Bai Yu Abrusim Bagarap Taim God i Kirap Givim Strafe Long Ol Man?
“Sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.”—MATYU 24:22.
YU SAVE tingim yu yet? Long nau planti man i save tingting long ol yet tasol. Tasol Baibel i no tok, yumi no ken tingting liklik long ol samting bilong yumi yet. (Efesus 5:33) Bilong tingim ol samting bilong yumi yet, yumi mas tingim i stap bilong yumi long bihain tu. Olsem na sapos yu laik save long ol samting bai painim yu bihain, dispela pasin i stret. Olsem wanem? Yu laik save long dispela samting?
2 Yumi save, ol aposel bilong Jisas ol i bin tingim i stap bilong ol long bihain. (Matyu 19:27) Ating dispela tingting i wanpela as na taim 4-pela aposel i stap wantaim Jisas long maunten Oliv ol i askim em: “Wanem taim ol dispela samting bai i kamap? Wanem mak bai i kamap pastaim, na mipela i ken save, ol dispela samting klostu i laik kamap?” (Mak 13:4) Jisas i no givim baksait long tok bilong ol, em ol i laik save long ol samting bai kamap bihain—em ol samting ol yet na yumi tu i tingim. Planti taim Jisas i tokaut long ol samting bai painim ol disaipel taim ol dispela samting bai kamap bihain, na samting bai kamap long pinis bilong dispela taim.
3 Bekim bilong Jisas em i wanpela tok profet i gat bikpela truim bilong en long taim bilong yumi. Yumi inap lukim dispela samting long ol pait bilong olgeta hap na ol narapela pait i bin kamap long taim bilong yumi, na ol bikpela guria i save kilim i dai planti planti man, na taim bilong bikpela hangre i save kamapim sik na dai, na ol bikpela sik nogut—kirap long bikpela sik kus bilong Spen i bin kisim planti man long yia 1918 na i kam inap long dispela bikpela sik AIDS i wok long kisim planti man long nau. Tasol planti tok Jisas i bin mekim insait long bekim bilong em, i gat wanpela truim bilong en i bin kamap paslain na long taim bilong yia 70 C.E., taim ol Rom i bagarapim Jerusalem. Jisas i toksave long ol disaipel olsem: “Yupela yet i mas lukaut gut. Ol bai i kotim yupela long ol kaunsil bilong ol. Na ol bai i paitim yupela insait long ol haus lotu. Ol bai i ting long daunim nem bilong mi, na ol bai i sanapim yupela long pes bilong ol gavman na ol king. Olsem na bai yupela i ken autim gutnius long ol.”—Mak 13:9.
Tok Profet Bilong Jisas, na Samting i Bin Kamap
4 Jisas i no tok profet tasol long ol samting ol man bai mekim long ol disaipel bilong em. Em i tokim ol tu long ol samting ol yet i mas mekim. Olsem: “ ‘Yupela bai i lukim samting nogut tru i sanap i stap long ples i tambu long en.’ Man i ritim dispela tok em i mas tingim gut. ‘Na long dispela taim ol manmeri i stap long distrik Judia ol i mas ranawe i go long ples maunten.’ ” (Mak 13:14) Dispela wankain stori long Luk 21:20 i tok: “Taim yupela i lukim ol ami i kam raunim Jerusalem i stap.” Orait, olsem wanem dispela tok profet i bin kamap tru long namba wan truim bilong en?
5 Wanpela buk dikseneri bilong Baibel (The International Standard Bible Encyclopedia, bilong 1982) i tok: “Ol Juda i no stap isi liklik aninit long ol Rom, na ol bikman bilong bosim ol provins samting ol i man bilong mekim nogut long ol man, na ol i save giaman. Orait, long yia 66 A.D. ol i kirap pait. . . . Dispela pait i kirap taim ol Selot i kisim Masada, na bihain Menahem i bosim ol na ol i mats i go long Jerusalem. Long dispela taim yet ol i kilim i dai ol Juda i stap long taun Sisaria, na tok bilong dispela samting i go nabaut long olgeta hap bilong kantri. Ol i putim rait long ol nupela mani olsem Yia 1 i go inap Yia 5 bilong dispela pait.
