Wanem Samting i Mekim na Laip i Gat As Bilong En?

“Yumi mas aninit long God tasol na bihainim ol lo bilong em.”​—SAV. 12:13.

1, 2. Taim yumi skelim Buk Saveman, olsem wanem dispela bai helpim yumi?

PIKSAIM long tingting wanpela man i luk olsem em i gat olgeta samting. Em i wanpela bikman na maniman tru, na man i gat gutpela tingting na save winim olgeta narapela man long taim bilong em. Tasol maski em i gat ol dispela samting, em i laik save, ‘Wanem samting i mekim na laip i gat as bilong en?’

² Wanpela man olsem i bin i stap inap 3,000 yia i go pinis. Nem bilong em Solomon, na long Buk Saveman yumi inap painim stori bilong em long ol samting em i bin mekim bilong i stap belgut na amamas. (Sav. 1:13) I gat planti samting yumi inap lainim long ol samting Solomon i mekim. Tru tumas, gutpela tingting na save i stap long Buk Saveman inap helpim yumi long putim ol mak yumi inap winim na bai laip bilong yumi i gat as tru bilong en.

“Ran i Go Bilong Holimpas Win”

 3. Wanem samting i save painim yumi ol manmeri na yumi no inap abrusim?

³ Solomon i stori olsem God i bin wokim planti naispela samting long graun​—i no gat pinis bilong ol dispela samting yumi inap skelim na amamas long en. Tasol yumi no inap kisim save long olgeta samting God i bin wokim, long wanem, laip bilong yumi i sotpela. (Sav. 3:11; 8:17) Olsem Baibel i tok, yumi ol manmeri i save stap sotpela taim long graun na bihain yumi save dai. (Jop 14:​1, 2; Sav. 6:12) Yumi save long dispela samting na dispela i mas kirapim yumi long mekim gut wok long laip bilong yumi. Tasol i hatwok long mekim olsem, long wanem, dispela graun bilong Satan inap pulim yumi long bihainim rot nogut.

 4. (a) Dispela tok “samting nating” i makim wanem samting? (b) Bai yumi skelim wanem ol samting ol man i save mekim?

⁴ Bilong kamapim klia olsem man i mas was gut nogut em i mekim ol samting i no gat as bilong en, inap 30 taim samting Solomon i mekim wok long tok “samting nating” o “no gat as bilong en.” Tok Hibru ol i tanim olsem “samting nating” i makim samting i no gat mining, i no gat as bilong en, na i no inap i stap longpela taim. (Sav. 1:​2, 3) Sampela taim Solomon i mekim wok long tok “samting nating” bilong makim tok olsem “man i ran i go bilong holimpas win.” (Sav. 1:14; 2:11) Yumi save, man i no inap tru long holimpas win. Sapos man i traim long mekim olsem, em bai i no inap holim wanpela samting. I wankain tu sapos yumi mekim ol samting i no inap helpim yumi, dispela bai mekim yumi bel hevi. Laip bilong yumi long nau i sotpela na i no gutpela long yumi lusim nating taim long ol samting i no gat as bilong en. Bilong helpim yumi long abrusim dispela pasin, bai yumi skelim sampela samting em ol man i save wok strong long mekim na Solomon i toktok long en. Pastaim, bai yumi skelim pasin bilong painim amamas na bungim ol mani kago. Bihain long dispela, bai yumi stori long pasin bilong mekim wok em Jehova i amamas long en.

Yu Ting Pasin Bilong Painim Amamas Bai Mekim Yumi i Stap Amamas?

 5. Solomon i painim gutpela sindaun olsem wanem?

⁵ Wankain olsem planti manmeri long nau, Solomon i bin traim long painim gutpela sindaun long rot bilong amamas. Em i tok: “Mi no bin pasim laik bilong mi liklik. Nogat tru. Long taim mi laikim wanpela samting, orait mi kisim tasol.” (Sav. 2:10) Em i wok long painim amamas olsem wanem? Saveman sapta 2 i tok, em i “dring wain”​—na taim em i mekim olsem em i bosim gut bel​—​na em i planim ol gaden, wokim ol bikpela bikpela haus, harim musik, na kisim gutpela kaikai.

 6. (a) Bilong wanem i no gat rong long kisim amamas sampela taim? (b) Yumi mas i gat wanem stretpela tingting long ol samting bilong amamas?

