Tupela Brata i Kisim Narapela Narapela Tingting
OL SAMTING papamama i mekim, dispela i save stiaim tingting bilong ol pikinini bilong ol. Dispela i stret long nau, wankain olsem long gaden Iden bipo. Pasin bikhet bilong Adam na Iv i bin mekim bikpela samting long olgeta manmeri bilong graun. (Stat 2:15, 16; 3:1-6; Rom 5:12) Tasol sapos yumi laik, yumi olgeta wan wan i gat rot long pas gut wantaim Man i bin wokim yumi. Dispela samting i kamap ples klia long stori bilong Kein na Abel, em tupela brata i bin kamap long pastaim tru.
I no gat wanpela tok long Baibel i kamapim olsem God i bin toktok wantaim Adam na Iv bihain long em i rausim ol long Iden. Tasol Jehova i bin toktok long tupela pikinini man bilong ol. Ating long rot bilong papamama bilong ol, Kein na Abel i kisim save long ol samting i bin kamap long Iden. Ol inap ‘lukim ol strongpela ensel wantaim bainat i gat paia i lait long en na i save tanim tanim long olgeta hap na i was i stap, nogut wanpela man i go klostu long dispela diwai bilong givim laip.’ (Stat 3:24) Tupela i lukim tu olsem tok bilong God i kamap tru, olsem ol bai hatwok na karim pen long i stap bilong ol.—Stat 3:16, 19.
Ating Kein na Abel i bin save long tok Jehova i bin givim long Satan, olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Kein na Abel i gat sampela save long Jehova, na dispela inap helpim ol long kisim pasin God i orait long en.
Taim Kein na Abel i tingim tok profet bilong Jehova na ol gutpela pasin bilong em olsem Man bilong sori na mekim gut long ol man, dispela i mas kirapim ol na ol i laik bai God i orait long ol. Tasol ol bai wok long kisim dispela laik i go inap long wanem mak? Yu ting ol bai bihainim laik i stap long bel bilong ol long lotuim God na wok long kamap strong long ol samting bilong spirit bambai ol inap bilip strong long em?—Matyu 5:3.
Tupela Brata i Givim Ofa
Orait bihain Kein na Abel i givim ofa long God. Kein i givim ol kaikai bilong gaden, na Abel i givim ol namba wan pikinini sipsip mama i bin karim. (Stat 4:3, 4) Ating long dispela taim tupela i gat olsem 100 krismas samting, long wanem, Adam i gat 130 krismas taim em i kamapim pikinini man, em Set.—Stat 4:25; 5:3.
Ofa Kein na Abel i bin givim i kamapim olsem ol i luksave ol i sinman na ol i laik bai God i orait long ol. Ating ol i bin tingim tok promis bilong Jehova long samting bai kamap long snek na Pikinini bilong meri. Tasol Kein na Abel i bin lusim bikpela hap taim na strong long pas gut wantaim Jehova o nogat, em Baibel i no tok. Tasol samting God i mekim taim ol i givim pinis ofa long em, dispela i helpim yumi long save long tingting i stap long bel bilong ol.
Sampela saveman i tok Iv i ting Kein em dispela “pikinini” bai bagarapim snek, long wanem, taim em i karim Kein em i tok: “Bikpela i helpim mi na mi kisim pikinini man.” (Stat 4:1) Sapos Kein tu i ting olsem, tingting bilong em i kranki stret. Tasol Abel i bilip na mekim ofa, olsem na “God i laikim ofa bilong Abel, tasol em i no laikim ofa bilong Kein.”—Hibru 11:4.
