Ol Tisa Bilong Tok Bilong God Ol i Mas Mekim Wok Ol i Kisim
I NO longtaim i go pinis insait long sampela mun planti handet tausen tisa i bin bung bilong kisim skul. Kirap long mun Me long las yia, ol i bung long planti handet “Ol Tisa Bilong Tok Bilong God” Kibung Distrik bilong ol Witnes Bilong Jehova long olgeta hap. Kibung i kirapim ol dispela tisa long skulim ol yet bilong kamap gutpela tisa moa, na bilong mekim wok ol i kisim olsem tisa.
Yu bin i go long wanpela bilong ol dispela kibung? Sapos olsem, ating yu bin amamas long ol gutpela kaikai bilong spirit ol i bin tilim long dispela bung bilong lotuim trupela God, em Jehova. Orait nau yumi ken tingim gen dispela gutpela program bilong kibung bilong skulim yumi.
De Namba Wan—Tok Bilong Baibel i Gutpela Samting Tru Bilong Skulim Man
Long rot bilong dispela tok, “Yupela Ol Tisa Bilong Tok Bilong God, Yupela i Mas Kisim Skul,” siaman bilong kibung i tok welkam long olgeta lain i kam bung. Jisas Krais i kisim skul long Jehova em “Nambawan Tisa,” na Jisas i kamap Bikpela Tisa. (Aisaia 30:20; Matyu 19:16) Sapos yumi laik kamap gutpela tisa bilong Tok Bilong God, orait yumi mas larim Jehova i skulim yumi.
Tok i kamap bihain long en, em “Pasin Bilong Skulim Ol Man Long Kingdom i Karim Gutpela Kaikai.” Long rot bilong inteviu ol i mekim wantaim sampela gutpela tisa bilong Tok Bilong God, ol tisa i stori long amamas na gutpela blesing ol i kisim long wok bilong kamapim disaipel.
Wanpela tok bilong kirapim tingting i kamap bihain long dispela, nem bilong en “ ‘Ol Strongpela Wok Bilong God’ i Kirapim Yumi.” Long taim bilong ol aposel “ol strongpela wok” bilong Kingdom bilong God i kirapim ol man long mekim ol samting. (Aposel 2:11) Yumi tu inap kirapim ol manmeri long mekim ol samting sapos yumi kamapim ol “strongpela wok” kain olsem ol tok bilong Baibel long ofa bilong Jisas long baim bek yumi, kirap bek, na nupela kontrak.
Narapela tok i strongim olgeta long “Amamas Long Stretpela Pasin Bilong Jehova.” (Song 35:27) Dispela tok i helpim yumi long lain long bihainim stretpela pasin. Yumi inap kisim dispela pasin sapos yumi laikim tru stretpela pasin na nolaik tru long pasin nogut. Pasin bilong stadi long Baibel, na pasin bilong wok strong long sakim ol samting bilong bagarapim yumi long ol samting bilong spirit, na pasin daun bai helpim yumi long mekim olsem. Ol dispela samting bai lukautim yumi na yumi ken abrusim pasin bilong poromanim ol lain i no bihainim gutpela pasin, na pasin bilong dispela graun long laikim planti mani kago, na pasin bilong laikim ol stori nogut i stap long ol piksa wokabaut, TV na buk samting, em ol stori i gat pasin pamuk na pait long en.
As tok bilong kibung, nem bilong en “Yumi Inap Tru Long Stap Olsem Ol Tisa Bilong Tok Bilong God,” i helpim yumi long tingim olsem long rot bilong Baibel, spirit holi bilong em, na oganaisesen bilong em hia long graun, Jehova i mekim yumi i kamap ol wokman bilong em i gat save. Long pasin bilong mekim wok long tok bilong God, man i mekim tok i stori olsem: “Yumi laik bai tok bilong Baibel i ken i go daun long bel bilong ol man i harim tok.”
