ʻOkú Ke Fakatatali “ki he Kolo ʻOkú Ne Maʻu ʻa e Ngaahi Fakavaʻe Moʻoní”?

 1. Ko e hā ʻa e ngaahi feilaulau kuo fai ʻe he tokolahi, pea ko e hā kuo nau fai ai iá?

KO E laui miliona ʻo e kakai ʻa e ʻOtuá he ʻahó ni kuo nau fai ʻa e ngaahi feilaulau. Kuo fili ʻa e fanga tokoua mo e fanga tuofāfine tokolahi ke nofo taʻemali. Kuo fili ʻa e ngaahi hoa mali ke ʻoua te nau maʻu fānau. Ko e ngaahi fāmili ʻe niʻihi ʻoku nau tauhi ke faingofua ʻenau moʻuí. Kuo nau fai kotoa ʻa e ngaahi fili ko ení koeʻuhi ko ha ʻuhinga mahuʻinga ʻe taha​—ʻoku nau loto ke tauhi kia Sihova ʻi he kakato taha ʻe ala lavá. ʻOku nau fiemālie mo falala ʻe tokonaki ʻe Sihova ʻa e meʻa kotoa ʻoku nau fiemaʻu moʻoní. ʻE siva ʻenau ʻamanakí? ʻIkai! Ko e hā ʻoku lava ai ke tau fakapapauʻi ʻa e moʻoniʻi meʻa ko iá? Ko e ʻuhinga ʻe taha he naʻe tāpuakiʻi ʻe Sihova ʻa ʻĒpalahame, “ko e tamai ʻa e faʻahinga kotoa ʻoku tui.”​—Loma 4:11.

 2. (a) Fakatatau ki he Hepelū 11:8-10, 16, ko e hā naʻe loto-lelei ai ʻa ʻĒpalahame ke mavahe mei ʻUá? (e) Ko e hā te tau lāulea ki ai ʻi he kupu ko ení?

² Naʻe loto-lelei ʻa ʻĒpalahame ke liʻaki ʻa e founga moʻui fiemālie naʻá ne maʻu ʻi he kolo ko ʻUá. Ko e hā hono ʻuhingá? Koeʻuhi naʻá ne fakatatali “ki he kolo ʻokú ne maʻu ʻa e ngaahi fakavaʻe moʻoní.” (Lau ʻa e Hepelū 11:8-10, 16.) Ko e hā ʻa e “kolo” ko iá? Ko e hā ʻa e ngaahi pole naʻe fehangahangai mo ʻĒpalahame ʻi heʻene tatali ke langa ʻa e kolo ko iá? Pea ʻe lava fēfē ke tau hangē ko ʻĒpalahame mo e faʻahinga ʻi he ʻahó ni kuo nau muimui ʻi heʻene faʻifaʻitakiʻangá?

 3. Ko e hā ʻa e kolo naʻe fakatatali ki ai ʻa ʻĒpalahamé?

³ Ko e kolo naʻe fakatatali ki ai ʻa ʻĒpalahamé ko e Puleʻanga ʻo e ʻOtuá. Ko e Puleʻanga ko iá ʻoku faʻuʻaki ʻa Sīsū Kalaisi mo e kau Kalisitiane pani ʻe toko 144,000. ʻOku lave ʻa Paula ki he Puleʻanga ko iá ko ha “kolo ʻo e ʻOtua moʻuí, ʻa Selusalema fakalangi.” (Hep. 12:22; Fkh. 5:8-10; 14:1) Naʻe akoʻi ʻe Sīsū ʻene kau ākongá ke nau lotu fekauʻaki mo e Puleʻanga tatau, ʻo kole ke hoko mai ia koeʻuhi ke fai ʻa e finangalo ʻo e ʻOtuá ʻi māmani ʻo hangē ko ia ʻi hēvaní.​—Māt. 6:10.

 4. Fakatatau ki he Sēnesi 17:1, 2, 6, ko e hā naʻe ʻiloʻi ʻe ʻĒpalahame fekauʻaki mo e kolo pe Puleʻanga naʻe talaʻofa ʻe he ʻOtuá?

