Sapta 10

Husat Inap Pait Long King i Winim Olgeta King?

1, 2. Dispela samting olsem driman Daniel i lukim long namba 3 yia bilong Belsasar i stap king, bilong wanem em i bikpela samting long yumi?

FIFTI-SEVEN yia bihain long taim tempel bilong Jehova long Jerusalem i kisim bagarap, Belsasar na papa bilong em, Nabonaidas, i wok king wantaim long bosim Gavman Babilon, em namba 3 bikpela gavman Baibel i tok profet long en.a Profet bilong God, em Daniel, i stap long Babilon. Long “namba 3 yia bilong Belsasar i stap king,” Jehova i givim wanpela samting olsem driman long Daniel i stori long sampela samting bilong kamapim bek lotu i tru.​—Daniel 8:1.

² Dispela samting olsem driman Daniel i lukim i mekim bikpela samting long em na em i samting yumi ol manmeri i stap long taim bilong “las de” i mas tingim. Ensel Gebriel i tokim Daniel: “Mi laik tokim yu long ol samting bai i kamap long taim belhat bilong God i laik pinis, klostu long taim God i makim pinis bilong las de.” (Daniel 8:​16, 17, 19, 27) Orait, yumi laik skelim gut ol samting Daniel i lukim na olsem wanem dispela em i bikpela samting long yumi long nau.

WANPELA SIPSIP MAN I GAT TUPELA KOM

3, 4. Daniel i lukim wanem animal i sanap klostu long wara? Dispela animal i makim wanem samting?

³ Daniel i tok: “Long dispela driman wantu mi go kamap long distrik Elam, na mi sanap insait long banis bilong biktaun Susa. Mi sanap klostu long wara Ulai.” (Daniel 8:2) Tru tru Daniel i stap long Susa​—em biktaun bilong Elam, na em i stap 350 kilomita longwe long Babilon long hap is​—o em i stap long dispela taun insait long driman tasol, em Baibel i no tok.

⁴ Daniel i tok moa: “Mi lukluk yet na mi lukim wanpela sipsip man i sanap klostu long wara. Em i gat tupela kom.” (Daniel 8:3a) Samting dispela sipsip man i makim, em i no stap hait moa long Daniel. Bihain ensel Gebriel i tok: “Yu bin lukim wanpela sipsip man i gat tupela kom. Em i makim kantri Midia na kantri Persia.” (Daniel 8:20) Ol Midia i bilong ples maunten i stap long hap is bilong Asiria, na long bipo ol Persia i save raun raun long hap graun i stap long not bilong Persian Galf. Tasol taim Gavman Midia-Persia i go bikpela ol i kirap laikim tumas ol naispela naispela samting bilong skin.

 5. Namba 2 kom “i bin kamap bihain,” olsem wanem em i kamap longpela moa?

⁵ Daniel i tok: “Namba wan kom em i longpela, tasol namba 2 kom i bin kamap bihain long namba wan kom, na em i longpela moa.” (Daniel 8:3b) Namba 2 kom i bin kamap bihain i makim Persia, na namba wan kom i makim Midia. Pastaim ol Midia i strongpela moa, winim Persia. Tasol long 550 B.C.E., Sairus, king bilong Persia, i daunim kwik Astiages, king bilong Midia. Sairus i bungim ol pasin na lo bilong tupela lain wantaim, na ol i kamap wanpela gavman tasol, na em i bringim ol i go pait na daunim planti narapela lain. Kirap long dispela taim tupela gavman i bung wantaim olsem wanpela gavman.

SIPSIP MAN I HAMBAK

6, 7. Olsem wanem na ‘i no gat wanpela animal inap long pasim’ dispela sipsip man?

⁶ Daniel i stori moa long sipsip man olsem: “Mi lukim dispela sipsip man i daunim het na i ran i go bamim ol samting long kom bilong en. Em i ran i go long hap san i go daun, na long hap not na long hap saut. I no gat wanpela animal inap long pasim em na i no gat wanpela inap ranawe long en. Em i mekim ol samting long laik bilong em yet na em i kamap strongpela tru.”​—Daniel 8:4.

