Tok Bilong Jehova i Gat Laip
Sampela Bikpela Tok Bilong Buk Josua
OL Israel i bung long ples daun bilong Moap long 1473 B.C.E., na ol i mas amamas long harim ol dispela tok olsem: “Ol i mas redim ol kaikai samting bilong ol. Tripela de tasol i stap na bai ol i brukim wara Jordan bilong kisim dispela graun God, Bikpela bilong ol, bai i givim long ol olsem graun bilong ol stret.” (Josua 1:11) Dispela 40 yia ol i wokabaut i klostu pinis nau.
Bihain long 20 yia, hetman bilong ol Josua i sanap namel long graun bilong Kenan na em i tokim ol hetman bilong Israel: “Nau yupela harim gut. Ol dispela graun bilong ol lain yupela i no winim yet, mi makim pinis bilong yupela long kisim, olsem mi bin mekim long graun bilong olgeta lain mi winim pinis long pait. Mak bilong graun bilong yupela i stat long wara Jordan long hap bilong sankamap na i go inap long biksolwara Mediterenian long hap bilong san i go daun. God, Bikpela bilong yumi, bai i rausim ol birua na mekim ol i ranawe long yupela. Na bai yupela i kisim graun bilong ol, olsem God i promis pinis.”—Josua 23:4, 5.
Josua i raitim dispela buk long 1450 B.C.E., na Buk Josua i stori long ol samting i bin kamap insait long dispela 22 yia. Nau yumi sanap klostu long dispela nupela taim God i promis long en, na i stap bilong yumi i wankain long ol pikinini man bilong Israel em ol i redi long kisim Graun Bilong Promis. Orait nau yumi ken skelim ol tok i stap long Buk Josua.—Hibru 4:12.
“LONG STRETPELA GRAUN KLOSTU LONG TAUN JERIKO”
Josua i kisim wanpela bikpela wok taim Jehova i tokim em: “Wokman bilong mi, Moses, i dai pinis. Orait yupela i mas redi nau. Yu wantaim olgeta manmeri bilong Israel, yupela i mas brukim wara Jordan na i go kamap long dispela graun mi laik givim long yupela.” (Josua 1:2) Josua i gat wok long kisim wanpela lain em inap sampela milion, bilong go insait long Graun Bilong Promis. Bilong redi long mekim olsem em i salim tupela man bilong lukstil i go long Jeriko—em dispela taun ol i mas daunim pastaim. Pamukmeri Rahap i save stap long dispela taun, na em i bin harim stori bilong ol strongpela wok Jehova i bin mekim bilong helpim ol lain bilong em. Rahap i lukautim na helpim tupela man bilong lukstil na tupela i tok promis long em olsem em bai abrusim bagarap.
Taim tupela man bilong lukstil i go bek long kem, Josua na ol manmeri ol i redi long brukim wara Jordan. Maski wara i tait, dispela i no pasim ol lain Israel, long wanem, Jehova i mekim na wara antap i stap olsem wanpela longpela maunten na wara i save ran i go daun long raunwara Detsi em i drai olgeta. Bihain long ol Israel i brukim wara Jordan, ol i wokim kem long Gilgal, klostu long Jeriko. Fopela de bihain, long nait bilong namba 14 de bilong mun Abib, ol i mekim kaikai bilong Tingim De God i Bin Larim Ol i Stap Gut. (Josua 5:10) Long de bihain, ol i kirap kisim kaikai bilong Kenan na God i no salim mana moa i kam daun. Long dispela taim Josua i katim skin bilong olgeta pikinini man em mama i bin karim ol long ples wesan nating.
Bekim Bilong Ol Askim Bilong Baibel:
2:4, 5—Bilong wanem Rahap i giamanim ol man bilong king em ol i kam painim ol man bilong lukstil? Rahap i bilip long Jehova, olsem na em i lukautim ol man bilong lukstil maski em inap kisim bagarap long dispela. Olsem na em i no gat wok long tokim ol man i laik bagarapim ol manmeri bilong God long wanem hap ol man bilong lukstil i hait long en. (Matyu 7:6; 21:23-27; Jon 7:3-10) Na “God i kolim em stretpela meri,” long wanem, Rahap i bin lukautim ol man bilong lukstil na salim ol man bilong king i go long narapela rot.—Jems 2:24-26.
