No Ken Lusim Pasin Jisas i Bin Soim Yumi Long Mekim
“Mi soim pasin long yupela, na yupela tu i mas mekim wankain pasin olsem nau mi mekim long yupela.”—JON 13:15.
1. Bilong wanem Jisas em i nambawan gutpela piksa bilong ol Kristen long bihainim?
WANPELA man tasol long graun i no bin mekim sin long laip olgeta bilong em. Dispela man em Jisas. “Olgeta manmeri i save mekim sin,” Jisas tasol nogat. (1 King 8:46; Rom 3:23) Olsem na ol Kristen tru i tingim Jisas olsem nambawan gutpela piksa long bihainim. Tru tumas, long Nisan 14, 33 C.E., paslain liklik long em i dai, Jisas i bin tokim ol disaipel long bihainim pasin bilong em. Em i tok: “Mi soim pasin long yupela, na yupela tu i mas mekim wankain pasin olsem nau mi mekim long yupela.” (Jon 13:15) Long dispela laspela nait, Jisas i kolim kain kain rot we ol Kristen i mas wok strong long bihainim em. Long dispela stadi bai yumi skelim sampela bilong ol.
Mas i Gat Pasin Daun
2, 3. Long wanem ol rot Jisas i stap nambawan gutpela piksa long kamapim pasin daun?
2 Taim Jisas i tokim ol disaipel bilong em long mekim wankain pasin olsem em i bin mekim, bikpela samting em i tingim em pasin daun. Planti taim em i bin tokim lain bilong em olsem ol i mas i gat pasin daun, na long nait bilong Nisan 14, em i kamapim pasin daun bilong em yet long taim em i wasim lek bilong ol aposel. Jisas i tok: “Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi.” (Jon 13:14) Bihain long dispela Jisas i tokim ol long mekim wankain pasin olsem em i bin mekim. Em piksa tru bilong pasin daun!
3 Aposel Pol i tok paslain long Jisas i kam long graun, em i “stap kain olsem God.” Tasol em i lusim namba em i holim na kamap olsem man nating bilong graun. Na “em i daunim em yet na i bihainim tok bilong God, i go inap long em i dai.” (Filipai 2:6-8; NW ) Tingim. Jisas em i stap olsem nambatu bikpela man bilong heven na graun, tasol em i bin orait long stap aninit long ol ensel, kamap olsem bebi, stap daun long papamama i gat sin taim em i wok long go bikpela, na long dai olsem em i wanpela man nogut. (Kolosi 1:15, 16; Hibru 2:6, 7) Em pasin daun tru! Yu ting wanpela inap holim “wankain tingting” na kisim kain pasin olsem na ‘daunim em yet’? (Filipai 2:3-5) Yes, em inap, tasol i hatwok.
4. Wanem samting i mekim na ol man i hambak? Bilong wanem pasin hambak i samting nogut?
4 Pasin hambak i narapela kain olgeta long pasin daun. (Sindaun 6:16-19) Pasin hambak i bin pundaunim Satan. (1 Timoti 3:6) Dispela pasin i isi long kisim, na taim em i stap pinis long bel bilong man, i hatwok long rausim. Ol samting ol man i save hambak long en i olsem: kantri o lain bilong ol, mani kago bilong ol, bikpela skul bilong ol, namba ol i winim long wok samting, biknem, naispela skin, save bilong ol long pilai spot, na planti arapela samting. Tasol olgeta dispela samting i no bikpela samting long Jehova. (1 Korin 4:7) Na sapos ol dispela samting i mekim yumi hambak, ol i bagarapim pasin bilong yumi long stap wanbel wantaim em. “Bikpela, yu stap antap tru na yu nambawan, tasol yu save tingting long ol manmeri i no bikhet. Na ol bikhetman tu i no inap hait long yu.”—Song 138:6; Sindaun 8:13.