⁷ Long driman samting Daniel i bin lukim pastaim, wanpela wel animal i bin lusim solwara na kam antap na i luk olsem wanpela laion i gat wing bilong tarangau, na em i bin makim Babilon. (Daniel 7:​4, 17) Dispela animal i no inap pasim “sipsip man” bilong dispela nupela driman. Bikpela King Sairus i daunim Babilon long 539 B.C.E. I go inap 50 yia bihain, i no gat “wanpela animal,” olsem gavman politik, inap pasim Gavman Midia-Persia​—em namba 4 bikpela gavman Baibel i tok profet long en.

8, 9. (a) Olsem wanem “sipsip man” “i ran i go long hap san i go daun, na long hap not na long hap saut”? (b) Buk Esta i tok wanem long senis bilong King Darius 1 bilong Persia?

⁸ Gavman Midia-Persia i kam long “hap bilong sankamap”​—olsem hap bilong is​—na em i mekim laik bilong em, “em i ran i go long hap san i go daun, na long hap not na long hap saut.” (Aisaia 46:11) King Kambisis 2, em i kamap king bihain long Bikpela King Sairus, em i daunim Isip. Senis bilong em, King Darius 1 bilong Persia, i go long hap wes na brukim solwara long Bosporus Streit long 513 B.C.E. na i go insait long graun bilong Tres, biktaun bilong en em Bisantiam (Istanbul long nau). Long yia 508 B.C.E., em i daunim Tres, na em i daunim Masedonia long 496 B.C.E. Olsem na i kam inap long taim bilong Darius, dispela “sipsip man” bilong Midia-Persia i bin daunim ol kantri long 3-pela hap: Babilon na Asiria long hap not, Esia Maina long hap wes, na Isip long hap saut.

⁹ Bilong strongim dispela tok olsem Gavman Midia-Persia em i bikpela na strongpela gavman, Baibel i stori long senis bilong Darius, em Serksis 1, olsem “em i bosim ol 127 provins, stat long India na i go inap long Itiopia.” (Esta 1:1) Tasol narapela gavman bai daunim dispela strongpela gavman, na driman bilong Daniel i kamapim sampela samting em inap strongim bilip bilong yumi long ol tok profet bilong God.

MEME I DAUNIM SIPSIP MAN

10. Long driman bilong Daniel, wanem animal i daunim dispela “sipsip man”?

¹⁰ Daniel i kirap nogut long samting nau em i lukim. Baibel i tok: “Mi tingting planti yet long as bilong dispela samting na mi lukim wanpela meme man i lusim hap san i go daun na i kam. Em i spit moa yet na lek bilong en i no krungutim graun. Em i gat wanpela traipela kom tasol i sanap namel long tupela ai bilong en. Taim dispela meme i lukim dispela sipsip mi bin lukim i sanap klostu long wara, orait dispela meme i ran spit nogut tru i go long dispela sipsip. Na mi lukim em i pait long sipsip. Dispela meme i kros nogut tru na taitim bun na i ran i go stret na bamim sipsip man na brukim tupela kom bilong en. Sipsip man i no gat strong bilong sakim em na meme i tromoi em i go daun long graun na i krungutim em nogut tru. Na i no gat wanpela samting inap long helpim dispela sipsip.” (Daniel 8:​5-7) Wanem insait bilong ol dispela samting?

11. (a) Ensel Gebriel i stori olsem wanem long “meme” na “traipela kom” bilong en? (b) Traipela kom i makim husat?

¹¹ God i no larim Daniel na yumi tu i paul long mining bilong dispela driman. Ensel Gebriel i tokim Daniel: “Dispela meme yu bin lukim, em i makim kantri Grik, na dispela traipela kom i sanap namel long tupela ai bilong en, em i namba wan king bilong ol Grik.” (Daniel 8:21) Long 336 B.C.E., Darius 3 (Kodomanus) i kamap king, em i laspela king bilong Gavman Persia. Na tu, long dispela yia Aleksander i kamap king bilong Masedonia. Ol samting i bin kamap long bipo i kamapim klia olsem Bikpela King Aleksander em i “namba wan king bilong ol Grik” em Baibel i tok profet long en. Aleksander i “lusim hap san i go daun,” o hap wes, long yia 334 B.C.E., na em i spit i kam. I olsem “lek bilong en i no krungutim graun”​—em i kisim ol kantri na daunim dispela “sipsip man.” Inap 200 yia Midia-Persia i bin bosim graun, tasol kantri Grik i daunim ol na kamap namba 5 bikpela gavman Baibel i stori long en. Truim bilong dispela tok profet bilong God i narapela kain tru!