6 Namba Twelv Lain Ami aninit long Sestius Galus i kirap long Siria na i mats i go na bagarapim Galili na Judia, na bihain long en ol i go pait long nambawan biktaun, na ol i kisim wanpela hap bilong “Jerusalem, dispela taun bilong God.” (Nehemia 11:1; Matyu 4:5; 5:35; 27:53) Wanpela buk (The Roman Siege of Jerusalem) i stori long ol samting i kamap na i tok: “Inap 5-pela de ol Rom i wok strong long go antap long banis, tasol ol Juda i strong na i rausim ol. Orait, ol Rom i mekim save sutim ol samting bilong pait i go long ol, na bihain ol Juda i no inap rausim ol moa. Nau ol soldia bilong Rom i mekim pasin ol i kolim testudo na bai ol i no ken kisim bagarap—ol i wokabaut klostu klostu na holim hap plang bilong ol antap long het na narapela plang i pas long narapela plang, na ol i wok long brukim banis na traim kukim dua bilong banis long paia. Nau ol Juda i pret nogut tru na ol i longlong nabaut.” Ol Kristen i stap insait long taun ol inap tingim bek ol tok bilong Jisas na ol inap luksave olsem wanpela samting nogut tru i sanap i stap long ples holi.a Tasol ol Rom i banisim pinis Jerusalem na olsem wanem ol dispela Kristen inap ranawe olsem Jisas i bin tokim ol long mekim?
7 Man bilong raitim stori bilong ol samting i bin kamap bipo, em Flavius Josifas, em i tok: “Sestius [Galus] i no save long pret bilong ol man i stap insait long taun, em ol i ting bai ol i bagarap, tasol wantu em i tokim ol soldia bilong em long lusim pait; em i no lus long pait, tasol em i ting em i no inap winim pait, na maski i olsem i no gat as, em i kirap na lusim Taun.” (Buk The Jewish War, II, 540 [xix, 7]) I gat wanem as na Galus i lusim taun? Yumi no save, tasol dispela i givim rot long ol Kristen long bihainim tok bilong Jisas na ranawe i go long ol maunten na stap gut.
8 Pasin bilong bihainim tok i lukautim ol na ol i no bagarap. Orait, i no longtaim na ol Rom i kam bek bilong daunim pait bilong ol man i bikhet long Rom. Jeneral Taitus i kam wantaim ami bilong em na ol i banisim Jerusalem, kirap long Epril i go inap Ogas long yia 70 C.E. Bai yumi kirap nogut tru sapos yumi kaunim stori bilong Josifas long samting nogut i bin painim ol Juda. Sampela ol i kisim bagarap taim ol i pait wantaim ol Rom, tasol planti ol narapela i kisim bagarap long han bilong sampela lain Juda i birua long ol, na bikpela hangre tru i kamap na dispela i mekim na ol i kirap na kaikai man. I kam inap long taim ol Rom i winim pait, i gat 1,100,000 Juda ol i dai.b Inap 97,000 ol i stap laip, tasol kwiktaim ol Rom i kilim i dai sampela; na ol narapela ol i go kalabus. Josifas i tok: “Ol manmeri i winim 17 krismas, ol i pasim sen olsem hankap long ol na salim ol i go mekim strongpela wok kalabus long Isip, na Taitus i salim bikpela lain tru i go long ol provins bilong kisim bagarap long bainat o long ol animal nogut insait long ol haus spot.” Na insait long taim ol Rom i wok long skelim ol samting ol bai mekim long ol dispela lain kalabus, i gat 11,000 kalabus ol i dai long hangre.
9 Ol Kristen inap tenkyu tru long ol i bin bihainim toksave bilong Bikpela na ol i lusim taun na ranawe i go long ol maunten taim ol ami bilong Rom i no kam bek yet. Ol i mekim olsem na ol i abrusim bagarap long wanpela hap bilong dispela taim nogut Jisas i kolim olsem ‘bikpela hevi tru, kain hevi olsem i no bin kamap bipo, na bihain tu bai i no gat kain hevi olsem i kamap gen’ long Jerusalem. (Matyu 24:21) Jisas i tok moa olsem: “Na sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.” (Matyu 24:22) Wanem insait bilong dispela tok bilong Jisas long dispela taim bipo, na wanem insait bilong en long nau?
