“Poto ʻo e ʻOtuá ʻa Ia ʻOku ʻi ha Fakalilolilo Toputapu”

1, 2. Ko e hā ʻa e “fakalilolilo toputapu” ʻoku totonu ke tau mahuʻingaʻia aí, pea ko e hā hono ʻuhingá?

FAKALILOLILO! Koeʻuhi ʻoku nau fakatupu fieʻilo, fakatoʻoaloto, mo fakatupu puputuʻu, ʻoku faʻa faingataʻa ai ki he faʻahinga ʻo e tangatá ke nau tauhi ia ke fakapulipuli. Kae kehe, ʻoku pehē ʻe he Tohitapú: “Ko e langilangi ʻo e ʻOtua ke fufū meʻa.” (Palōveepi 25:2) ʻIo, ʻi he tuʻunga ko e Pule Aoniu mo e Tokotaha-Fakatupú, ʻoku totonu ai ʻa hono tauhi ʻe Sihova ke fakalilolilo ha ngaahi meʻa mei he faʻahinga ʻo e tangatá kae ʻoua ke aʻu ki heʻene taimi kotofa ke fakahaaʻi ai kinautolú.

² Kae kehe, ʻoku ʻi ai ha fakalilolilo fakatoʻoaloto mo fakatupu fieʻilo kuo fakahaaʻi mai ʻe Sihova ʻi heʻene Folofolá. ʻOku ui ia ko e ‘fakalilolilo toputapu ʻo e finangalo [ʻo e ʻOtuá].’ (Efeso 1:9, NW) Ko e ako ki aí ʻoku malava ke ne fai ʻe ia ʻa e meʻa lahi ange ʻi hono fakatōliʻa pē hoʻo fieʻiló. Ko hono ʻiloʻi ʻa e fakalilolilo ko ʻení, ʻoku lava ke taki atu ia ki he fakamoʻuí pea malava ke ne tokonaki mai kiate koe ha fakamaama ki he poto taʻefakangatangata ʻo Sihová.

3, 4. Naʻe anga-fēfē hono tokonaki mai ʻe he kikite ʻoku lēkooti ʻi he Sēnesi 3:15 ha ʻamanakí, pea ko e hā ʻa e misiteli, pe “fakalilolilo toputapu” naʻe kātoi aí?

³ ʻI he taimi naʻe faiangahala ai ʻa ʻĀtama mo ʻIví, ne hā ngali ne afeʻi nai ai ʻa e taumuʻa ʻa Sihova ke ʻai ha māmani palataisi ke nofoʻi ʻe ha faʻahinga haohaoa ʻo e tangatá. Ka naʻe ngāue leva ʻa e ʻOtuá ki he palopalemá. Naʻá ne pehē: “Te u ʻai ke mo fetāufehiʻa ʻaki, ʻa koe [ko e ngatá] mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.”​—Senesi 3:15.

⁴ Ko e ngaahi lea fakapuputuʻu mo fakamisiteli ʻeni. Ko hai ʻa e fefine ko ʻení? Ko hai ʻa e ngatá? Ko hai ʻa e “hako” te ne laiki ʻa e ʻulu ʻo e ngatá? Naʻe malava pē ke fai hano fakamahaloʻi ia ʻe ʻĀtama mo ʻIvi. Kae kehe, naʻe ʻoange ʻe he ngaahi folofola ʻa e ʻOtuá ʻa e ʻamanaki ki ha taha pē ʻo e fānau loto-tōnunga ʻa e ongo meʻa taʻefaitōnunga ko iá. ʻE ikuna ʻa e māʻoniʻoní. ʻE fakahoko ʻa e taumuʻa ia ʻa Sihová. Ka ʻi he founga fē? ʻŌ, ko ha misiteli ia! ʻOku ui ia ʻe he Tohitapú ko e “poto ʻo e ʻOtuá ʻa ia ʻoku ʻi ha fakalilolilo toputapú, ʻa e poto fufū.”​—1 Kolinito 2:7, NW.