5:14, 15—Husat dispela “kepten bilong ami bilong Bikpela”? Dispela kepten i kam strongim Josua taim em i kirap rausim ol birua bilong kisim Graun Bilong Promis em “Tok”—Jisas Krais taim em i stap long heven paslain long em i kam daun long graun. (Jon 1:1; Daniel 10:13) Yumi amamas tru long save olsem Jisas Krais i stap wantaim ol manmeri bilong God long nau taim ol i insait long pait bilong spirit!
Skul Yumi Kisim:
1:7-9. Pasin bilong ritim Baibel long olgeta de, na tingim tingim long bel na bihainim ol tok yumi lainim, ol i bikpela samting bilong helpim yumi long ol samting bilong spirit.
1:11. Josua i tokim ol manmeri long redim ol kaikai samting na no ken stap nating tasol na wetim God i givim ol dispela samting long ol. Tok Jisas i mekim olsem yumi no ken tingting planti long ol samting yumi mas i gat, na tok promis bilong em olsem ‘bai em i givim dispela olgeta arapela samting tu long yumi,’ i no makim olsem yumi stap tasol na yumi no mekim wanpela samting bilong lukautim yumi yet.—Matyu 6:25, 33.
2:4-13. Rahap i harim stori bilong ol bikpela wok Jehova i bin mekim na em i luksave olsem bagarap bai kamap, olsem na em i pasim tok long helpim ol man i save lotuim Jehova. Sapos yu bin stadi long Baibel inap longpela taim pinis na yu luksave olsem yumi stap long “taim bilong las de,” orait yu mas pasim tok long bel long mekim wok bilong God.—2 Timoti 3:1.
3:15. Ripot Josua i kisim long tupela man bilong lukstil long Jeriko i gutpela, olsem na Josua i kirap kwik long mekim ol samting na em i no wet long wara Jordan i go daun. Taim yumi mas mekim ol wok bilong lotu i tru, yumi mas i gat strongpela bel na mekim na yumi no ken wetim taim i luk olsem ol samting i kamap gutpela.
4:4-8, 20-24. Dispela 12-pela ston ol i kisim long wara Jordan ol i stap olsem mak bilong ol lain Israel i ken tingim ol samting God i bin mekim bilong helpim ol. Ol samting Jehova i mekim bilong kisim bek ol lain bilong em long ol birua bilong em long nau, dispela tu i stap olsem mak bilong soim olsem em i stap wantaim ol.
OL I WOK LONG DAUNIM YET OL LAIN
Ol i “pasim strong olgeta dua bilong banis bilong taun” Jeriko. “Ol man i no inap i go i kam.” (Josua 6:1) Olsem wanem bai lain Israel i kisim dispela taun? Jehova i tokim Josua long ol samting ol i mas mekim. I no longtaim ol banis bilong taun i bruk na ol i bagarapim pinis taun Jeriko. Rahap na ol wanhaus bilong em tasol i abrusim bagarap.
Narapela taun ol i mas daunim em Ai. Ol man i go lukstil long dispela taun i tokaut olsem i no gat planti man i stap long en, olsem na liklik lain tasol i ken i go bilong pait na kisim dispela taun. Tasol 3,000 soldia ol i salim i go bilong pait long dispela taun, ol i ranawe long ol man bilong Ai. Bilong wanem ol i mekim olsem? Jehova i no stap wantaim ol Israel. Akan bilong lain Juda i bin mekim sin taim ol i bagarapim Jeriko. Taim ol i stretim pinis dispela hevi, Josua i kisim ol lain i go pait long ol Ai. King bilong Ai i bin winim ol Israel long pastaim, olsem na em i gat bikpela laik long pait gen long ol. Maski lain bilong Ai i ting olsem ol bai win, Josua i bihainim wanpela kain pasin bilong pait na em i daunim ol.
