ʻiloʻi ko e ngaahi tōʻonga fulikivanú ʻoku kamata ia mei he ngaahi fakakaukau mo e ngaahi ongoʻi fulikivanu. (Pal. 4:23) Kapau naʻe fakaʻatā ʻe ha ʻIsileli ha holi fehālaaki ke tupu ʻi hono lotó, ngalingali te ne fakafeangai taʻeʻofa ki he niʻihi kehé. Ko e fakatātaá, ko Tuʻi Tēvita, naʻá ne tō ʻi he tauhele ko iá. Ko hono moʻoní, ko ha tangata lelei ia. Ka ʻi he taimi ʻe taha, naʻá ne mānumanu ki he uaifi ʻo ha tangata kehe. Ko ʻene holí naʻe taki atu ki ha angahala. (Sēm. 1:14, 15) Naʻe fai ʻe Tēvita ha tono, feinga ke kākaaʻi ʻa e husepāniti ʻo e fefiné, peá ne toki tāmateʻi ia.​—2 Sām. 11:2-4; 12:7-11.

¹⁰ Naʻe ʻiloʻi ʻe Sihova ʻa e taimi naʻe maumauʻi ai ʻe ha ʻIsileli ʻa e lao fekauʻaki mo e mānumanú​—ʻoku lava ke Ne ʻiloʻi ʻa e meʻa ʻoku ʻi he lotó. (1 Kal. 28:9) Ko e lao fekauʻaki mo e mānumanú naʻe tala ai ki heʻene kakaí naʻe totonu ke nau fakaʻehiʻehi mei he ngaahi fakakaukau ʻe taki atu ki ha tōʻonga kovi. He Tamai poto mo ʻofa ē ka ko Sihova!

¹¹ Lēsoní: ʻOku sio fakalaka atu ʻa Sihova ʻi he fōtunga hā mai pē ʻo ha tokotaha. ʻOkú ne sio ki hotau tuʻunga moʻoni ʻi lotó, ʻa hotau lotó. (1 Sām. 16:7) ʻOku ʻikai ha fakakaukau, ongoʻi pe tōʻonga ʻe lava ke puli meiate ia. ʻOkú ne kumi ki he lelei ʻiate kitautolú pea loto ke tau fakatupulekina ia. Ka ʻokú ne loto ke tau ʻiloʻi pea mapuleʻi ʻa e ngaahi fakakaukau fehālaakí ki muʻa ke tau fakahoko ha ngaahi tōʻonga kovi.​—2 Kal. 16:9; Māt. 5:27-30.

12. Ko e hā naʻe fakamamafaʻi ʻe he Lao ʻa Mōsesé?

¹² Naʻe toe fakamamafaʻi ʻe he Lao ʻa Mōsesé ʻa e ʻofa ʻa Sihova ʻi he fakamaau totonú. (Saame 37:28; ʻAi. 61:8) Naʻá ne fokotuʻu mai ʻa e faʻifaʻitakiʻanga haohaoa ʻo e founga ke fakafeangai totonu ai ki he niʻihi kehé. ʻI he talangofua ʻa e kau ʻIsilelí ki he lao naʻe ʻoange ʻe Sihová, naʻá ne tāpuakiʻi kinautolu. ʻI heʻenau tukunoaʻi ʻene ngaahi tuʻunga fakamaau totonu mo māʻoniʻoní, naʻa nau faingataʻaʻia. Fakakaukau ki ha toe lao ʻe ua mei he Fekau ʻe Hongofulú.

13-14. Ko e hā naʻe fiemaʻu ʻi he ʻuluaki fekau ʻe ua ʻi he Fekau ʻe Hongofulú, pea naʻe maʻu ʻaonga fēfē ʻa e kau ʻIsilelí mei he talangofua ki he ongo lao ko iá?

¹³ Lotu kia Sihova toko taha pē. Ko e ʻuluaki fekau ʻe ua ʻi he Fekau ʻe Hongofulú naʻe fiemaʻu ai mei he kau ʻIsilelí ʻa e anga-līʻoa maʻataʻatā kia Sihova pea fakatokanga fekauʻaki mo e lotu ki he ngaahi ʻaitolí. (ʻEki. 20:3-6) Ko e ngaahi fekau ko iá naʻe ʻikai ko e ʻai ke maʻu ʻaonga mei ai ʻa Sihova. ʻI hono kehé, ko e ʻaonga pē maʻa hono kakaí. ʻI he nofoʻaki mateaki ʻa ʻene kakaí kiate iá, naʻa nau lakalakaimonū. ʻI heʻenau lotu ki he ngaahi ʻotua ʻo e ngaahi puleʻanga kehé, naʻa nau faingataʻaʻia.

