Bilip Long Ol Tok Promis Bilong God na Bihainim
“Mi wanpela tasol mi God, na i no gat narapela god moa . . . olsem mi i stap. Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem.”—AISAIA 46:9, 10.
1, 2. Ol man i gat wanem narapela narapela tingting long pasin bilong God long insait long ol samting i kamap long graun?
OLSEM WANEM? God i save insait long ol samting i kamap long graun? Ol man i gat narapela narapela tingting long dispela samting. Sampela man i ting, em i no save insait liklik long ol samting i kamap long graun. Ol i ting, God i bin wokim yumi na bihain em i no laik helpim yumi, o em i no inap helpim yumi. Long tingting bilong ol, God i olsem wanpela papa i save sindaunim pikinini man bilong em long wanpela nupela wilwil, na em i mekim wilwil i sanap gut, na em i subim wilwil bambai pikinini i ken kirap ran long rot. Bihain long dispela papa i lusim em na wokabaut i go. Manki yet i ran; ating em bai pundaun o nogat? Maski wanem samting bai painim em, papa i no inap helpim em moa.
2 Sampela man i gat narapela tingting, olsem: God i save stiaim olgeta samting long i stap bilong yumi, na em i save insait long olgeta samting i kamap long graun. Tasol sapos dispela tok em i tru, sampela bai ting olsem God i no save kamapim ol gutpela samting tasol, nogat; em i save kamapim tu ol pasin raskol na ol samting nogut i save painim ol man. Sapos yumi save tru long ol samting God i bin mekim, dispela bai helpim yumi long save long ol samting em i laik mekim. Na tu, dispela bai strongim bilip bilong yumi olsem ol tok promis bilong em bai kamap tru.—Hibru 11:1.
3. (a) Olsem wanem yumi save Jehova em i God bilong kamapim laik bilong em? (b) Bilong wanem Baibel i tok Jehova i save “mekim” ol samting bilong kamapim laik bilong em?
3 Bikpela samting long dispela askim olsem God i save insait long ol samting i kamap long ol man o nogat em olsem: Jehova em i God bilong kamapim laik bilong em. Dispela i kamap ples klia long nem bilong em. Insait bilong dispela nem “Jehova” i olsem “Em i Mekim i Kamap.” Jehova i wok long mekim ol samting, na long dispela rot em i kamap olsem Man i truim olgeta tok promis bilong em. Olsem na Baibel i tok Jehova i wok long “mekim” ol samting bilong kamapim laik bilong em long ol samting i kamap bihain. (2 King 19:25; Aisaia 46:11) Dispela tok ol i raitim olsem “mekim,” em i kam long wanpela tok Hibru (ya·tsarʹ), na i wankain liklik long wanpela tok, insait bilong en ‘man bilong wokim sospen graun.’ (Jeremaia 18:4) Olsem man i save gut long wokim sospen graun em i kisim hap graun malumalum na wokim wanpela naispela sospen graun long en, Jehova inap mekim, o stiaim, ol samting bilong kamapim laik bilong em.—Efesus 1:11.
4. Olsem wanem God i redim graun bambai ol man i ken i stap long en?
4 Olsem: God i laik bai graun i kamap wanpela naispela ples tru na ol man i gutpela olgeta na i bihainim tok bilong em ol bai stap long en. (Aisaia 45:18) Paslain tru long taim Jehova i bin wokim namba wan man na meri, em i redim gut ol samting bilong ol. Buk Stat sapta 1 na sapta 2 i stori long olsem wanem Jehova i wokim taim bilong san na nait, na graun na solwara. Bihain em i wokim ol diwai na sayor samting na ol animal. Planti tausen yia i lus bilong redim graun bambai ol man i ken i stap long en. Em i pinisim gut dispela wok. Em i sindaunim namba wan man na meri long gaden Iden, em wanpela gutpela ples paradais i gat olgeta samting long en bilong ol i ken i stap amamas. (Stat 1:31) Olsem na Jehova i bin insait tru long ol samting long dispela graun, na em i wok long mekim ol samting bilong kamapim laik bilong em i gutpela tru. Olsem wanem? Taim ol manmeri i kamap planti, dispela i senisim pasin bilong Jehova long insait long ol samting i kamap long graun?