Nem bilong namba wan tok i gat 3-pela hap, em “Skulim Yumi Yet Taim Yumi Skulim Ol Narapela.” Namba wan hap i kamapim olsem yumi yet i mas bihainim stretpela pasin Kristen em yumi save skulim ol man long en. Namba tu hap i helpim yumi long “autim stret tok tru bilong God.” (2 Timoti 2:15) Bilong skulim yumi yet, em i bikpela samting long mekim gut stadi bilong yumi yet long olgeta taim, maski yumi bin mekim wok bilong God inap planti yia pinis. Laspela hap bilong dispela tok i gat tripela hap i kamapim olsem Satan i wok long lukluk long yumi bilong pundaunim yumi long ol pasin olsem pasin antap, na tingting olsem yumi yet inap bosim wokabaut bilong yumi, jeles, bel kaskas, pasin bilong bel nogut, na kros kros long ol samting, na i gat tok long pasin bilong ol narapela. Tasol sapos yumi strong long sakim Satan, em bai lusim yumi na ranawe. Yumi mas i go klostu long God bambai yumi inap sakim Satan.—Jems 4:7, 8.
Tok i kamap long taim stret bilong kisim, nem bilong en “Yumi Mas Nolaik Tru Long Lukim Ol Piksa Nogut Bilong Pasin Sem,” em i kamapim long yumi ol rot bilong winim dispela samting nogut em inap bagarapim yumi long ol samting bilong spirit. Profet Habakuk i stori long Jehova olsem: “Mi save yu stret olgeta na yu mas kotim ol man i save mekim pasin nogut na bekim pe nogut long ol.” (Habakuk 1:13) Yumi mas “givim baksait tru long pasin nogut.” (Rom 12:9) Ol i tokim ol papamama long skelim gut ol samting ol pikinini i lukim long Intenet na TV. Man i mekim tok i stori olsem ol man i kalabus long lukim ol piksa nogut i gat pasin sem, ol i mas i go long wanpela pren i strong long ol samting bilong spirit bilong kisim helpim. Em i gutpela long putim gut long tingting na tingim tingim long bel ol kain tok olsem Song 97:10; Matyu 5:28; 1 Korin 9:27; Efesus 5:3, 12; Kolosi 3:5; na 1 Tesalonaika 4:4, 5.
Narapela tok, “Larim Bel Isi Bilong God i Lukautim Yu,” i strongim yumi olsem taim yumi tingting planti long ol samting, yumi ken putim hevi bilong yumi long han bilong Jehova. (Song 55:22) Sapos yumi kamapim hevi bilong yumi long rot bilong beten, bai yumi kisim “bel isi God i save givim,” em pasin bilong i stap bel isi tru na bel i malolo, na dispela samting i save kamap long pasin bilong pas gut wantaim Jehova.—Filipai 4:6, 7.
Namba wan de bilong kibung i pinis long rot bilong wanpela tok nem bilong en, “Jehova i Givim Lait Long Lain Bilong Em na Ol i Kamap Nambawan Tru,” na dispela tok i stori gut long truim bilong Aisaia sapta 60. Long taim bilong tudak bilong dispela graun, “ol man bilong ol arapela kantri”—em ol bikpela lain manmeri i olsem sipsip—ol wantaim ol Kristen God i bin makim long spirit ol i kisim lait bilong Jehova. Man i mekim tok i stori long Aisaia sapta 60 ves 19 na 20, na em i tok: “Jehova bai no go ‘daun’ olsem san na mun i save mekim. Em bai wok long givim lait long lain bilong em na mekim ol i kamap nambawan tru. Dispela tok i strongim tru bel bilong yumi ol man i stap long taim bilong las de bilong dispela graun i stap long tudak!” Long pinis bilong dispela tok, man i mekim tok i toksave long wanpela nupela buk Isaiah’s Prophecy—Light for All Mankind, Volium 2. Yu ritim pinis dispela nupela buk?