¹⁴ Fakakaukau fekauʻaki mo e kau Kēnaní. Naʻa nau lotu ki he ngaahi ʻaitoli ʻoku ʻikai moʻui kae ʻikai ki he ʻOtua moʻoni mo moʻuí. Ko hono olá, naʻa nau tuku hifo ai honau ngeiá. (Saame 115:4-8) Ko e konga ʻenau lotú, naʻa nau fai ha ngaahi meʻa fakalielia fakaefehokotaki fakasino mo fakalilifu ʻi hono feilaulauʻaki ʻa e fānaú. Pehē foki, ʻi he taimi naʻe tukunoaʻi ai ʻe he kau ʻIsilelí ʻa Sihová pea fili ke lotu ki he ngaahi ʻaitolí, naʻa nau tuku hifo ai honau ngeiá pea fakamamahiʻi honau fāmilí. (2 Kal. 28:1-4) Ko e faʻahinga maʻu mafaí naʻa nau talitekeʻi ʻa e ngaahi tuʻunga ʻa Sihova ki he fakamaau totonú. Naʻa nau ngāuehalaʻaki honau mafaí pea lōmekina ʻa e vaivaí mo e faʻahinga ʻikai hanau maluʻí. (ʻIsi. 34:1-4) Naʻe fakatokanga ʻa Sihova ki he kau ʻIsilelí te ne fakamāuʻi ʻa e faʻahinga naʻa nau ngaohikoviʻi ʻa e kau fefine mo e fānau ne ʻikai hanau maluʻí. (Teu. 10:17, 18; 27:19) ʻI hono kehé, naʻe tāpuakiʻi ʻe Sihova ʻene kakaí ʻi he taimi naʻa nau mateaki ai kiate ia pea fefakafeangaiʻaki totonú.​—1 Tuʻi 10:4-9.

15. Ko e hā ʻa e lēsoni ʻoku tau ako fekauʻaki mo Sihová?

¹⁵ Lēsoní: ʻOku ʻikai totonu ke tukuakiʻi ʻa Sihova ʻi hono talitekeʻi ʻe he faʻahinga ʻoku nau taku ʻoku nau tauhi kiate iá ʻene ngaahi tuʻungá pea fakamamahiʻi ʻene kakaí. Kae kehe, ʻoku ʻofa ʻa Sihova ʻiate kitautolu pea ʻiloʻi ʻa e taimi ʻoku tau faingataʻaʻia ai ʻi he fakamaau taʻetotonú. ʻOkú ne ongoʻi ʻetau mamahí ʻo lahi ange ia ʻi he ongoʻi ʻa ha faʻē ʻi he faingataʻaʻia ʻene pēpeé. (ʻAi. 49:15) Neongo heʻikai nai tokoni mai ʻa Sihova ʻi he taimi pē ko iá, ka ʻi heʻene taimi kotofá te ne fakamāuʻi ʻa e kau faihala taʻefakatomalá ki he anga ʻo ʻenau fakafeangai ki he niʻihi kehé.

16-18. Ko e hā ʻa e ngaahi tafaʻaki ʻoku ngāueʻaki ki ai ʻa e Lao ʻa Mōsesé, pea ko e hā ʻa e lēsoni ʻoku tau akó?

¹⁶ Naʻe kāpui ʻe he Lao ʻa Mōsesé ʻa e ngaahi tafaʻaki lahi ʻo e moʻui ʻa ha ʻIsileli, ko ia naʻe mātuʻaki mahuʻinga ki he kau tangata taʻumotuʻa kuo fakanofó ke fakamāuʻi ʻa e kakai ʻa Sihová ʻi he māʻoniʻoni. Naʻe fakafatongiaʻaki kinautolu ʻo ʻikai ko hono tokangaʻi pē ʻa e ngaahi meʻa fakalaumālié kae pehē foki ki he ngaahi fakafekiki mo e ngaahi faihia. Fakatokangaʻi ʻa e ngaahi fakatātā ko ení.

¹⁷ Kapau naʻe tāmateʻi ʻe ha ʻIsileli ha tokotaha, naʻe ʻikai tāmateʻi ia he taimi pē ko iá. ʻE sivisiviʻi ʻe he kau mātuʻa ʻi hono koló ʻa e ngaahi tuʻungá ki muʻa ke fili pe naʻe tuha mo e tautea maté. (Teu. 19:2-7, 11-13) Naʻe toe fakamāuʻi ʻe he kau mātuʻá ʻa e ngaahi tafaʻaki kehekehe ʻo e moʻui fakaʻahó​—mei he ngaahi fakafekiki fekauʻaki mo e koloá ʻo aʻu ki he fekīhiaki ʻi he nofo malí. (ʻEki. 21:35; Teu. 22:13-19) ʻI he taimi naʻe fakamaau totonu ai ʻa e kau mātuʻá pea talangofua ʻa e kau ʻIsilelí ki he Laó, naʻe maʻu ʻaonga ʻa e tokotaha kotoa, pea ko e puleʻangá naʻa nau ʻave ʻa e lāngilangí kia Sihova.​—Liv. 20:7, 8; ʻAi. 48:17, 18.