Jehova i No Bosim Olgeta Samting Bilong Ol Man
5, 6. Bilong wanem God i no bosim olgeta samting bilong ol man?
5 Jehova i gat strong long stiaim na bosim olgeta liklik liklik samting ol man i mekim, tasol em i no mekim olsem. I gat as na em i no mekim. Wanpela em olsem: God i wokim ol man i kamap olsem em yet, na ol yet inap makim wanem rot ol i laik bihainim. Jehova i no subim yumi long bihainim laik bilong em; em i no bosim olgeta samting yumi mekim. (Lo 30:19, 20; Josua 24:15) Tru, God i save skelim yumi long ol samting yumi mekim, tasol long pasin sori em i larim yumi yet i makim planti samting yumi laik mekim long i stap bilong yumi.—Rom 14:12; Hibru 4:13.
6 Bikpela tok Satan i bin kamapim long gaden Iden, dispela em i narapela as na God i no save stiaim olgeta samting i wok long kamap. Satan i gat tok long God i stap bos. I olsem em i tokim Iv, rot i op na em i ken makim ol samting em i laik mekim—em samting em yet na bihain man bilong em, Adam, ol i orait long mekim. (Stat 3:1-6) Orait nau, inap bikpela hap taim God i larim ol manmeri i bosim ol yet bilong kamapim long ples klia olsem tok bilong Satan i stret o nogat. Olsem na yumi no ken tok em asua bilong God na ol man i mekim ol samting nogut long nau. Long ol man i bikhet Moses i tok: “Yupela i save senisim tok na brukim promis. Yupela i manmeri bilong mekim sin tasol. Olsem na yupela i no inap i stap lain pikinini bilong God.”—Lo 32:5.
7. Jehova i gat wanem laik long dispela graun na ol manmeri?
7 Tru, Jehova i larim ol manmeri i makim ol samting ol i laik mekim na ol i ken traim ol kain kain gavman bilong bosim ol yet, tasol i no olsem Jehova i no tingim moa ol samting i kamap long graun, nogat; sapos em i mekim olsem bai yumi no inap wetim em i truim ol tok promis bilong em. Tru, Adam na Iv i bikhet long wok bos bilong God, tasol Jehova i no senisim laik bilong em long ol samting bilong graun na ol manmeri. Em bai mekim graun i kamap wanpela paradais na ol man i gutpela olgeta na i amamas na i bihainim tok bilong em, ol bai stap long en. (Luk 23:42, 43) Ol stori bilong Baibel, kirap long Buk Stat i go inap long Buk Kamapim Tok Hait, ol i toktok long olsem wanem Jehova i bin wok i go bilong kamapim dispela laik bilong em.
God i Mekim Ol Samting Bilong Kamapim Laik Bilong Em
8. Bilong bringim ol Israel i go long Graun Bilong Promis, God i mas mekim wanem ol samting?
8 Long ol samting em i mekim long lain Israel, God i kamapim long ples klia olsem em bai kamapim laik bilong em. Olsem: Jehova i tokim Moses olsem Em bai kisim bek ol Israel long Isip na bringim ol i go long Graun Bilong Promis, em graun i gutpela tumas na i gat planti gris. (Kisim Bek 3:8) Dispela em i wanpela bikpela tok bilong strongim tru bel bilong ol. Ol Israel wantaim ol poroman bilong ol, ol i bikpela lain tru, inap olsem 3 milion, na bilong helpim ol long kamap fri Jehova i mas helpim ol long lusim wanpela strongpela lain i nolaik tru long larim ol i go. (Kisim Bek 3:19) Long kantri Jehova i laik bringim ol i go long en, i gat ol strongpela lain na ol bai i strong tru long sakim ol. (Lo 7:1) Na bilong go long dispela kantri, ol Israel i mas wokabaut long ples drai nating na ol i mas i gat kaikai na wara. Ol dispela samting i givim rot long Jehova long kamapim olsem em i gat bikpela strong na em i God tru.—Wok Pris 25:38.
9, 10. (a) Bilong wanem Josua inap tokaut olsem yumi ken bilip tru long ol tok promis bilong God? (b) Yumi bilip tru olsem God inap mekim gut long ol man i stap gut long em, na dispela em i bikpela samting olsem wanem?