⁴ Naʻe ʻiloʻi ʻe ʻĒpalahame ʻa e fakaikiiki ki he anga hono fokotuʻutuʻu ʻo e Puleʻanga ʻo e ʻOtuá? ʻIkai. ʻI he laui senituli, naʻe hoko ʻa e ngaahi fakaikiiki ko iá ko ha “fakalilolilo toputapu.” (ʻEf. 1:8-10; Kol. 1:26, 27) Ka naʻe ʻiloʻi ʻe ʻĒpalahame ʻe ʻi ai ʻa e niʻihi ʻi hono hakó te nau hoko ko e ngaahi tuʻi. Naʻe tala ange hangatonu ʻe Sihova ʻa e talaʻofa ko iá kiate ia. (Lau ʻa e Sēnesi 17:1, 2, 6.) Naʻe tui mālohi ʻa ʻĒpalahame ki he ngaahi talaʻofa ʻa e ʻOtuá ʻo hangē ia naʻe lava ke ne sio ki he Tokotaha Paní pe Mīsaiá, ʻa ia te ne hoko ko e Tuʻi ʻo e Puleʻanga ʻo e ʻOtuá. Ko e ʻuhinga ia naʻe tala ange ai ʻe Sīsū ki he kau Siu ʻi hono taimí: “Ko ʻĒpalahame ko hoʻomou tamaí naʻá ne fiefia lahi ʻi he ʻamanaki ke mamata ki hoku ʻahó, pea naʻá ne mamata ai peá ne fiefia.” (Sione 8:56) ʻOku hā mahino naʻe ʻiloʻi ʻe ʻĒpalahame ko hono hakó ʻe faʻuʻaki ha Puleʻanga ʻa ia ʻe poupouʻi ʻe Sihova, pea naʻá ne loto-lelei ke tatali ke fakahoko ʻe Sihova ʻa e talaʻofa ko iá.

 5. ʻOku anga-fēfē ʻetau ʻiloʻi naʻe tatali ʻa ʻĒpalahame ki he kolo naʻe palani ʻe he ʻOtuá?

⁵ Naʻe anga-fēfē hono fakahāhā ʻe ʻĒpalahame naʻá ne tatali ki he kolo pe Puleʻanga, naʻe palani ʻe he ʻOtuá? ʻUluakí, naʻe ʻikai ke kau ʻa ʻĒpalahame ki ha puleʻanga fakamāmani. Naʻá ne hoko ko ha tokotaha hikihiki holo, ʻo fili ke ʻoua ʻe nofo maʻu ʻi ha feituʻu mo poupou ki ha tuʻi fakaetangata. ʻIkai ko ia pē, naʻe ʻikai ke feinga ʻa ʻĒpalahame ke fokotuʻu hano puleʻanga. ʻI hono kehé, naʻá ne hanganaki talangofua kia Sihova pea tatali ke Ne fakahoko ʻEne talaʻofá. ʻI hono fai iá, naʻe fakahaaʻi ai ʻe ʻĒpalahame ʻa e tui taʻehanotatau kia Sihova. Tau sivisiviʻi angé ʻa e ngaahi pole ʻe niʻihi naʻá ne fehangahangai mo iá pea vakai ki he meʻa ʻe lava ke tau ako mei heʻene faʻifaʻitakiʻangá.

 6. Ko e kolo fēfē ʻa ʻUa?

⁶ Ko e kolo naʻe mavahe mei ai ʻa ʻĒpalahamé naʻe malu, fiemālie mo tuʻumālie. Naʻe maluʻi ia ʻe ha ngaahi kolotau mo ha tafenga vai takatakai ʻi he tafaʻaki ʻe tolu. Ko e kakai ʻi ʻUá naʻa nau poto ʻaupito ʻi he tohí mo e fiká. Pea ʻoku ngalingali naʻe hoko ʻa e koló ko e senitā ki he ngaahi meʻa fakapisinisí; kuo maʻu ʻa e ngaahi tohi fakapisinisi lahi ʻi he feituʻu ko iá. Ko e ngaahi fale tāutahá naʻe langa ʻaki ʻa e piliki; ko e holisí naʻe palasitaaʻi pea vali hinehina. Ko e niʻihi ʻo e ngaahi fale ko ení naʻe loki 13 pe 14 ʻo takatakai ki ha lotoʻā naʻe faliki maka.

 7. Ko e hā naʻe pau ai ke falala ʻa ʻĒpalahame ʻe maluʻi ia mo hono fāmilí ʻe Sihova?

⁷ Naʻe pau ke falala ʻa ʻĒpalahame ʻe maluʻi ia mo hono fāmilí ʻe Sihova. Ko e hā hono ʻuhingá? Manatuʻi naʻe liʻaki ʻe ʻĒpalahame mo Sela hona ʻapi malu mo fiemālie ʻi he kolo ko ʻUá kae nofo ʻi he ngaahi tēniti ʻi he ngaahi feituʻu ʻuta ʻi Kēnani. Naʻe ʻikai ke toe maluʻi ia mo hono fāmilí ʻe he ngaahi fuʻu ʻā matolu mo e ngaahi tafenga vai lolotó. ʻI hono kehé, naʻa nau tuʻu laveangofua ki hono ʻohofi kinautolu ʻe he ngaahi filí.