¹⁸ Lēsoní: Ko e tafaʻaki kotoa ʻetau moʻuí ʻoku mahuʻinga kia Sihova. ʻOkú ne loto ke tau fakamaau totonu pea anga-ʻofa ʻi heʻetau fakafeangai ki he niʻihi kehé. Pea ʻokú ne ʻiloʻi ʻa e meʻa ʻoku tau leaʻaki mo faí, naʻa mo ʻete toko taha ʻi hoto ʻapí.​—Hep. 4:13.

19-21. (a) Naʻe totonu ke fēfē ʻa e fakafeangai ʻa e kau mātuʻá mo e kau fakamāú ki he kakai ʻa e ʻOtuá? (e) Naʻe anga-fēfē hono maluʻi ʻe he Lao ʻa Mōsesé ʻa e kakaí, pea ko e hā ʻa e lēsoni ʻoku tau akó?

¹⁹ Naʻe loto ʻa Sihova ke ne fakahaofi ʻa ʻene kakaí mei he tākiekina fakameleʻi ʻa e ngaahi puleʻanga kaungāʻapí. Ko ia naʻá ne fiemaʻu ke ngāueʻaki taʻefilifilimānako ʻe he kau mātuʻá mo e kau fakamāú ʻa e Laó. Neongo ia, ko e faʻahinga ko ia naʻa nau fai ʻa e fakamāú naʻe fiemaʻu ke ʻoua te nau fakafeangai anga-fefeka ki heʻene kakaí. ʻI hono kehé, naʻe fiemaʻu ke nau ʻofa ki he fakamaau totonú.​—Teu. 1:13-17; 16:18-20.

²⁰ Naʻe manavaʻofa ʻa Sihova ki heʻene kakaí, ko ia naʻá ne fokotuʻu ʻa e laó ke maluʻi fakafoʻituitui kinautolu mei hano ngaohikoviʻi taʻetotonu. Ko e fakatātaá, naʻe fakangatangata ʻe he Laó ʻa e malava ke tukuakiʻi loi ha taha ki ha faihia. Ko e tokotaha ne tukuakiʻí naʻá ne maʻu ha totonu ke ʻilo pe ko hai naʻá ne tukuakiʻi iá. (Teu. 19:16-19; 25:1) Pea ki muʻa ke fakahalaiaʻi iá, naʻe fiemaʻu ki ha fakamoʻoni ʻe toko ua pe lahi ange ke nau ʻoatu ʻa e fakamoʻoní. (Teu. 17:6; 19:15) Kae fēfē ha ʻIsileli naʻá ne fai ha hia pea ko e toko taha pē naʻe sio ki aí? Heʻikai lava ke pehē te ne hao mei heʻene faihalá. Naʻe ʻafioʻi ʻe Sihova ʻa e meʻa naʻá ne faí. ʻI he fāmilí, naʻe ʻoange ki he ngaahi tamaí ʻa e mafai, ka ko e mafai ko iá ʻoku fakangatangata. ʻI he ngaahi fakakikihi ʻe niʻihi ʻa e fāmilí, ko e kau mātuʻa ʻo e koló naʻa nau maʻu ʻa e fatongia ke fai ʻa e fili aofangatukú.​—Teu. 21:18-21.

²¹ Lēsoní: ʻOku fokotuʻu mai ʻe Sihova ʻa e faʻifaʻitakiʻanga haohaoá; ʻoku ʻikai te ne fai ha meʻa taʻetotonu. (Saame 9:7) ʻOkú ne fakapaleʻi ʻa e faʻahinga ko ia ʻoku nau pouaki mateaki ʻene ngaahi tuʻungá, ka ʻokú ne tauteaʻi ʻa e faʻahinga ʻoku nau ngāuehalaʻaki honau mafaí. (2 Sām. 22:21-23; ʻIsi. 9:9, 10) ʻOku tōʻonga fulikivanu nai ʻa e niʻihi pea hā ngali ʻoku nau hao ʻo ʻikai tauteaʻi, ka ʻi he fakapapauʻi ʻe Sihova ʻa e taimi totonú, te ne fakamāuʻi kinautolu. (Pal. 28:13) Pea kapau ʻoku ʻikai te nau fakatomala, ʻoku vavé ni ke nau ʻiloʻi “ko ha meʻa fakamanavahē ia ke tō ki he nima ʻo e ʻOtua moʻuí.”​—Hep. 10:30, 31.

