Helpim Ol Long Kam Bek Long Lain Sipsip

“Yupela amamas wantaim mi! Wanpela sipsip bilong mi em i lus, na mi painim na kisim bek pinis!”​​—LU. 15:6.

 1. Olsem wanem Jisas i bin kamapim klia olsem em i gutpela wasman?

PIKININI bilong Jehova, Jisas Krais, em “strongpela Wasman bilong ol sipsip.” (Hi. 13:20) Baibel i tok profet long em bai kam na i soim tu olsem em i wanpela Wasman i narapela kain, em i kam bilong painim ‘ol sipsip i lus,’ em ol i bilong lain Israel. (Mt. 2:​1-6; 15:24) Na tu, wankain olsem wanpela wasman inap lusim laip bilong em bilong lukautim ol sipsip bilong em, Jisas i bin i dai olsem ofa bilong helpim ol manmeri i kain olsem sipsip em ol i bilip long dispela ofa.​​—Jo. 10:​11, 15; 1 Jo. 2:​1, 2.

 2. Ating wanem samting i bin mekim na sampela Kristen i no bung moa wantaim kongrigesen?

² Sori tru, sampela i luk olsem ol i bin pilim tru ofa bilong Jisas na ol i dediket pinis long God, ol i no bung moa wantaim kongrigesen Kristen. Ating bel hevi, sik, o sampela arapela samting i bin daunim laik bilong ol long mekim wok na ol i no bung moa wantaim lain bilong God. Tasol i gat wanpela rot tasol bilong ol i ken kisim dispela bel isi na amamas em Devit i stori long en long Song 23. Dispela rot i olsem: Ol i mas insait long lain sipsip bilong God. Devit i tok: “Bikpela em i wasman bilong mi. Olsem na mi no inap sot long wanpela samting.” (Sng. 23:1) Ol manmeri i stap insait long lain sipsip bilong God ol i no sot long wanpela samting, ol i gat olgeta samting ol i mas i gat bilong ol i ken pas gut wantaim God. Tasol i no olsem long ol sipsip i lus. Husat i ken helpim ol? Olsem wanem ol inap kisim helpim? Wanem ol samting stret inap helpim ol long kam bek long lain sipsip?

Husat i Ken Helpim Ol?

 3. Olsem wanem Jisas i kamapim klia samting man i mas mekim bilong helpim ol sipsip bilong God em ol i lus?

³ Ol lain i laik helpim ol sipsip bilong God em ol i lus, ol i mas taitim bun. (Sng. 100:​3) Jisas i kamapim klia dispela samting taim em i tok: “Sapos wanpela man i gat 100 sipsip, na sapos wanpela sipsip i lus, ating bai em i no wok long painim, a? Nogat. Bai em i lusim ol 99 sipsip i stap long maunten, na bai em i go painim dispela wanpela sipsip i lus. Mi tok tru long yupela, sapos em i kisim sipsip pinis, orait bai em i amamas moa yet. Em i save amamas long ol 99 sipsip i no bin lus, tasol taim em i kisim bek dispela wanpela sipsip i bin lus, amamas bilong en bai i moa moa yet. Olsem tasol Papa bilong yupela i stap long heven em i no laik bai wanpela bilong ol dispela liklik pikinini i lus.” (Mt. 18:​12-​14) Husat i ken helpim ol man i kain olsem sipsip em ol i bin lusim lain sipsip?

4, 5. Ol elda i mas i gat wanem tingting long lain sipsip bilong God?

⁴ Bilong ol elda Kristen i ken helpim ol sipsip i lus, ol i mas tingim dispela samting: ‘Lain sipsip bilong God’ ol i wanpela lain manmeri i dediket pinis long Jehova na ol i dia tumas long ai bilong em. (Sng. 79:13) Ol gutpela wasman i mas tingim na lukautim gut ol dispela sipsip. Taim ol i mekim ol sepeding visit long ol long gutpela pasin pren, dispela inap helpim gut ol. Ol gutpela tok em wasman i givim long ol, dispela inap strongim bilip bilong ol na kirapim ol long kam bek long lain sipsip.​​—1 Ko. 8:1.