 8. ʻI he taimi ʻe taha, ko e hā naʻe pau ke fekuki ʻa ʻĒpalahame mo iá?

⁸ Naʻe fai ʻe ʻĒpalahame ʻa e finangalo ʻo e ʻOtuá, ka ʻi he taimi ʻe taha naʻá ne fāinga ke fafanga hono fāmilí. Naʻe pau ke ne fekuki mo ha fuʻu honge lahi naʻe tō ʻi he fonua naʻe fekau ʻe Sihova ke ne ʻalu ki aí. Naʻe fakautuutu ʻa e hongé pea fili ʻa ʻĒpalahame ke ne hiki fakataimi mo hono fāmilí ki ʻIsipite. Kae kehe, ʻi heʻene ʻi ʻIsipité, ko Felo, ʻa e pule ʻo e fonuá, naʻá ne ʻave hono uaifí. Sioloto atu ki he loto-moʻua ʻa ʻĒpalahamé ʻo aʻu ki he toki ʻai ʻe Sihova ʻa Felo ke ne fakafoki ʻa Sela kia ʻĒpalahame.​—Sēn. 12:10-19.

 9. Ko e hā ʻa e ngaahi faingataʻa fakafāmili naʻe pau ke fekuki ʻa ʻĒpalahame mo iá?

⁹ Naʻe faingataʻa ʻa e moʻui fakafāmili ʻa ʻĒpalahamé. Ko hono uaifi ʻofaʻanga ko Selá, naʻe ʻikai ke ne fanau. ʻI he laui hongofuluʻi taʻu naʻe pau ke na fekuki mo e meʻa mātuʻaki fakalotomamahi ko iá. Faai atu pē, naʻe ʻoange ʻe Sela ʻene kaunangá, ʻa Hekaʻā, kia ʻĒpalahame koeʻuhi ke ne fanauʻi ha fānau maʻa ʻĒpalahame mo Sela. Ka ʻi he taimi naʻe feitama ai ʻa Hekaʻā ʻia ʻIsimeʻelí, naʻe kamata ke ne taʻetokaʻi ʻa Sela. Naʻe ʻalu ke toe faingataʻa ange ʻa e tuʻungá ʻo tuli ai ʻe Sela ʻa Hekaʻā mei hono ʻapí.​—Sēn. 16:1-6.

10. Ko e hā ʻa e meʻa naʻe hoko kia ʻIsimeʻeli mo ʻAisake naʻe ʻahiʻahiʻi ai ʻa e falala ʻa ʻĒpalahame kia Sihová?

¹⁰ Naʻe faai atu pē ʻo feitama ʻa Sela peá ne fanauʻi ha tama kia ʻĒpalahame ʻa ia naʻá ne fakahingoa ko ʻAisake. Naʻe ʻofa ʻa ʻĒpalahame ʻi hono ongo fohá, ʻa ʻIsimeʻeli mo ʻAisake. Ka koeʻuhi ko e fakafeangai kovi ʻa ʻIsimeʻeli kia ʻAisaké, naʻe fiemaʻu kia ʻĒpalahame ke ne fekauʻi ʻa ʻIsimeʻeli mo Hekaʻā ke na mavahe. (Sēn. 21:9-14) Ki mui ai, naʻe kole ange ʻe Sihova kia ʻĒpalahame ke ne foaki ʻa ʻAisake ko ha feilaulau. (Sēn. 22:1, 2; Hep. 11:17-19) ʻI he ongo tuʻungá fakatouʻosi, naʻe pau ke falala ʻa ʻĒpalahame ʻe faai atu pē ʻo fakahoko ʻe Sihova ʻene ngaahi talaʻofa fekauʻaki mo hono ongo fohá.

