Tok Bilong Jehova i Gat Laip
Sampela Bikpela Tok Bilong Buk Namba 2 Samuel
BILONG i stap gut long wok bos bilong Jehova, yu ting yumi mas bihainim stret olgeta tok bilong em? Olsem wanem? Oltaim man i stap gut long God i save mekim stretpela pasin long ai bilong God? Wanem kain man God tru i save “laikim”? (1 Samuel 13:14) Buk Namba 2 Samuel long Baibel i kamapim ol gutpela bekim bilong ol dispela askim.
Gat na Natan, em tupela profet i bin pas gut wantaim King Devit bilong Israel long bipo ol i bin raitim Namba 2 Samuel.a Ol i raitim pinis dispela buk long yia 1040 B.C.E., klostu long pinis bilong namba 40 yia bilong Devit i stap king. Dispela buk i stori planti long Devit na pasin bilong em long pas gut wantaim Jehova. Dispela buk i stori long olsem wanem lain Israel i bruk bruk nabaut na bihain ol i kamap wanpela lain i pas gut wantaim na i stap aninit long wanpela strongpela king. Em i stori planti long ol samting ol man i pilim long bel na tingting.
DEVIT I “WOK LONG KAMAP STRONGPELA KING”
Pasin Devit i mekim taim em i harim toksave olsem Sol na Jonatan i dai i kamapim klia tingting bilong em long tupela na long Jehova. Ol i makim Devit i kamap king bilong lain Juda long Hebron. Ol i makim pikinini man bilong Sol em Isboset long i stap king bilong ol arapela lain bilong Israel. Devit i “wok long kamap strongpela king” na 7 na hap yia bihain em i kamap king bilong olgeta lain bilong Israel.—2 Samuel 5:10.
Devit i winim pait na kisim Jerusalem long ol lain Jebus na makim i kamap biktaun bilong em. Hevi i kamap long namba wan taim em i traim long kisim bokis kontrak i go long Jerusalem. Tasol long namba tu taim i no gat hevi i kamap taim em i kisim bokis kontrak i go, na Devit i amamas na danis. Jehova i wokim kontrak bilong kingdom wantaim Devit. God i stap wantaim Devit olsem na em i winim ol birua bilong em.
Bekim Bilong Ol Askim Bilong Baibel:
2:18—Bilong wanem Baibel i tok olsem Joap na tupela brata bilong em, ol i pikinini bilong Seruia, em mama bilong ol? Long Ol Skripsa Hibru, ol i save bihainim lain bilong papa taim ol i raitim lista bilong ol lain tumbuna. Ating man bilong Seruia i bin dai taim em i yangpela yet, o ating em i no gutpela inap long ol i raitim nem bilong em long Baibel. Ating ol i raitim nem bilong Seruia, long wanem, em i susa bilong Devit. (1 Stori 2:15, 16) Baibel i stori long matmat bilong papa bilong ol i stap long Betlehem, em dispela wanpela taim tasol Baibel i stori long papa bilong ol.—2 Samuel 2:32.
3:29—Wanem insait bilong dispela tok ‘man i mekim wok bilong ol meri’? Em wok bilong ol meri long samapim ol laplap. Olsem na ating dispela tok i makim ol man em ol i no inap insait long ami na ol i mas mekim wok em ol meri i save mekim.
5:1, 2—Ol i kilim Isboset i dai pinis na inap hamas yia bihain ol i makim Devit long kamap king bilong olgeta lain Israel? I stret yumi ken tok olsem Isboset i kirap mekim wok king bihain long Sol i dai, na em i wok king inap 2-pela yia, na long wankain taim Devit i kirap mekim wok king long Hebron. Devit i stap long Hebron na bosim lain Juda inap 7 na hap yia. Bihain liklik long ol i makim em i kamap king na bosim olgeta lain Israel, em i mekim Jerusalem i kamap biktaun bilong em. Olsem na inap 5-pela yia bihain long Isboset i dai Devit i kirap bosim olgeta lain Israel.—2 Samuel 2:3, 4, 8-11; 5:4, 5.