Pasin Daun Namel Long Ol Brata
5. Bilong wanem ol elda i mas i gat pasin daun?
5 I no stret sapos wok bilong Jehova yumi mekim na ol mak bilong spirit yumi winim i mekim yumi hambak; na ol wok bilong kongrigesen yumi holim i no ken mekim yumi i hambak. (1 Stori 29:14; 1 Timoti 6:17, 18) Tru tumas, man i holim bikpela wok moa, dispela i makim olsem em i mas strong moa yet long kamapim pasin daun. Aposel Pita i tokim ol elda olsem ol i no ken ‘stap olsem ol bikman na daunim dispela ol manmeri God i bin putim long han bilong ol. Ol i mas mekim gutpela pasin tasol, bai ol i ken lukim na bihainim.’ (1 Pita 5:3) Ol i makim ol elda bilong stap olsem wokboi na gutpela piksa ol arapela i ken bihainim, ol i no bilong stap olsem bikman o bos.—Luk 22:24-26; 2 Korin 1:24.
6. Long wanem ol samting ol Kristen i mas i gat pasin daun?
6 I no olsem ol elda tasol i mas i gat pasin daun. Ol yangpela man tu, em ol inap hambak long tingting bilong ol i wok hariap na ol i gat bikpela strong winim ol man i lapun liklik, so Pita i tokim ol: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ” (1 Pita 5:5) Yes, olgeta Kristen i mas i gat pasin daun olsem Krais i bin kamapim. Yumi mas i gat pasin daun na bai yumi inap autim gutnius, moa yet taim ol man i les o i laik daunim yumi. Yumi mas i gat pasin daun na bai yumi inap amamas long tok bilong stretim yumi o long lusim sampela samting bilong yumi yet na bai yumi ken mekim bikpela wok moa long autim tok. Na yumi mas i gat pasin daun na strongpela bilip long taim ol nius ripot i daunim yumi, gavman i givim hevi long yumi, o ol man i mekim nogut long yumi.—1 Pita 5:6.
7, 8. Wanem ol samting inap helpim yumi long kisim pasin daun?
7 Olsem wanem man inap lusim pasin hambak na ‘daunim em yet na ting ol arapela i winim em’? (Filipai 2:3) Em i mas save Jehova i ting wanem long em na em i mas holim wankain tingting. Jisas i stori long tingting man i mas i gat taim em i tok: “Olsem na yupela tu, sapos yupela i mekim pinis olgeta samting olsem God i tokim yupela, orait yupela i mas tok, ‘Mipela i no gutpela wokboi. Samting mipela i mekim, em i wok tasol bilong mipela.’ ” (Luk 17:10) Tingim, wok yumi inap mekim i no inap tru long winim samting Jisas i bin mekim. Tasol Jisas i gat pasin daun.
8 Na tu, yumi ken askim Jehova long helpim yumi long kisim stretpela tingting long ol save o strong samting bilong yumi yet. Olsem man bilong raitim song, yumi ken beten: “Mi bilip tru long olgeta lo bilong yu, olsem na yu ken givim gutpela tingting na gutpela save long mi.” (Song 119:66) Jehova bai helpim yumi long kisim stretpela tingting long yumi yet, na em bai mekim gut long yumi, long wanem, yumi kamapim pasin daun. (Sindaun 18:12) Jisas i tok: “Man i litimapim nem bilong em yet, nem bilong en bai i go daun. Na man i daunim em yet, em bai i kisim biknem.”—Matyu 23:12.
Stretpela Tingting Long Pasin i Stret na Pasin i No Stret
9. Jisas i ting wanem long pasin i stret na pasin i no stret?
9 Maski em i bin stap 33 yia pinis namel long ol manmeri i gat sin, Jisas “i no mekim sin.” (Hibru 4:15) Man bilong raitim song i bin tok profet long Mesaia olsem: “Yu save laikim stretpela pasin na yu no laikim tru pasin nogut.” (Song 45:7; Hibru 1:9) Long dispela samting tu ol Kristen i wok strong long bihainim Jisas. Ol i save long ol pasin i stret na long ol pasin i no stret, na bikpela samting moa yet ol i no laikim tru pasin nogut na ol i laikim tumas stretpela pasin. (Amos 5:15) Dispela i helpim ol long sakim sin i stap long skin bilong ol.—Stat 8:21; Rom 7:21-25.