12. Olsem wanem “traipela kom” bilong meme i “bruk”? Dispela 4-pela kom i kamap long ples bilong en i makim wanem samting?

¹² Tasol strong bilong Aleksander i no inap i stap longpela taim. Driman i tok: “Orait dispela meme i hambak moa yet na i soim strong bilong en. Tasol taim strong bilong en i kamap bikpela tru, kom bilong en i bruk. Na 4-pela arapela kom i kamap long ples bilong dispela kom i bruk. Ol dispela 4-pela kom i traipela moa. Narapela kom i lukluk i go olsem long hap not, na narapela i lukluk i go olsem long hap saut, na narapela i lukluk i go olsem long hap sankamap, na narapela i lukluk i go olsem long hap san i go daun.” (Daniel 8:8) Gebriel i kamapim insait bilong dispela tok profet olsem: “Yu bin lukim dispela traipela kom i bruk, na 4-pela arapela kom i kamap long ples bilong en. As bilong dispela i olsem. Kantri Grik bai i bruk na i kamap 4-pela nupela kantri. Tasol ol bai i no gat strong olsem bipo taim kantri i no bruk yet.” (Daniel 8:22) Olsem tok profet i makim, taim Aleksander i gat strong tru, em i “bruk,” o i dai, taim em i gat 32 krismas tasol. Na bihain ol i brukim gavman bilong em na givim long 4-pela jeneral bilong em.

LIKLIK KOM I NARAPELA KAIN

13. Wanem samting i kru long wanpela bilong ol dispela 4-pela kom? Em i mekim wanem kain pasin?

¹³ Narapela hap bilong dispela tok profet i makim samting i kamap 2,200 yia bihain, na truim bilong en i kamap long taim bilong yumi. Daniel i tok: “Wanpela nupela liklik kom i kamap olsem kru bilong diwai antap long wanpela bilong dispela 4-pela kom. Strong bilong dispela nupela kom i kamap bikpela moa yet. Na em i daunim ol manmeri bilong hap saut na bilong hap sankamap na bilong dispela gutpela graun God i bin givim long ol manmeri bilong en. Dispela kom i kamap strong moa na i pait long ol sta. Ol sta i pait olsem ol soldia bilong ami bilong heven. Na kom i tromoi sampela sta i go daun long graun na i krungutim ol. Na tu kom i traim long daunim King bilong ami bilong heven. Em i pinisim pasin bilong mekim ofa long dispela King, na em i bagarapim haus ol manmeri i save lotuim dispela King long en. Ol manmeri i bin mekim pasin nogut, olsem na dispela kom i kisim strong bilong daunim ol ami bilong heven na bilong pinisim pasin bilong mekim ofa long olgeta de. Ol tok bilong God i tru olgeta, tasol dispela kom i rabisim dispela tok, bai ol manmeri i no ken bihainim moa. Olgeta samting dispela kom i laik mekim, em i mekim tasol.”​—Daniel 8:​9-12.

14. Ensel Gebriel i tok wanem long ol samting dispela liklik kom bai mekim? Wanem samting bai painim dispela kom?

¹⁴ Bilong save long mining bilong ol dispela tok, pastaim yumi mas putim yau long tok bilong ensel bilong God. Gebriel i stori pinis long 4-pela gavman i kamap long gavman bilong Aleksander, na bihain em i tok: “Long taim ol dispela kantri i laik pundaun na sin bilong ol manmeri i kamap nogut tru, orait long dispela taim tasol, wanpela king bai i kamap. Em bai i man nogut tru. Em bai i man bilong bikhet na man bilong giaman na trik. Em bai i kamap strong na bagarapim planti samting, tasol i no long strong bilong em yet. Na olgeta samting em i tingting long mekim, em bai i mekim tasol. Em bai i bagarapim ol strongpela man na ol manmeri bilong God. Em bai i stap hapman tru bilong giamanim ol manmeri, na olgeta trikpasin bilong en bai i win. Na long bel bilong em yet, em bai i ting em i nambawan tru. Ol manmeri bai i ting ol i stap gut, tasol wantu bai em i kirap na bagarapim planti bilong ol. Em bai i bikhet na i laik pait long dispela bikpela King i winim olgeta king. Na long dispela taim i no gat man bai i bagarapim em, tasol em bai i bagarap.”​—Daniel 8:​23-25.

15. Ensel i tokim Daniel long mekim wanem long dispela driman em i bin lukim?

¹⁵ Orait ensel i tokim Daniel: “Yu no ken autim dispela driman long ol arapela manmeri, long wanem, ol dispela samting bai i no inap kamap kwik.” (Daniel 8:26) Truim bilong dispela hap bilong driman “bai i no inap kamap kwik,” na Daniel i “no ken autim dispela driman long ol arapela.” Ating Daniel i no save long insait bilong en. Tasol yumi ken ting long nau dispela samting i kamap pinis. Olsem na yumi askim olsem: ‘Ol samting i bin kamap long graun i givim wanem save long yumi long truim bilong dispela tok profet i olsem driman?’

LIKLIK KOM I KAMAP STRONGPELA GAVMAN

16. (a) Liklik kom i kru na kamap long wanem kom? (b) Olsem wanem Rom i kamap namba 6 bikpela gavman Baibel i tok profet long en? Tasol bilong wanem Rom i no dispela liklik kom?

¹⁶ Olsem ol samting i bin kamap long bipo i kamapim, dispela liklik kom i kru long wanpela bilong dispela 4-pela kom​—em kom i stap long hap bilong wes. Dispela em i gavman Grik bilong Jeneral Kasanda na em i bosim Masedonia na Grik. Bihain, gavman bilong Jeneral Laisimakus, em king bilong Tres na Esia Maina, i kisim dispela gavman. Namel long 200 B.C.E. i go long 150 B.C.E. samting, Rom i kisim dispela hap wes bilong ol gavman Grik. Na long yia 30 B.C.E., Rom i daunim pinis olgeta gavman bilong Grik na em i kamap namba 6 bikpela gavman em tok profet bilong Baibel i makim. Tasol Gavman Rom i no dispela liklik kom bilong driman bilong Daniel, long wanem, Gavman Rom i no bin i stap inap long taim bilong “las de.”​—Daniel 8:19.

17. (a) Bipo Inglan i bin stap olsem wanem wantaim Gavman Rom? (b) Olsem wanem pasin bilong ol lain bilong Gavman Inglan na gavman Grik bilong Masedonia na Grik i wankain liklik?

¹⁷ Ol samting i bin kamap bipo i makim wanem gavman i olsem dispela king “em bai i man nogut tru”? Long hap bilong not-wes, Inglan em i kru bilong Gavman Rom. I kam inap long 400 C.E. samting Rom i gat sampela provins long hap nau ol i kolim Inglan. Isi isi strong bilong Rom i pinis, tasol ol man i bihainim yet pasin bilong Grik na Rom long hap bilong Inglan na long ol narapela hap bilong Yurop em Rom i bin bosim. Octavio Paz, em man bilong Meksiko i bin winim Prais Nobel, i tok: “Taim Gavman Rom i pundaun pinis, misin i kisim ples bilong en. Ol tisa bilong lotu bilong bipo na sampela saveman i kamap bihain, ol i skruim tingting bilong ol Grik i go long bilip Kristen.” Na saveman Bertrand Russell (1872-1970) i tok: “Pasin ol man bilong hap Wes i bihainim, em ol i bin kisim long ol Grik, as bilong en em ol tingting na pasin saiens i bin kirap long Miletus [wanpela taun bilong ol Grik long Esia Maina] 2,500 yia i go pinis.” Olsem na yumi ken tok, pasin ol man bilong Gavman Inglan i save bihainim i bin kirap long dispela gavman Grik bilong Masedonia na Grik.