9 God i kamapim sampela strongpela wok bilong helpim ol Israel long lusim Isip. Namba wan samting, em i kamapim 10-pela bikpela hevi long lain Isip. Bihain, em i brukim solwara Retsi, na dispela i opim rot long ol Israel i ranawe na ami bilong Isip i wok long raunim ol i bagarap. (Song 78:12, 13, 43-51) Na bihain long dispela, em i lukautim ol Israel taim ol i raun long ples drai nating inap 40 yia. Em i givim mana na wara long ol, na em i mekim na klos bilong ol i no bruk na lek bilong ol i no solap. (Lo 8:3, 4) Taim ol Israel i go insait pinis long Graun Bilong Promis, Jehova i helpim ol long daunim ol birua bilong ol. Josua, em man i gat strongpela bilip long ol tok promis bilong Jehova, em i lukim ol dispela samting long ai bilong em yet. Olsem na em inap tok tru long ol lapun bikman long taim bilong em olsem: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14.
10 Olsem Josua bilong bipo, ol Kristen long nau ol i bilip tru olsem God i amamas long mekim ol samting bilong helpim ol man i mekim wok bilong em na em inap long mekim olsem. Em i bikpela samting yumi gat kain strongpela bilip olsem. Aposel Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem . . . God i save mekim gut tru long ol man i wok long painim em.”—Hibru 11:6.
God i Save Long Ol Samting Bai Kamap Bihain
11. Wanem ol samting i mekim na God inap truim ol tok promis bilong em?
11 Orait, long ol samting yumi stori pinis long en, yumi kisim save olsem God i larim ol man i makim ol samting ol i laik mekim na em i larim ol man yet i bosim graun, tasol yumi kisim save tu olsem God i gat strong na laik long mekim ol samting bilong kamapim laik bilong em. Tasol i gat narapela samting moa i mekim na God inap truim ol tok promis bilong em. Jehova inap save long ol samting bai kamap bihain. (Aisaia 42:9) Long rot bilong profet bilong em, God i tok: “Yupela i mas tingim ol samting mi bin mekim bipo, long wanem, mi wanpela tasol mi God, na i no gat narapela god moa . . . olsem mi i stap. Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok. Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim dispela samting.” (Aisaia 46:9, 10) Man bilong wokim gaden em i save long wanem taim na long wanem hap em i mas planim pikinini kaikai, tasol em i no save kaikai bai kamap gutpela o nogat. Tasol “King bilong olgeta taim” em i gat stretpela save, olsem na em inap save tru long wanem taim na long wanem hap em i mas mekim wanpela samting bilong kamapim laik bilong em.—1 Timoti 1:17.
12. Jehova i save long ol samting bai kamap bihain, na olsem wanem em i bin mekim wok long dispela save long taim bilong Noa?
12 God i save long wanem samting bai kamap bihain, orait nau yumi ken tingim olsem wanem God i bin mekim wok long dispela save bilong em long taim bilong Noa. Ol pasin nogut i pulap long olgeta hap bilong graun, olsem na God i tingting long pinisim ol man i bikhet long em. Em i makim wanpela taim bilong mekim olsem—inap 120 yia bihain. (Stat 6:3) Bilong makim dispela taim, Jehova i no tingim tasol pasin bilong bagarapim ol man nogut, em samting em i ken mekim long olgeta taim. Dispela taim Jehova i bin makim, em i givim rot long ol stretpela man long abrusim bagarap. (Skelim wantaim Stat 5:29.) Long gutpela save na tingting bilong em, God i bin save long wanem taim em i mas givim wok long Noa na bihain pinis bai kamap. Em i givim save long Noa long ol samting em i mas mekim. Noa i mas wokim wanpela sip bambai ‘em wantaim meri pikinini bilong en ol i ken go insait long sip na stap gut,’ na God bai bagarapim ol man nogut long bikpela tait.—Hibru 11:7; Stat 6:13, 14, 18, 19.
Ol i Wokim Wanpela Traipela Samting Tru
13, 14. Bilong wanem dispela wok bilong wokim sip em i wanpela bikpela wok tru?
