‘Nau Em i Taim Bilong God i Mekim Gut Long Yumi’
“Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”—2 KO. 6:2.
1. Bilong wanem yumi mas skelim ol samting yumi mas mekim insait long wanpela haptaim?
“OLGETA samting i kamap long dispela graun, i save kamap long taim bilong em yet.” (Sav. 3:1) Long dispela skripsa Solomon i toktok long pasin bilong skelim gutpela taim bilong mekim wanpela wok—olsem wok gaden, raun, wok bisnis, na toktok wantaim ol narapela. Yumi tu i mas save wanem wok i bikpela samting long yumi mas mekim long taim bilong en. Em nau, yumi mas kliagut long wanem wok i mas i stap namba wan.
2. Olsem wanem yumi save olsem taim Jisas i autim tok, em i kliagut long wanem kain taim em i stap long en?
2 Taim Jisas i stap long graun, em i save long wanem kain taim em i stap long en na ol samting em i mas mekim. Em i save olsem taim bilong truim planti tok profet bilong Mesaia, em ol manmeri i bin wet longtaim tru long en, klostu nau bai kamap. (1 Pi. 1:11; KTH 19:10) Em i gat wok long helpim ol man long save olsem em i dispela Mesaia God i bin tok promis long en. Em i mas autim tok bilong Kingdom na bungim ol man em bihain ol bai mekim wok king wantaim em long Kingdom. Na em i mas kirapim wok bilong kamapim kongrigesen Kristen, em dispela lain husat bai mekim wok bilong autim tok na kamapim ol disaipel long olgeta hap bilong graun.—Mk. 1:15.
3. Jisas i save long wanem kain taim em i stap long en, na dispela i kirapim em long mekim wanem?
3 Jisas i save long wanem kain taim em i stap long en, na dispela i kirapim em long givim bel tru long mekim laik bilong Papa bilong em. Em i tokim ol disaipel: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” (Lu. 10:2; Mal. 4:5, 6) Pastaim Jisas i makim 12-pela disaipel, na bihain 70. Em i givim sampela tok long ol, na salim ol i go autim dispela tok: “Kingdom bilong heven i kam klostu pinis.” Taim Jisas i givim pinis dispela tok long “ol 12-pela disaipel bilong en, orait em i lusim dispela ples na i go long ol taun bilong dispela hap na i skulim ol manmeri na i autim tok bilong God long ol.”—Mt. 10:5-7; 11:1; Lu. 10:1.
4. Pol i bihainim wanem pasin bilong Jisas Krais?
4 Jisas i stap gutpela piksa long pasin bilong givim bel tru em ol disaipel bilong em i ken bihainim. Aposel Pol i tingim dispela samting taim em i tokim ol wanbilip: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Ko. 11:1) Pol i bihainim wanem pasin bilong Krais? Em i bihainim pasin bilong Krais long wok strong long autim gutnius. Long ol pas Pol i salim long ol kongrigesen, yumi lukim ol kain tok olsem: “Wok strong oltaim,” “wok strong long mekim wok bilong Bikpela,” na “olgeta samting yupela i mekim, yupela i mas wok strong na mekim.” (Ro. 12:11; 1 Ko. 15:58; Kl. 3:23) Pol i no lusim tingting long taim Bikpela Jisas Krais i kamap long em long rot i go long Damaskus na long ol tok bilong Jisas em disaipel Ananaias i givim long em, olsem: “Dispela man em i kamap wokman bilong mi. Mi makim em pinis long i go long ol arapela lain manmeri na long ol king, na long ol Israel tu, na autim nem bilong mi long ol.”—Ap. 9:15; Ro. 1:1, 5; Ga. 1:16.
‘Em Taim Bilong God i Mekim Gut Long Man’
5. Wanem samting i kirapim Pol long wok strong tru long mekim wok autim tok?
5 Taim yumi ritim Buk Aposel, yumi luksave long Pol i gat strongpela bel na em i wok strong tru long mekim wok autim tok. (Ap. 13:9, 10; 17:16, 17; 18:5) Pol i kliagut long wanem kain taim em i stap long en. Em i tok: “Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.” (2 Ko. 6:2) Bipo, long 537 B.C.E., em i taim bilong God i mekim gut long ol Juda i stap kalabus long Babilon na ol i ken go bek long ples. (Ais. 49:8, 9) Tasol Pol i toktok long wanem samting? Ol ves i stap klostu bai helpim yumi long save long dispela.