10. Sapos yumi save mekim “pasin nogut” na yumi no tanim bel, dispela i soim olsem yumi gat wanem tingting?
10 Jisas i tokim Farisi Nikodemus: “Olgeta man i save mekim pasin nogut, ol i birua bilong lait. Ol i no laik bai pasin bilong ol i kamap ples klia. Olsem na ol i no save kam long lait. Tasol man i mekim pasin i tru, em i save kam long lait, bai ol man i ken lukim gut olsem, em i bin mekim wok bilong en long strong bilong God.” (Jon 3:20, 21) Tingim: Jon i tok Jisas em i ‘lait i save givim lait long olgeta manmeri.’ (Jon 1:9, 10) Tasol Jisas i tok sapos yumi save mekim “pasin nogut”—ol samting i no stret na God i no orait long en—yumi birua long lait. I hatwok long bilip olsem man bai i birua long Jisas na ol lo bilong em. Tasol ol man husat i save mekim pasin nogut na ol i no tanim bel, ol i mekim olsem. Ating ol yet i no ting olsem, tasol i klia tru Jisas i ting olsem.
Rot Bilong Kisim Tingting Bilong Jisas Long Pasin i Stret na Pasin i No Stret
11. Yumi mas mekim wanem sapos yumi laik kisim tingting bilong Jisas long wanem ol pasin i stret na pasin i no stret?
11 Yumi mas kliagut long tingting bilong Jehova long wanem pasin i stret na wanem pasin i no stret. Yumi inap kisim dispela save long wanpela rot tasol, em long stadi long Tok Bilong God, em Baibel. Taim yumi stadi, yumi mas beten olsem man bilong raitim song: “God, yu mas skulim mi long gutpela pasin bilong yu, na soim mi long rot bilong yu.” (Song 25:4) Tasol tingim, Satan i save trikim ol man. (2 Korin 11:14) Em inap mekim na sapos Kristen i no was gut, pasin nogut bai i luk olsem samting i stret long mekim. Olsem na yumi mas tingim tingim long bel ol save yumi kisim na bihainim tru ol tok i kam long “wokboi i gat gutpela tingting.” (Matyu 24:45-47) Stadi, beten, na pasin bilong tingim tingim long bel ol tok yumi lainim bai helpim yumi long kamap strong na stap olsem ol man em “ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” (Hibru 5:14) Dispela bai helpim yumi long nolaik tru long ol pasin nogut na laikim tru pasin i stret.
12. Wanem tok bilong Baibel i helpim yumi long sakim pasin nogut?
12 Sapos yumi nolaik tru long ol pasin nogut, bai yumi no larim ol laik nogut i kamap strong long bel bilong yumi. Planti yia bihain long Jisas i dai, aposel Jon i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.”—1 Jon 2:15, 16.
13, 14. (a) Bilong wanem i no gutpela sapos wanpela Kristen i laikim tumas ol samting bilong graun? (b) Bai yumi mekim wanem bilong abrusim pasin bilong laikim tumas ol samting bilong dispela graun?
13 Ating sampela bai tok: “I no olsem olgeta samting bilong dispela graun i gat rong long en.” I tru, tasol em i isi tru long ol samting bilong dispela graun i pulim tingting bilong yumi na yumi no givim bel long mekim wok bilong Jehova. I no gat wanpela samting dispela graun i kamapim i bilong helpim yumi long go klostu moa long God. Olsem na sapos yumi kirap laikim tumas ol samting bilong dispela graun—ol samting i no gat rong long en tu—dispela em i samting nogut. (1 Timoti 6:9, 10) Tasol planti samting bilong dispela graun em i nogut na em inap bagarapim yumi. Sapos yumi lukim ol vidio o ol piksa long TV i gat ol pasin bilong pait, laikim tumas mani kago, o pasin pamuk, ol inap kamap olsem ol pasin yumi orait tasol long en—na bihain bai ol i pulim yumi. Sapos yumi poromanim ol man i tingting tasol long helpim sindaun bilong ol i kamap gutpela moa o mekim moa yet wok bisnis, ol dispela samting inap kamap olsem nambawan bikpela samting long yumi tu.—Matyu 6:24; 1 Korin 15:33.
