Strongim Bel Long Rot Bilong Bilip na Pret Long God
“Yu mas sanap strong na yu no ken pret . . . Mi God, Bikpela bilong yu, bai mi go wantaim yu.”—JOSUA 1:9.
1, 2. (a) Bilong wanem i luk olsem ol Israel i no inap winim ol Kenan long pait? (b) Josua i kisim wanem tok promis?
LONG 1473 B.C.E., lain Israel i redi long go insait long Graun Bilong Promis. Moses i kirapim ol long tingim sampela hevi ol bai bungim: “Klostu yupela i laik brukim wara Jordan na i go kisim dispela graun bilong ol bikpela lain manmeri, strong bilong ol i winim strong bilong yupela. Ol i gat planti bikpela taun, na ol banis bilong taun i go antap moa inap long skai. Ol dispela strongpela manmeri i gat longpela bun, na ol i traipela moa, na yupela i harim pinis, i no gat wanpela man inap winim ol long pait.” (Lo 9:1, 2) Man! Ol dispela traipela soldia ol i gat nem! Na ami bilong sampela Kenan i gat planti samting bilong pait, ol i gat planti hos na karis ain.—Hetman 4:13.
2 Tasol ol Israel i wanpela lain i bin stap wokboi nating tasol na nau tasol ol i bin lusim wanpela ples drai we ol i bin stap 40 yia. I luk olsem ol i no inap winim ol Kenan long pait. Tasol Moses i gat strongpela bilip; em inap “lukim” Jehova i stiaim ol. (Hibru 11:27) Moses i tokim ol: “God, Bikpela bilong yumi, bai i go paslain long yupela . . . Long taim yupela i wokabaut i go, em bai i daunim strong bilong ol.” (Lo 9:3; Song 33:16, 17) Taim Moses i dai pinis, Jehova i tok promis long Josua olsem Em bai sambai long em. Em i tok: “Yupela i mas redi nau. Yu wantaim olgeta manmeri bilong Israel, yupela i mas brukim wara Jordan na i go kamap long dispela graun mi laik givim long yupela. Josua, long taim yu stap laip, i no gat wanpela lain man inap winim yupela long pait. Mi bai i stap wantaim yu olsem mi bin i stap wantaim Moses.”—Josua 1:2, 5.
3. Wanem samting i mekim na Josua i bilip na sanap strong?
3 Bilong Jehova i ken helpim na stiaim Josua, Josua i mas ritim na tingim tingim Lo bilong God na bihainim. Jehova i tok: “Sapos yu mekim olsem, orait olgeta arapela samting yu mekim bai i kamap gutpela tasol. Mi tokim yu pinis. Olsem na yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Josua 1:8, 9) Long rot bilong harim tok bilong God, Josua i bin sanap strong na olgeta samting em i mekim i kamap gutpela tasol. Tasol klostu olgeta wankrismas bilong em ol i no mekim olsem God i tok. Olsem na wok bilong ol i no kamap gutpela, na ol i bin i dai long dispela ples drai.
Ol i No Gat Strongpela Bel
4, 5. (a) Olsem wanem pasin bilong 10-pela man bilong lukstil i narapela kain long pasin bilong Josua na Kalep? (b) Ol Israel i no bilip na Jehova i tok wanem long dispela?
4 Foti yia paslain, long taim ol Israel i kam klostu long Kenan long namba wan taim, Moses i salim 12-pela man i go lukstil long dispela ples. Taim ol i kam bek, 10-pela i pret nogut tru. Ol i tok: “Olgeta manmeri mipela i lukim, ol i longpela bun tru. Na mipela i lukim ol longpela traipela man i stap. Ol i lain bilong Anak. Mipela i lukim ol na mipela i ting mipela i samting nating olsem ol grasopa tasol.” Tasol olsem wanem? “Olgeta manmeri”—na i no ol Anak tasol—i traipela man? Nogat! Tasol tok bilong 10-pela i mekim, na bikpela pret i kisim ol Israel. Ol i laik go bek long Isip, em ples we ol i bin stap wokboi nating!—Namba 13:31–14:4.