6, 7. Ol Kristen God i bin makim, ol i bin kisim wanem gutpela wok long nau? Husat i wok wantaim ol Kristen God i bin makim?
6 Long pas bilong Pol, pastaim em i bin tok long wanpela gutpela wok God i bin givim long em na ol wanbilip Kristen God i bin makim. (Ritim 2 Korin 5:18-20.) Em i stori olsem God i bin singautim ol long mekim wanpela wok, em wok bilong helpim ol man long “kamap wanbel wantaim God,” olsem pren bilong em.
7 Kirap long taim pasin bikhet i kamap long gaden Iden, olgeta manmeri i bin stap longwe long Jehova. (Ro. 3:10, 23) Dispela i mekim na planti manmeri i stap tudak long ol samting bilong spirit, na pen na dai i painim ol. Pol i tok: “Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” (Ro. 8:22) Tasol God i bin wokim rot bilong singautim ol man long kam bek long em, olsem kamap wanbel wantaim em. Em dispela wok Pol na ol Kristen God i bin makim ol i bin kisim long dispela taim bipo. Dispela “taim bilong God i mekim gut” long man, em inap kamap olsem “taim bilong God i kisim bek” ol man i bilip long Jisas. Olgeta Kristen God i bin makim na ol poroman bilong ol, em “ol arapela sipsip,” ol i wok wantaim long singautim ol man long kamap wanbel wantaim God nau long dispela “taim bilong God i mekim gut” long man.—Jo. 10:16.
8. Wanem samting i mekim na dispela singaut bilong kamap wanbel em i narapela kain?
8 Dispela singaut long kamap wanbel em i narapela kain, long wanem, maski em asua bilong ol man na ol i stap longwe long God—em samting pasin bikhet long Iden i bin kamapim—God yet i bin kirap stretim rot bilong ol man i ken kamap wanbel wantaim em. (1 Jo. 4:10, 19) God i mekim wanem? Pol i tok: “Long rot bilong Krais,” God i bin “mekim olgeta man i lusim pasin birua na i kamap wanbel wantaim em. Em i no tingting moa long olgeta rong ol i bin mekim. Na em i givim mipela wok bilong autim dispela tok, bilong em i ken mekim ol birua i kamap wanbel wantaim em.”—2 Ko. 5:19; NW; Ais. 55:6.
9. Pol i mekim wanem bilong soim olsem em i pilim tru marimari bilong God?
9 Long rot bilong ofa bilong baim bek ol man, Jehova i wokim rot bilong lusim rong bilong ol man husat i bilip, na mekim ol i kamap wanbel wantaim em olsem pren bilong em. Na tu, em i salim ol mausman bilong em i go tokim ol man long olgeta hap long kamap wanbel wantaim em taim rot i op i stap yet. (Ritim 1 Timoti 2:3-6.) Pol i kliagut long laik bilong God na long wanem kain taim em i stap long en, olsem na em i wok strong long wok bilong helpim ol man long “kamap wanbel wantaim God.” Laik bilong God i no senis liklik. Laik bilong em long ol man i mas kamap wanbel wantaim em, dispela laik i stap yet. Ol dispela tok bilong Pol olsem ‘nau em i taim bilong God i mekim gut long yumi’ na ‘nau em i taim bilong God i kisim bek yumi’ i stret tu long taim bilong yumi. Tru tumas, Jehova em i God bilong marimari na sori!—Kis. 34:6, 7.
No Ken “Lusim Nating Marimari Bilong Em”
10. Long ol Kristen God i bin makim, long bipo na long nau, dispela “taim bilong God i kisim bek” man i makim wanem samting?
10 Namba wan lain bilong kisim marimari bilong God na kamap wanbel wantaim God, em ol man i “pas wantaim Krais.” (2 Ko. 5:17, 18) “Taim bilong God i kisim bek” ol, dispela i kirap long Pentikos 33 C.E. Kirap long dispela taim na i kam, ol i bin kisim wok bilong autim ‘dispela tok bilong kamap wanbel.’ Long nau, ol Kristen God i bin makim em ol i stap yet long graun, ol i mekim yet dispela wok bilong tokaut long pasin bilong “kamap wanbel.” Ol i luksave olsem ol fopela ensel, em aposel Jon i bin lukim long driman, “ol i holimpas ol 4-pela win bilong graun, bai ol win i no inap . . . winim graun.” Olsem na i gat taim yet bilong “God i kisim bek” ol man na “bilong God i mekim gut” long ol. (KTH 7:1-3) Long dispela as, kirap long yia 1900 samting, ol Kristen God i bin makim em ol i stap yet long graun, ol i givim bel tru long mekim dispela wok long olgeta hap bilong graun bilong tokaut long pasin bilong “kamap wanbel.”