18. Wanem dispela liklik kom i kamap wanpela king i “man nogut tru” long taim bilong “las de”? Stori long dispela.

¹⁸ I kam inap long 1763 Gavman Inglan i daunim pinis tupela strongpela birua bilong en, em Spen na Frans. Kirap long dispela taim i olsem Inglan i bosim solwara na i kamap namba 7 bikpela gavman em Baibel i tok profet long en. Maski 13 provins long Amerika i lusim Inglan long 1776 na kamapim Yunaitet Stets Bilong Amerika, Gavman Inglan i wok long i go bikpela na i bosim 25 pesen bilong olgeta graun na 25 pesen bilong olgeta man. Namba 7 bikpela gavman i kamap strongpela moa taim Amerika i kirap na wok bung wantaim Inglan bilong kamap Gavman Inglan-Amerika. Long ol samting bilong wok bisnis na ami, dispela gavman i kamap “man nogut tru.” Olsem na dispela liklik kom i kamap strongpela gavman long taim bilong “las de,” em Gavman Inglan-Amerika.

19. Wanem dispela “gutpela graun” driman i stori long en?

¹⁹ Daniel i lukim strong bilong dispela liklik kom “i kamap bikpela moa yet. Na em i daunim ol manmeri bilong . . . dispela gutpela graun God i bin givim long ol manmeri bilong en.” (Daniel 8:9) Graun Bilong Promis, em Jehova i bin givim long ol manmeri bilong em, i naispela graun tru, olsem na ol i tok “dispela graun i nambawan tru na . . . i winim tru ol arapela graun” i stap long olgeta hap. (Esekiel 20:​6, 15) Tru, Inglan i bin kisim Jerusalem long Disemba 9, 1917, na long yia 1920, Lig ov Nesen i makim Inglan long bosim Palestain, i go inap long Me 14, 1948. Tasol dispela driman em i wanpela tok profet na planti samting bilong en i olsem piksa i makim ol narapela samting. Na dispela “gutpela graun” em driman i stori long en i no makim Jerusalem, nogat, em i makim sindaun bilong ol manmeri bilong God long taim bilong namba 7 bikpela gavman. Bai yumi skelim olsem wanem Gavman Inglan-Amerika i laik mekim nogut long ol manmeri bilong God.

OL I BAGARAPIM HAUS BILONG LOTUIM EM

20.  “Ami bilong heven” na “ol sta” em liklik kom i traim long tromoi i go daun, ol i makim husat?

²⁰ Liklik kom “i kamap strong moa na i pait long ol sta. Ol sta i pait olsem ol soldia bilong ami bilong heven. Na kom i tromoi sampela sta i go daun long graun.” Olsem ensel i tok, “ami bilong heven” na “ol sta” em liklik kom i traim long tromoi i go daun, em “ol manmeri bilong God.” (Daniel 8:​10, 24) Dispela “ol manmeri bilong God” em ol Kristen God i bin makim long spirit holi. Ol i pas gut wantaim God long rot bilong nupela kontrak, em blut bilong Jisas Krais i givim strong long en bilong mekim wok, olsem na ol i stap holi na klin na ol i stap narapela kain bambai ol i ken mekim wok bilong God. (Hibru 10:10; 13:20) Jehova i makim ol long kisim ol samting bilong heven wantaim Pikinini bilong em, olsem na long ai bilong Jehova ol i stap holi. (Efesus 1:​3, 11, 13, 18-20) Olsem na long driman bilong Daniel, “ami bilong heven” i makim ol manmeri bilong lain 144,000 ol i stap laip yet long graun, na ol bai wok king wantaim Pikinini Sipsip long heven.​—KTH 14:​1-5.