22-24. (a) Ko hai naʻe tautefito hono maluʻi ʻe he Laó, pea ko e hā ʻoku tau ako fekauʻaki mo Sihová? (e) Ko e hā ʻa e fakatokanga ʻoku maʻu ʻi he ʻEkisoto 22:22-24?

²² Naʻe tautefito hono maluʻi ʻe he Laó ʻa e faʻahinga naʻe ʻikai lava ke nau maluʻi kinautolú, hangē ko e kau paeá, uitoú mo e kau mulí. Naʻe tala ki he kau fakamaau ʻi ʻIsilelí: “Kuo pau ke ʻoua naʻá ke pikoʻi ʻa e fakamaau ʻo e mulí pe ko e tamai-maté, pea kuo pau ke ʻoua naʻá ke faʻao ʻa e kofu ʻo ha uitou ko ha maluʻi ki ha nō.” (Teu. 24:17) Naʻe fakahāhā ʻe Sihova ʻa e mahuʻingaʻia fakafoʻituitui ʻi he faʻahinga naʻe ʻikai hanau tokoni ʻi he koló. Pea naʻá ne tauteaʻi ʻa e faʻahinga naʻa nau ngaohikoviʻi kinautolú.​—Lau ʻa e ʻEkisoto 22:22-24.

²³ Naʻe toe maluʻi ʻe he Laó ʻa e ngaahi mēmipa ʻo e fāmilí mei ha faʻahinga founga pē ʻo e hia fakamalaʻiá. (Liv. 18:6-30) ʻI he ʻikai hangē ko e kakai ʻo e ngaahi puleʻanga takatakai ʻi ʻIsilelí, ʻa ia naʻa nau makātakiʻi pe aʻu ʻo tali lelei ʻa e tōʻonga ko ení, ko e kakai ʻa Sihová naʻa nau vakai ki he faʻahinga hia ko ení ʻo hangē ko Sihová​—ko ha tōʻonga fakalielia ia.

²⁴ Lēsoní: ʻOku fiemaʻu ʻe Sihova ki he faʻahinga ʻokú ne fakanofo ki he ngaahi tuʻunga fua fatongiá ke nau mahuʻingaʻia anga-ʻofa ʻi he kotoa ʻo e faʻahinga ʻoku nau tokangaʻí. ʻOkú ne fehiʻa ʻi he hia fakamalaʻiá pea loto ke fakapapauʻi ko e faʻahinga kotoa tautautefito ki he faʻahinga ʻoku ʻikai hanau tokoní, ke nau maʻu ʻa e maluʻi mo e fakamaau totonu.

25-26. (a) Ko e hā ʻoku lava ai ke tau pehē ko e ʻofá mo e fakamaau totonú ʻoku hangē ko e mānavá mo e moʻuí? (e) Ko e hā te tau lāulea ki ai ʻi he kupu hono hoko ʻi he kupu hokohoko ko ení?

²⁵ Ko e ʻofá mo e fakamaau totonú ʻoku hangē ko e mānavá mo e moʻuí; ʻi he māmaní, ʻoku ʻikai lava ke na māvahevahe. ʻI heʻetau tuipau ʻoku fakafeangai totonu mai ʻa Sihova kiate kitautolú, ʻoku tupulaki ai ʻetau ʻofa kiate iá. Pea ʻi he taimi ʻoku tau ʻofa ai ki he ʻOtuá pea ʻofa ʻi heʻene ngaahi tuʻunga māʻoniʻoní, ʻoku ueʻi ai kitautolu ke ʻofa ki he niʻihi kehé pea fakafeangai totonu kiate kinautolu.

²⁶ Ko e fuakava Lao ʻa Mōsesé naʻá ne tauhi ke moʻui ʻa e vahaʻangatae ʻo Sihova mo e kau ʻIsilelí. Kae kehe, naʻe ngata ʻa e Laó hili hono fakakakato ʻe Sīsū ʻa e Laó, pea naʻe fetongi ia ʻaki ha meʻa naʻe lelei mamaʻo ange. (Loma 10:4) Naʻe fakamatalaʻi ʻe he ʻapositolo ko Paulá ʻa e Laó ko ha “ʻata pē ʻo e ngaahi meʻa lelei ka hoko maí.” (Hep. 10:1) Ko e kupu hono hoko ʻi he kupu hokohoko ko ení ʻe lāulea ai ki he niʻihi ʻo e ngaahi meʻa lelei ko iá pea mo e ngafa ʻo e ʻofá mo e fakamaau totonú ʻi he fakatahaʻanga Kalisitiané.