⁵ Ol wasman bilong lain sipsip bilong God ol i gat wok long painim ol sipsip i lus na ol i mas traim long helpim ol. Aposel Pol i kirapim ol elda Kristen long Efesus long tingim wok bilong ol long lukautim ol sipsip taim em i tok: “Yupela i mas was gut long yupela yet, na long olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God.” (Ap. 20:28) Aposel Pita tu i tokim ol elda: “Yupela i mas lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim dispela wok . . . Yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok. Yupela i no ken i stap olsem ol bikman na daunim dispela ol manmeri God i bin putim long han bilong yupela. Nogat. Yupela i mas mekim gutpela pasin tasol, bai ol i ken lukim na bihainim.”​​—1 Pi. 5:​1-3.

 6. Bilong wanem i gat bikpela wok moa long ol wasman i mas lukautim ol sipsip bilong God long nau?

⁶ Ol wasman Kristen i mas bihainim pasin bilong “gutpela wasman bilong ol sipsip,” em Jisas. (Jo. 10:11) Em i bin wari long ol sipsip bilong God, na em i kamapim klia olsem em i bikpela samting long lukautim ol taim em i tokim Saimon Pita long ‘was long ol sipsip bilong Em.’ (Ritim Jon 21:​15-​17.) Long nau i gat bikpela wok moa long was long ol sipsip, long wanem, Satan i wok strong moa yet long kirapim ol bratasista i dediket pinis long God long lusim pasin bilong ol long stap gut long Em. Satan i mekim wok long ol pasin kranki bilong ol na ol samting bilong dispela graun long pulim ol sipsip bilong Jehova long mekim sampela pasin i no stret. (1 Jo. 2:​15-​17; 5:​19) I no hatwok tumas long Satan i paulim ol sipsip i no kam moa long ol miting, olsem na ol i mas i gat helpim na bai ol i ken “larim Holi Spirit i stiaim wokabaut” bilong ol. (Ga. 5:​16-​21, 25) Bilong ol wasman i ken helpim ol dispela sipsip, ol i mas beten askim God long holi spirit i ken stiaim ol, na ol i mas i gat save tru long mekim wok long Baibel.​​—Snd. 3:​5, 6; Lu. 11:13; Hi. 4:​12.

 7. Pasin bilong lukautim ol sipsip i stap aninit long lukaut bilong ol elda i bikpela samting olsem wanem?

⁷ Ol wasman long Israel bipo ol i save yusim wanpela kain stik bilong stiaim ol sipsip bilong ol, na taim ol sipsip i go insait long banis o lusim banis, wasman i save mekim wok long dispela stik bilong “kaunim” ol. (Wkp. 27:32; Mai. 2:​12) Olsem tasol, wasman Kristen i mas save gut long ol wan wan bilong lain sipsip bilong God i stap aninit long lukaut bilong em. (Skelim Sindaun 27:23.) Olsem na wok wasman em i wanpela bikpela samting tru lain elda i save toktok long en. Ol i stretim rot bilong helpim ol sipsip i lus. Jehova yet i tok em bai painim ol sipsip bilong em na lukautim ol. (Ese. 34:11) Olsem na God i amamas taim ol elda i wok long painim ol sipsip i lus na helpim ol long kam bek long lain sipsip.

 8. Wanem sampela samting ol elda i ken mekim bilong helpim ol sipsip?

⁸ Taim wanpela wanbilip i gat sik na wanpela wasman bilong lain sipsip bilong God i go lukim em, dispela inap strongim bel bilong sikman na mekim em i belgut tru. Na i wankain tu taim wasman i go lukim wanpela sipsip i stap nogut tru long sait bilong spirit. Ol elda i ken ritim sampela skripsa, skelim wanpela stori long Wastaua o Kirap!, stori long sampela bikpela tok i bin kamap long ol miting, beten wantaim em, na mekim ol kain samting olsem. Ol i ken stori gut olsem ol bratasista bai amamas tru long lukim em i kam bek long ol miting. (2 Ko. 1:​3-7; Jem. 5:​13-​15) Pasin bilong i go lukim em, ringim em, o salim pas, dispela inap helpim tru em. Na taim elda i mekim sampela wok bilong helpim sipsip i lus, dispela inap givim bikpela amamas long elda yet.

Yumi Olgeta i Ken Helpim Ol

9, 10. Olsem wanem yumi ken tok olsem wok bilong helpim ol sipsip i lus em i no samting ol elda tasol i mas mekim?

⁹ Yumi stap long wanpela taim nogut na i gat planti samting bilong mekim, olsem na taim isi isi wanpela wanbilip i wok long lusim kongrigesen, ating yumi no luksave long dispela. (Hi. 2:1) Tasol ol sipsip bilong Jehova ol i dia tumas long ai bilong em. Olgeta wan wan i gutpela samting, wankain olsem ol wan wan hap bilong bodi bilong man i gutpela samting. Olsem na yumi olgeta i mas tingim tru ol brata bilong yumi na lukautim gut ol. (1 Ko. 12:25) Olsem wanem? Yu yet i gat dispela tingting long ol?

¹⁰ Tru, ol elda i save go pas long wok bilong painim na helpim ol sipsip i lus, tasol pasin bilong tingim ol dispela wanbilip, em i no samting ol wasman Kristen tasol i mas mekim, nogat. Ol narapela tu i ken wok wantaim ol dispela wasman. Yumi inap strongim bel bilong ol brata na sista em ol i mas kisim helpim long kam bek long lain sipsip, na i gutpela sapos yumi mekim olsem. Yumi ken helpim ol olsem wanem?

11, 12. Olsem wanem yu inap helpim wanpela wanbilip i bin lusim kongrigesen?

¹¹ Ating ol elda bai askim sampela strongpela pablisa long stadi long Baibel wantaim sampela wanbilip em ol i bin lusim kongrigesen na ol i tok ol i laik kisim helpim. Dispela wok i bilong helpim ol long kisim bek pasin bilong laikim tru Jehova olsem ol i bin laikim em ‘taim ol i bilip nupela.’ (KTH 2:​1, 4) Ol dispela wanbilip inap kamap strong long bilip long rot bilong stadi long ol tok ol i no bin harim taim ol i no bin kam long ol miting.

¹² Sapos ol elda i askim yu long stadi wantaim wanpela bilong ol dispela wanbilip, orait beten askim Jehova long stiaim na blesim ol wok yu mekim bilong helpim dispela wanbilip. “Olgeta samting yu laik mekim, em yu mas putim long han bilong Bikpela. Na em bai i mekim ol dispela samting i kamap gutpela.” (Snd. 16:3) Tingim gut long bel sampela skripsa na ol tok bilong strongim bilip, em yu ken kamapim long taim yu stadi wantaim em. Tingim gutpela pasin bilong aposel Pol. (Ritim Rom 1:​11, 12.) Pol i laikim tumas long lukim ol Kristen long Rom na bai em inap givim sampela presen bilong Holi Spirit bilong strongim ol. Em i laik bai ol i ken strongim em tu. Yumi tu i mas i gat wankain tingting taim yumi wok long helpim ol sipsip i bin lusim lain sipsip bilong God.

13. Wanem sampela samting yu ken stori long en wantaim wanbilip i bin lusim kongrigesen?

¹³ Taim yu mekim stadi, askim em, “Olsem wanem yu bin kisim save long tok i tru?” Kirapim em long stori long ol gutpela amamas em i bin kisim bipo long ol miting, long wok autim tok, na long ol kibung. Sapos bipo yutupela i bin wok wantaim long mekim wok bilong Jehova, orait toktok long ol amamas yutupela i bin kisim long dispela wok. Stori long amamas yu yet i save kisim long pasin bilong i stap klostu long Jehova. (Jem. 4:8) Tokim em olsem yu tenkyu long gutpela pasin bilong God long lukautim yumi ol manmeri bilong Em​​—Em i save mekim gut bel bilong yumi long taim bilong hevi na yumi inap wetim gutpela samting i kamap bihain.​​—Ro. 15:4; 2 Ko. 1:​3, 4.

14, 15. Yu ken kirapim ol wanbilip long tingim wanem ol blesing ol i bin kisim bipo taim ol i bung wantaim kongrigesen?

¹⁴ Yu ken kirapim em long tingim sampela blesing em i bin kisim bipo taim em i stap yet insait long kongrigesen. Wanpela blesing i olsem: Oltaim em i bin wok long kisim sampela save moa long Baibel na ol samting God bai mekim. (Snd. 4:​18) Taim em i “larim Holi Spirit i stiaim olgeta wokabaut” bilong em, ating em i no bin hatwok long sakim ol samting i laik pulim em long mekim rong. (Ga. 5:​22-​26) Dispela i bin mekim na bel bilong em i stap stret na em inap beten long Jehova na kisim ‘bel isi God i save givim na bel na tingting bilong em i stap gut tru.’ (Fl. 4:​6, 7) Holim ol dispela poin long tingting, soim olsem yu tingim em, na long pasin laikim kirapim dispela brata o sista bilong yu long kam bek long lain sipsip.​​—Ritim Filipai 2:4.