De Namba 2—Yumi Inap Long Skulim Ol Narapela Man
Long de namba 2 bihain long stori bilong teks bilong de, yumi putim gut yau long namba tu tok i gat 3-pela hap, nem bilong en “Long Rot Bilong Ol Wokman Bilong God Ol Man i Kamap Bilipman.” Ol man i mekim dispela tok i gat 3-pela hap i kamapim 3-pela samting yumi mas mekim bilong helpim ol man long kamap bilipman—autim tok bilong Kingdom, go bek na helpim ol man i laik harim tok, na skulim ol man i givim bel long harim tok long bihainim tok Krais i givim long yumi. Ol i bin givim askim long sampela na mekim soim, na dispela i helpim yumi long luksave long olsem wanem yumi ken lainim ol narapela long kamap disaipel.
Narapela tok i kamap, nem bilong en “Bungim Pasin Bilong Sanap Strong na Karim Hevi Wantaim Pasin Bilong Wokabaut Long Pasin Bilong God.” Man i mekim dispela tok i kamapim klia olsem em i bikpela samting tru long “stap strong inap long las de.” (Matyu 24:13) Yumi mas mekim wok long olgeta samting God i givim yumi—olsem beten, mekim stadi bilong yumi yet, go long ol miting, na mekim wok autim tok—bilong kamapim pasin bilong wokabaut long pasin bilong God. Yumi mas strong long pasim ol laik nogut bilong dispela graun na ol wok bilong en na bai ol i no ken bagarapim pasin bilong yumi long wokabaut long pasin bilong God.
Ol manmeri i hatwok tru na karim bikpela hevi, olsem wanem ol i ken kisim nupela strong nau long taim bilong yumi? Wanpela tok, nem bilong en “Kisim Nupela Strong Aninit Long Plang Bilong Krais,” i bekim dispela askim. Jisas i singautim ol disaipel bilong em long kam aninit long plang bilong em na kisim save long em. (Matyu 11:28-30) Yumi ken kam aninit long plang bilong Jisas taim yumi bihainim pasin bilong em long kisim liklik samting tasol bilong skin, na no ken tingting tumas long kisim planti samting. Bikpela tingting bilong dispela tok i kamap ples klia long rot bilong ol inteviu wantaim sampela brata sista em ol i bin lusim sampela samting long i stap bilong ol na kisim liklik samting tasol bilong skin.
Wanpela bikpela samting long ol bikpela bung bilong ol Witnes Bilong Jehova em baptais bilong ol nupela wokman bilong God i dediket pinis. Brata i mekim dispela tok “Baptais i Opim Rot Long Mekim Bikpela Wok Moa Bilong Autim Tok,” em i tok welkam long ol man i laik kisim baptais na em i singautim ol long insait long sampela bikpela wok moa bilong autim tok. Ol man i kisim baptais nupela na winim ol mak Baibel i kolim ol i ken wok strong long kisim sampela wok insait long kongrigesen.
“Bihainim Pasin Bilong Bikpela Tisa” em nem bilong namba wan tok long belo bek. Inap planti bilion yia long heven Jisas i wok long lukluk gut long pasin bilong Papa bilong em na em i bihainim, olsem na em i kamap Bikpela Tisa. Taim em i stap long graun em i yusim ol gutpela pasin bilong skulim ol man em ol i save pilim gut, olsem em i save kamapim ol askim i sutim tru bel bilong ol man i harim tok na em i mekim ol tok piksa long ol samting ol man i save long en bilong helpim ol long kisim gut insait bilong tok bilong em. Tok Bilong God i stap olsem as bilong tok em i skulim ol man long en na em i givim bel long mekim tok, na mekim long pasin sori, na mekim tok olsem man i gat namba. Olsem wanem? Dispela i bin kirapim yumi long bihainim pasin bilong Bikpela Tisa?