5 Tasol tupela man bilong lukstil, Josua na Kalep, i gat bikpela laik long go insait long Graun Bilong Promis. Ol i tok: “Ol [Kenan] i olsem abus bilong yumi tasol. Yumi no gat hatwok long winim ol. Bikpela i stap wantaim yumi na em i bagarapim pinis ol giaman god i save was long ol. Olsem na maski pret long ol.” (Namba 14:9) Yu ting Josua na Kalep i no gat gutpela tingting? Nogat! Tupela wantaim ol arapela Israel i bin lukim Jehova i semim strongpela kantri Isip wantaim ol god bilong en long rot bilong 10-pela bikpela hevi. Bihain ol i lukim Jehova i bagarapim king bilong Isip na ol soldia bilong em long solwara Retsi. (Song 136:15) Tru tumas, i no gat as na 10-pela man bilong lukstil na ol man i harim tok bilong ol i ken pret. Pasin bilong ol i mekim na Jehova i bel hevi. Em i tok: “Planti taim ol dispela lain manmeri . . . i no bilip long mi. Mi bin wokim planti mirakel namel long ol, tasol ol i no bilip.”—Namba 14:11.
6. Olsem wanem pasin bilong bilip na strongpela bel i poroman wantaim? Olsem wanem strongpela bilip i bin helpim lain bilong God long nau?
6 Jehova i kamapim klia as bilong pret bilong ol—ol i no bilip. Yes, pasin bilong bilip na strongpela bel i poroman wantaim, olsem na aposel Jon i tokim kongrigesen Kristen, em ol i insait long wanpela pait bilong spirit, olsem: “Yumi bilip long God, na long dispela pasin yumi save winim pait na daunim strong bilong dispela graun.” (1 Jon 5:4) Long nau, strongpela bilip kain olsem bilong Josua na Kalep i mekim na 6 milion Witnes Bilong Jehova—ol yangpela na lapun, sampela i gat strong na sampela i no gat strong—ol i save autim gutnius bilong Kingdom long olgeta hap bilong graun. I no gat wanpela birua inap pasim maus bilong ol; ol i olsem wanpela bikpela lain ami i gat strongpela bel.—Rom 8:31.
No Ken “Surik”
7. Wanem mining bilong dispela tok “surik”?
7 Ol wokboi bilong Jehova long nau ol i save strongim bel na autim gutnius, long wanem, ol i gat wankain tingting olsem aposel Pol, em i tok: “Yumi no man bilong surik na lus. Nogat tru. Yumi ol manmeri bilong bilip na kisim laip.” (Hibru 10:39) Dispela tok “surik” Pol i kolim i no makim dispela pret we man i save pret inap sotpela taim tasol, nogat, long wanem, planti wokboi bilong Jehova i bin pret inap sotpela taim. (1 Samuel 21:12; 1 King 19:1-4) Wanpela buk dikseneri bilong Baibel i tok, dispela tok “surik” i makim pasin bilong “surik i go bek,” “slek na i no holim tok i tru.” Buk i tok moa, dispela tok “surik” inap makim tu pasin bilong “slekim sel” bilong bot na bai bot i no ken ron strong, na dispela i kirapim yumi long tingim pasin bilong slek long mekim wok bilong God. Tasol ol man husat i gat strongpela bilip, ol i no tingting long “slek” taim hevi—pasin birua o sik o wanpela narapela hevi—i painim ol, nogat. Ol i wok strong i go long mekim wok bilong Jehova, ol i save olsem em i tingim tru ol na i save long mak bilong strong bilong ol. (Song 55:22; 103:14) Olsem wanem? Yu gat kain bilip olsem?
8, 9. (a) Jehova i mekim wanem bilong strongim bilip bilong ol Kristen bilong pastaim? (b) Yumi ken mekim wanem bilong strongim bilip bilong yumi?