14 Tasol sapos yumi amamas long Tok Bilong Jehova, “pasin bilong bel kirap na aigris na bikhet” bai i no pulim yumi. Na sapos yumi poromanim ol man i putim ol samting bilong Kingdom i stap nambawan, bai yumi kamap wankain, bai yumi laikim samting ol i laikim na abrusim ol samting ol i abrusim.—Song 15:4; Sindaun 13:20.
15. Wankain olsem Jisas, yumi laikim tru stretpela pasin na yumi no laikim pasin nogut, dispela i helpim yumi olsem wanem?
15 Jisas i no laikim pasin nogut na em i laikim tru stretpela pasin, dispela i bin helpim em long tingim olsem “bihain em bai i stap gut na amamas moa yet.” (Hibru 12:2) Na i wankain long yumi. Yumi save “pasin bilong dispela graun, em ol pasin bilong bel i kirap na aigris, ol tu bai i pinis wantaim.” Amamas bilong dispela graun i bilong sotpela taim tasol. Tasol “man i bihainim tok bilong God, em bai i stap oltaim.” (1 Jon 2:17) Jisas i bin mekim laik bilong God, na dispela i bin opim rot long ol man long kisim laip oltaim. (1 Jon 5:13) Yumi olgeta i laik bihainim em na bai pasin bilong em long stap gut long God i ken helpim yumi.
Taim Ol Man i Mekim Nogut Long Yumi
16. Bilong wanem Jisas i strong olsem pasin laikim i mas i stap namel long ol lain bilong em?
16 Jisas i kamapim narapela rot we ol disaipel bilong em bai bihainim em: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela.” (Jon 15:12, 13, 17) I gat planti as na ol Kristen i laikim tru ol brata bilong ol. Long dispela taim, bikpela samting Jisas i tingim em ol man bai biruaim lain bilong em. Em i tok: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. . . . Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” (Jon 15:18, 20) Yes, ol man i birua long ol Kristen, long dispela rot tu ol i wankain olsem Jisas. Ol i mas strongim pasin laikim i stap namel long ol na bai ol inap stap strong taim ol man i mekim nogut long ol.
17. Bilong wanem ol man bilong graun i birua long ol Kristen tru?
17 Bilong wanem ol man i birua long ol Kristen? Long wanem, kain olsem Jisas, ol i “no bilong dispela graun.” (Jon 17:14, 16) Ol i no insait long ol samting bilong pait na ol samting bilong wok gavman, ol i bihainim ol stiatok bilong Baibel, tingim laip i bikpela samting, na ol i bihainim ol lo bilong stretpela pasin. (Aposel 15:28, 29; 1 Korin 6:9-11) Ol samting bilong spirit i olsem nambawan bikpela samting long ol, ol samting bilong graun, nogat. Ol i stap long dispela graun, tasol olsem Pol i tok, ol ‘samting bilong graun i no bikpela samting long laip bilong ol.’ (1 Korin 7:31) Tru, sampela i tok amamas long ol Witnes Bilong Jehova i bihainim ol stretpela lo. Tasol ol Witnes Bilong Jehova bai i no inap orait liklik long sampela pasin i no stret na bai ol man i ken litimapim nem bilong ol o wanbel wantaim ol. Olsem na planti man i no kliagut long tingting bilong ol na planti i birua long ol.
18, 19. Olsem Jisas i bin mekim, ol Kristen i mekim wanem taim ol man i birua na mekim nogut long ol?
18 Ol aposel bilong Jisas i bin lukim ol man i birua tru long Jisas taim ol i holim em na kilim em i dai, na ol i bin lukim pasin Jisas i bin mekim long dispela taim. Long gaden Getsemani, ol birua bilong Jisas i kam long holimpas em. Pita i traim long yusim bainat bilong em bilong lukautim Jisas, tasol Jisas i tokim Pita: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:52; Luk 22:50, 51) Bipo ol Israel i bin yusim bainat taim ol i pait long ol birua bilong ol. Tasol nau ol samting i senis. