Filemon
1 Mi Pol, mi kalabus,+ long wanem, mi mekim wok bilong Krais Jisas, na Timoti+ i stap wantaim mi. Dispela pas i go long Filemon, em brata mipela i laikim tumas na wanwok bilong mipela. 2 Na dispela pas i go tu long susa bilong yumi, Apia, na long wansoldia bilong yumi, Arkipus,+ na long kongrigesen i save bung long haus bilong yu.+
3 Bikpela pasin helpim na bel isi bilong God, Papa bilong yumi, na bilong Bikpela Jisas Krais, i ken i stap wantaim yupela.
4 Oltaim mi save tenkyu long God taim mi kolim nem bilong yu long ol beten bilong mi.+ 5 (Mi wok long harim tok olsem yu laikim Bikpela Jisas na yu bilip long em. Na yu mekim olsem tu long olgeta manmeri holi.) 6 Mi beten olsem bilip em yu gat wankain olsem bilong ol arapela, dispela inap kirapim yu long luksave long olgeta gutpela samting yumi kisim long rot bilong Krais. 7 Mi kisim bikpela amamas na bel i stap isi taim mi harim stori long pasin laikim bilong yu. Yes brata, bel bilong ol manmeri holi i kisim nupela strong long rot bilong yu.
8 Olsem na, maski long nem bilong Krais mi stap fri tru long toktok na mi ken tokim yu long mekim pasin i stret, 9 mi tingim pasin laikim bilong yu na mi laik mekim askim long yu. Yu save olsem mi Pol, mi winim pinis bikpela krismas na nau tu mi stap kalabus, long wanem, mi mekim wok bilong Krais Jisas. 10 Mi laik askim yu long tingim pikinini bilong mi, Onesimus.+ Mi kamap olsem papa bilong em+ taim mi stap long kalabus.* 11 Bipo em i no gutpela helpim bilong yu, tasol nau em i gutpela helpim bilong yu na mi wantaim. 12 Mi salim em i kam bek long yu, yes, em dispela man i stap long lewa bilong mi.
13 Mi laik em i stap yet bilong helpim mi, bai em i ken kamap olsem senis bilong yu na em i ken wok yet long helpim mi long taim mi stap long kalabus bilong helpim gutnius.+ 14 Tasol mi no laik mekim wanpela samting paslain long yu tok orait long en. Mi laik bai yu mekim gutpela pasin long laik bilong yu yet, na i no olsem mi subim yu long mekim.+ 15 Ating long dispela as em i bin lusim yu long sotpela taim,* bai yu ken kisim em bek na em i ken stap wantaim yu oltaim oltaim. 16 Bai em i no stap moa olsem wanpela wokboi,+ nogat, em i winim wokboi. Bai em i stap olsem wanpela brata ol man i laikim tumas,+ na mi laikim em tru. Tasol yu bai laikim em moa yet olsem wokboi bilong yu na brata Kristen bilong yu. 17 Olsem na sapos yu tingim mi olsem wanpela wanbilip bilong yu, orait yu mas kisim em long wankain pasin olsem yu bai amamas long kisim mi. 18 Na tu, sapos em i bin mekim sampela rong long yu o em i gat dinau long yu, orait putim dispela long akaun bilong mi. 19 Mi Pol, mi raitim dispela tok long han bilong mi yet. Mi bai bekim dispela dinau. Mi inap tokim yu olsem yu yet i gat dinau long mi, em laip bilong yu, tasol mi no laik mekim dispela tok. 20 Yes brata, yumitupela i disaipel bilong Bikpela, olsem na mi laik kisim helpim long yu na askim yu long givim nupela strong long bel bilong mi, yumitupela i pas wantaim Krais.
21 Mi bilip olsem yu bai bihainim tok bilong mi, olsem na mi rait long yu. Mi save olsem yu bai mekim ol samting i winim ol samting mi tokim yu long mekim. 22 Na tu, redim ples bilong mi long stap long en. Mi bilip olsem ol beten bilong yupela bai mekim mi kamap fri bilong helpim yupela.+
23 Epafras i salim gude long yu,+ em wankalabus bilong mi, long wanem, mipela i pas wantaim Krais Jisas. 24 Na Mak, Aristarkus,+ Demas,+ na Luk,+ em ol wanwok bilong mi, ol tu i salim gude long yu.
25 Bikpela pasin helpim bilong Bikpela Jisas Krais i ken i stap wantaim yupela, long wanem, yupela i save kamapim ol gutpela pasin.