Lain Long Famili Bilong Jisas Long Graun
YU SAVE long wanem samting long famili bilong Jisas, em lain em i bin stap wantaim ol long graun i go inap long em i kisim baptais taim em i gat 30 krismas? Ol Gutnius i tok wanem? Taim yumi wok long skelim ol samting bilong famili bilong em, yumi inap lainim wanem samting? Ol bekim bilong ol dispela askim inap helpim yu.
Yu ting Jisas i kamap long wanpela famili i gat planti mani kago? Josep, em waspapa bilong Jisas, em i wanpela kamda. Man i mekim wok kamda i mas mekim strongpela wok, planti taim wok bilong katim ol diwai bilong kisim timba i insait long en. Foti de bihain long taim mama i karim Jisas, papamama bilong Jisas i go long Jerusalem na i mekim ofa olsem Lo i makim. Yu ting ol i ofaim wanpela sipsip man wantaim pisin balus olsem Lo i makim? Nogat. I luk olsem ol i no gat mani inap long ol i ken givim dispela kain ofa. Tasol Lo i stretim rot bilong ol rabisman i ken givim ofa tu. Josep na Maria i bihainim dispela rot na ol i ofaim “tupela namba wan balus, o tupela yangpela namba 2 balus.” Ol i ofaim animal i no gat bikpela pe long en, olsem na dispela i soim olsem ol i no gat planti samting bilong skin.—Luk 2:22-24; Wok Pris 12:6, 8.
Yu inap lukim olsem Jisas Krais, em King bilong olgeta lain manmeri long bihain, em i bin kamap long wanpela famili i no gat planti samting, na ol i mas wok hat bilong kisim ol samting bilong ol i ken stap laip. Em i kamap wanpela kamda, olsem waspapa bilong em. (Matyu 13:55; Mak 6:3) Maski Jisas “i gat planti samting” taim em i stap long heven olsem wanpela strongpela spirit, Baibel i tok em i “bin kamap rabisman” bilong em i ken helpim yumi. Em i daunim em yet na i kamap olsem wanpela man bilong graun na em i kamap bikpela insait long famili i no gat nem. (2 Korin 8:9; Filipai 2:5-9; Hibru 2:9) Jisas i no kamap long wanpela famili i gat planti mani kago, na ating dispela i mekim na sampela manmeri i no hatwok long i stap wantaim em. Ol i no tingting long wok o namba em i holim. Ol i laikim em long ol tok em i skulim ol long en, ol gutpela pasin bilong em, na ol gutpela wok em i save mekim. (Matyu 7:28, 29; 9:19-33; 11:28, 29) Yumi ken lukim olsem God Jehova i gat gutpela savetingting taim em i larim Jisas i kamap long famili i no gat nem.
Nau yumi ken skelim famili bilong Jisas na lukim wanem ol samting yumi ken lainim long ol.
Josep—Wanpela Stretpela Man
Taim Josep i painimaut olsem meri em bai marit long em i gat bel “taim tupela i no i stap wantaim yet,” em i tingting planti, long wanem, em i laikim tru Maria, tasol i luk olsem Maria i bin mekim pasin pamuk. Dispela samting i kamap i laik bagarapim ol samting Josep i laik mekim, em i laik maritim Maria. Long taim bilong em, meri ol i makim pinis bilong maritim wanpela man, i olsem dispela meri i marit pinis long em. Josep i tingting gut long dispela samting, na bihain em i laik lusim Maria isi tasol bambai ol i no ken tromoi ston long em olsem meri i mekim pasin pamuk.—Matyu 1:18; Lo 22:23, 24.
Bihain ensel i kamap long Josep long wanpela driman na i tok: “Yu no ken pret long kisim Maria olsem meri bilong yu. Harim. Dispela pikinini i stap long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas, long wanem, em bai i lusim sin bilong ol manmeri bilong en na kisim bek ol.” Taim Josep i harim dispela tok bilong God, em i bihainim na kisim Maria olsem meri bilong em.—Matyu 1:20-24.