11, 12. Inap 100 yia samting i go pinis, ol Kristen God i bin makim ol i mekim wanem bilong soim olsem ol i kliagut long kain taim ol i stap long en? (Lukim piksa long pes 15.)
11 Buk Jehovah’s Witnesses—Proclaimers of God’s Kingdom i kamapim olsem, klostu long yia 1900, “C. T. Russell na ol wanwok bilong em ol i bilip strong olsem ol i stap long taim bilong kaikai i mau pinis na ol man i mas harim ol tok i tru bilong mekim ol i kamap fri.” Olsem na ol i mekim wanem? Ol i luksave olsem ol i stap long taim bilong kisim kaikai i mau pinis, o “taim bilong God i mekim gut” long man, olsem na ol dispela brata i no singautim ol man long kam long ol miting na em tasol, nogat. Em pasin ol pris pasto bilong Kristendom i bin mekim inap longtaim pinis. Tasol ol dispela Kristen God i bin makim, ol i wok long painim sampela narapela rot moa bilong autim gutnius. Ol i mekim wok long ol nupela masin samting bilong mekim wok i go bikpela.
12 Bilong autim gutnius bilong Kingdom, dispela liklik grup i mekim wok long ol liklik nius, buklet, magasin, na ol buk. Na tu, ol i raitim ol stori bilong Baibel na ol dispela stori i kamap long planti tausen niuspepa. Ol i kamapim ol tok bilong Baibel long redio na bai ol man long olgeta hap i ken harim. Ol i kamapim na yusim ol piksa wokabaut i gat toktok i stap long en. Long dispela taim i no gat yet ol piksa wokabaut i gat toktok long en. Wanem samting i kamap long dispela pasin bilong ol long wok strong? Long nau, inap 7 milion manmeri i insait long wok bilong autim dispela tok: “Kamap wanbel wantaim God.” Tru tumas, ol dispela wokboi bilong Jehova long bipo ol i stap gutpela piksa long pasin bilong givim bel tru long wok, maski ol i no planti na ol i no gat bikpela save tumas long mekim wok.
13. Yumi mas tingim tru wanem laik bilong God?
13 Tok bilong Pol olsem ‘nau em i taim bilong God i mekim gut long yumi,’ dispela tok i stret yet long nau. Yumi ol man i bin kisim marimari bilong Jehova, yumi tenkyu olsem rot i bin op long yumi long harim na kisim dispela tok bilong kamap wanbel wantaim God. Tasol yumi no ken ting yumi no gat wok long mekim, nogat, yumi tingim tru dispela tok bilong Pol: “Yupela i kisim pinis marimari bilong God, na nogut yupela i lusim nating marimari bilong em.” (2 Ko. 6:1) As na God i marimari, em i laik “mekim olgeta man i . . . kamap wanbel wantaim em” long rot bilong Krais.—2 Ko. 5:19.
14. Nau long planti kantri, rot i op long ol manmeri i mekim wanem?
14 Klostu olgeta manmeri, em Satan i bin pasim tingting bilong ol, ol i stap longwe yet long God na ol i no save long as bilong marimari bilong God. (2 Ko. 4:3, 4; 1 Jo. 5:19) Tasol taim ol man i lukim ol samting long graun i go nogut moa yet, dispela i bin kirapim planti long harim tok taim ol i kisim save olsem pasin bilong stap longwe long God em i as bilong ol hevi na pasin nogut. Na long ol kantri we planti man i bin les long harim tok, nau planti ol i laik harim na ol i wok long kamap wanbel wantaim God. Orait olsem wanem long yumi? Yumi save olsem nau em i taim bilong givim bel moa yet long mekim dispela tok: “Kamap wanbel wantaim God”?