Abel i gat gutpela save na tingting long ol samting bilong spirit na Kein nogat, tasol long sampela narapela samting tu dispela tupela brata i stap narapela narapela kain. Tupela i gat narapela narapela tingting. Olsem na “Bikpela i amamas long Abel na ofa bilong em, tasol em i no amamas long Kein na ofa bilong em.” Yumi ken ting Kein i no tingim tumas ofa bilong em na em i givim nating tasol. Tasol God i no laik ol man i lotu nating long em. Kein i bin kisim tingting nogut long bel, na Jehova i luksave long dispela samting. Samting Kein i mekim taim God i no orait long ofa bilong em, dispela i kamapim ples klia tingting bilong em. Kein i no wok long stretim tingting bilong em, nogat; em “i kros nogut tru, na pes bilong en i senis olgeta.” (Stat 4:5) Pasin bilong em i kamapim tingting na laik nogut bilong em.
Tok Lukaut na Pasin Em i Mekim
God i save long tingting bilong Kein, olsem na em i givim tok lukaut long em, olsem: “Watpo yu kros? Na watpo pes bilong yu i senis olgeta? Sapos yu mekim gutpela pasin, orait bai yu amamas, long wanem, mi orait long ofa bilong yu. Tasol sapos yu mekim pasin nogut, orait sin bai i redi long bagarapim yu. Sin i gat bikpela laik tru bilong winim yu. Tasol yu mas strong na winim em.”—Stat 4:6, 7.
Samting i bin kamap inap skulim yumi long sampela samting. Sin i redi long bagarapim yumi. Tasol God i bin wokim yumi bambai yumi yet i ken skelim wanem samting yumi laik mekim, na yumi ken makim stretpela rot long bihainim. Jehova i tokim Kein long “mekim gutpela pasin,” tasol Em i no subim Kein long senisim tingting bilong em. Kein i makim wanem rot em yet i laik bihainim.
Stori bilong Baibel i tok moa: “Bihain Kein i tokim Abel, brata bilong em long go wokabaut wantaim em. Na taim tupela i stap long ples kunai, Kein i paitim brata bilong em na kilim em i dai.” (Stat 4:8) Long dispela rot Kein i bikhet na kamap wanpela kilman. Em i no kamapim olsem em i bel hevi liklik taim Jehova i askim em: “We stap Abel, brata bilong yu?” Kein i no pilim liklik dispela pasin nogut bilong em, na long pasin bikhet em i tok: “Mi no save. Olsem wanem? Yu ting mi stap tasol bilong lukautim brata bilong mi?” (Stat 4:9) Dispela tok giaman na pasin bilong em long tok em i no bin mekim wanpela rong, dispela i kamapim klia olsem bel bilong Kein i nogut.
Jehova i givim strongpela tok long Kein na rausim em long hap klostu long Iden. Jehova i bin demim pinis graun, tasol ating em i demim moa yet graun bilong Kein, na taim Kein i wokim gaden, kaikai i no inap kamap. Em i mas kamap wanpela tripman na man i raun nating long graun. Kein i bel nogut long bikpela strafe em bai kisim, nogut ol man bai bekim indai bilong brata bilong em na kilim em i dai, tasol em i no bel hevi long rong em i bin mekim. Jehova i putim “wanpela mak” long Kein—ating em olsem wanpela tambu ol man bai save long en na ol bai bihainim na bai ol i no ken kilim em i dai bilong bekim pasin birua em i bin mekim.—Stat 4:10-15.
Orait nau “Kein i lusim Bikpela na i go i stap long wanpela hap graun ol i kolim ‘Raun Nabaut.’ Dispela graun i stap long hap sankamap bilong gaden Iden.” (Stat 4:16) Em i maritim wanpela susa bilong em o wanpela pikinini meri bilong brata bilong em, na em i wokim wanpela taun, nem bilong en Enok, olsem nem bilong namba wan pikinini bilong em. Tumbuna pikinini bilong Kein, em Lamek, em i kamap man bilong kros pait, wankain olsem tumbuna bilong em, Kein. Tasol God i pinisim lain bilong famili bilong Kein long Bikpela Tait long taim bilong Noa.—Stat 4:17-24.