Narapela gutpela tok, “Yu Gat Laik Long Helpim Ol Narapela?,” em i strongim bel bilong yumi long bihainim pasin bilong Jisas long mekim wok bilong helpim ol narapela. (Jon 13:12-15) Man i mekim tok i kirapim ol brata i winim mak long kisim pasin bilong Timoti long painim rot bilong helpim ol narapela. (Filipai 2:20, 21) Em i strongim ol papamama long bihainim pasin bilong Elkana na Hana long helpim ol pikinini bilong ol long mekim wok bilong God fultaim. Na em i tokim ol yangpela long bihainim pasin bilong Jisas Krais na yangpela Timoti na ol yet i mas laik long mekim wok bilong God. (1 Pita 2:21) Na tu, tok bilong ol man em ol i bin redi long helpim ol narapela long taim rot i op i kirapim tru yumi.
Nem bilong namba tri tok i gat 3-pela hap em “Larim Skul i Kam Long God i Helpim Yumi Moa Yet.” Man i mekim namba wan hap bilong dispela tok em i kamapim klia olsem em i bikpela samting long putim tingting olgeta i go long samting yumi lainim. Bilong winim dispela mak, pastaim yumi ken kirap mekim sotpela stadi bilong yumi yet na bihain mekim stadi i go longpela liklik. Na tu, em i kirapim odiens long lukim ol skripsa long Baibel bilong ol na raitim sampela tok long taim bilong miting. Man i mekim namba tu hap bilong dispela tok em i kirapim yumi long holimpas pasin bilong mekim stretpela tok tasol. (2 Timoti 1:13-14) Bilong lukautim yumi na bai ol samting i no ken bagarapim yumi—olsem ol stori nogut long TV na nius samting, tingting bilong ol saveman bilong graun na ol saveman i skelim skelim tok bilong Baibel, na ol tok bilong ol man i tromoi bilip—yumi mas makim hap taim bilong mekim stadi bilong yumi yet na go long ol miting. (Efesus 5:15, 16) Man i mekim laspela hap bilong dispela tok i kamapim klia olsem yumi mas bihainim ol samting yumi lainim bambai olgeta skul tiokratik yumi kisim i ken helpim tru yumi.—Filipai 4:9.
Yumi bin amamas tru long harim tok “Ol Nupela Samting Bilong Helpim Yumi Kamap Strong Long Samting Bilong Spirit”! Yumi amamas long harim olsem wanpela nupela buk nem bilong en “Kisim Helpim Long Skul Tiokratik Bilong Autim Tok” bai kamap liklik taim bihain. Yumi gat laik tru long kisim dispela buk taim man i mekim tok i stori long ol tok i stap insait long en. Taim em i stori long wanpela hap bilong buk i gat ol tok bilong givim tok kaunsel, em i tok: “Dispela nupela buk i no bihainim tingting bilong ol man na kamapim ol dispela 53 stadi bilong helpim man long ritim gut tok, na toktok long ol man, na mekim gutpela wok tisa, nogat. Dispela buk i save bihainim pasin Baibel i kamapim long mekim ol dispela samting.” Buk bai stori long pasin bilong ol profet, na Jisas, na ol disaipel long skulim gut ol man. Tru tumas, dispela buk na ol nupela pasin bilong mekim Skul Tiokratik Bilong Autim Tok bai lainim yumi gut long kamap gutpela tisa bilong Tok Bilong God.
Namba 2 de i gat narapela gutpela samting long ol man i kam bung long kibung. Ol i kisim nupela buk Putim Yau Long Tok Profet Bilong Daniel! long Hiri Motu na Tok Pisin. Dispela buk long ol tok profet bilong Daniel bai kirapim yumi long laikim moa yet tok bilong God na em bai helpim yumi long save gut long ol tok profet bilong Baibel em truim bilong planti i kamap pinis. Na tu, i gat planti samting yumi inap lain long en bilong helpim yumi yet taim yumi putim gut yau long ol tok profet bilong Daniel na ol truim bilong en.
De Namba 3—Tingim Dispela Taim Yumi Stap Long En na Stap Olsem Tisa
Bihain long stori bilong teks bilong de long laspela de bilong kibung, olgeta i putim gut yau long laspela tok i gat 3-pela hap, nem bilong en “Tok Profet Bilong Malakai i Redim Yumi Long De Bilong Jehova.” Malakai i mekim tok profet wan handet yia samting bihain long ol Juda i lusim Babilon na i kam bek long ples bilong ol. Ol i tromoi lotu i tru na kirap mekim pasin nogut, ol i daunim nem bilong Jehova, ol i givim baksait long ol stretpela lo bilong em, na bagarapim tempel taim ol i ofaim ol animal i aipas, lek nogut, na i gat sik. Ol i katim marit wantaim ol meri ol i bin maritim taim ol i yangpela, na ating ol i mekim olsem bilong ol i ken maritim ol meri bilong ol narapela ples.
Namba wan sapta bilong tok profet bilong Malakai i tokim yumi olsem Jehova i save laikim tru ol manmeri bilong em. Em i kamapim olsem yumi mas pret long God, na yumi mas soim olsem yumi tingim tru ol samting i holi. Jehova i laik bai yumi givim ol nambawan gutpela samting bilong yumi long em, na pasin bilong laikim tumas Jehova i mas kirapim yumi long lotuim em, pasin mangal, nogat. Yumi no ken lotuim God long skin tasol, na God bai skelim olgeta samting yumi mekim.
Man i mekim namba tu hap i stori long olsem wanem sapta 2 bilong Malakai i stret long taim bilong yumi, na em i mekim wanpela askim olsem: “Olsem wanem? Yumi save was gut, nogut yumi mekim ‘pasin nogut’ olsem mekim ol tok i no stret?” (Malakai 2:6) Ol brata i go pas long lainim ol man ol i mas skelim gut olsem tok bilong ol i stret wantaim Tok Bilong God. Yumi mas nolaik tru long kain pasin nogut olsem pasin bilong katim nating marit.—Malakai 2:14-16.
Laspela hap bilong ol tok i gat 3-pela hap, nem bilong en “Husat Bai Abrusim Bagarap Long De Bilong Jehova?” na man i mekim dispela tok i helpim yumi long redi long de bilong Jehova. Em i tok: “Ol wokman bilong Jehova i save olsem bikpela truim bilong Malakai sapta 3, ves 17, i kamap long ol, na dispela i mekim gut bel bilong ol! [Jehova bilong ol bikpela lain ami] i tok: ‘Dispela ol lain bai i stap lain bilong mi tasol. Long dispela bikpela De mi bin makim, bai ol dispela lain i stap manmeri tru bilong mi. Na bai mi marimari long ol olsem wanpela papa i save marimari long pikinini i mekim wok bilong papa.’ ”
Narapela bikpela samting long dispela kibung em wanpela pilai nem bilong en “Rispektim Wok Bos Bilong Jehova,” na em i stori long ol pikinini bilong Kora. Maski papa bilong ol i bikhet long Moses na Aron, ol i stap gut long Jehova na ol man em i makim. Kora na ol lain bilong em i bagarap, tasol ol pikinini bilong em i abrusim bagarap. Tok i kamap bihain long en, “Stap Gut Aninit Long Wok Bos Bilong God,” i stori long olsem wanem ol tok bilong dispela pilai i stret long yumi. Man i mekim dispela tok i kolim 6-pela samting Kora na ol lain bilong em i bin pundaun long en, olsem: Ol i no bin helpim wok bos bilong Jehova; ol i gat pasin antap, na ol i tingting strong long kisim namba, na ol i jeles; ol i tingim tingim popaia bilong ol man Jehova i makim; ol i wok long kisim pasin bilong toktok planti; ol i no amamas moa long ol gutpela wok ol i mekim; na ol i putim ol pren na famili i stap namba wan na pasin bilong i stap gut long Jehova i stap namba tu.