10 Long bipo yumi bin tok, ol manmeri God i kisim bek ol long dispela taim na ol i no lus, ol i makim ol Juda i bin abrusim bagarap taim dispela bikpela hevi tru i painim Jerusalem long yia 70 C.E. Longtaim ol Kristen i ranawe pinis, olsem na God inap larim ol Rom i bagarapim kwik Jerusalem. I olsem: God i tingim “ol manmeri em i makim pinis,” em ol i ranawe na lusim pinis ples bilong kisim bagarap, olsem na em inap sotim dispela taim bilong bikpela hevi na bai i gat sampela “manmeri” em i ken kisim bek ol na ol i no ken lus. Yumi bin ting, ol Juda i abrusim bagarap long dispela taim ol i olsem piksa na i makim ol manmeri ol bai abrusim bagarap long taim bilong bikpela hevi tru bai kamap long taim bilong yumi.—KTH 7:14.
11 Tasol olsem wanem? Dispela tingting i stret wantaim ol samting i bin kamap long yia 70 C.E.? Jisas i tok, God i sotim taim bilong dispela bikpela hevi tru na bai sampela “manmeri” i no ken lus—olsem God bai kisim bek ol. Tasol yu ting yumi ken tok, God i kisim bek ol dispela 97,000 Juda em bihain liklik planti tausen bilong ol i dai long hangre o ol i kisim bagarap insait long ol haus spot? Josifas i stori long wanpela haus spot long Sisaria, olsem: “Ol man i bin bagarap taim ol i pait wantaim ol animal nogut, o long pait namel long ol yet, o ol man i kukim ol long paia, ol i winim 2,500.” Tru, ol i no bagarap taim ol Rom i kam banisim Jerusalem, tasol yumi no inap tok, God i kisim bek ol, a? Na yu ting Jisas bai tingim ol dispela lain i wankain olsem ol manmeri ol bai abrusim bagarap long taim bilong “bikpela hevi tru” klostu bai kamap, na ol i stap amamas?
God i Kisim Bek Sampela Manmeri Olsem Wanem?
12 Long yia 70 C.E., God i no moa tingim ol Juda bilong skin ol i lain bilong em. Jisas i bin kamapim klia olsem God i bin rausim dispela lain na em bai larim biktaun bilong en, na haus lotu bilong en, na pasin bilong lotu, ol i pinis. (Matyu 23:37–24:2) God i makim wanpela nupela lain, em lain Israel bilong spirit. (Aposel 15:14; Rom 2:28, 29; Galesia 6:16) Em ol man na meri God i bin kisim ol namel long olgeta lain na em i makim ol long spirit holi. (Matyu 22:14; Jon 15:19; Aposel 10:1, 2, 34, 35, 44, 45) Sampela yia paslain long taim Sestius Galus i kam pait long Jerusalem, Pita i raitim pas i go long ol “manmeri bilong God . . . bipo tru God Papa i save pinis long [ol] na i makim [ol] long kamap ol manmeri bilong em yet. Holi Spirit i bin helpim [ol] long givim laip bilong [ol] olgeta long God na kamap holi.” Dispela lain i kisim spirit holi, “God i makim [ol] pinis, na [ol] i stap lain manmeri bilong em stret. [Ol] i stap ol pris bilong lain bilong king. [Ol] i stap lain manmeri i holi.” (1 Pita 1:1, 2; 2:9) Ol dispela manmeri God i bin makim ol, em bai kisim ol i go long heven bilong mekim wok king wantaim Jisas.—Kolosi 1:1, 2; 3:12; Taitus 1:1; KTH 17:14.