Gibeon ‘em i bikpela taun—bikpela moa yet winim taun Ai, na olgeta man i strongpela man bilong pait.’ (Josua 10:2) Tasol taim ol Gibeon i harim stori long ol Israel i winim Jeriko na Ai, ol i giamanim Josua na em i wokim kontrak bilong i stap isi wantaim ol. Ol narapela lain i stap klostu i harim stori bilong samting ol Gibeon i mekim na ol i pret nogut ol Gibeon i mekim nogut long ol. Faipela king bilong ol i bung wantaim na ol i go pait long ol Gibeon. Ol lain Israel i go helpim ol Gibeon na ol i daunim ol dispela king. Aninit long wok bos bilong Josua, lain Israel i daunim ol narapela taun i stap long hap saut na wes bilong wara Jordan, na ol i daunim tu ol king bilong not em ol i bung wantaim na kam pait long ol. Olgeta king ol i daunim long hap wes bilong wara Jordan em inap olsem 31.
Bekim Bilong Ol Askim Bilong Baibel:
10:13—Olsem wanem dispela narakain samting inap kamap? Olsem wanem? Yu ting “i no gat wanpela samting Bikpela i no inap long mekim”? (Stat 18:14) Sapos em i laik, Jehova inap stopim graun long tanim tanim na long ai bilong man i stap long graun i luk olsem san na mun i sanap i stap tasol long wanpela hap. O em inap larim graun na mun i tanim tanim yet, tasol long sampela kain rot em inap mekim lait bilong san na mun i lait i stap long wanpela hap tasol bilong graun. Maski wanem samting i bin kamap, “i no gat wanpela de olsem dispela de” long bipo na i kam inap long nau.—Josua 10:14.
10:13—Dispela Buk Bilong Ol Stretpela Man em wanem kain buk? Namba 2 Samuel 1:18 i stori tu long dispela buk em ol i raitim wanpela singsing insait long en, nem bilong en “Song Bilong Banara”—em wanpela singsing sori long King Sol bilong Israel na pikinini man bilong em Jonatan. Ating dispela buk i gat ol singsing na ol sotpela stori long ol samting i bin painim ol Israel na ol lain Hibru i save gut long en.
Skul Yumi Kisim:
6:26; 9:22, 23. Truim bilong strongpela tok Josua i bin mekim long taim Jeriko i bagarap i bin kamap 500 yia bihain. (1 King 16:34) Tok Noa i bin mekim long tumbuna pikinini bilong em Kenan i bin kamap tru taim lain Gibeon i kamap wokboi nating. (Stat 9:25, 26) Tok bilong Jehova i save kamap tru olgeta taim.
7:20-25. Ating sampela bai tok pasin stil bilong Akan i liklik samting tasol, na ol inap ting olsem dispela samting i no inap bagarapim ol narapela. Ating ol bai i gat wankain tingting long pasin bilong stilim liklik samting tasol na ol liklik rong man i mekim na i brukim lo bilong Baibel i olsem liklik samting. Tasol yumi mas bihainim pasin bilong Josua long strong long sakim ol pasin i brukim lo na ol pasin i no stret.
9:15, 26, 27. Yumi mas tingim tru ol promis yumi mekim wantaim ol narapela na truim ol tok promis yumi mekim.
JOSUA I MEKIM LASPELA BIKPELA WOK BILONG EM
Taim Josua i lapun—klostu 90 krismas—em i kirap tilim graun. Em wanpela bikpela wok tru! Lain Ruben na Gat na hap lain bilong lain Manase i bin kisim pinis graun long hap is bilong wara Jordan. Josua i pilai satu bilong tilim graun i stap long hap wes i go long ol narapela lain bilong Israel.
Ol i sanapim haus lotu sel long Silo long graun bilong ol Efraim. Kalep i kisim taun Hebron, na Josua i kisim Timnat Sera. Ol i givim ol lain Livai 48 taun, na tu 6-pela taun bilong ol man i ken i go hait long en. Taim lain bilong Ruben, Gat na hap lain bilong Manase i go bek long ples bilong ol, ol i sanapim wanpela “bikpela alta.” (Josua 22:10) Ol lain i stap long hap wes bilong wara Jordan i lukim dispela pasin i olsem pasin bilong tromoi lotu i tru, na klostu pait i kamap, tasol ol lain long hap wes na lain bilong hap is i toktok gut wantaim na dispela i pasim ol long pait.