¹⁵ Sapos yu wanpela elda na yu mekim sepeding visit long tupela marit i no bung moa wantaim kongrigesen, yu ken kirapim ol long tingim namba wan taim ol i kisim save long Tok Bilong God. Tok i tru ol i kisim save long en i bin bekim gut ol askim bilong ol na i mekim ol i kamap fri! (Jo. 8:​32) Ol i tenkyu tru long save ol i kisim long Jehova, na long pasin laikim bilong em, na long ol gutpela samting em bai mekim! (Skelim Luk 24:32.) Kirapim ol long tingim olsem ol Kristen i dediket pinis, ol inap pas gut wantaim Jehova na beten long em. Strongim ol long bihainim gen “dispela gutnius God i givim long [yumi].”​​—1 Ti. 1:​11.

Soim Yet Pasin Laikim Long Ol

16. Kamapim wanpela ekspiriens bilong soim olsem gutpela samting i bin kamap long wok bilong helpim ol wanbilip i bin lusim kongrigesen.

¹⁶ Olsem wanem? Gutpela samting i bin kamap long dispela wok yumi stori pinis long en bilong helpim ol sipsip i lus? Tru tumas, gutpela samting i bin kamap. Olsem: Wanpela brata i bin kamap pablisa taim em i gat 12-pela krismas, tasol em i lusim kongrigesen taim em i gat 15 krismas. Tasol bihain em i kam bek long kongrigesen, na winim 30 yia nau em i insait long fultaim sevis. Wanpela bikpela samting i bin strongim em long kam bek em wok wanpela elda Kristen i bin mekim bilong helpim em. Brata i tenkyu tru long dispela gutpela helpim elda i givim!

17, 18. Wanem ol pasin bai helpim yu long helpim wanpela husat i bin lusim lain sipsip bilong God?

¹⁷ Pasin laikim i save kirapim ol Kristen long helpim ol wanbilip long kam bek long kongrigesen. Jisas i tokim ol disaipel bilong em olsem: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jo. 13:​34, 35) Yes, pasin laikim em wanpela mak bilong ol Kristen tru. Yumi mas kamapim dispela pasin laikim long ol Kristen i baptais pinis na ol i bin lusim kongrigesen. Tasol i gat sampela pasin Kristen yumi mas bihainim taim yumi wok long helpim ol wanbilip i lus.

¹⁸ Bilong yu ken helpim wanpela husat i bin lusim lain sipsip bilong God, wanem sampela pasin yu mas kamapim? Yu mas kamapim pasin laikim, tasol yu mas kamapim tu pasin sori, pasin helpim, pasin isi, na pasin bilong i no les kwik. Na sampela taim, ating yu mas kamapim pasin bilong lusim rong bilong narapela. Pol i tok: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik [“les kwik,” NW] long ol man i rongim yupela. . . . Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.”​​—Kl. 3:​12-​14.

19. Wok bilong helpim ol man i olsem sipsip long kam bek long lain Kristen, olsem wanem dispela wok i no inap lus nating?

¹⁹ Stadi i kamap bihain long dispela bai stori long sampela samting i mekim na sampela i lusim lain sipsip bilong God. Stadi bai stori tu long tingting bilong kongrigesen long sipsip i kam bek. Taim yu tingim dispela stadi i kamap bihain na dispela stadi nau yumi mekim, yu mas save olsem ol wok yu mekim bilong helpim ol man i olsem sipsip long kam bek long lain Kristen, ol dispela wok i no inap lus nating. Planti man long nau, kirap long taim ol i yangpela yet i go inap long taim ol i lapun, ol i wok long bungim planti mani kago samting, tasol laip bilong man i winim tru olgeta mani bilong dispela graun. Jisas i kamapim klia dispela samting long tok piksa bilong em long sipsip i lus. (Mt. 18:​12-​14) Oltaim tingim dispela samting taim yu wok strong long helpim ol gutpela sipsip bilong God em ol i lus, long kam bek long lain sipsip.

Bai Yu Bekim Olsem Wanem?

• Ol wasman Kristen i gat wok long mekim wanem bilong helpim ol wanbilip i bin lusim lain sipsip?

• Olsem wanem yu inap helpim ol wanbilip i no save bung moa wantaim kongrigesen?

• Wanem ol pasin inap helpim yu long helpim ol wanbilip i bin lusim lain sipsip?

[Piksa long pes 10]

Long gutpela pasin laikim ol wasman Kristen i wok long helpim ol wanbilip i bin lusim lain sipsip