8 Wanpela taim ol aposel i pilim olsem bilip bilong ol i no strong tumas, olsem na ol i tokim Jisas: “Mekim bilip bilong mipela i kamap bikpela moa.” (Luk 17:5) Jisas i bekim askim bilong ol, olsem long de Pentikos 33 C.E., taim holi spirit i kam long ol disaipel na i helpim ol long save gut moa long Tok Bilong God na long ol samting God i tingting pinis long mekim. (Jon 14:26; Aposel 2:1-4) Dispela i strongim bilip bilong ol disaipel, na ol i kirap mekim wanpela bikpela wok bilong autim tok. Maski ol man i mekim nogut long ol, gutnius ol i autim i go kamap long “olgeta manmeri i stap long graun.”—Kolosi 1:23; Aposel 1:8; 28:22.
9 Bilong strongim bilip na mekim yet wok autim tok, yumi tu i mas stadi na tingim tingim ol tok bilong Baibel na beten long kisim holi spirit. Yumi mas putim tok i tru bilong God i go long tingting na bel bilong yumi—olsem Josua, Kalep, na ol disaipel Kristen bilong pastaim ol i bin mekim—long dispela rot tasol bai yumi gat bilip na dispela bilip bai strongim bel bilong yumi long mekim yet pait bilong spirit na winim pait.—Rom 10:17.
Bilip Olsem God i Stap —Dispela Tasol i No Inap
10. Wanem ol samting i insait long pasin bilong bilip tru?
10 Olsem ol bilipman bilong bipo i kamapim ples klia, pasin bilong bilip olsem God i stap, dispela tasol i no inap helpim yumi long kisim strongpela bel na mekim yet wok. (Jems 2:19) Pasin bilong bilip tru i olsem: Yumi mas save tru long Jehova na bilip strong long em. (Song 78:5-8; Sindaun 3:5, 6) Yumi mas bilip long bel olgeta olsem pasin bilong bihainim ol lo na ol stiatok bilong God bai helpim yumi long i stap gut. (Aisaia 48:17, 18) Na yumi mas bilip strong olsem Jehova bai truim olgeta promis bilong em na “mekim gut tru long ol man i wok long painim em.”—Hibru 11:1, 6; Aisaia 55:11.
11. Josua na Kalep i bilip na strongim bel na Jehova i givim wanem gutpela pe long ol?
11 Dispela kain bilip i no stap olsem tasol, em i save go bikpela. Taim yumi bihainim tok i tru, na yumi “traim” na “lukim” olsem tok i tru i helpim yumi na God i harim ol beten bilong yumi, na yumi pilim olsem Jehova i stiaim yumi, bilip bilong yumi i kamap strong moa. (Song 34:8; 1 Jon 5:14, 15) Bilip bilong Josua na Kalep i kamap strong moa taim ol i lukim ol gutpela pasin bilong Jehova. (Josua 23:14) Tingim ol dispela samting: Josua na Kalep i bin abrusim dai taim ol i raun 40 yia long ples drai, olsem God i tok promis ol bai mekim. (Namba 14:27-30; 32:11, 12) I go inap 6-pela yia, ol i insait long planti wok bilong kisim graun Kenan. Tupela i stap laip longpela taim na strong bilong ol i no pinis, na ol i kisim wanpela hap graun bilong ol yet. Em nau, Jehova i save givim gutpela pe long ol man husat i strongim bel na bihainim gut tok bilong em!—Josua 14:6, 9-14; 19:49, 50; 24:29.
12. Olsem wanem tok bilong Jehova i “nambawan tru”?
12 Gutpela-pasin-sori God i mekim long Josua na Kalep i kirapim yumi long tingim tok bilong man bilong raitim song: “Yu soim mipela pinis olsem, yu wantaim tok bilong yu i nambawan tru.” (Song 138:2) Ol tok bilong Jehova i “nambawan tru,” long wanem, truim bilong ol promis bilong em i save winim tru ol samting ol man i ting bai kamap. (Efesus 3:20) Yes, Jehova i save inapim tru laik bilong ol man i “amamas” long em.—Song 37:3, 4.
Em i “Gutpela Long Ai Bilong God”
13, 14. I gat wanem as na Enok i mas i gat strongpela bilip na strongpela bel?