Josua i stap longpela taim liklik long Timnat Sera, orait em i singautim ol hetman na ol lida na ol bikman na ol ofisa bilong ol manmeri i kam bung na em i tok strong long ol i mas sanap strong na stap gut long Jehova. Bihain Josua i bungim olgeta lain Israel long Sekem. Em i stori gen long ol samting Jehova i bin mekim kirap long taim bilong Abraham na i kam long taim bilong ol, na em i tokim ol gen long ol “i mas pret long Jehova na mekim wok bilong em long pasin i stret olgeta na i tru.” Na olgeta manmeri i tokaut olsem: “Mipela i laik lotu long God, Bikpela bilong yumi na bihainim ol lo bilong em tasol.” (Josua 24:14, 15, 24; NW ) Bihain taim Josua i gat 110 krismas em i dai.
Bekim Bilong Ol Askim Bilong Baibel:
13:1—Olsem wanem? Tok i stap long dispela ves i pait wantaim tok i stap long Josua 11:23? Nogat, long wanem, i gat tupela samting ol i mekim bilong kisim Graun Bilong Promis: Namba wan, ol i pait na daunim 31 king bilong graun Kenan na dispela i daunim strong bilong lain Kenan. Namba tu, ol i kisim graun olgeta long rot bilong samting ol lain na ol man wan wan i mekim. (Josua 17:14-18; 18:3) Tru lain Israel i no bin rausim olgeta lain Kenan, tasol ol Kenan i stap yet i no inap mekim samting bilong bagarapim ol Israel. (Josua 16:10; 17:12) Josua 21:44 i tok: “Bikpela i givim gutpela taim long ol.”
24:2—Olsem wanem? Papa bilong Abraham, Tera, i save lotuim ol giaman god? Pastaim, Tera i no bin lotuim God Jehova. Ating em i save lotuim god bilong mun nem bilong em Sin—em wanpela god planti man long Ur i save lotuim. Stori bilong ol Juda i tok Tera i bin wokim ol giaman god. Tasol taim Abraham i bihainim tok bilong God na lusim Ur, Tera i go wantaim em long Haran.—Stat 11:31.
Skul Yumi Kisim:
14:10-13. Maski Kalep i gat 85 krismas, em i laik pait na rausim ol manmeri i stap long Hebron. Ol man long dispela hap ol i traipela man bilong lain Anak. Jehova i helpim em na dispela man i gat save long pait i winim ol man bilong dispela hap na kisim dispela taun na Hebron i kamap wanpela taun bilong hait. (Josua 15:13-19; 21:11-13) Pasin bilong Kalep i strongim yumi long no ken surik long mekim ol wok tiokratik i gat hatwok long en.
22:9-12, 21-33. Yumi mas was gut na no ken skelim skelim ol samting ol narapela i mekim na tingting kranki long ol.
‘Olgeta Promis i Bin Kamap’
Taim Josua i lapun em i tokim ol hetman bilong Israel: “Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis.” (Josua 23:14) Olgeta stori i stap long Buk Josua i kamapim ples klia dispela samting!
Aposel Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Yumi ken bilip tru olsem ol tok promis bilong God i no inap lus nating. God bai inapim tru olgeta tok promis bilong em; olgeta bai kamap tru.
[Mep long pes 10]
(Bilong save ol dispela rait i stap we long pes, lukim buk o magasin)
Aninit long wok bos bilong Josua lain Israel i daunim ol man na kisim graun
BASAN
GILEAT
ARABA
NEGEV
Wara Jordan
Raunwara Detsi
Ples Daun Bilong Wara Jabok
Ples Daun Bilong Wara Arnon
Hasor
Madon
Lasaron
Simron
Jokneam
Dor
Megido
Kedes
Tanak
Hefer
Tirsa
Afek
Tapua
Betel
Ai
Gilgal
Jeriko
Geser
Jerusalem
Makeda
Jarmut
Adulam
Lipna
Lakis
Eklon
Hebron
Debir
Arat
[Piksa long pes 9]
Yu save long as na God i tok pamukmeri Rahap em i stretpela meri?
[Piksa long pes 10]
Josua i kirapim ol lain Israel long “pret long Jehova na mekim wok bilong em”
[Piksa long pes 12]
Pasin stil bilong Akan i no liklik rong; em i mekim na bikpela hevi i kamap
[Piksa long pes 12]
‘Ol Israel i bilip long God, na ol i wokabaut raunim banis bilong taun Jeriko na banis i pundaun.’—Hibru 11:30