Long pasin em i mekim, dispela stretpela man i insait long truim bilong tok Jehova i bin mekim long rot bilong profet Aisaia. Em i tok: “Wanpela yangpela meri i gat bel, na bai em i karim wanpela pikinini man na kolim nem bilong en Emanuel.” (Aisaia 7:14) Yumi save, Josep i save tingim ol samting bilong spirit na em i amamas long kamap waspapa bilong Mesaia, maski namba wan pikinini bilong Maria i no pikinini em yet i kamapim.
Josep i no slip wantaim Maria i go inap long taim Maria i karim pikinini. (Matyu 1:25) Tupela i nupela marit, na ating i hatwok long tupela i no ken slip wantaim, tasol ol i no laik bai ol man i gat tupela tingting long husat i Papa bilong dispela bebi. Ol i gutpela piksa tru long pasin bilong bosim gut laik bilong bodi! Josep i putim ol samting bilong spirit i go pas long ol laik bilong bodi bilong em.
Fopela taim Josep i kisim tok long ensel long pasin bilong mekim bikpela long dispela pikinini em i lukautim. Tripela taim em i kisim tok long ples em i mas mekim bikpela long dispela pikinini. Pasin bilong bihainim kwik tok em i bikpela samting bilong dispela pikinini i ken abrusim bagarap. Long olgeta taim ensel i toktok long Josep, em i kirap kwik na mekim samting, pastaim em i kisim liklik pikinini i go long Isip na bihain em i kisim i kam bek long Israel. Dispela i lukautim bebi Jisas taim Herot i wok long kilim i dai ol bebi. Na tu, pasin bilong Josep long bihainim tok i mekim na ol tok profet long ol samting bilong Mesaia i kamap tru.—Matyu 2:13-23.
Josep i lainim Jisas long wanpela wok skin bambai em i ken lukautim em yet. Olsem na Jisas i no kisim tasol nem olsem “pikinini bilong wanpela kamda,” em i kisim tu nem olsem “wanpela kamda.” (Matyu 13:55; Mak 6:3) Aposel Pol i tok long Jisas olsem “olgeta traim i save kamap long yumi, dispela olgeta i bin kamap pinis long em bilong traim em.” Dispela i makim olsem Jisas i mas wok hat tu bilong helpim wok bilong lukautim famili.—Hibru 4:15.
Long laspela stori bilong Josep long Ol Skripsa Grik, yumi lukim pasin bilong em long givim bel long lotu i tru. Josep i kisim famili bilong em i go long Jerusalem bilong mekim Pasova. Ol man tasol i mas i go long Pasova, tasol Josep i save kisim famili bilong em i go long Jerusalem “long olgeta yia.” Em i daunim tru laik bilong em yet, long wanem, long Nasaret i go long Jerusalem ol i mas wokabaut inap 100 kilomita. Tasol long wanpela taim olsem em Baibel i stori long en, Jisas i lus. Em i stap long tempel na i wok long harim tok bilong ol saveman bilong Lo na givim askim long ol. Maski Jisas i gat 12-pela krismas tasol, em i gat gutpela save long Tok Bilong God. Long dispela stori, yumi lukim olsem papamama bilong Jisas i bin skulim em gut, ol i lainim em long kamap mangi i tingim ol samting bilong spirit. (Luk 2:41-50) I luk olsem Josep i bin dai sampela taim bihain long dispela, long wanem, ol stori bilong Baibel i kamap bihain i no stori moa long em.
Tru tumas, Josep em i wanpela stretpela man i save lukautim gut famili bilong em long ol samting bilong spirit na bilong skin. Olsem Josep i bin mekim, yu save putim ol samting bilong spirit i stap namba wan long laip bilong yu taim yu tingim samting God i laik yumi mas mekim long nau? (1 Timoti 2:4, 5) Yu amamas long bihainim tok bilong God i stap long Baibel, na long dispela rot yu soim olsem yu bihainim pasin bilong Josep long bihainim tok? Yu save skulim ol pikinini bilong yu na bai ol i ken toktok long ol samting bilong spirit wantaim ol narapela?