11. Ko e hā naʻe pau ai ke tatali anga-kātaki ʻa ʻĒpalahame kia Sihová?

¹¹ ʻI he kotoa ʻo e taimi ko ení, naʻe pau ke tatali anga-kātaki ʻa ʻĒpalahame kia Sihova. ʻOku ngalingali naʻá ne taʻu 70 tupu ʻi heʻene mavahe mo hono fāmilí mei ʻUá. (Sēn. 11:31–12:4) Pea ʻi he taʻu nai ʻe teau, naʻá ne nofo tēniti, ʻo fononga holo ʻi he fonua ko Kēnaní. Naʻe mate ʻa ʻĒpalahame ʻi hono taʻu 175. (Sēn. 25:7) Ka naʻe ʻikai ke ne sio ki hono fakahoko ʻe Sihova ʻene talaʻofa ke foaki ʻa e fonua naʻá ne fononga aí ki hono hakó. Pea naʻá ne mate ʻoku teʻeki ai ke fokotuʻu ʻa e koló, ʻa e Puleʻanga ʻo e ʻOtuá. Neongo ia, naʻe fakamatalaʻi ʻa ʻĒpalahame naʻá ne mate kuó ne “motuʻa mo fiemālie.” (Sēn. 25:8) Neongo ʻa e ngaahi pole kotoa naʻe fekuki mo ʻĒpalahamé, naʻá ne tauhi maʻu ha tui mālohi pea fiemālie ke tatali kia Sihova. Ko e hā naʻá ne malava ai ke kātakí? Koeʻuhi ʻi he kotoa ʻo e moʻui ʻa ʻĒpalahamé, naʻe maluʻi ia ʻe Sihova pea fakafeangai kiate ia ko ha kaumeʻa.​—Sēn. 15:1; ʻAi. 41:8; Sēm. 2:22, 23.

12. Ko e hā ʻoku tau tatali ki aí, pea ko e hā te tau lāulea ki aí?

¹² Hangē ko ʻĒpalahamé, ʻoku tau fakatatali mo kitautolu ki he kolo ʻokú ne maʻu ʻa e ngaahi fakavaʻe moʻoní. Kae kehe, ʻoku ʻikai ke tau tatali ke langa ʻa e kolo ko iá. Ko e Puleʻanga ʻo e ʻOtuá naʻe fokotuʻu ʻi he 1914 pea kuó ne ʻosi pule fakaʻaufuli ʻi hēvani. (Fkh. 12:7-10) Ka ʻoku tau tatali ke ne pule fakaʻaufuli mai ki he māmaní. Lolotonga ʻetau tatali ke hoko mai iá, ʻoku lahi ʻa e ngaahi tuʻunga kuo pau ke tau fekuki mo ia ʻa ia ʻoku meimei tatau mo e meʻa naʻe fehangahangai mo ʻĒpalahame mo Selá. Kuo malava ke faʻifaʻitaki ʻa e kau sevāniti ʻa Sihova ʻi onopōní kia ʻĒpalahame? Ko e ngaahi talanoa ki he moʻuí ʻoku ʻi he Taua Leʻo ʻoku fakahaaʻi ai ko e tokolahi ʻi he ʻahó ni, hangē ko ʻĒpalahame mo Selá, ʻoku nau maʻu ʻa e tui mo e kātaki. Tau lāulea angé ki he niʻihi ʻo e ngaahi talanoa ko iá pea vakai ki he meʻa ʻe lava ke tau ako mei aí.