 5. Fakatātaaʻi ʻa e ʻuhinga naʻe fakahā fakalakalaka ai ʻe Sihova ʻene fakaliloliló.

⁵ ʻI he tuʻunga ko e “Tokotaha-Fakahā ʻo e ngaahi fakaliloliló,” ʻe faai atu pē ʻo fakahaaʻi mai ʻe Sihova ʻa e ngaahi fakaikiiki kaungatonu fekauʻaki mo hono fakahoko ʻo e fakalilolilo ko ʻení. (Taniela 2:28) Ka te ne fai māmālie ia mo fakalakalaka. Ke fakatātaaʻi, tau fakakaukau atu nai ki he founga ʻo e tali ʻa ha Tamai ʻofa ʻi he taimi ʻoku ʻeke ange ai ʻe haʻane kiʻi tamasiʻi, “Tangataʻeiki, naʻá ku haʻú mei fē?” Ko ha tamai poto te ne ʻoange pē ʻa e fakamatala ko ē ʻe malava ʻe he kiʻi tamasiʻí ke mahinoʻí. ʻI he tupu hake ʻa e kiʻi tamasiʻí ʻo taʻumotuʻa angé, ʻoku tala ange ʻe he tamaí kiate ia ʻa e meʻa lahi ange. ʻI ha founga meimei tatau, ʻoku fakapapauʻi ʻe Sihova ʻa e taimi ʻoku mateuteu ai ʻene kakaí ki ha ngaahi meʻa fakahā ʻo hono finangaló mo ʻene taumuʻá.​—Palovepi 4:18; Taniela 12:4.

 6. (a) Ko e hā ʻa e taumuʻa ʻoku fakahoko ʻe ha fuakava, pe ko ha aleapau? (e) Ko e hā ʻoku taau ai ke fakatokangaʻi ʻe fakahoko ʻe Sihova ʻa e ngaahi fuakava mo e faʻahinga ʻo e tangatá?

⁶ Naʻe anga-fēfē hono ʻai ʻe Sihova ʻa e ngaahi meʻa fakahā peheé? Naʻá ne ngāueʻaki ha hokohoko ʻo e ngaahi fuakava, pe ngaahi aleapau, ke fakahaaʻi ai ha meʻa lahi. Mahalo pē ne ʻi ai ha taimi ne ke kau ai ki ha faʻahinga aleapau​—mahalo ke fakatau mai ha ʻapi, pe ke nō mai pe tuku atu ke nō ha paʻanga. Ko ha aleapau pehē naʻe ʻomai ai ha fakapapauʻiʻanga fakalao ko e ngaahi tuʻunga naʻe fai ki ai e felotoí ʻe fakahoko. Ka ko e hā ʻe fiemaʻu ai ke fai ʻe Sihova ha ngaahi fuakava, pe ngaahi aleapau fakalao mo e faʻahinga ʻo e tangatá? Ko hono moʻoní, ko ʻene folofolá ko ha fakapapauʻiʻanga feʻunga ia ʻo ʻene ngaahi talaʻofá. Ko e moʻoni ia, ka neongo ia, ʻi ha ngaahi taimi lahi, kuo poupouʻi anga-ʻofa ai ʻe he ʻOtuá ʻene folofolá ʻaki ha ngaahi aleapau fakalao. ʻOku ʻomai ʻe he ngaahi aleapau fakafatongia ko ʻení kiate kitautolu faʻahinga taʻehaohaoa ʻo e tangatá ha makatuʻunga ʻoku toe mālohi ange ke falala ai ki he ngaahi talaʻofa ʻa Sihová.​—Hepelu 6:16-18.

7, 8. (a) Ko e hā ʻa e fuakava naʻe fai ʻe Sihova mo ʻĒpalahamé, ʻo ʻomai ai ʻa e fakamaama ko e hā ki he fakalilolilo toputapú? (e) Naʻe anga-fēfē hono fakasiʻisiʻi fakalakalaka mai ʻe Sihova ʻa e laine hohoko ki he hako naʻe talaʻofá?