15. Wok bilong yumi i bilong helpim ol man long olgeta hap long save long wanem samting?
15 Wok bilong yumi i no bilong tokim tasol ol man olsem sapos ol i go long God, em bai helpim ol long ol hevi bilong ol na ol bai stap belgut, nogat. Planti man i laik harim kain tok olsem taim ol i go long lotu, na ol lotu i amamas long mekim kain tok olsem. (2 Ti. 4:3, 4) Wok bilong yumi long autim tok i no bilong mekim dispela samting, nogat. Gutnius yumi autim i olsem: Long rot bilong pasin laikim bilong em, Jehova i redi long lusim rong bilong ol man long rot bilong Krais. Olsem na ol man inap lusim pasin bilong stap longwe long God na kamap wanbel wantaim em. (Ro. 5:10; 8:32) Tasol dispela “taim bilong God i mekim gut long yumi,” klostu nau em bai pinis.
“Larim Holi Spirit i Kirapim Yupela”
16. Wanem samting i bin helpim Pol long strongim bel na wok strong?
16 Orait olsem wanem yumi inap kisim na holimpas pasin bilong givim bel long mekim lotu i tru? Ating sampela i gat pasin bilong sem o ol i no save toktok tumas na i hatwok long ol i kamapim ol samting ol i pilim long bel bilong ol, tasol dispela i no makim olsem ol i no gat pasin bilong givim bel tru, nogat. Pol i kamapim rot bilong kisim dispela pasin taim em i tokim ol wanbilip Kristen: “Larim Holi Spirit i kirapim yupela.” (Ro. 12:11) Holi spirit bilong Jehova i bin mekim bikpela wok bilong helpim Pol long strongim bel na wok strong long wok autim tok. Kirap long taim Jisas i singautim em na i go inap long laspela taim em i kalabus na ol i kilim em long Rom—em inap 30 yia samting—pasin bilong Pol long givim bel tru i no go slek. Oltaim em i bilip long God, na long rot bilong holi spirit God i givim strong long em. Em i tok, God “i save strongim mi, na long strong bilong em mi inap mekim olgeta samting.” (Fl. 4:13) Taim yumi bihainim pasin bilong em, dispela inap helpim tru yumi!
17. Olsem wanem yumi inap “larim Holi Spirit i kirapim” yumi?
17 Long Rom 12:11, aposel Pol i yusim wanpela tok Grik, insait bilong en i olsem “boilim.” Bilong wara insait long ketel i ken boil yet, paia i mas hat i stap. Olsem tasol, bilong “larim Holi Spirit i kirapim” yumi, yumi mas mekim ol samting i opim rot long spirit bilong God i ken wok oltaim long laip bilong yumi. Rot bilong mekim olsem em long mekim wok long olgeta samting em Jehova i givim long yumi bilong strongim yumi long ol samting bilong spirit. Yumi mas tingim Famili Lotu na ol miting bilong kongrigesen i bikpela samting—long olgeta taim yumi mas mekim Baibel stadi bilong yumi yet na famili stadi, beten, na bung wantaim ol wanbilip Kristen. Ol dispela samting bai helpim yumi long “larim Holi Spirit i kirapim” yumi, olsem “paia” i save mekim wara i “boil” i stap.—Ritim Aposel 4:20; 18:5.
18. Yumi ol Kristen i dediket pinis i mas putim tingting olgeta bilong yumi long wanem samting?
18 Man i putim tingting olgeta bilong em long wanpela wok, em i no larim wanpela samting i pulim em long mekim dispela wok. Yumi ol Kristen i dediket pinis, yumi putim tingting olgeta bilong yumi long mekim wanem wanem wok Jehova i laik yumi mas mekim. Jisas tu i bin mekim olsem. (Hi. 10:7) Long nau, laik bilong Jehova em olsem planti man i mas kamap wanbel wantaim em. Olsem na yumi mas givim bel tru—olsem Jisas na Pol i bin mekim—long mekim dispela nambawan bikpela wok em yumi mas mekim long nau.
Yu Inap Tingim?
• Wanem dispela wok bilong “kamap wanbel” em Pol na ol narapela Kristen God i bin makim ol i bin kisim?
• Ol Kristen God i bin makim em ol i stap yet long graun, olsem wanem ol i bin mekim gutpela wok long dispela “taim bilong God i mekim gut” long ol man?
• Olsem wanem ol Kristen inap “larim Holi Spirit i kirapim ol”?
[Piksa long pes 12]
Pol i no lusim tingting long taim Bikpela Jisas Krais i kamap long em