Josua
1 Bihain long Moses, wokman bilong Jehova, i dai, Jehova i tokim Josua,*+ pikinini man bilong Nun na wokman+ bilong Moses, olsem: 2 “Wokman bilong mi, Moses, i dai pinis.+ Orait nau yupela i mas redi na go brukim Wara Jordan. Yu wantaim olgeta dispela manmeri, yupela i mas go long dispela graun em mi bai givim long ol manmeri bilong Israel.+ 3 Bai mi givim yupela olgeta ples yupela i wokabaut long en, olsem mi bin tok promis long Moses.+ 4 Mak bilong graun bilong yupela bai kirap long ples nating i go inap long Lebanon na i go long bikpela Wara Yufretis—olgeta graun bilong ol Hit+—na i go inap long Bikpela Solwara* long hap wes.*+ 5 Long taim yu stap laip yet, i no gat wanpela lain bai winim yu long pait.+ Mi bai stap wantaim yu, olsem mi bin stap wantaim Moses.+ Mi no inap lusim yu o givim baksait long yu.+ 6 Yu mas strongim bel na sanap strong,+ long wanem, yu bai bringim ol dispela manmeri i go kisim dispela graun em mi bin tok tru antap long ol tumbuna papa bilong ol olsem mi bai givim long ol.+
7 “Tru tumas, yu mas strongim bel na sanap strong tru na bihainim gut olgeta Lo em wokman bilong mi, Moses, i bin givim long yu. Yu no ken bihainim narapela rot.+ Olsem bai yu ken bihainim savetingting long olgeta hap yu go long en.+ 8 Ol tok bilong buk bilong Lo i no ken lusim maus bilong yu.+ Long san na long nait, yu mas ritim isi isi,* olsem bai yu inap bihainim olgeta tok i stap long dispela Lo.+ Sapos yu mekim olsem, orait olgeta samting yu mekim bai kamap gutpela na yu bai bihainim savetingting.+ 9 Ating mi no bin tokim yu, a? Yu mas strongim bel na sanap strong. Yu no ken pret o surik, long wanem, Jehova, God bilong yu, bai stap wantaim yu long olgeta hap yu go long en.”+
10 Orait Josua i tokim ol ofisa bilong ol manmeri olsem: 11 “Yupela i mas go raun long olgeta hap bilong kem na tokim ol manmeri olsem, ‘Yupela i mas redim ol kaikai samting bilong yupela, long wanem, bihain long 3-pela de bai yupela i brukim Wara Jordan na go kisim dispela graun em Jehova, God bilong yupela, bai givim long yupela.’”+
12 Na Josua i tokim traib bilong Ruben, na Gat, na hap traib bilong Manase olsem: 13 “Yupela i mas tingim tok em Moses, wokman bilong Jehova, i bin tokim yupela:+ ‘Jehova, God bilong yupela, i givim malolo long yupela na em i givim pinis dispela graun long yupela. 14 Ol meri pikinini bilong yupela na ol bulmakau na sipsip samting bilong yupela bai stap long graun em Moses i bin givim yupela pinis long dispela sait* bilong Wara Jordan.+ Tasol yupela ol strongpela soldia+ i mas wokabaut olsem wanpela lain ami na go pas long ol brata bilong yupela+ long hapsait. Yupela i mas helpim ol 15 i go inap Jehova i givim malolo long ol brata bilong yupela olsem em i bin givim malolo long yupela, na ol i kisim dispela graun em Jehova, God bilong yupela, i laik givim long ol. Orait bihain yupela i ken kam bek long dispela graun bilong yupela na sindaun long en, em graun Moses, wokman bilong Jehova, i bin givim long yupela long hap is bilong Wara Jordan.’”+
16 Orait ol i bekim tok bilong Josua olsem: “Mipela bai mekim olgeta samting olsem yu bin tokim mipela, na mipela bai go long wanem wanem hap yu salim mipela i go long en.+ 17 Mipela bai bihainim tok bilong yu olsem mipela i bin bihainim olgeta tok bilong Moses. Tru tumas, Jehova, God bilong yu, i ken stap wantaim yu olsem em i bin stap wantaim Moses.+ 18 Sapos wanpela man i bikhet na i sakim olgeta tok yu givim long em, orait em i mas i dai.+ Tru tumas, yu mas strongim bel na sanap strong.”+