⁷ Laka hake ʻi he taʻu ʻe ua afe hili hono kapusi ʻo e tangatá mei Palataisí, naʻe tala ʻe Sihova ki heʻene sevāniti faitōnunga ko ʻĒpalahamé: “Ko ia te u matuʻaki tapuakiʻi koe, pea te u matuʻaki fakatokolahi ho hako ke tatau mo e ngaahi fetuʻu ʻo e langi . . . pea ko ho hako ʻe monuʻia ai ʻa e ngaahi puleʻanga ʻo mamani; koeʻuhiā kuo ke tuitala ki heʻeku lea.” (Sēnesi 22:17, 18) Naʻe mahulu atu ʻeni ia ʻi ha talaʻofa; naʻe faʻu ia ʻe Sihova ʻi he faʻunga ʻo ha fuakava fakalao pea poupouʻi ia ʻaki ʻene tukumoʻui taʻealamamotu. (Sēnesi 17:1, 2; Hepelū 6:13-15) He taau lahi ē ke fakatokangaʻi ko e ʻEiki Haú naʻá ne fai moʻoni ʻa e aleapau ke tāpuakiʻi ʻa e faʻahinga ʻo e tangatá!

⁸ Naʻe fakahā ʻe he fuakava kia ʻĒpalahamé ʻe hoko mai ʻa e hako naʻe talaʻofá ko ha tangata, he te ne hoko ko ha hako ʻo ʻĒpalahame. Ka ko hai ia? ʻI he faai mai ʻa e taimí, naʻe fakahā ai ʻe Sihova ko e taha mei he ngaahi foha ʻo ʻĒpalahamé, ko ʻAisake te ne hoko ko ha kui ʻa e hakó. Mei he ongo foha ʻo ʻAisaké, ko Sēkope naʻe filiʻí. (Sēnesi 21:12; 28:13, 14) Ki mui aí, naʻe fakahaaʻi ai ʻe Sēkope ʻa e ngaahi lea fakaekikité ni ki he taha ʻo hono ngaahi foha ʻe toko 12: “Ko e sēpitá ʻe ʻikai mavahe ia meia Siuta, pe ko e tokotoko ʻa e pulé mei he vahaʻa ʻo hono ongo vaʻé, kae ʻoua ke haʻu ʻa Sailo, [pe “Ko Ia ʻOku ʻAʻaná,” fakamatala ʻi lalo] pea ʻe talangofua kiate ia ʻa e ngaahi kakaí.” (Sēnesi 49:10, NW) Naʻe ʻilo leva ko e hakó ʻe hoko ko ha tuʻi, ko e tokotaha ʻe haʻu meia Siuta!

9, 10. (a) Ko e hā ʻa e fuakava naʻe fai ʻe Sihova mo e puleʻanga ʻo ʻIsilelí, pea ko e hā ʻa e maluʻi naʻe tokonaki ʻe he fuakava ko iá? (e) Naʻe anga-fēfē hono fakahāhā ʻe he Laó ʻa e fiemaʻu ki he faʻahinga ʻo e tangatá ha huhuʻí?

⁹ ʻI he 1513 K.M., naʻe fai ai ʻe Sihova ha fokotuʻutuʻu ʻo teuteu ai ʻa e founga ki ha toe ngaahi meʻa fakahā fekauʻaki mo e fakalilolilo toputapú. Naʻá ne fakangata ai ʻa e fuakava mo e ngaahi hako ʻo ʻĒpalahamé, ko e puleʻanga ʻo ʻIsilelí. Neongo ʻoku ʻikai ke toe ngāue ʻeni, naʻe hoko ʻa e Lao ko ʻeni ʻa Mōsesé ko ha konga tefito ia ʻo e taumuʻa ʻa Sihova ke fakahoko mai ʻa e hako naʻe talaʻofá. Anga-fēfē? Fakakaukau angé ki ha founga ʻe tolu. ʻUluakí, naʻe hangē ʻa e Laó ha ʻā maluʻí. (Efeso 2:14) Ko hono ngaahi tuʻutuʻuni māʻoniʻoní naʻe hoko ia ko ha fakangatangataʻanga ʻi he vahaʻa ʻo e Siú mo e Senitailé. Ko ia ai, naʻe tokoni ʻa e Laó ke fakatolonga ʻa e laine ʻo e hako naʻe talaʻofá. Tupu ʻi he tuʻunga lahi mei he maluʻi peheé, naʻe kei ʻi ai ʻa e puleʻanga ʻIsilelí ʻi he taimi naʻe aʻu ai ki he taimi kotofa ʻa e ʻOtuá ki he Mīsaiá ke ʻaloʻi mai ki he matakali ʻo Siutá.