13 Nau yumi save pinis long dispela lain God i makim bilong em yet, na dispela bai givim sampela tingting long yumi, long wanem, Jisas i tok profet olsem God “em i tingting long ol manmeri em i makim pinis,” olsem na bai em i sotim taim bilong bikpela hevi tru. Wanpela tok Grik ol i tanim olsem “em i tingting long,” yumi inap tanim tu olsem “em i laik helpim.” (Mak 2:27; Jon 12:30; 1 Korin 8:11; 9:10, 23; 11:9; 2 Timoti 2:10) Olsem na yumi ken ting Jisas i bin tok olsem: ‘Sapos God i no sotim taim bilong ol dispela hevi, orait olgeta manmeri bai i lus. Tasol em i laik helpim ol manmeri em i makim pinis. Olsem na bai em i sotim dispela taim.’c (Matyu 24:22) Olsem wanem? I gat sampela samting i bin kamap na i ‘helpim’ ol Kristen God i makim ol pinis na ol i kalabus insait long Jerusalem?
14 Tingim gen ol samting i bin kamap long yia 66 C.E. Ol Rom i kam brukim kantri bilong ol Juda na ol i kisim wanpela hap bilong Jerusalem na ol i kirap long brukim banis. Josifas i tok: “Sapos em i strong strong na i banisim Taun inap liklik hap taim moa, em inap kisim hariap.” Orait askim yu yet: ‘Olsem wanem na wantu tasol dispela strongpela ami bilong Rom i kirap na lusim pait, na “i olsem i no gat as” na ol i lusim?’ Wanpela saveman bilong skelim stori bilong ol pait bilong bipo, em Rupert Furneaux, em i tok: “I no gat wanpela man bilong raitim stori bilong ol samting i bin kamap bipo em inap kolim as tru na Galus i bin kisim dispela narapela kain tingting i nogutim em.” Tasol maski i gat wanem as na em i lusim pait, dispela i sotim taim bilong bikpela hevi. Ol Rom i ranawe i go, na ol Juda i bihainim ol na mekim save long ol. Orait, olsem wanem long ol Kristen “God i makim pinis” na ol i bin kalabus insait long taun? Taim ol ami bilong Rom i lusim taun, ol dispela Kristen i abrusim bagarap em inap painim ol long dispela taim bilong bikpela hevi tru. Orait, taim God i sotim taim bilong dispela bikpela hevi long yia 66 C.E., dispela i helpim ol Kristen; olsem na dispela ol “manmeri” i no bin lus, em Matyu 24:22 i toktok long en, em ol dispela Kristen yet.
Olsem Wanem Long Yu Long Bihain?
15 Ating sampela bai askim olsem, ‘Bilong wanem mi mas laik tru long kisim dispela nupela save long tok bilong Jisas?’ Long wanem, i gat as tru na yumi ken bilip olsem i gat wanpela bikpela truim moa bilong dispela tok profet bilong Jisas—i no dispela namba wan truim tasol em i bin kamap paslain na long taim bilong yia 70 C.E.d (Skelim wantaim Matyu 24:7; Luk 21:10, 11; KTH 6:2-8.) Inap planti yia pinis ol Witnes Bilong Jehova i bin autim tok olsem bikpela truim bilong dispela tok profet bai kamap long taim bilong yumi em i kamapim klia olsem i gat wanpela “bikpela hevi tru” klostu bai kamap, em bai kisim olgeta hap bilong graun. Long taim bilong dispela “bikpela hevi tru,” tok profet bilong Matyu 24:22 bai kamap tru olsem wanem?
16 Inap twenti yia samting bihain long dispela bikpela hevi tru i bin painim Jerusalem, aposel Jon i raitim tok bilong Buk Kamapim Tok Hait. Em i strongim tok olsem bikpela hevi tru bai kamap bihain. Yumi laik save long ol samting bai painim yumi yet, olsem na bai yumi amamas long save, tok profet bilong Kamapim Tok Hait i tokaut olsem sampela manmeri bai abrusim bagarap long dispela bikpela hevi tru i laik kamap. Jon i tok profet long “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Dispela lain ol i husat? Wanpela maus long heven i tok: “Ol dispela manmeri ol i bin [“winim taim bilong bikpela hevi tru,” NW].” (KTH 7:9, 14) Em nau, ol bai abrusim bagarap! Na Kamapim Tok Hait i givim sampela save long yumi long ol samting bai kamap long taim bilong dispela bikpela hevi tru, na olsem wanem tok profet bilong Matyu 24:22 bai kamap tru.