8:2—Bihain long ol Israel i winim ol Moap long pait ol i kilim hamas man bilong Moap? Devit i no kaunim namba bilong ol man em i kilim i dai. Em i tokim ol Moap long slip long lain long graun. Orait em i kisim wanpela hap baklain na i makim ol. Ol man i stap long namba wan na namba 2 lain ol i kilim ol i dai, na ol lain i stap long namba 3 lain ol i no kilim ol i dai.
Skul Yumi Kisim:
2:1; 5:19, 23. Paslain long Devit i go sindaun long Hebron, na paslain long em i go pait long ol birua bilong em, em i bin askim Jehova long tingting bilong em. Yumi no laik bai ol samting yumi tingting long mekim i bagarapim yumi long ol samting bilong spirit, olsem na paslain long yumi makim ol samting yumi laik mekim yumi tu i mas askim Jehova long stiaim yumi.
3:26-30. Pasin bilong bekim rong bilong narapela i save kamapim samting nogut.—Rom 12:17-19.
3:31-34; 4:9-12. Devit i stap gutpela piksa long pasin bilong i no tingting long bekim rong na i no birua long ol man i rongim em.
5:12. Yumi no ken lusim tingting olsem Jehova i bin skulim yumi long pasin bilong em na em i opim rot bilong yumi i ken pas gut wantaim em.
6:1-7. Tru Devit i gat gutpela tingting long kisim Bokis Kontrak i go, tasol em i putim Bokis Kontrak long karis na dispela i brukim lo bilong God na hevi i kamap long dispela. (Kisim Bek 25:13, 14; Namba 4:15, 19; 7:7-9) Usa i holim Bokis Kontrak na dispela tu i soim olsem maski man i gat gutpela laik long mekim samting tasol dispela i no inap senisim lo bilong God.
6:8, 9. Taim wanpela hevi i kamap, pastaim Devit i kros na bihain em i pret—ating em i sutim tok long Jehova long dispela hevi. Yumi mas was gut, nogut yumi sutim tok long Jehova long ol hevi i kamap taim yumi no bihainim ol lo bilong em.
7:18, 22, 23, 26. Pasin bilong Devit long daunim em yet, lotuim Jehova wanpela tasol, na laik long givim biknem long em, ol i gutpela pasin yumi mas bihainim.
8:2. Wanpela tok profet i bin kamap 400 yia i go pinis i kamap tru. (Namba 24:17) Oltaim tok bilong Jehova i save kamap tru tasol.
9:1, 6, 7. Devit i truim tok promis bilong em. Yumi tu mas truim ol tok promis yumi mekim.
JEHOVA I MEKIM BIKPELA HEVI I KAMAP LONG MAN EM I MAKIM
Jehova i tokim Devit olsem: “Bai mi mekim sampela man long famili bilong yu yet i givim bikpela hevi long yu. Na bai yu lukim mi i kisim ol meri bilong yu na givim ol long narapela man. Na em bai i pamukim ol long ples klia.” (2 Samuel 12:11) Wanem samting i kamap na Jehova i mekim dispela tok? Devit i mekim sin wantaim Batseba. Tru Devit i tanim bel na God i lusim rong bilong em, tasol em i no inap abrusim hevi bilong sin em i bin mekim.
Pastaim pikinini em Batseba i karim i dai. Orait bihain Amnon, brata bilong Tamar i reipim Tamar, em pikinini meri bilong Devit i no bin slip wantaim man. Brata tru tru bilong Tamar em Apsalom i kilim i dai Amnon bilong bekim rong bilong em. Apsalom i pasim tok long kilim i dai papa bilong em na em yet i tokaut olsem em i king long Hebron. Devit i mas ranawe lusim Jerusalem. Apsalom i slip wantaim 10-pela namba tu lain meri bilong papa bilong em Devit, em dispela ol meri Devit i lusim i stap bilong lukautim haus bilong king. Devit i go bek long wok king bilong em bihain long ol i kilim i dai Apsalom. Seba, em i bilong lain Benjamin, i bikhet na i laik daunim Devit tasol ol i kilim em i dai.