⁶ Yu ting Baibel i tambuim pasin bilong kisim amamas wantaim ol pren? Nogat tru. Solomon i tok olsem pasin bilong kisim kaikai bihain long taim man i wok hat tru long de olgeta, dispela em i presen i kam long God. (Ritim Saveman 2:24; 3:​12, 13.) Na tu, Jehova i tokim ol yangpela long bihainim gutpela tingting taim ol i kisim ‘amamas long taim ol i yangpela yet.’ (Sav. 11:9) Yumi mas kisim malolo na mekim ol samting bilong kisim amamas. (Skelim Mak 6:31.) Tasol pasin bilong painim amamas i no ken i stap nambawan samting long laip bilong yumi. Pasin bilong kisim amamas i mas i stap olsem aiskrim samting​—em i swit tru, tasol em i no strongpela kaikai. Yu bai wanbel long tok olsem maski yu save amamas long kaikai aiskrim, bai yu les long en sapos olgeta taim yu kaikai aiskrim tasol na narapela kaikai nogat, na tu, em bai i no inap strongim tru skin bilong yu. Olsem tasol, Solomon i kisim save olsem pasin bilong painim amamas tasol i kain olsem “man i ran i go bilong holimpas win.”​—Sav. 2:​10, 11.

 7. Bilong wanem yumi mas skelim gut ol amamas yumi laik kisim?

⁷ Na tu, i no olgeta kain amamas i gutpela. Planti bilong ol inap bagarapim pasin bilong yumi long pas gut wantaim Jehova na inap kirapim yumi long mekim pasin i no stret. Planti milion manmeri i bin kisim bikpela hevi, long wanem, ol i laik kisim amamas, olsem na ol i kisim drak, dring planti, o pilai laki. Jehova i givim tok lukaut long yumi olsem sapos yumi larim bel o ai bilong yumi i pulim yumi long mekim ol samting nogut, yumi mas save olsem yumi bai karim hevi long dispela samting.​—Ga. 6:7.

 8. Bilong wanem i gutpela long yumi skelim laip bilong yumi?

⁸ Na tu, sapos yumi tingting oltaim long painim amamas, dispela bai pulim tingting bilong yumi na yumi no tingim ol bikpela samting. Tingim, laip i sotpela na yumi no save bai yumi kisim sik na ol hevi bai painim yumi o nogat. Olsem na Solomon i tok, pasin bilong i go long haus krai​—moa yet haus krai bilong wanpela gutpela brata o sista Kristen husat i dai​—i gutpela moa winim pasin bilong i go long “haus bilong amamas” long en. (Ritim Saveman 7:​2, 4.) Bilong wanem i olsem? Taim yumi stap long haus krai bilong wanpela Kristen i dai, na yumi harim tok bilong planim em na yumi tingim laip bilong dispela gutpela Kristen, dispela inap kirapim yumi long skelim laip bilong yumi yet. Na yumi inap luksave olsem yumi mas senisim ol samting yumi tingting long mekim na bai yumi inap mekim gut wok long laip bilong yumi.​—Sav. 12:1.

Yu Ting Mani Kago Bai Mekim Yumi i Stap Amamas?

 9. Solomon i kisim save long wanem samting long pasin bilong holim planti mani kago?

⁹ Long taim Solomon i raitim Buk Saveman em i wanpela man i gat planti mani kago. (2 Sto. 9:22) Em i gat mani bilong baim wanem wanem samting em i laikim. Em i tok: “Mi no bin pasim laik bilong mi liklik. Nogat tru. Long taim mi laikim wanpela samting, orait mi kisim tasol.” (Sav. 2:10) Tasol em i luksave olsem maski man i gat planti mani kago dispela i no inap mekim man i stap amamas. Em i tok: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em.”​—Sav. 5:10.

10. Wanem samting i save mekim man i stap amamas na belgut?

¹⁰ Maski mani kago inap pinis wantu, mani kago i gat bikpela strong long pulim ol man. Long wanpela wok painimaut ol i mekim long Amerika, inap 75 pesen bilong ol sumatin long yunivesiti i tok nambawan samting long laip bilong ol “em long kamap maniman.” Sapos ol i winim dispela mak ol i putim, yu ting ol bai amamas tru? Ating nogat, a? Long wanpela wok painimaut ol i kisim save olsem taim man i tingting oltaim long kisim planti mani kago, dispela bai pasim em long stap amamas na belgut. Long bipo yet, Solomon i bin luksave long dispela samting. Em i tok: “Mi bin kisim planti silva na gol long ol provins bilong mi na long ol king bilong ol arapela kantri . . . na mi pilim olsem, olgeta dispela samting i olsem samting nating tasol na i no inap long helpim mi liklik. I olsem man i ran i go bilong holimpas win.”a (Sav. 2:​8, 11) Tasol sapos yumi mekim wok long laip bilong yumi bilong givim bel olgeta long mekim wok bilong Jehova na em i givim blesing long yumi, bai yumi kisim planti gutpela samting tru.​—Ritim Sindaun 10:22.