Samting Dispela i Skulim Yumi Long En
Stori bilong Kein na Abel inap skulim yumi long sampela samting. Aposel Jon i tokim ol Kristen long narapela i mas laikim tru narapela. Ol i “no ken i stap olsem Kein. Em i man bilong Satan, na em i kilim i dai brata bilong en.” Kain i kilim Abel i dai, long wanem, “pasin bilong en em i nogut, na pasin bilong brata bilong en em i stretpela.” Na Jon i tok moa: “Man i no laikim tru brata bilong en na i bel nogut long em, i olsem em i kilim man i dai. Na yupela i save, man i kilim narapela man i dai, em i no kisim laip bilong i stap gut oltaim oltaim.” Tru tumas, pasin yumi mekim long wanwok Kristen bilong yumi, dispela i mekim sampela samting long pasin bilong yumi long pas gut wantaim God na long samting bai painim yumi long bihain. Yumi no inap i stap bel nogut long wanbilip bilong yumi na God bai orait long yumi, nogat tru.—1 Jon 3:11-15; 4:20.
Ating papamama i mekim wankain pasin taim ol i mekim bikpela long Kein na Abel, tasol Kein i no bilip long God. Em i bihainim laik bilong Satan, em ‘man bilong kilim ol man i dai, na em i papa tru bilong pasin bilong tok giaman.’ (Jon 8:44) Pasin bilong Kein i kamapim olsem yumi olgeta inap makim wanem rot yumi laik bihainim. Ol man i mekim sin long laik bilong ol yet ol i no inap pas gut wantaim God, na Jehova bai givim strafe long ol man i no tanim bel.
Tasol Abel i bilip long Jehova. Tru tumas, “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as God i laikim ol presen Abel i givim em. Na dispela i soim yumi olsem God i kolim em stretpela man.” Baibel i no kamapim wanpela tok Abel i bin mekim, tasol long pasin bilong em long bilip strong i olsem em i “autim tok yet” long yumi.—Hibru 11:4.
Abel em i namba wan man long wanpela longpela lain bilong ol manmeri i stap gut long God. Blut bilong em i ‘kapsait pinis long graun na i krai long God,’ na God i no lusim tingting long em. (Stat 4:10; Luk 11:48-51) Sapos yumi gat strongpela bilip olsem Abel, yumi tu bai pas gut wantaim Jehova inap oltaim oltaim.
[Blok long pes 22]
MAN BILONG WOKIM GADEN NA MAN BILONG LUKAUTIM SIPSIP
Pasin bilong wokim gaden na lukautim ol animal em sampela wok God i bin givim long Adam long pastaim tru. (Stat 1:28; 2:15; 3:23) Pikinini man bilong em, Kein, em i bin wokim gaden, na Abel i kamap man bilong lukautim ol sipsip. (Stat 4:2) I go inap long taim bilong Bikpela Tait, ol man i bin kaikai tasol ol prut na sayor samting, olsem na i gat wanem as na ol i lukautim ol sipsip?—Stat 1:29; 9:3, 4.
Bilong ol sipsip i ken kamap gutpela, ol i mas i gat man bilong lukautim ol. Wok Abel i mekim i kamapim long ples klia olsem kirap long bipo yet ol man i bin lukautim ol sipsip. Baibel i no kamapim olsem ol man bilong pastaim tru ol i bin mekim wok long susu bilong ol animal olsem kaikai bilong ol o nogat; tasol maski ol man i no save kaikai abus, ol inap mekim wok long gras bilong sipsip. Na taim wanpela sipsip i dai, ol man inap mekim gutpela wok long skin bilong en. Olsem: Jehova i bin givim “klos long skin bilong animal” long Adam na Iv.—Stat 3:21.
Maski ol manmeri long pastaim tru ol i bin mekim wanem wok long ol sipsip, yumi ken ting pastaim Kein na Abel i bin wok gut wantaim. Ol i bin mekim sampela wok i helpim ol narapela insait long famili long kisim klos na kaikai, em ol samting ol i mas kisim.
[Piksa long pes 23]
“Pasin bilong [Kein] em i nogut, na pasin bilong brata bilong en em i stretpela”