¹⁰ Ko hono uá, naʻe fakahāhā fakaʻaufuli ʻe he Laó ʻa e fiemaʻu ʻe he faʻahinga ʻo e tangatá ha huhuʻí. Ko ha Lao haohaoa, naʻá ne fakaeʻa ʻa e taʻemalava ʻa e faʻahinga angahalaʻia ʻo e tangatá ke pīkitai kakato ki aí. Ko ia, naʻe “kanoni ʻaki ia koeʻuhi ko e ngaahi fai hala, kaeʻoua ke hoko mai ʻa e hako ne fai ki ai ʻa e talaʻofa.” (Kalētia 3:19) Fakafou ʻi he ngaahi feilaulau monumanú, naʻe fakahoko ai ʻe he Laó ha fakalelei fakataimi ki he ngaahi angahalá. Ka koeʻuhi, hangē ko ia naʻe tohi ʻe Paulá, “ʻoku ʻikai malava ke ʻave angahala ʻe he toto ʻo e fanga pulu mo e fanga kosi,” naʻe fakahāhā tōmuʻa mai pē ʻe he ngaahi feilaulaú ni ia ʻa e feilaulau huhuʻi ʻa Kalaisí. (Hepelū 10:1-4) Ko ia ai, ki he kau Siu faitōnungá, naʻe hoko ʻa e fuakava ko iá ko ha “fakaleʻo maʻa Kalaisi.”​—Kaletia 3:24.

11. Ko e hā ʻa e ʻamanaki lāngilangiʻia naʻe ʻoange ʻe he Lao fuakavá ki ʻIsilelí, ka ko e hā naʻe fakamoleki ai ia ʻe he puleʻangá fakalūkufua?

¹¹ Ko hono tolú, naʻe ʻoange ʻe he fuakava ko iá ki he puleʻanga ʻo ʻIsilelí ha ʻamanaki lāngilangiʻia. Naʻe tala ange ʻe Sihova kiate kinautolu kapau te nau fakamoʻoniʻi ʻenau faitōnunga ki he fuakavá, te nau hoko “koe buleaga oe kau taulaeiki, moe kakai maonioni.” (Ekisoto 19:5, 6, PM) Naʻe faai mai pē ʻo ʻomai ʻe ʻIsileli fakakakano ʻa e ʻuluaki kau mēmipa ʻo ha puleʻanga fakahēvani ʻo e kau taulaʻeikí. Kae kehe, ʻi he fakalūkufuá, naʻe angatuʻu ʻa ʻIsileli ki he fuakava Laó, ʻo talitekeʻi ʻa e hako Faka-Mīsaiá, pea mole ai ʻa e ʻamanaki ko iá. Ko hai leva ʻe fakakakatoʻaki ʻa e puleʻanga ʻo e kau taulaʻeikí? Pea ʻe anga-fēfē ʻa e felāveʻi ʻa e puleʻanga faitāpuekina ko iá mo e hako naʻe talaʻofá? Ko e ongo tafaʻaki ko ia ʻo e fakalilolilo toputapú ʻe fakahaaʻi ia ʻi he taimi kotofa ʻa e ʻOtuá.

12. Ko e hā ʻa e fuakava naʻe fai ʻe Sihova mo Tēvitá, pea ko e hā ʻa e fakamaama naʻe fai ʻe he meʻa ko iá ki he fakalilolilo toputapu ʻa e ʻOtuá?

¹² ʻI he senituli hono 11 K.M., naʻe ʻomai ai ʻe Sihova ha fakamaama lahi ange ki he fakalilolilo toputapú ʻi he taimi naʻá ne fai ai ha toe fuakava ʻe taha. Naʻá ne talaʻofa kia Tuʻi Tēvita faitōnunga: “Te u fokotuʻu ke hoko mo koe ʻa ho hako, . . . pea te u fakapapau hono puleʻanga. . . . pea te u fakapapau ʻa e taloni ʻo hono puleʻanga ʻo taʻengata.” (2 Sāmiuela 7:12, 13; Sāme 89:3) Naʻe fakangatangata leva ʻa e laine hohoko ʻo e hako naʻe talaʻofá ki he fale ʻo Tēvitá. Ka ʻe malava ki ha tangata meʻavale ke pule ʻo taʻengata? (Sāme 89:20, 29, 34-36) Pea ʻe malava ki ha tuʻi fakaetangata pehē ke ne fakahaofi ʻa e faʻahinga ʻo e tangatá mei he angahalá mo e maté?