Maria—Wanpela Wokmeri Bilong God i No Tingim Em Yet
Maria, mama bilong Jisas, em i wanpela gutpela wokmeri bilong God. Taim ensel Gebriel i tokim em olsem em bai karim pikinini, em i kirap nogut. Em i no “marit yet long wanpela man,” olsem na em i no bin slip wantaim man. Taim Maria i kisim save olsem holi spirit bai mekim na em bai karim pikinini, em i mekim pasin daun na i orait long dispela tok na i tok: “Harim. Mi wokmeri bilong Bikpela. Em i ken mekim long mi olsem yu tok.” (Luk 1:30-38) Em i tingim dispela em i wanpela bikpela blesing bilong spirit, olsem na em i redi long karim ol hevi inap kamap long dispela samting.
Tru tumas, taim em i orait long mekim dispela samting, i stap bilong em i senis olgeta. Taim em i go long Jerusalem bilong mekim em yet i kamap klin, wanpela lapun man bilong lotu, nem bilong em Simeon, i tokim em: “Yu bai pilim olsem wanpela bainat i sutim lewa bilong yu.” (Luk 2:25-35) Yumi save dispela tok i makim olsem bel bilong Maria bai bagarap stret taim em i lukim planti manmeri i sakim Jisas na bihain ol i nilim em long diwai pos.
Taim Jisas i wok long i go bikpela, Maria i putim long tingting ol samting i kamap long laip bilong Jisas, na ‘em i tingim i stap long bel bilong em.’ (Luk 2:19, 51) Olsem Josep, Maria i save tingim ol samting bilong spirit, na em i pilim tru ol tok na ol samting i kamap em ol i truim ol tok profet. Ating tok ensel Gebriel i tokim em i pas long tingting bilong em: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:32, 33) Tru tumas, Maria i ting em wanpela bikpela samting long i stap olsem mama bilong Mesaia long graun.
Pasin bilong Maria long tingim ol samting bilong spirit i kamap ples klia gen taim em i bungim wanblut bilong em Elisabet, em tu i kisim bel long rot bilong mirakel. Taim Maria i lukim em, Maria i litimapim nem bilong Jehova na i kamapim olsem em i laikim tru Tok Bilong God. Em i kolim tok bilong beten bilong Hana i stap long 1 Samuel sapta 2, na em i kolim tu sampela tok bilong ol narapela buk bilong Ol Skripsa Hibru. Kain save em i gat long Baibel i soim olsem em inap tru long kamap wanpela mama i givim bel na pret long God. Em i wok gut wantaim Josep long skulim pikinini man bilong em.—Stat 30:13; 1 Samuel 2:1-10; Malakai 3:12; Luk 1:46-55.
Maria i gat strongpela bilip long pikinini bilong em olsem em i Mesaia, na dispela bilip bilong em i stap i go inap long bihain long i dai bilong Jisas. Bihain liklik long taim Jisas i kirap bek, Maria i stap namel long ol disaipel i bung na beten wantaim ol aposel. (Aposel 1:13, 14) Em i holimpas pasin bilong stap gut long God, maski em i mas karim bikpela pen bilong lukim gutpela pikinini bilong em i dai long diwai pos.
Olsem wanem pasin bilong kisim save long i stap bilong Maria inap helpim yu? Yu save amamas long gutpela wok bilong God yu inap mekim, maski yu mas daunim sampela laik bilong yu yet? Yu save tingim tru dispela wok em i bikpela samting long nau? Yu save ‘tingim long bel’ ol tok profet bilong Jisas na skelim dispela wantaim ol samting i wok long kamap long nau? (Matyu, sapta 24 na 25; Mak, sapta 13; Luk, sapta 21) Yu save bihainim pasin bilong Maria na save gut long ol tok bilong Baibel, na mekim wok long en taim yu toktok wantaim ol narapela? Bai yu holimpas bilip bilong yu long Jisas maski bikpela hevi i painim yu, long wanem, yu stap disaipel bilong em?