21. Husat ol i stap long wanpela “haus bilong lotu” em namba 7 gavman bilong bosim graun i laik bagarapim?

²¹ Long nau hap lain bilong 144,000 i stap long graun ol i mausman bilong “Jerusalem i stap long heven”​—em Kingdom bilong God i stap olsem wanpela taun​—na tempel bilong en, em ol samting God i putim bilong lotuim em. (Hibru 12:​22, 28; 13:14) Long dispela rot i olsem ol i stap long wanpela “haus bilong lotu” em namba 7 gavman bilong bosim graun i laik krungutim na bagarapim. (Daniel 8:13) Na Daniel i stori long dispela haus bilong lotu olsem “haus ol manmeri i save lotuim dispela King [Jehova] long en,” na em i tok: “Em i pinisim pasin bilong mekim ofa long dispela King [Jehova], na em i bagarapim haus ol manmeri i save lotuim dispela King long en. Ol manmeri i bin mekim pasin nogut, olsem na dispela kom i kisim strong bilong daunim ol ami bilong heven na bilong pinisim pasin bilong mekim ofa long olgeta de. Ol tok bilong God i tru olgeta, tasol dispela kom i rabisim dispela tok, bai ol manmeri i no ken bihainim moa. Olgeta samting dispela kom i laik mekim, em i mekim tasol.” (Daniel 8:​11, 12) Dispela i kamap tru olsem wanem?

22. Long taim bilong Namba Tu Pait, olsem wanem namba 7 bikpela gavman i mekim bikpela “pasin nogut”?

²² Wanem samting i painim ol Witnes Bilong Jehova long taim bilong Namba Tu Pait? Ol man i mekim nogut tru long ol! Dispela i kirap long ol kantri Natsi na Fasis. Tasol i no longtaim na ‘ol i rabisim tok i tru’ long olgeta hap dispela “liklik kom” i bosim. Long klostu olgeta hap bilong Komonwel bilong Inglan ol i tambuim dispela “ami,” em ol man i save autim tok bilong Kingdom, na ol i tambuim wok bilong ol long autim “gutnius.” (Mak 13:10) Long ol dispela kantri, taim gavman i singautim ol man long go insait long ami, ol i orait long ol wokman bilong lotu i no ken insait long ami, tasol ol i no orait long ol Witnes Bilong Jehova i mekim olsem. God yet i bin makim ol i stap wokman bilong em, tasol ol dispela gavman i no laik tingim dispela samting. Long Amerika ol man i bung na mekim nogut long ol wokboi bilong Jehova ol i stap gut long em. Namba 7 bikpela gavman i laik pasim ol manmeri bilong Jehova long givim biknem long em olsem ofa​—olsem ‘long maus ol i litimapim nem bilong en’​—na ol i givim long olgeta taim olsem ‘ofa bilong olgeta de.’ (Hibru 13:15) Olsem na dispela bikpela gavman i bin mekim “pasin nogut” taim em i laik go insait long “haus ol manmeri i save lotuim dispela King long en,” em hap stret bilong God Antap Tru long bosim.

23. (a) Long taim bilong Namba Tu Pait, olsem wanem Gavman Inglan-Amerika i bin pait long “King i winim olgeta king”? (b) “King i winim olgeta king” em i husat?

²³ Taim liklik kom i mekim nogut long “ol manmeri bilong God” long taim bilong Namba Tu Pait, i olsem em “i traim long daunim King bilong ami bilong heven.” O, olsem ensel Gebriel i tok, em “i bikhet na i laik pait long dispela bikpela King i winim olgeta king.” (Daniel 8:​11, 25) Dispela biknem olsem “King i winim olgeta king” i makim God Jehova wanpela tasol. Dispela tok Hibru sar, ol i tanim olsem “king,” na insait bilong en i olsem “bosim.” Dispela tok inap makim pikinini man bilong wanpela king o wanpela man i holim namba olsem king, na i makim tu wanpela hetman o bikman. Buk Daniel i stori long sampela ensel i stap olsem hetman​—olsem Maikel. God em i Nambawan Hetman i winim ol narapela hetman olsem. (Daniel 10:​13, 21; skelim wantaim Song 83:18.) Yu ting i gat man inap pait long Jehova​—em King i winim olgeta king?