13, 14. (a) Fakatatau ki he Sāme 110, ko e hā ʻa e talaʻofa ʻoku fai ʻe Sihova ki heʻene Tuʻi paní? (e) Ko e hā ʻa e toe ngaahi meʻa fakahā lahi ange fekauʻaki mo e hako ʻe hoko maí naʻe fai fakafou ʻi he kau palōfita ʻa Sihová?

¹³ ʻI hono fakamānavaʻí, naʻe tohi ʻe Tēvita: “Folofola ʻa Sihova ki hoku ʻEiki, ‘Nofo koe ʻi hoku toʻomataʻu ni, kae ʻoua ke u ʻai ho fili fuape ke hoko ko ho tuʻungavaʻe.’ Kuo fuakava ʻa Sihova, pea ʻe ʻikai te ne fakatomala, Ko e taulaʻeiki koe ʻo taʻengata pe, ʻi he ʻalunga ʻo Melikiseteke.” (Sāme 110:1, 4) Naʻe kaunga fakahangatonu ʻa e ngaahi lea ʻa Tēvitá ki he hako naʻe talaʻofá, pe Mīsaiá. (Ngāue 2:35, 36) ʻE pule ʻa e Tuʻi ko ʻení, ʻo ʻikai mei Selusalema, ka mei hēvani ʻi he “toʻomataʻu” ʻo Sihová. ʻE ʻoange ai kiate ia ʻa e mafai ʻo ʻikai ki he fonua pē ko ʻIsilelí ka ki he foʻi māmaní fakakātoa. (Sāme 2:6-8) Naʻe toe fakahaaʻi heni ʻa e meʻa lahi ange. Fakatokangaʻi naʻe fai ʻe Sihova ha fuakava molumalu ko e Mīsaiá ʻe hoko ‘ko e taulaʻeiki ʻi he ʻalunga ʻo Melikiseteké.’ ʻI he hangē ko Melikisēteké, ʻa ia naʻá ne ngāue ko ha tuʻi-taulaʻeiki ʻi he ʻaho ʻo ʻĒpalahamé, ʻe maʻu ʻe he hako ʻe hoko maí ha fakanofo fakahangatonu mei he ʻOtuá ke ngāue ko e Tuʻi mo e Taulaʻeiki!​—Senesi 14:17-20.

¹⁴ ʻI he faai mai ʻa e ngaahi taʻú, naʻe ngāueʻaki ai ʻe Sihova ʻene kau palōfitá ke ʻai ha ngaahi meʻa fakahā lahi ange fekauʻaki mo ʻene fakalilolilo toputapú. Ko e fakatātaá, naʻe fakahā ʻe ʻAisea ʻo pehē ʻe pekia ʻa e hakó ko ha pekia fakaefeilaulau. (Aisea 53:3-12) Naʻe tomuʻa tala ʻe Maika ʻa e feituʻu ʻe ʻaloʻi ai ʻa e Mīsaiá. (Maika 5:2) Naʻe aʻu ʻo kikiteʻi ʻe Taniela ʻa e taimi tofu pē ko ia ʻe hā mo pekia ai ʻa e hakó.​—Taniela 9:24-27.

15, 16. (a) Naʻe anga-fēfē ʻa e hoko ʻa e ʻAlo ʻo Sihová ʻo “tupu mei ha fefine”? (e) Ko e hā naʻe maʻu tukufakaholo ʻe Sīsū mei heʻene ongo mātuʻa fakaetangatá, pea ko fē ʻa e taimi naʻá ne hoko mai ai ko e hako ʻo e talaʻofá?