13 Pasin bilong Enok—em wanpela witnes paslain long taim bilong Krais—inap skulim gut yumi long pasin bilong bilip na strongpela bel. Taim Enok i no kirap yet long mekim tok profet, em i save pasin birua bai painim em na em i mas i gat strongpela bilip na strongpela bel. Olsem wanem em i save long dispela? Em i save, long Iden Jehova i bin tokaut olsem pasin birua bai stap namel long ol man i bihainim God na ol man i bihainim Satan. (Stat 3:15) Enok i save dispela pasin birua i bin kamap taim Kein i kilim i dai brata bilong em Abel. Papa bilong tupela, Adam, i bin stap 310 yia bihain long mama i karim Enok.—Stat 5:3-18.
14 Maski Enok i save long ol dispela samting, em i strongim bel na wokabaut wantaim God olsem “pren tru” bilong em na em i tokaut strong long “ol kain kain tok nogut” ol man i mekim long Jehova. (Stat 5:22; Jut 14, 15) Enok i helpim lotu i tru, olsem na planti man i birua long em na ol i laik kilim em i dai. Tasol Jehova i no larim ol birua i kilim em i dai. Bihain long Jehova i kamapim long Enok olsem “pasin bilong Enok i gutpela long ai bilong [Em],” Jehova i “kisim” Enok, olsem pinisim laip bilong em na em i dai. Ating dispela samting i bin kamap taim Enok i lukim wanpela piksa olsem driman bilong ol gutpela samting bihain bai kamap.—Hibru 11:5, 13; Stat 5:24.
15. Olsem wanem Enok i stap gutpela piksa bilong ol wokboi bilong Jehova long nau i ken bihainim?
15 Taim Pol i stori pinis long Jehova i kisim Enok, Pol i stori gen long pasin bilong bilip i bikpela samting, na em i tok: “Man i no bilip long God, em i no inap bihainim laik bilong God.” (Hibru 11:6) Enok i bilip long God na dispela i strongim bel bilong em long wokabaut wantaim Jehova na autim tok olsem kot bilong God bai painim ol man nogut. Long dispela samting, Enok i stap gutpela piksa bilong yumi ken bihainim. Yumi gat wankain wok long mekim namel long ol man i birua long lotu i tru na i bihainim kain kain pasin nogut.—Song 92:7; Matyu 24:14; KTH 12:17.
Pasin Bilong Pret Long God i Kamapim Strongpela Bel
16, 17. Obadia i husat? Wanem hevi inap painim em?
16 Pasin bilong bilip i save helpim man long kisim strongpela bel, tasol i gat narapela pasin tu i kamapim strongpela bel. Dispela pasin em pasin bilong daun long God na pret long em. Orait nau yumi ken skelim stori bilong wanpela man, em i pret long God, na i bin stap long taim bilong profet Elaija na King Ahap bilong lain Israel long hap not. Taim Ahap i stap king, lotu Bal i bin kam insait long lain Israel na bagarapim lotu i tru. I gat 450 profet bilong giaman god Bal na 400 profet bilong god meri Asera, em “Kwin Jesebel [meri bilong Ahap] i save lukautim ol long kaikai.”—1 King 16:30-33; 18:19.
17 Jesebel, wanpela birua bilong Jehova, em i wok long rausim lotu i tru long kantri Israel. Em i kilim i dai sampela profet bilong Jehova na em i laik kilim Elaija tu, tasol God i tokim Elaija long ranawe i go long hap is bilong wara Jordan na em i abrusim bagarap. (1 King 17:1-3; 18:13) Ating long dispela taim bipo long Israel i hatwok tru long sambai long lotu i tru, a? Na yumi ken ting olsem i hatwok moa sapos man i wok long haus bilong king. Wanpela man olsem em Obadia,a em i save lotu long Jehova na em i holim wok bilong lukautim haus bilong Ahap.—1 King 18:3.