STRETIM “HAUS BILONG GOD”

24. Daniel 8:14 i mekim wanem tok bilong strongim bilip bilong yumi?

²⁴ I no gat man i ken pait long King i winim olgeta king​—maski em i wanpela king i “man nogut tru” olsem Gavman Inglan-Amerika. Ol samting dispela king i traim bilong bagarapim haus lotu bilong God i no wok. Ensel i tok, taim 2,300 de i pinis “bai ol i stretim haus bilong God,” o “haus bilong God bai winim pait.”​—Daniel 8:​13, 14; The New English Bible.

25. Dispela 2,300 de i longpela olsem wanem? Em i kamap long wanem taim?

²⁵ Dispela 2,300 de i olsem wanpela hap taim i gat tok profet long en. Olsem na yumi mas tingim wanpela yia i gat 360 de long en i insait long dispela tok profet. (KTH 11:​2, 3; 12:​6, 14) Orait, dispela 2,300 de i olsem 6-pela yia, na 4-pela mun, na 20 de. Dispela hap taim i kamap long wanem taim? Namel long 1930 na 1939, pasin bilong mekim nogut long ol manmeri bilong God i go bikpela moa long sampela kantri. Na long taim bilong Namba Tu Pait ol i mekim nogut tru long ol Witnes Bilong Jehova long ol kantri Gavman Inglan-Amerika i bosim. Bilong wanem? Long wanem, ol i strong long ‘bihainim tok bilong God tasol. Tok bilong ol man nogat.’ (Aposel 5:29) Olsem na dispela 2,300 de i mas kamap long taim bilong dispela pait.b Tasol olsem wanem long kirap na pinis bilong dispela 2,300 de?

26. (a) Yumi mas kirap kaunim dispela 2,300 de long wanem taim? (b) Wanem taim dispela 2,300 de i pinis?

²⁶ Bilong “stretim haus bilong God na mekim ol ofa gen,” dispela 2,300 de i mas kirap long taim “haus bilong God” i stap stret long ai bilong em. Dispela samting i kamap long Jun 1, 1938, taim Wastaua i kamapim namba wan hap bilong stori “Oganaisesen.” Namba tu hap i kamap long Wastaua bilong Jun 15, 1938. Sapos yumi kaunim 2,300 de (6-pela yia, 4-pela mun, na 20 de long kalenda Hibru) kirap long Jun 1 o 15, 1938, i go i go, bai yumi kamap long Oktoba 8 o 22, 1944. Long namba wan de bilong wanpela bikpela kibung long Pitsbek, Pensilvenia, long Amerika, long Septemba 30 na Oktoba 1, 1944, presiden bilong Sosaiti Was Taua i toktok long “Bihainim Pasin Tiokratik Long Nau.” Long Oktoba 2, long miting bilong olgeta yia bilong ol memba bilong Sosaiti Was Taua, ol i kamapim sampela senis long lo pepa bilong Sosaiti bambai ol i ken bihainim moa yet pasin tiokratik inap long mak lo bilong gavman i orait long en. Long ol buk na nius ol i kamapim klia ol lo bilong Baibel ol i mas bihainim, na dispela i mekim na ol i bihainim moa yet pasin tiokratik insait long ol kongrigesen bilong ol Witnes Bilong Jehova.

27. Taim ol i mekim nogut long ol Witnes long taim bilong Namba Tu Pait, wanem samting i makim olsem ol i laik pasim “pasin bilong mekim ofa long olgeta de”?

²⁷ Long taim bilong Namba Tu Pait, i kirap long 1939, dispela 2,300 de i wok long go yet, na ol man i mekim nogut long ol Witnes na ol i no mekim tumas ‘ol ofa bilong olgeta de’ long haus ol i lotuim God long en. Long 1938 Sosaiti Was Taua i gat 39 brens-ofis i lukautim wok bilong ol Witnes long olgeta hap, tasol long 1943 i gat 21 tasol. Namba bilong ol man i autim tok bilong Kingdom i go antap liklik tasol long dispela taim.