¹⁵ Ko e founga ʻe fakahoko ai ʻa e ngaahi kikité ni naʻe kei misiteli ia kae ʻoua kuo hā moʻoni mai ʻa e hakó. ʻOku pehē ʻe he Kalētia 4:4: “ʻI he hokosia leva ʻa e fakakakato ʻo e taimi, naʻe fekau atu ʻe he ʻOtua hono ʻAlo oʻona, ʻa ia ne tupu mei ha fefine.” ʻI he taʻu 2 K.M., naʻe tala ai ʻe ha ʻāngelo ki he tāupoʻou Siu ko hono hingoá ko Mele: “Vakai, te ke tuituia i ho manava, bea faeleʻi ae tama, bea ke ui hono huafa ko Jisu. Bea e lahi ia, bea e ui ia koe Alo oe Fugani Maoluga; e age kiate ia e he Eiki koe Otua ae nofoa o ene tamai ko Tevita: . . . E hoko mai ae Laumalie Maonioni kiate koe, bea e fakamalu koe e he malohi oe Fugani Maoluga; bea koia foki e ui ai ae hako maonioni te ke faeleʻi koe Alo oe Otua.”​—Luke 1:31, 32, 35, PM.

¹⁶ Ki mui mai aí, naʻe hiki ʻe Sihova ʻa e moʻui ʻa hono ʻAló mei hēvani ki he manava ʻo Melé, koeʻuhi ke fanauʻi mai ia ʻe ha fefine. Ko Melé ko ha fefine taʻehaohaoa. Neongo ia, naʻe ʻikai ke maʻu tukufakaholo ʻe Sīsū ia ha taʻehaohaoa meiate ia, he ko iá ia ko e “Alo oe Otua.” ʻI he taimi tatau, ko e ongo mātuʻa fakaetangata ʻa Sīsuú, ʻi he tuʻunga ko e ongo hako ʻo Tēvitá, naʻe malava ai ke Ne maʻu fakatouʻosi ʻa e ngaahi totonu fakanatula mo fakalao ke hoko ko ha ʻea ʻo Tēvita. (Ngāue 13:22, 23) ʻI he papitaiso ʻo Sīsū ʻi he 29 T.S., naʻe pani ai ia ʻe Sihova ʻaki ʻa e laumālie māʻoniʻoní mo ne pehē: “Ko hoku ʻAlo pele ʻena.” (Mātiu 3:16, 17) Naʻe hoko mai leva ʻa e hakó! (Kalētia 3:16) Naʻe taimi leva ke fakahā ʻa e meʻa lahi ange fekauʻaki mo e fakalilolilo toputapú.​—2 Timote 1:10.

17. Naʻe anga-fēfē hono fakamaama mai ʻa e ʻuhinga ʻo e Sēnesi 3:15?

¹⁷ ʻI he lolotonga ʻene ngāue fakafaifekaú, naʻe fakahā ai ʻe Sīsū ko e ngata ʻi he Sēnesi 3:15 ko Sētane pea ko e hako ʻo e ngatá ko e kau muimui ʻo Sētané. (Mātiu 23:33; Sione 8:44) Ki mui mai ai, naʻe fakahaaʻi ai ʻa e founga ʻe laiki taʻengata ai ʻa e faʻahingá ni kotoa. (Fakahā 20:1-3, 10, 15) Pea naʻe fakahaaʻi ʻa e fefiné “ko e Selusalema mei ʻolunga,” pe ko e uaifi ʻo e ʻOtuá​—ʻa ia, ko e konga fakahēvani ia ʻo e kautaha ʻa Sihová, ʻoku faʻuʻaki ʻa e ngaahi meʻamoʻui laumālie.a​—Kaletia 4:26; Fakahā 12:1-6.

18. Ko e hā ʻa e taumuʻa ʻo e “fuakava foʻou”?

¹⁸ Mahalo ko e meʻa fakahā maeʻeeʻa lahi tahá naʻe hoko ia ʻi he pō ki muʻa ʻi he pekia ʻa Sīsuú ʻi heʻene tala ki heʻene kau ākonga faitōnungá fekauʻaki mo e “fuakava foʻou.” (Luke 22:20) ʻI he hangē ko e meʻa naʻá ne fetongí, ʻa e fuakava Lao ʻa Mōsesé, ʻe faʻu ʻe he fuakava foʻou ko ʻení ha “buleaga oe kau taulaeiki.” (Ekisoto 19:6, PM; 1 Pita 2:9) Kae kehe, ʻe fokotuʻu ʻe he fuakava ko ʻení, ʻo ʻikai ha puleʻanga fakakakano, ka ko ha puleʻanga fakalaumālie, ko e “Isileli oe Otua,” ʻoku faʻu ʻaki maʻataʻatā ʻa e kau muimui pani loto-tōnunga ʻa Kalaisí. (Kalētia 6:16, PM) Ko e faʻahinga ko ʻeni ʻoku kau ki he fuakava foʻoú te nau kau fakataha mo Sīsū ʻi hono tāpuekina ʻa e matakali ʻo e faʻahinga ʻo e tangatá!