Wanem Kain Wok i Save Mekim Man i Stap Amamas Tru?

11. Baibel i stori olsem wanem long wok?

¹¹ Jisas i tok: “Papa bilong mi em i save wok oltaim i kam inap long nau. Na mi tu mi save wok.” (Jo. 5:17) Yumi ken save Jehova na Jisas i save kisim amamas long wok ol i mekim. Taim Jehova i bin wokim ol samting, Baibel i soim olsem em i bin kisim amamas long ol dispela wok. Baibel i tok: “God i lukim olgeta dispela samting i gutpela, na em i amamas tru.” (Stt. 1:31) Ol ensel “i amamas na singaut” taim ol i lukim olgeta samting God i wokim. (Jop 38:​4-7) Solomon tu i amamas long wok i gat as bilong en.​—Sav. 3:13.

12, 13. (a) Tupela man i tok wanem long amamas ol i kisim long wok ol i mekim? (b) Bilong wanem sampela taim wok mani i save mekim man i bel hevi?

¹² Planti man i save olsem sapos man i mekim gutpela wok em bai kisim amamas. Olsem: José, wanpela man bilong droim piksa, em i tok: “Taim yu inap long droim piksa bilong samting yu tingting long en, yu bai kisim bikpela amamas tru.” Miguel,b wanpela bisnisman, em i tok: “Taim yu wok, yu kisim amamas, long wanem, yu inap long lukautim famili bilong yu. Na tu, bai yu pilim olsem yu mekim wanpela gutpela samting.”

¹³ Tasol long planti wok, man i mekim wankain samting long olgeta de na i no gat rot long em i wokim tingting na kamapim nupela samting. Sampela taim ol samting i kamap long ples wok i mekim man i bel hevi o ples wok i stap olsem ples we ol arapela i mekim pasin i no stret long em. Olsem Solomon i tok, lesman​—ating em i save long bos​—em inap kisim nating samting bilong man i bin wok strong. (Sav. 2:21) Na ol narapela samting tu inap mekim na man i bel hevi. Ating man inap insait long wanpela bisnis em i ting dispela bisnis bai ron gut, tasol strong bilong mani i go daun o sampela narapela hevi i kamap na nau bisnis i bagarap. (Ritim Saveman 9:11.) Planti taim, man i wok strong long mekim wok em i save bel hevi na kros, na em i luksave olsem em i “hatwok nating olsem man i ran i go bilong holimpas win.”​—Sav. 5:16.

14. Wanem wok i save mekim man i stap amamas tru?

¹⁴ Olsem wanem? I gat wanpela wok i no inap mekim man i bel hevi? José, em dispela man bilong droim ol piksa em pastaim yumi bin stori long em, i tok: “Insait long ol yia i kam i go, ol piksa inap lus o bagarap. Tasol ol wok bilong God yumi mekim i no olsem. Taim mi bihainim tok bilong Jehova long autim gutnius, mi wok long helpim ol narapela long kamap Kristen i daun long God na dispela i helpim ol inap oltaim. Dispela samting i winim tru ol narapela samting.” (1 Ko. 3:​9-​11) Miguel tu i tok olsem wok bilong autim tok bilong Kingdom i mekim em i stap amamas tru winim wok mani bilong em. Em i tok: “I no gat wanpela samting inap givim amamas long yu winim amamas yu inap kisim taim yu tokim ol narapela long tok i tru bilong Baibel na yu luksave olsem man i pilim tru ol tok bilong Baibel.”

“Wok Long Planti Hap”

15. Wanem samting i save mekim na laip i gat as tru bilong en?

¹⁵ Bilong pinisim dispela stori, wanem samting i save mekim laip i gat as tru bilong en? Yumi bai amamas tru sapos yumi mekim wok long dispela sotpela taim bilong yumi long nau bilong mekim gutpela wok na amamasim Jehova. Yumi ken wok long kisim pasin bilong pas gut wantaim God, yumi ken skulim ol pikinini bilong yumi long ol stiatok bilong Baibel, yumi ken helpim ol narapela long kisim save long Jehova; na yumi ken pas gut wantaim ol bratasista bilong yumi. (Ga. 6:10) Olgeta dispela samting i bilong i stap oltaim na i save givim blesing long ol man i mekim ol dispela wok. Solomon i stori long pasin bilong mekim gutpela wok. Em i tok: “Yu mas mekim wok long planti hap, na bihain bai yu kisim gutpela pe.” (Sav. 11:1) Jisas i tokim ol disaipel bilong em: “Yupela i mas givim ol samting long ol arapela, na bai God i givim ol samting long yupela.” (Lu. 6:38) Na tu, Jehova i tok promis long em yet bai mekim gut long ol man i mekim gutpela pasin long ol narapela.​—Snd. 19:17; ritim Hibru 6:10.