28, 29. (a) Taim Namba Tu Pait i laik pinis, wanem samting i kamap insait long oganaisesen bilong Jehova? (b) Yumi ken tok wanem long pasin nogut bilong ol birua long traim long bagarapim “haus bilong God”?

²⁸ Olsem yumi stori pinis, klostu long pinis bilong Namba Tu Pait, ol Witnes Bilong Jehova i gat strongpela tingting long litimapim wok king bilong God long rot bilong mekim wok bilong em olsem wanpela oganaisesen i bihainim pasin tiokratik. Long dispela as, long 1944 ol i kirap stretim na senisim pasin bilong ol long mekim wok na long bosim oganaisesen bilong ol. Wastaua bilong Oktoba 15, 1944, i gat wanpela stori, het-tok bilong en “Stretim Gut Ol Samting Bilong Mekim Laspela Wok.” Dispela stori wantaim ol narapela stori i toktok long wok autim tok i kamapim klia olsem dispela 2,300 de i pinis na “haus bilong God” i stap stret gen.

²⁹ Ol birua i traim long bagarapim “haus bilong God,” tasol ol i no inap mekim. Tru tumas, hap lain bilong “ol manmeri bilong God” ol i stap yet long graun, wantaim ol poroman bilong ol, em bikpela lain, ol i win tru. (KTH 7:9) Na haus ol i save lotuim God long en, i stap stret long pasin tiokratik, i wok yet long mekim wok bilong Jehova.

30. Klostu nau wanem samting bai painim dispela king “i man nogut tru”?

³⁰ Gavman Inglan-Amerika i holim yet bikpela namba bilong ol. Tasol ensel Gebriel i tok: “Long dispela taim i no gat man bai i bagarapim em, tasol em bai i bagarap.” (Daniel 8:25) Klostu nau, dispela namba 7 bikpela gavman bilong tok profet bilong Baibel​—em dispela king “i man nogut tru”​—bai bagarap, tasol i no gat man bai bagarapim em, nogat, narapela kain strong bai bagarapim em long Armagedon. (Daniel 2:44; KTH 16:​14, 16) Yumi amamas long save olsem Jehova, em King i winim olgeta king, bai kamapim long ples klia olsem em i Nambawan Bos bilong heven na graun!

[Ol Futnot]

YU BIN KISIM WANEM SAVE?

• “Sipsip man” i gat “tupela kom” i makim wanem samting?

“Meme” wantaim “traipela kom” bilong en i makim wanem samting?

Fopela kom i kisim ples bilong “traipela kom” i makim wanem samting?

Liklik kom i kru long wanpela bilong dispela fopela kom i makim wanem samting?

• Long taim bilong Namba Tu Pait, olsem wanem Gavman Inglan-Amerika i traim long bagarapim “haus bilong God”? Em i mekim o nogat?

[Mep/Piksa long pes 166]

(Bilong save ol dispela rait i stap we long pes, lukim buk o magasin)

Gavman Midia-Persia

MASEDONIA

ISIP

Memfis

ITIOPIA

Jerusalem

Babilon

Ekbatana

Susa

Pesepolis

INDIA

[Mep/Piksa long pes 169]

(Bilong save ol dispela rait i stap we long pes, lukim buk o magasin)

Gavman Grik

MASEDONIA

ISIP

Babilon

Wara Indus

[Mep long pes 172]

(Bilong save ol dispela rait i stap we long pes, lukim buk o magasin)

Gavman Rom

INGLAN

ITALI

Rom

Jerusalem

ISIP

[Piksa i karamapim pes olgeta long pes 164]

[Ol Piksa long pes 174]

Sampela bikman bilong Gavman Inglan-Amerika:

1. George Washington, namba wan presiden bilong Amerika (1789-1797)

2. Kwin Victoria bilong Inglan (1837-1901)

3. Woodrow Wilson, presiden bilong Amerika (1913-1921)

4. David Lloyd George, praim minista bilong Inglan (1916-1922)

5. Winston Churchill, praim minista bilong Inglan (1940-1945, 1951-1955)

6. Franklin D. Roosevelt, presiden bilong Amerika (1933-1945)