13 Noa i gat wanem tingting long dispela wok em i kisim? Noa em i man tru bilong God, olsem na em i save Jehova inap bagarapim ol man i givim baksait long Em. Tasol taim dispela samting i no kamap yet, i gat wanpela wok bilong mekim, na man i mas i gat bilip bilong mekim dispela wok. Em i wanpela bikpela wok tru long wokim dispela sip. God i kolim stret mak bilong en. Longpela bilong sip i winim ol bikpela hap graun bilong pilai soka long nau na em i go antap olsem wanpela haus i gat 5-pela plua. (Stat 6:15) Ol man i wokim sip ol i no gat save long dispela wok na ol i no planti. Na ol i no gat ol tul i wok long paua na ol narapela samting i stap long nau. Na Noa i no gat dispela save bilong Jehova long ol samting bai kamap bihain, olsem na Noa i no inap save long samting bai kamap long ol dispela yia, em ol samting inap helpim o pasim wok bilong em long wokim sip. Ating Noa i gat planti askim long dispela samting. Olsem wanem em bai kisim ol diwai samting bilong wokim sip? Olsem wanem em bai bungim ol animal? Em i mas kisim wanem kain kaikai na hamas kaikai? Long wanem taim stret dispela Tait God i bin tok profet long en bai kamap?
14 Na yumi ken tingim pasin na sindaun bilong ol manmeri long dispela taim. Pasin nogut i pulap long olgeta hap. Ol ensel nogut i maritim ol meri na kamapim ol pikinini man i traipela tru na ol i kolim ol Nefilim, na ol dispela traipela man i mekim na pasin pait na bagarapim man i go bikpela tru long graun. (Stat 6:1-4, 13) Noa i no inap haitim wok bilong em long wokim dispela bikpela sip. Ating ol man bai askim Noa long samting em i wokim, na em bai tokim ol. (2 Pita 2:5) Yu ting bai ol i orait long en? Ating nogat, a? Sampela yia paslain long dispela, gutpela man Enok i bin tokaut long God bai bagarapim ol man nogut. Ol man i nolaik tru long tok em i autim, olsem na God i “kisim em,” o pinisim laip bilong em, bambai ol birua bilong God i no ken kilim em i dai. (Stat 5:24; Hibru 11:5; Jut 14, 15) Noa tu i mas autim wanpela tok em ol man i no ken laikim, na em i mas wokim wanpela sip tu. Taim em i wok long wokim dispela sip, sip hia bai stap olsem wanpela bikpela mak ol man i ken lukim na ol bai save olsem Noa i bin stap gut long God maski em i stap namel long ol manmeri nogut!
15. Bilong wanem Noa i bilip olsem em inap long mekim dispela wok Jehova i bin givim long em?
15 Noa i save olsem God i Gat Olgeta Strong em i sambai long dispela wok ol i mekim na em i mekim gut long ol. Jehova yet i bin givim dispela wok long em. Em i bin tokim Noa olsem em na famili bilong em ol bai go insait long sip na God bai lukautim ol na ol i no ken bagarap long Bikpela Tait i kamap long olgeta hap bilong graun. Na God i mekim wanpela strongpela tok promis bilong makim olsem dispela samting bai kamap tru tru. (Stat 6:18, 19) Noa i luksave olsem Jehova i bin tingim na skelim olgeta samting paslain long taim em i givim dispela wok long em. Na Noa i save olsem Jehova inap helpim em sapos em i mas kisim helpim. Olsem na bilip i kirapim Noa long mekim wok. Olsem tumbuna pikinini bilong em Abraham, Noa i “save pinis olsem, God em inap mekim olsem em i bin promis long mekim.”—Rom 4:21.
16. Taim Noa i wokim sip, olsem wanem bilip bilong em i kamap strong?
16 Insait long ol yia Noa i wokim sip, bilip bilong em i kamap strong. Em i stretim ol hevi samting bilong wokim sip. Na em i winim ol hevi na traim. Ol pasin birua i no inap pasim dispela wok. Jehova i bin helpim famili bilong Noa na em i sambai long ol. Taim Noa i wok long mekim dispela wok, ol ‘samting i traim bilip bilong em i kamapim pasin bilong sanap strong na karim hevi.’ (Jems 1:2-4) Bihain sip i pinis, na Bikpela Tait i kamap, na Noa wantaim famili bilong em ol i abrusim bagarap. Noa i lukim truim bilong tok promis bilong God, olsem Josua i lukim long bihain. Noa i kisim gutpela samting tru long bilip bilong em.