19. (a) Ko e hā ʻoku lavameʻa ai ʻa e fuakava foʻoú ʻi hono faʻu ha “buleaga oe kau taulaeiki”? (e) Ko e hā ʻoku ui ai ʻa e kau Kalisitiane paní ko ha “fakatupu foʻou,” pea ko e toko fiha te nau ngāue ʻi hēvani fakataha mo Kalaisí?

¹⁹ Ka ko e hā ʻoku lavameʻa ai ʻa e fuakava foʻoú ʻi hono faʻu ha “buleaga oe kau taulaeiki” ke tāpuekina ai ʻa e faʻahinga ʻo e tangatá? Koeʻuhi ʻi he ʻikai ke fakahalaiaʻi ʻa e kau ākonga ʻa Kalaisí ko ha kau angahalá, ʻokú ne ʻai ke malava ʻa e fakamolemoleʻi ʻo ʻenau ngaahi angahalá fakafou ʻi heʻene feilaulaú. (Selemaia 31:31-34) ʻI heʻenau maʻu pē ha tuʻunga maʻa ʻi he ʻao ʻo Sihová, ʻokú ne ohi leva kinautolu ki hono fāmili fakahēvaní pea pani kinautolu ʻaki ʻa e laumālie māʻoniʻoní. (Loma 8:15-17; 2 Kolinitō 1:21) ʻOku nau hokosia ai ha “fakatupu foʻou . . . ke maʻu ha ʻamanaki ʻoku moʻui . . . kuo taʻofia ʻi hevani.” (1 Pita 1:3, 4) Koeʻuhi ko ha tuʻunga māʻolunga pehē ʻoku foʻou fakaʻaufuli ia ki he faʻahinga ʻo e tangatá, ʻoku ui ʻa e kau Kalisitiane pani ʻe he laumālié ko ha “fakatupu foʻou.” (2 Kolinitō 5:17) ʻOku fakahaaʻi mai ʻe he Tohitapú ko e toko 144,000 ʻe faai atu pē ʻo nau kau ʻi he pule mei hēvani ki he faʻahinga ʻo e tangatá kuo huhuʻí.​—Fakahā 5:9, 10; 14:1-4.

20. (a) Ko e hā ʻa e meʻa fakahā fekauʻaki mo e fakalilolilo toputapú naʻe fai ʻi he 36 T.S.? (e) Ko hai te ne maʻu ʻa e ngaahi tāpuaki naʻe talaʻofa kia ʻĒpalahamé?

²⁰ Fakataha mo Sīsū, ʻoku hoko ʻa e kau pani ko ʻení ko e “hako ʻo Epalahame.”b (Kalētia 3:29) Ko e ʻuluaki faʻahinga naʻe filí ko e kau Siu fakakakano. Ka ʻi he 36 T.S., naʻe fakahā ai ha toe tafaʻaki ʻe taha ʻo e fakalilolilo toputapú: Ko e kau Senitailé, pe faʻahinga ʻikai ko ha Siú, te nau kau foki mo kinautolu ʻi he ʻamanaki fakahēvaní. (Loma 9:6-8; 11:25, 26; ʻEfesō 3:5, 6) Ko e kau Kalisitiane paní pē ʻa e faʻahinga te nau maʻu ʻa e ngaahi tāpuaki naʻe talaʻofa kia ʻĒpalahamé? ʻIkai, he ko e feilaulau ʻa Sīsuú ʻoku ʻaonga ia ki he māmaní fakakātoa. (1 Sione 2:2) ʻI he faai mai ʻa e taimí, naʻe fakahā ai ʻe Sihova ha “fuʻu kakai lahi” ʻoku ʻikai lava ʻo lau te nau hao moʻui atu ʻi he ngataʻanga ʻo e ngaahi meʻa ʻo e fokotuʻutuʻu ʻa Sētané. (Fakahā 7:9, 14) ʻE toe ʻi ai mo e fuʻu kakai tokolahi ʻaupito ʻe fokotuʻu mei he maté fakataha mo e ʻamanaki ko e moʻui taʻengata ʻi Palataisi!​—Luke 23:43; Sione 5:28, 29; Fakahā 20:11-15; 21:3, 4.