Ol Brata Bilong Jisas—Inap Senisim Pasin
I luk olsem ol brata bilong Jisas i no bin bilip long em i go inap bihain long i dai bilong em. Na ating dispela em i as na ol i no bin stap taim em i dai long diwai pos, olsem na Jisas i mas tokim aposel Jon long lukautim mama bilong em. Ol wanblut bilong Jisas i soim olsem ol i no rispektim em, wanpela taim ol i tok olsem “em i longlong.” (Mak 3:21) Sampela bilong famili bilong Jisas i no bin bilip, olsem na long nau ol lain em sampela long famili bilong ol i no bilip, ol i ken save tru olsem Jisas i save gut long hevi ol i karim taim ol wanblut i tok bilas long ol long bilip bilong ol.
Tasol i luk olsem bihain long taim Jisas i kirap bek pinis, ol brata bilong em ol i stat bilip long em. Ol i stap insait long lain i bung long Jerusalem paslain long Pentikos 33 C.E., na ol i beten strong wantaim ol aposel. (Aposel 1:14) Kirap bek bilong brata bilong ol i kirapim bel bilong ol long bilip, na ol i laik kamap disaipel bilong em. Yumi no ken les kwik long ol wanblut bilong yumi em ol i no wanbilip bilong yumi.
Baibel i stori long Jems, brata bilong Jisas, em Jisas i bin kamap long em, olsem em i bin mekim bikpela wok insait long kongrigesen Kristen. Holi spirit i kirapim em long raitim wanpela pas i go long ol wanbilip Kristen, na em i tokim ol long holimpas bilip bilong ol. (Aposel 15:6-29; 1 Korin 15:7; Galesia 1:18, 19; 2:9; Jems 1:1) Narapela brata bilong Jisas, em Jut, holi spirit i kirapim em long raitim wanpela pas bilong strongim ol wanbilip long lukautim bilip bilong ol. (Jut 1) Yumi ken luksave tu olsem Jems na Jut i no bin raitim long ol pas bilong ol olsem ol i brata bilong Jisas na bai ol wanbilip Kristen i pilim tru tok ol i raitim. Ol i lainim yumi long mekim gutpela pasin daun tru, a?
Orait, yumi lainim wanem sampela samting long famili bilong Jisas? Tru tumas, yumi lainim pasin bilong givim bel tru long lotu em yumi ken kamapim long ol kain rot olsem: (1) Yumi mas daun tru long laik bilong God na karim olgeta hevi inap painim yumi taim yumi mekim olsem. (2) Putim ol samting bilong spirit i go pas, maski yu mas lusim sampela laik bilong yu yet bilong mekim olsem. (3) Skulim ol pikinini bilong yu long pasin i stret wantaim ol tok bilong Baibel. (4) No ken les kwik long ol wanfamili em ol i no wanbilip bilong yu. (5) Yu no ken hambak sapos yu gat wanpela wanblut o pren i holim bikpela wok insait long kongrigesen Kristen. Em nau, taim yumi kisim save long famili bilong Jisas long graun, dispela i mekim na yumi go klostu moa long em na yumi tenkyu long Jehova long em i makim wanpela famili i no gat nem long lukautim Jisas taim em i liklik.
[Ol Piksa long pes 4, 5]
Josep i kisim Maria olsem meri bilong em na em i insait long truim bilong ol tok profet long Mesaia
[Ol Piksa long pes 6]
Josep na Maria i skulim ol pikinini bilong ol long ol samting bilong spirit na long mekim wok
[Ol Piksa long pes 7]
Maski ol brata bilong Jisas i kamap bikpela insait long famili i tingim ol samting bilong spirit, ol i no bilip long em i go inap bihain long i dai bilong em
[Ol Piksa long pes 8]
Ol brata bilong Jisas, Jems na Jut, i strongim ol wanbilip Kristen