Jehova i Helpim Wok
17. Olsem wanem taim bilong yumi i wankain olsem taim bilong Noa?
17 Jisas i tok profet olsem ol samting i kamap long taim bilong yumi bai i wankain olsem long taim bilong Noa. God i tingting gen long bagarapim ol man nogut na em i makim pinis taim bilong mekim olsem. (Matyu 24:36-39) Na em i redim ol samting pinis bambai ol stretpela man i ken abrusim bagarap. God i bin tokim Noa long wokim wanpela sip, tasol ol wokboi bilong God long nau ol i mas tokaut long ol samting Jehova i laik mekim, na ol i mas skulim ol man long Baibel, na kamapim disaipel.—Matyu 28:19.
18, 19. Bilong wanem yumi save Jehova i helpim wok bilong autim tok?
18 Sapos Jehova i no helpim na strongim Noa, Noa i no inap wokim sip. (Skelim wantaim Song 127:1.) Na i wankain tu long ol Kristen tru long nau—sapos Jehova i no helpim ol, ol i no inap abrusim bagarap, na tu, ol i no inap stap gutpela. Gamaliel, em wanpela Farisi na tisa bilong Lo long taim bilong ol aposel, em i luksave long dispela. Taim kaunsil bilong ol Juda i laik kilim i dai ol aposel, em i tokim ol long was gut: “Yupela i no ken mekim wanpela samting long ol dispela man. Nogat. Yupela i mas larim ol i stap. Sapos dispela wok ol i mekim em i kirap long tingting bilong ol man tasol, orait em bai i bagarap. Tasol sapos God yet i kirapim dispela wok, orait yupela bai i no inap pasim ol. Nogut yupela i pait long God!”—Aposel 5:38, 39.
19 Ol gutpela samting i kamap long wok bilong autim tok long taim bilong ol aposel na long nau, em i kamapim long ples klia olsem dispela i no wok bilong ol man, nogat, em wok bilong God. Long stori i kamap bihain long dispela bai yumi toktok long sampela gutpela samting tru i bin mekim na dispela wok i kamap gutpela long olgeta hap bilong graun.
No Ken Les!
20. Husat i helpim yumi taim yumi autim tok?
20 Tru yumi stap long ‘taim bilong las de na planti hevi nogut tru i kamap,’ tasol yumi inap save tru olsem Jehova i bosim olgeta samting. Em i save helpim na strongim lain bilong em taim ol i mekim ol wok bilong pinisim wok bilong autim gutnius paslain long taim God i bin makim bilong pinisim pasin nogut bilong dispela graun. (2 Timoti 3:1; Matyu 24:14) Jehova i singautim yumi long kamap “wanwok” bilong em. (1 Korin 3:9) Na tu, yumi bilip tru olsem Krais Jisas i sambai long yumi taim yumi mekim dispela wok na yumi ken bilip tru olsem ol ensel bai helpim na stiaim yumi.—Matyu 28:20; KTH 14:6.
21. Yumi no ken les long bilip long wanem samting?
21 Noa na famili bilong em ol i bilip long ol tok promis bilong Jehova, olsem na ol i abrusim bagarap long taim bilong tait wara. Ol man i gat wankain bilip long nau, ol inap abrusim bagarap long taim bilong “bikpela hevi tru” klostu bai kamap. (KTH 7:14, NW ) Yumi stap long wanpela taim i kirapim tru bel bilong yumi. Sampela bikpela samting tru bai kamap bihain! Klostu nau God bai kamapim nupela heven na nupela graun em stretpela pasin i stap long en. (2 Pita 3:13) Yu no ken les long bilip olsem ol samting God i tok long mekim, em bai mekim tru.—Rom 4:21.
Sampela Tok Bilong Tingim Gen
◻ Bilong wanem Jehova i no save bosim olgeta liklik liklik samting ol man i save mekim?
◻ Olsem wanem strong bilong Jehova long kamapim laik bilong em i kamap ples klia long ol samting em i mekim long ol Israel?
◻ Jehova inap save long ol samting bai kamap bihain, na olsem wanem dispela i kamap ples klia long taim bilong Noa?
◻ Yumi ken bilip olsem wanem long ol tok promis bilong God?