21, 22. ʻI he ngaahi founga fē ʻoku fakahāhā ai ʻe he fakalilolilo toputapu ʻa Sihová hono potó?

²¹ Ko e fakalilolilo toputapú ko ha fakahāhā fakaofo ia ʻo e “poto faifio ʻa e ʻOtua.” (Efeso 3:8-10) He poto lahi ē naʻe fakahāhā ʻe Sihova ʻi hono faʻufaʻu ʻa e fakaliloliló ni, pea toki fakahaaʻi mātuʻaki māmālie mai iá! Naʻá ne fakakaukauʻi fakapotopoto ʻa e ngaahi ngataʻanga ʻo e faʻahinga ʻo e tangatá, ʻo fakaʻatā kinautolu ke nau fakahāhā ʻa e tuʻunga moʻoni ʻo honau lotó.​—Sāme 103:14.

²² Naʻe toe fakahaaʻi ʻe Sihova ʻa e poto taʻefakatatauá ʻi heʻene fili ʻa Sīsū ko e Tuʻí. ʻOku alafalalaʻanga ange ʻa e ʻAlo ʻo Sihová ʻi ha toe meʻamoʻui kehe ʻi he ʻunivēsí. ʻI he moʻui ko ha tangata ʻo e kakano mo e totó, naʻe hokosia ai ʻe Sīsū ʻa e ngaahi faʻahinga lahi ʻo e faingataʻá. ʻOkú ne mahinoʻi kakato ʻa e ngaahi palopalema fakaetangatá. (Hepelū 5:7-9) Pea fēfē ʻa e kau kaungāpule ʻo Sīsuú? ʻI he faai mai ʻa e ngaahi senitulí, kuo pani fakatouʻosi ai ʻa e kakai tangata mo e kakai fefine​—naʻe fili mei he ngaahi matakali, ngaahi lea, mo e ngaahi ʻātakai kotoa pē. ʻOku ʻikai ha palopalema ia ne teʻeki ai ke fehangahangai pea ikuna ai ʻa e faʻahinga tāutaha ʻi he lotolotonga ʻo kinautolú. (Efeso 4:22-24) Ko e moʻui ʻi he malumalu ʻo e pule ʻa e kau taulaʻeiki fakatuʻi faimeesi ko ʻení ʻe hoko ia ko ha meʻa fakafiefia!

23. Ko e hā ʻa e monū ʻoku maʻu ʻe he kau Kalisitiané ʻi he fekauʻaki mo e fakalilolilo toputapu ʻa Sihová?

²³ Naʻe tohi ʻe he ʻapositolo ko Paulá: “[Ko e] fakalilolilo toputapu naʻe fufū talu mei he ngaahi fokotuʻutuʻu ʻi he kuohilí pea talu mei he ngaahi toʻutangata ʻi he kuohilí . . . kuo fakaeʻa ia ki heʻene kakai tapú.” (Kolose 1:26, NW) ʻIo, ko e kau māʻoniʻoni pani ʻa Sihová kuo nau hoko ʻo mahinoʻi ʻa e meʻa lahi fekauʻaki mo e fakalilolilo toputapú, pea kuo nau vahevahe atu ʻa e ʻilo ko iá ki he laui miliona. Ko ha monū lahi ē kuo maʻu ʻe kitautolu kotoa! Kuo hanga ʻe Sihova ʻo “fakaʻilo mai kiate kitautolu ʻa e fakalilolilo toputapu ʻo hono finangaló.” (Efeso 1:9, NW) Tau vahevahe atu ʻa e fakalilolilo fakaofo ko ʻení ki he niʻihi kehé, ʻo tokoniʻi tatau mo kinautolu ke nau kumi ki he poto taʻefakangatangata ʻo Sihova ko e ʻOtuá!