17 Dispela bikpela hevi tru bai kirap taim ol i mekim pait long wanpela lain em Baibel i kolim olsem pamukmeri, nem bilong em “Bikpela taun Babilon.” (KTH 14:8; 17:1, 2) Dispela pamukmeri i makim olgeta lotu giaman long graun, na ol lotu i holim nating nem Kristen ol i gat bikpela asua moa. Olsem Kamapim Tok Hait 17:16-18 i tok, God bai i givim tingting long ol gavman politik na bai ol i pait long dispela pamukmeri.e Yumi ken tingim “ol manmeri God i makim pinis” na ol poroman bilong ol, em dispela lain “planti manmeri tru,” ol inap kisim wanem tingting long taim dispela samting i kamap? Taim ol dispela lain politik i wok long bagarapim ol lotu, ating i olsem ol bai pinisim olgeta lotu giaman na lain bilong Jehova wantaim.
18 Long dispela taim bikpela truim bilong tok bilong Jisas long Matyu 24:22 bai kamap. Ol manmeri God i makim pinis na ol i bin stap insait long Jerusalem, i olsem ol inap kisim bagarap. Na i olsem tu long ol wokman bilong Jehova long nau—ating i olsem ol inap kisim bagarap taim ol lain politik i wok long mekim pait long ol lotu, na i olsem dispela pait inap bagarapim olgeta “manmeri” long lain bilong God. Tasol yumi mas tingim ol samting i bin kamap long yia 66 C.E. Dispela bikpela hevi tru em ol Rom i kamapim, God i bin sotim taim bilong en, na dispela i givim rot long ol manmeri God i makim pinis na ol i gat bikpela hap taim bilong ranawe na i stap laip. Olsem na yumi inap bilip tru olsem taim ol i wok long bagarapim ol lotu, God i no inap larim ol i bagarapim kongrigesen bilong ol manmeri i lotu tru long God, em ol i stap long olgeta hap. Dispela pait bilong bagarapim ol lotu bai wok long kamap hariap, olsem “long wanpela de tasol.” Tasol long wanpela rot God bai sotim taim bilong en, na em i no inap larim ol lain politik i pinisim tru dispela wok ol i laik mekim, bambai God i ken kisim bek lain bilong em na ol i no ken lus.—KTH 18:8.
19 Bihain long dispela taim, ol narapela hap bilong oganaisesen bilong Satan long graun ol bai stap inap wanpela hap taim na bai ol i krai sori, long wanem, ol i no inap prenim moa dispela pamukmeri, em ol lotu giaman. (KTH 18:9-19) Tasol bihain bai ol i lukim olsem ol wokman tru bilong God ol i stap yet, na i olsem “ol samting nogut i no save kamap long ol. Na ol taun bilong ol i no gat banis i raunim ol,” na i olsem i no hatwok long pinisim ol. Tasol ol dispela lain i kam pait long ol wokman bilong God, ol bai i kirap nogut long samting bai kamap! Taim God i lukim olsem ol i pait o ol i laik pait long ol wokman bilong em, God bai kirap na givim strafe long ol birua bilong em long laspela hap bilong dispela bikpela hevi tru.—Esekiel 38:10-12, 14, 18-23.
20 Dispela namba 2 hap bilong bikpela hevi tru em i wankain olsem ol samting i bin kamap long Jerusalem na lain bilong en taim ol Rom i kam namba 2 taim long yia 70 C.E. Ol samting i kamap bai i kamapim klia olsem em i “bikpela hevi tru. Stat long taim graun i nupela yet na i kam inap long [dispela taim bihain], kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Tasol yumi ken bilip olsem ol manmeri God i makim pinis na ol lain i bung wantaim ol, ol i no ken kisim bagarap. Tru, ol i no ranawe i go long wanpela ples tru, nogat. Ol Kristen bilong pastaim ol i bin stap long Jerusalem, ol inap ranawe long dispela taun na go long hap bilong ol maunten, olsem ples Pela long hapsait bilong wara Jordan. Tasol bihain, ol Witnes bilong God ol i stap gut long em ol bai stap long olgeta hap bilong graun, olsem na i no olsem ol i mas i stap long wanpela hap stret na bai God i ken lukautim ol, nogat.
