Tok Tenkyu Long Jehova Long Gutpela-Pasin-Sori Bilong Em
Memorial Bilong Tingim Indai Bilong Krais Bai Kamap Long Mas 24
1 Man bilong raitim song i tok: “Ol i mas tenkyu tru long Bikpela, oltaim em i save sori [“mekim gutpela-pasin-sori,” NW] long ol, na em i bin mekim gutpela wok tru bilong helpim ol.” (Sng. 107:8) Gutpela-pasin-sori bilong God i no olsem em i sori tasol long ol man, nogat. Dispela i kamap klia long dispela tok: “O Jehova, gutpela-pasin-sori bilong yu i save lukautim mi.” (Sng. 94:18, NW) Jehova i kamapim gutpela-pasin-sori tru taim em i givim dispela wanpela Pikinini bilong em bilong helpim yumi!—1 Jo. 4:9, 10.
2 Taim bilong Memorial bilong tingim indai bilong Krais i kam klostu, olsem na yumi ken tok tenkyu long “God bilong gutpela-pasin-sori” olsem wanem? (Sng. 59:17, NW) Yumi olgeta wan wan bai i gat laik long makim taim bilong tingim tingim long bel ol laspela de bilong Jisas long graun. (Sng. 143:5) Gutpela yu bihainim sediul bilong Baibel ritim bilong Memorial, olsem i stap long buklet Skelim Sampela Tok Bilong Baibel Long Olgeta De—2005 na sapos yu inap yu ken ritim na stadi long sapta 112-16 bilong buk Nambawan Man na ol narapela buk samting em Baibel i as bilong ol. Tingim tingim long bel ol tok yu ritim. (1 Ti. 4:15) Taim yumi stadi long Tok Bilong God na beten, dispela i strongim bel bilong yumi na tu em i kamapim klia pasin bilong yumi long laikim Jehova.—Mt. 22:37.
3 Kirapim Ol Narapela Long Tenkyu Long God: Long las yia inap 16,760,607 manmeri long olgeta hap i kam long Memorial. Long wanpela ples long Laibiria, ol brata i raitim pas i go long bikman bilong taun, na tokim em olsem ol bai mekim Kaikai Bilong Bikpela long taun bilong em. Em i givim tok orait long ol i ken yusim ples bilong pilai soka bilong mekim Memorial na em i toksave long dispela samting long taun, na em i singautim ol manmeri long go long dispela bung. I gat 5-pela pablisa tasol long dispela ples, tasol ol lain i kam long Memorial em 636!
4 Olsem tasol, yumi laik helpim planti man long kam bung wantaim yumi long Memorial. I gutpela yu wokim lista bilong ol lain yu laik singautim ol i kam long Memorial. Ol piksa i stap long baksait bilong Awake! bilong Mas 8 na Wastaua bilong Mas 15 i wok long singautim ol man long kam long Memorial. Na tu, yu ken yusim ol pepa bilong singautim man long kam long Memorial. Raitim taim na hap we Memorial bai kamap long en long dispela pepa na givim long ol man yu singautim ol i kam long Memorial. Taim Mas 24 i kam klostu, yu mas go lukim ol man yu singautim bilong kirapim ol long tingim Memorial na stretim ol samting bilong ol i ken kam.
5 Olsem wanem yumi ken helpim ol Baibel sumatin em ol i no bin kam yet long ol miting long kisim helpim long dispela bung? Taim yupela i stadi, lusim sampela haptaim bilong helpim ol long kliagut olsem dispela bung i bikpela samting. Yu inap painim ol gutpela tok i stap long Wastaua bilong Mas 15, 2004, p. 3-7, na buk Toktok Gut, p. 271-5.
6 Tok Amamas Long Ol Nupela Man i Kam: Long taim bilong Memorial, yumi mas tok amamas long ol nupela man i kam. (Ro. 12:13) Stretim rot bilong sindaun wantaim ol man yu singautim ol i kam, na givim Baibel na buk singsing long ol. Yumi laik go pas long tok amamas long ol brata na sista i kam long Memorial em ol i bin lusim wok autim tok inap longtaim pinis. Ating pasin bilong yumi long tingim ol bai helpim ol long kirap gen long bung wantaim kongrigesen. (Lu. 15:3-7) Long dispela gutpela bung, yumi laik mekim olgeta samting yumi inap mekim bilong kirapim ol narapela long bung wantaim yumi long tok tenkyu long Jehova long “gutpela-pasin-sori” bilong em.—Sng. 31:21, NW.
[Askim Bilong Stadi]
1. Long wanem rot Jehova i kamapim gutpela-pasin-sori bilong em long yumi?
2. Olsem wanem yumi ken soim tenkyu bilong yumi long Jehova?
3, 4. (a) Olsem wanem yumi ken bihainim pasin bilong ol brata bilong yumi long Laibiria? (b) Yu laik singautim husat i kam long Memorial?
5. Olsem wanem yumi ken kirapim ol Baibel sumatin long kam long Memorial?
6. Bilong wanem em i bikpela samting long tok amamas long ol nupela man i kam long Memorial?