Bekim Bilong Ol Askim Bilong Baibel:
14:7—Wanem mining bilong dispela tok “wanpela liklik hap paia”? Paia i wok long lait isi isi i makim pikinini bilong wanpela man i stap laip yet.
19:29—Bilong wanem Devit i mekim dispela tok taim Mefiboset i tokim em long as na em i no bin ranawe wantaim Devit? Taim Devit i harim tok Mefiboset i mekim, em i luksave olsem em i bin popaia taim em i bilipim tok Siba i mekim. (2 Samuel 16:1-4; 19:24-28) Ating dispela i mekim Devit i no amamas, na em i no laik harim sampela tok moa long dispela samting.
Skul Yumi Kisim:
11:2-15. Baibel i kolim stret olgeta asua bilong Devit na dispela i kamapim klia olsem spirit bilong God i kamapim ol tok i stap insait long Baibel.
11:16-27. Taim yumi mekim wanpela bikpela rong, yumi no ken haitim olsem Devit i bin mekim. Yumi mas tokaut long rong bilong yumi long Jehova na askim ol elda long kongrigesen long helpim yumi.—Sindaun 28:13; Jems 5:13-16.
12:1-14. Natan i stap gutpela piksa bilong ol elda insait long kongrigesen. Ol i mas helpim ol man i mekim sin long stretim pasin bilong ol. Ol i mas mekim gut dispela wok.
12:15-23. Devit i gat stretpela tingting long ol samting i painim em na dispela i helpim em long mekim ol samting i stret taim hevi i painim em.
15:12; 16:15, 21, 23. Pasin antap na pasin bilong laikim biknem i kirapim Ahitofel long bikhet long Devit taim em i lukim olsem Apsalom bai kamap king. Sapos man i gat save, tasol em i no gat pasin daun na pasin bilong i stap gut long narapela, dispela inap pundaunim em.
19:24, 30. Mefiboset i pilim tru gutpela-pasin-sori bilong Devit. Em i orait long tok king i mekim long Siba. Pasin bilong amamas long Jehova na oganaisesen bilong em i mas kirapim yumi long daun long ol.
20:21, 22. Gutpela tingting na save bilong wanpela man inap helpim planti man long abrusim bagarap.—Saveman 9:14, 15.
“LARIM BIKPELA YET I MEKIM WANEM SAMTING EM I LAIK MEKIM LONG MIPELA”
Inap 3-pela yia i gat bikpela hangre i kamap long Israel, long wanem, Sol i bin kilim ol lain Gibeon. (Josua 9:15) Bilong bekim dispela rong, lain Gibeon i askim Devit long givim 7-pela pikinini man long famili bilong Sol na bai ol i ken kilim ol i dai. Devit i givim 7-pela man long ol lain Gibeon, na taim bilong san i pinis na ren i pundaun. “Devit wantaim ol soldia bilong en i bin kilim” i dai 4-pela traipela man bilong Filistia.—2 Samuel 21:22.
Devit i mekim bikpela rong taim em i tok long ol i mas kaunim namba bilong olgeta manmeri. Em i tanim bel na em i tok “larim Bikpela yet i mekim wanem samting em i laik mekim long mipela.” (2 Samuel 24:14) Olsem na 70,000 manmeri i dai long sik. Devit i bihainim tok bilong Jehova, na dispela sik i pinis.