21 I no ol ami bilong Rom o narapela lain bilong graun bai kamapim dispela bikpela bagarap, nogat. Buk Kamapim Tok Hait i tok, ol ami bilong mekim dispela wok ol i bilong heven. Tru tumas, ami bilong kamapim dispela bagarap long laspela hap bilong bikpela hevi tru, i no wanpela lain ami bilong graun; dispela ami em “Tok bilong God,” em King Krais Jisas, wantaim “ol ami bilong heven,” na ol Kristen God i bin makim ol na ol i kirap bek pinis, ol i insait long dispela lain. ‘Bikpela bilong olgeta bikman na King bilong olgeta king’ bai kilim i dai planti man moa yet, winim dispela lain em ol Rom i bin kilim ol i dai long yia 70 C.E. Olgeta man bilong graun i birua long God—ol king, ol kepten bilong ol ami, ol man i stap fri wantaim ol wokboi nating, ol man i no gat nem wantaim ol man i gat nem, olgeta bai bagarap. Na ol oganaisesen bilong dispela graun em Satan i bosim, ol tu bai pinis.—KTH 2:26, 27; 17:14; 19:11-21; 1 Jon 5:19.
22 Olsem yumi stori pinis, ol “manmeri”—em lain remnan God i bin makim ol wantaim dispela lain “planti manmeri tru”—God i kisim bek ol na ol i no lus taim Bikpela Babilon i bagarap olgeta, olsem wantu tasol, long namba wan hap bilong bikpela hevi tru. Na olsem tu, long laspela hap bilong bikpela hevi tru, ol “manmeri” ol i bin ranawe i kam long lain bilong Jehova, em bai kisim bek ol na ol i no ken lus. Dispela bai i narapela kain tru long samting i bin painim ol bikhetlain Juda long yia 70 C.E.!
23 Ating yu tingting long i stap bilong yu wantaim famili bilong yu long bihain, olsem na yu ken tingim wanpela tok promis i stap long Kamapim Tok Hait 7:16, 17, em i tok: “Ol bai i no hangre moa, na nek bilong ol bai i no drai gen. San bai i no inap boinim skin bilong ol, na i no gat wanpela samting bai i mekim skin bilong ol i hat nogut tru. Long wanem, Pikinini Sipsip i stap namel tru long sia king, em bai i stap wasman bilong ol. Em bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” Em nau, yumi ken tok, God i kisim bek tru ol dispela lain na ol i no lus, na dispela gutpela samting tru bai stap inap oltaim oltaim long ol.
[Ol Futnot]
b Josifas i tok: “Taim Taitus i go insait, em i kirap nogut long strong bilong dispela taun . . . Em i singaut olsem: ‘God i bin helpim yumi; ol Juda i stap long ol strongpela haus bilong hait, tasol God yet i kisim ol i kam daun; long wanem, han bilong ol man o ol samting bilong pait i no inap mekim wanpela samting long ol dispela kain haus taua.’ ”
c Long Buk Matyu bilong Sem-Top, long Matyu 24:22, em i kolim wanpela tok Hibru, em ʽa·vurʹ, na insait bilong en i olsem “laik helpim, tingting long, bambai.” Lukim stori i kamap paslain long dispela, long pes 13.
d Lukim Wastaua bilong Februeri 15, 1994, pes 11 na 12, na sat long pes 14 na 15, i gat ol blok i kamapim tok profet Jisas i bin mekim bilong bekim askim bilong ol disaipel, i stap long Matyu sapta 24, Mak sapta 13, Luk sapta 21.
e Lukim buk Kamapim Tok Hait—Bikpela Samting Bilong En i Laik Kamap!, pes 235-258, Sosaiti Wastaua bilong Nu Yok i wokim long 1994.
Bai Yu Bekim Olsem Wanem?
◻ I gat wanem tupela hap bilong pait ol ami bilong Rom i mekim long Jerusalem?