13. Ko e hā ʻokú ke ako mei he hokosia ʻa Tokoua Walden?

¹³ Loto-lelei ke fai ʻa e ngaahi feilaulau. Kapau ʻoku tau loto ke fakamuʻomuʻa ʻi heʻetau moʻuí ʻa e kolo ʻo e ʻOtuá, ʻa e Puleʻangá, kuo pau ke tau hangē ko ʻĒpalahamé, ʻa ia naʻá ne loto-lelei ke fai ʻa e ngaahi feilaulau ke fakahōifuaʻi ʻa e ʻOtuá. (Māt. 6:33; Mk. 10:28-30) Fakatokangaʻi ʻa e faʻifaʻitakiʻanga ha tokoua ko Bill Walden.b ʻI he 1942, naʻe teu ke maʻu ʻe Bill hono mataʻitohi ʻi he ʻākitekí mei ha ʻunivēsiti ʻi ʻAmelika peá ne kamata ako mo e Kau Fakamoʻoni ʻa Sihová. Naʻe fokotuʻutuʻu ʻe he palōfesa ʻa Bill ha ngāue maʻa Bill ʻi he hili ʻene maʻu tohi fakamoʻoni akó, ka naʻe ʻikai ke tali ia ʻe Bill. Naʻá ne tala ange kuó ne fili ke tuku ange ʻa e faingamālie ngāue paʻanga ko iá ke tauhi kakato ange ki he ʻOtuá. ʻI he taimi nounou mei ai, naʻe fekauʻi ʻa Bill ke kau ʻi he ngāue fakakautaú. Naʻá ne fakafisingaʻi anga-fakaʻapaʻapa ia pea ko e olá naʻá ne moʻua $10,000 pea tautea ke ngāue pōpula ʻi he taʻu ʻe nima. Naʻá ne ʻatā ʻi he hili ha taʻu ʻe tolu. Ki mui ai, naʻe fakaafeʻi ia ke ʻalu ki he Akoʻanga Kiliatí pea ngāue ko ha misinale ʻi ʻAfilika. Naʻe mali leva ʻa Bill mo Eva, peá na ngāue fakataha ʻi ʻAfilika, ʻa ia naʻe fiemaʻu ki ai ʻa e ngaahi feilaulau. Faai atu pē naʻá na foki ki ʻAmelika ke tokangaʻi ʻa e faʻē ʻa Bill. ʻI he fakamulituku ʻe Bill ʻene talanoa ki he moʻuí, ʻokú ne pehē: “ʻOku ou loʻimataʻia ʻi heʻeku fakakaukau atu ki he monū fakaofo ʻo hono ngāueʻaki au ʻe Sihova ʻi he taʻu ʻe 70 tupu ʻi heʻene ngāué. ʻOku ou faʻa fakamālō kiate ia ʻi heʻene tataki au ke u fai ʻene ngāué.” ʻOku malava ke ke ʻai ʻa e ngāue fakafaifekau taimi-kakató ko hoʻo ngāué ia?

14-15. Ko e hā ʻoku tau ako mei he hokosia ʻa Tokoua mo Tuofefine Apostolidis?

¹⁴ ʻOua ʻe ʻamanekina hoʻo moʻuí ke ʻatā mei he faingataʻá. ʻOku tau ako mei he faʻifaʻitakiʻanga ʻa ʻĒpalahamé naʻa mo e faʻahinga ʻoku nau līʻoa ʻenau moʻuí kotoa ke tauhi kia Sihová kuo pau ke nau kei fekuki mo e ngaahi palopalema. (Sēm. 1:2; 1 Pita 5:9) Fakakaukau ki hono fakamoʻoniʻi ʻo e meʻá ni ʻi he hokosia ʻa Aristotelis Apostolidis.c Naʻá ne papitaiso ʻi he 1946 ʻi Kalisi, pea ʻi he 1952 naʻá ne fakamaʻu mo ha tuofefine ko Eleni, ʻa ia naʻá ne maʻu ha taumuʻa tatau mo ia. Kae kehe, naʻe puke ʻa Eleni pea naʻe ʻiloʻi naʻe ʻi ai ha foʻi ngungu ʻi hono ʻutó. Naʻe toʻo ʻa e foʻi ngungú, ka ʻi he hili pē ha ngaahi taʻu siʻi ʻena malí, naʻe toe tupu pē ʻa e foʻi ngungú. Naʻe toe fai ʻe he kau toketā ha tafa, ka naʻe mamatea fakakonga ʻa Eleni, pea uesia ʻene leá. Naʻá ne kei hoko pē ko ha faifekau faivelenga neongo ʻene puké mo e fakatanga mei he puleʻangá ʻi he taimi ko iá.

¹⁵ Naʻe tokangaʻi ʻe Aristotelis ʻa hono uaifí ʻi he taʻu ʻe 30. Lolotonga ʻa e taimi ko ení naʻá ne ngāue ko ha mātuʻa, ngāue ʻi he ngaahi kōmiti ʻasemipilī pea tokoni ʻi hono langa ha Holo ʻAsemipilī. Pea ʻi he 1987, naʻe lavea ʻa Eleni ʻi ha fakatuʻutāmaki lolotonga ʻene malangá. Naʻe ʻikai ke ne toe ʻiloʻi ha meʻa ʻi he taʻu ʻe tolu, pea naʻá ne mate leva. ʻOku fakamulituku ʻe Aristotelis ʻene hokosiá ʻaki ʻene pehē: “ʻI he faai mai ʻa e ngaahi taʻú, ko e ngaahi tuʻunga mafatukitukí, ngaahi pole faingataʻá, mo e ngaahi meʻa ʻoku hokonoá kuo fiemaʻu ki ai ha tuʻunga lahi ʻo e loto-toʻá mo e kītakí. Neongo ia, kuo ʻomai maʻu pē ʻe Sihova ʻa e mālohi ʻa ia ʻoku fiemaʻu ke ikuʻi ʻaki ʻa e ngaahi palopalemá ni.” (Saame 94:18, 19) He ʻofa ē ko Sihova ʻi he faʻahinga ʻoku nau fai ʻa e kotoa ʻenau malavá maʻana neongo ʻa e fekuki mo e ngaahi faingataʻá!