16. Wanem taim i gutpela long mekim ol disisen long ol samting yumi laik mekim long laip bilong yumi?

¹⁶ Baibel i kirapim yumi long mekim ol gutpela disisen long ol samting yumi laik mekim long laip bilong yumi taim yumi yangpela yet. Taim yumi mekim olsem bai yumi no bel hevi long bihain. (Sav. 12:1) Em bai i no gutpela sapos yumi mekim wok long laip bilong yumi long painim ol amamas bilong dispela graun long taim yumi yangpela na bihain yumi luksave olsem ol dispela samting i samting nating na i olsem yumi ran i go bilong holimpas win!

17. Wanem samting bai helpim yu long makim nambawan gutpela rot long bihainim?

¹⁷ Wankain olsem wanpela gutpela papa, Jehova i laik yu stap amamas, mekim ol gutpela samting, na abrusim ol samting inap mekim yu bel hevi. (Sav. 11:​9, 10) Wanem samting bai helpim yu long mekim olsem? Putim ol mak long mekim ol wok bilong God na wok strong long winim ol dispela mak. Klostu 20 yia i go pinis, Javier i mas wokim disisen long em bai mekim wok dokta o em bai insait long fultaim sevis. Em i tok: “Tru wok dokta inap mekim mi i stap amamas, tasol i no gat wanpela samting inap winim amamas mi kisim taim mi helpim sampela manmeri long kisim save long tok i tru. Fultaim sevis i helpim mi long i stap amamas tru. Samting mi bel hevi long en em mi no bin insait long dispela wok taim mi yangpela yet.”

18. Bilong wanem laip bilong Jisas long graun i gat as tru bilong en?

¹⁸ Olsem na wanem samting i nambawan gutpela samting yumi mas wok strong long kisim? Buk Saveman i tok: “Sapos ol man i ting yu gutpela man, orait dispela i gutpela tru, na i winim sanda i gat bikpela pe bilong en. Na de yu dai i winim de mama i bin karim yu.” (Sav. 7:1) Laip bilong Jisas i kamapim klia dispela samting. Em i gutpela man long ai bilong Jehova. Taim Jisas i stap gut long Jehova i go inap long em i dai, em i kamapim klia olsem Papa bilong em i nambawan Bos bilong heven na graun na Jisas i givim em yet olsem ofa bilong baim bek ol man, na dispela ofa i opim rot long God i kisim bek yumi. (Mt. 20:28) Insait long dispela sotpela taim Jisas i stap long graun, em i stap olsem gutpela piksa tru yumi ken bihainim​—na yumi mas wok strong long bihainim​—em i mekim ol samting na laip bilong em i gat as tru bilong en.​—1 Ko. 11:1; 1 Pi. 2:21.

19. Solomon i givim wanem gutpela tok?

¹⁹ Yumi tu inap i stap gutpela man long ai bilong God. Sapos yumi gat gutpela nem long ai bilong Jehova, dispela i winim tru mani kago samting. (Ritim Matyu 6:​19-​21.) Long olgeta de, yumi mas painim rot bilong mekim ol gutpela samting long ai bilong Jehova na dispela bai mekim yumi i stap amamas. Olsem: Yumi ken autim gutnius long ol narapela, strongim marit na famili bilong yumi, na mekim ol samting bilong pas gut moa wantaim Jehova long rot bilong stadi na go long ol miting. (Sav. 11:6; Hi. 13:16) Olsem wanem? Yu laik kisim laip i gat as tru bilong en? Sapos olsem, orait bihainim tok bilong Solomon: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”​—Sav. 12:13.

[Ol Futnot]

Bai Yu Bekim Olsem Wanem?

• Wanem samting i mas kirapim yumi long tingting gut long ol mak yumi laik winim long laip bilong yumi?

• Yumi mas i gat wanem tingting long pasin bilong painim amamas na pasin bilong bungim mani kago?

• Wanem kain wok bai mekim man i stap amamas tru?

• Yumi mas wok strong long kisim wanem gutpela samting?

[Piksa long pes 23]

Yumi mas i gat wanem tingting long pasin bilong painim amamas?

[Piksa long pes 24]

Olsem wanem wok bilong autim tok i mekim man i amamas tru?