◻ Olsem wanem yumi ken ting, dispela 97,000 Juda ol i abrusim bagarap long yia 70 C.E. i no ol dispela “manmeri” em Matyu 24:22 i toktok long en?
◻ Olsem wanem God i bin sotim taim bilong bikpela hevi tru i painim Jerusalem? Long dispela taim, olsem wanem God i kisim bek sampela “manmeri” na ol i no lus?
◻ Long bikpela hevi tru klostu bai kamap, olsem wanem God bai sotim taim bilong en na kisim bek sampela “manmeri” na ol i no lus?
[Askim Bilong Stadi]
1, 2. (a) Bilong wanem i stret yumi tingim i stap bilong yumi long bihain? (b) Ating dispela tingting i as na wanem ol askim i kamap?
3. Bilong wanem yumi tok, bekim bilong Jisas i gat bikpela truim bilong en long taim bilong yumi?
4. I gat wanem sampela tok lukaut insait long bekim bilong Jisas?
5. Wanem samting i kamap namel long ol Juda long Judia long yia 66 C.E.?
6. Taim ol Juda i bikhet long Rom na ol i kirap long pait, Rom i mekim wanem?
7. Long yia 66 C.E., i olsem ol Rom bai winim pait, tasol ol i kirap na mekim wanem?
8. Wanem namba 2 hap bilong dispela pait ol Rom i mekim long Jerusalem? Wanem ol samting i painim ol manmeri i bin abrusim bagarap?
9. Samting i bin painim ol Juda, bilong wanem em i no bin painim ol Kristen? Tasol i gat wanem ol askim i stap yet?
10. Long bipo yumi bin tok wanem long Matyu 24:22?
11. Bilong wanem i olsem yumi mas skelim gen tok bilong Matyu 24:22?
12. Long taim bilong ol aposel, husat dispela ‘ol manmeri God i makim pinis’ na em i tingim ol?
13. Yumi inap ting Jisas i bin kolim tok bilong Matyu 24:22 olsem wanem?
14. Taim ol ami bilong Rom i kirap na ranawe lusim Jerusalem long yia 66 C.E., olsem wanem God i kisim bek sampela “manmeri” na ol i no lus?
15. Olsem wanem yu inap tok, yumi ol man bilong nau i mas tingim moa yet ol tok bilong Matyu sapta 24?
16. Taim Buk Kamapim Tok Hait i toktok long bikpela hevi tru i laik kamap, em i mekim wanem tok bilong strongim bel bilong yumi?
17. Long namba wan hap bilong bikpela hevi tru, wanem samting bai kamap?
18. Bilong wanem i olsem i no gat sampela “manmeri” bai abrusim bagarap long namba wan hap bilong bikpela hevi tru?
19. (a) Taim namba wan hap bilong bikpela hevi tru i pinis, wanem samting bai kamap ples klia? (b) Dispela i mekim na wanem samting bai kamap?
20. Taim namba 2 hap bilong bikpela hevi tru i kamap, bilong wanem lain bilong God i no ken kisim bagarap long dispela taim?
21. Long dispela laspela pait, husat ol bai mekim pait? Wanem samting bai kamap?
22. Long wanem narapela pasin tu bai God i kisim bek ol “manmeri” na ol i no ken lus?
23. Ol “manmeri” i abrusim bagarap, ol i ken tingim wanem gutpela samting bai painim ol?
[Piksa long pes 16]
Em wanpela mani Juda ol i bin wokim bihain long taim ol Juda i bikhet na i kirapim pait. Rait Hibru i tok, “Yia 2,” em olsem yia 67 C.E., em namba 2 yia ol Juda i gat gavman bilong ol yet
[Kredit Lain]
Pictorial Archive (Near Eastern History) Est.
[Piksa long pes 17]
Em wanpela mani Rom ol i wokim long yia 71 C.E. Long han kais em wanpela Rom i holim samting bilong pait; long han sut em wanpela meri Juda i krai sori. Dispela tok IVDAEA CAPTA i olsem “Judia i Stap Kalabus”
[Kredit Lain]
Pictorial Archive (Near Eastern History) Est.