Bekim Bilong Ol Askim Bilong Baibel:
21:9, 10—Inap hamas mun Rispa i was long bodi bilong tupela pikinini man bilong em na faipela tumbuna pikinini man bilong Sol em ol lain Gibeon i bin kilim i dai? Ol i bin hangamapim dispela 7-pela man long “taim ol gaden bali i redi,” em long Mas o Epril. Ol i larim bodi bilong ol i stap ples klia antap long maunten. Rispa i was long ol bodi bilong ol long san na long nait i go inap long taim Jehova i salim ren i kam bilong soim olsem em i no belhat moa. Bikpela ren i no inap pundaun inap long Oktoba, em taim ol i kisim pinis ol bali long gaden. Olsem na ating Rispa i bin was long ol bodi inap olsem 5-pela o 6-pela mun. Bihain Devit i tokim ol long planim bun bilong ol dispela man.
24:1—Devit i kaunim namba bilong ol manmeri. Bilong wanem dispela i wanpela bikpela rong? Lo i no tambuim pasin bilong kaunim namba bilong ol man. (Namba 1:1-3; 26:1-4) Baibel i no tokaut long wanem samting i kirapim Devit long kaunim ol manmeri. Tasol 1 Stori 21:1 i tok olsem Satan i givim tingting long em long mekim olsem. Joap, kepten bilong ami bilong Devit, i save olsem samting Devit i laik mekim i no stret, na em i bin traim long pasim Devit.
Skul Yumi Kisim:
22:2-51. Singsing bilong Devit i kamapim klia olsem Jehova em i God tru, na i stret yumi mas bilip tru long em!
23:15-17. Devit i tingim lo bilong God long laip na blut na long dispela taim em i no mekim samting i kain olsem em i brukim dispela lo. Yumi mas kisim wankain tingting long ol lo bilong God.
24:10. Bel bilong Devit i kotim em na dispela i kirapim em long tanim bel. Olsem wanem? Maus bilong bel bilong yumi i gat strong inap long mekim kain samting olsem?
24:14. Devit i bilip tru olsem Jehova em i man bilong marimari tru winim ol man. Yumi tu i gat kain strongpela bilip olsem?
24:17. Devit i bel hevi tru olsem rong em i bin mekim i givim hevi long ol Israel. Man i mekim rong na tanim bel i mas hevi tru olsem samting em i mekim i bin nogutim nem bilong kongrigesen.
Yumi Inap Stap Olsem Man God i “Laikim”
Namba 2 king bilong Israel i bin i stap man God i “laikim.” (1 Samuel 13:14) Devit i no bin tok pait long ol stretpela lo bilong Jehova, na em i no bin bosim wokabaut bilong em yet na bikhet long God. Long olgeta taim Devit i mekim rong, em i tokaut long sin bilong em, kisim tok bilong stretim em, na stretim pasin bilong em. Devit em i wanpela man i bin bihainim stretpela pasin. Em i gutpela tingting sapos yumi bihainim pasin bilong em, na moa yet long taim yumi mekim rong, a?
Stori bilong Devit i kamapim klia olsem bilong tingim wok king bilong Jehova yumi mas bihainim lo bilong Em long wanem samting i stret na wanem samting i no stret na wok strong long bihainim stretpela pasin bilong em. Yumi inap long mekim olsem. Yumi amamas tru long ol samting yumi lainim long Namba 2 Samuel! Ol tok i stap insait long dispela buk bilong Baibel i gat laip na em i wok strong i stap.—Hibru 4:12.
[Futnot]
a Maski Samuel i no bin raitim dispela buk, tasol buk i gat nem bilong em, long wanem, pastaim Namba 1 Samuel na 2 Samuel i wanpela buk tasol long Ol Skripsa Hibru. Samuel i bin raitim bikpela hap bilong Namba 1 Samuel.
[Piksa long pes 16]
Devit i tingim man i bin makim em i kamap king na dispela i helpim em long bihainim pasin daun
[Ol Piksa long pes 18]
“Bai mi mekim sampela man long famili bilong yu yet i givim bikpela hevi long yu”
Batseba
Tamar
Amnon