Nem bilong pablik-tok em “Husat Ol i Wok Long Skulim Olgeta Lain Long Tok i Tru?” Tok i tru dispela pablik-tok i stori long en, em i no makim kain kain tok i tru, nogat; em tok i tru long laik bilong Jehova, na taim Jisas i autim tok em i kamapim dispela tok i tru. Man i mekim tok i stori olsem dispela em i tok i tru bilong ol samting bilong bilip, tok i tru bilong pasin yumi mas bihainim bilong lotuim God, na tok i tru i toktok long pasin yumi mas bihainim. Taim yumi skelim olsem dispela pasin i bin stap long ol Kristen bilong bipo na long ol Witnes Bilong Jehova long nau, dispela i strongim tingting bilong yumi olsem “God i stap namel long [yumi].”—1 Korin 14:25.
Taim ol i skelim pinis stori bilong Wastaua bilong dispela wik, brata i mekim laspela tok bilong kibung, nem bilong en “Wok Strong Long Mekim Wok Tisa Bilong Yumi.” Dispela tok i kirapim tru ol tisa bilong tok bilong God i kam bung long mekim wok. Ol i riviu liklik long ol tok bilong program na kamapim olsem em i bikpela samting long yusim Baibel taim yumi skulim ol man, na long ol rot yumi ken bihainim bilong kamap gutpela tisa, na yumi mas bilip long dispela tok i tru yumi skulim ol man long en. Man i mekim tok i kirapim yumi long mekim ‘pasin bilong yumi i kamap gutpela tru,’ na ‘yumi was gut long ol pasin bilong yumi yet na long wok yumi mekim bilong skulim ol manmeri.’—1 Timoti 4:15, 16.
Man! Yumi kisim planti gutpela kaikai bilong spirit long “Ol Tisa Bilong Tok Bilong God” Kibung Distrik! Olsem na em i gutpela sapos yumi bihainim pasin bilong Nambawan Tisa bilong yumi, em Jehova, na Bikpela Tisa bilong yumi, Jisas Krais, long skulim ol narapela long tok bilong God.
[Blok/Ol Piksa long pes 28]
Ol i Kisim Ol Nupela Buk Samting
Ol man i go long “Ol Tisa Bilong Tok Bilong God” Kibung Distrik, ol i amamas tru long kisim fopela buk samting bilong helpim ol long skulim ol man long hap bilong ol long tok i tru bilong Baibel. Liklik nius, nem bilong en Yu Ting Yu Gat Wanpela Spirit i No Save Dai?, i gutpela bilong kirapim tok wantaim ol man bilong ol hap em tok ples bilong ol i no kamapim klia mining bilong dispela tok “spirit.” Dispela nupela nius i kamapim klia olsem spirit i stap insait long man, em strong bilong laip, na taim man i dai, spirit bilong em i no go long wanpela ples spirit. Na tu, ol i kisim narapela liklik nius, nem bilong en Yu Laik Kisim Sampela Save Moa Long Baibel? Dispela liklik nius i toksave long ol man i no Witnes olsem yumi save mekim Baibel-stadi wantaim ol man, no gat pe; na em bai helpim ol pablisa i hatwok long kirapim ol Baibel-stadi. Long Sarere ol i toksave long wanpela nupela buklet long tok Inglis, nem bilong en, “A Satisfying Life−How to Attain It.”
Long namba 3 de bilong kibung ol i kisim buklet Ol Witnes Bilong Jehova—Ol i Husat? Ol i Bilip Long Wanem Samting?, long Hiri Motu na Tok Pisin. Dispela buklet i stori gut long ol bilip bilong ol Witnes Bilong Jehova na olsem wanem ol i stretim gut wok bilong ol. Na tu, em i bekim ol askim ol man i save kamapim. Olsem wanem? Yu bin mekim wok long ol dispela nupela buk samting taim yu autim tok?
[Ol Piksa long pes 26]
Long Milan, Itali, na long planti narapela kibung long olgeta hap, inap planti handet manmeri i kisim baptais
[Piksa long pes 29]
Pilai “Rispektim Wok Bos Bilong Jehova,” i bin kirapim tru bel bilong ol man i kam bung