18. Wanem samting i mekim na Obadia i lotu long Jehova wanpela tasol?
18 Yumi ken ting olsem Obadia i save bihainim gutpela tingting na tingim gut pastaim ol samting em i laik mekim taim em i lotu long Jehova. Tasol taim em i mekim olsem em i no insait liklik long lotu giaman, nogat. Namba Wan King 18:3 i tok: “Obadia i save lotu long Bikpela na i aninit long em wanpela tasol.” Yes, Obadia i save pret long Jehova wanpela tasol! Dispela gutpela pasin pret i strongim bel bilong em na dispela i kamap ples klia bihain stret long Jesebel i kilim i dai ol profet bilong Jehova.
19. Obadia i mekim wanem na dispela i kamapim ples klia em i gat strongpela bel?
19 Baibel i tok: “Long taim Kwin Jesebel i wok long kilim i dai ol profet bilong Bikpela, Obadia i bin kisim 100 bilong dispela ol profet na haitim ol insait long ol bikpela hul bilong ston. Em i haitim 50 long narapela hul na 50 long narapela hul. Na em i bin lukautim ol na givim kaikai na wara long ol.” (1 King 18:4) Dispela wok hait bilong givim kaikai long 100 man em i wanpela wok em inap kisim bagarap long en. Em i mas was gut, nogut Ahap na Jesebel, na ol dispela 850 profet giaman i save kam long haus bilong king, i painimaut olsem em i mekim dispela wok. I gat planti arapela tu long Israel i lotu long ol god giaman, sampela i man nating na sampela i gat namba, na sapos rot i op, ol bai kamapim Obadia long Ahap na Jesebel bilong grisim tupela long amamas long ol. Tasol maski ol dispela man inap lukim em, Obadia i strongim bel na lukautim ol profet bilong Jehova. Man! Pasin bilong pret long God i gat bikpela strong!
20. Olsem wanem pasin bilong pret long God i bin helpim Obadia? Olsem wanem pasin bilong em i helpim yu?
20 Pasin bilong pret long God i kirapim Obadia long strongim bel na helpim ol profet, olsem na Jehova i lukautim em long ol birua. Sindaun 29:25 i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” Obadia i no narapela kain man, nogat; em wanpela man nating kain olsem yumi na em i pret long ol birua bai kisim em na kilim em i dai. (1 King 18:7-9, 12) Tasol maski em i pret olsem, pasin bilong pret long God i strongim bel bilong em na em i daunim pasin bilong pret long man. Obadia i stap gutpela piksa bilong yumi olgeta i ken bihainim, na moa yet long ol man em ol i save olsem ol inap kalabus o lusim laip bilong ol taim ol i lotuim Jehova. (Matyu 24:9) Olsem na yumi olgeta i mas wok strong long lotuim Jehova long pasin bilong “pret long em na aninit long em.”—Hibru 12:28.
21. Stadi i kamap bihain long dispela bai stori long wanem samting?
21 Bilip na pasin bilong pret long God inap helpim man long strongim bel, tasol pasin laikim i gat bikpela strong moa long helpim man. Pol i tok: “Spirit God i bin givim long yumi, em i no spirit bilong mekim yumi i pret. Nogat. Em i Spirit bilong givim strong long yumi na bilong mekim yumi i laikim tru ol arapela.” (2 Timoti 1:7) Stadi i kamap bihain long dispela bai stori long olsem wanem pasin laikim inap helpim yumi long strongim bel na mekim wok bilong Jehova long dispela taim bilong las de i gat planti hevi nogut tru long en.—2 Timoti 3:1.
[Futnot]
a I no profet Obadia.
Yu Inap Bekim?
• Wanem samting i mekim na Josua na Kalep i gat strongpela bel?
• Wanem ol samting i insait long pasin bilong bilip tru long God?
• Wanem samting i mekim na Enok i no pret long autim tok bilong strafe bilong God?
• Olsem wanem pasin bilong pret long God i helpim man long kisim strongpela bel?
[Piksa long pes 16, 17]
Jehova i tokim Josua: “Sanap strong na yu no ken pret”
[Piksa long pes 18]
Obadia i lukautim ol profet bilong God
[Ol Piksa long pes 19]
Enok i autim tok bilong God na i no pret