16. Ko e hā ʻa e faleʻi lelei naʻe ʻoange ʻe Tokoua Knorr ki hono uaifí?

¹⁶ Tokangataha ki he kahaʻú. Naʻe tokangataha ʻa ʻĒpalahame ki he ngaahi pale ʻi he kahaʻú ʻe ʻoange ʻe Sihova kiate iá, pea naʻe tokoni eni kiate ia ke ikuʻi ʻene ngaahi polé. Ko Tuofefine Audrey Hyde naʻá ne feinga ke tauhi maʻu ʻa e vakai pau ko ení, neongo ʻa e mate he kanisā ʻa hono ʻuluaki malí, ʻa Nathan H. Knorr, pea ko hono mali uá, ʻa Glenn Hyde, naʻe maʻu ʻe he mahaki loto-ngalongaló.d ʻOkú ne pehē naʻe tokoniʻi ia ʻe he meʻa naʻe tala ange ʻe Tokoua Knorr kiate ia ʻi he ngaahi uike siʻi ki muʻa ke ne maté. ʻOkú ne pehē: “Naʻe fakamanatu mai ʻe Nathan: ‘ʻI he hili ʻa e maté, ko ʻeta ʻamanakí ʻoku pau pea ko ia ai ʻe ʻikai ʻaupito ke ta toe tofanga ʻi ha mamahi.’ Naʻá ne ekinaki mai leva kia au: ‘Hanga ki muʻa, he ʻoku ʻi ai ho palé.’ . . . Naʻá ne tānaki mai: ‘Hanganaki femoʻuekina​—feinga ke ngāueʻaki hoʻo moʻuí ʻi hono fai ha meʻa maʻá e niʻihi kehé. ʻE tokoniʻi koe ʻe he meʻá ni ke ke maʻu ai ʻa e fiefia ʻi he moʻuí.’” Ko ha faleʻi ʻaonga ē ke hanganaki femoʻuekina ʻi he failelei ki he niʻihi kehé pea “fiefia ʻi he ʻamanakí”!​—Loma 12:12.

17. (a) Ko e hā ʻoku tau maʻu ai ʻa e ʻuhinga lelei ke tokangataha ki he kahaʻú? (e) ʻE lava fēfē ke tokoniʻi kitautolu ʻe he muimui ʻi he faʻifaʻitakiʻanga ʻi he Maika 7:7 ke fiefia ʻi he ngaahi tāpuaki ʻi he kahaʻú?

¹⁷ ʻI he ʻahó ni, ʻoku tau maʻu ha ʻuhinga lahi ange ʻi ha toe taimi ki muʻa ke tokangataha ki he kahaʻú. ʻOku hā mahino ʻi he ngaahi meʻa ʻoku hoko he māmaní ʻoku tau ʻi he fakaʻosiʻosi ʻo e ngaahi ʻaho fakaʻosi ʻo e fokotuʻutuʻu ko ení. ʻOku vavé ni ke ʻikai toe fiemaʻu ke tau tatali ki he kolo ʻokú ne maʻu ʻa e ngaahi fakavaʻe moʻoní ke ne pule fakaʻaufuli mai ki he kotoa ʻo e māmaní. Ko e taha ʻi he ngaahi tāpuaki lahi te tau fiefia aí ko e sio ki he toetuʻu mai hotau ngaahi ʻofaʻangá mei he maté. ʻI he taimi ko iá, ʻe fakapaleʻi ʻe Sihova ʻa ʻĒpalahame koeʻuhi ko ʻene tuí mo e kātakí ʻaki hono fokotuʻu mai ia mo hono fāmilí ke moʻui ʻi he māmaní. Te ke ʻi ai ke talitali lelei kinautolu? ʻE lava ke ke ʻi ai, kapau te ke loto-lelei ke fai ʻa e ngaahi feilaulau maʻá e Puleʻanga ʻo e ʻOtuá, kapau te ke tauhi maʻu hoʻo tuí neongo ʻa e ngaahi palopalemá, pea kapau te ke tatali anga-kātaki kia Sihova, ʻo hangē ko ʻĒpalahamé.​—Lau ʻa e Maika 7:7.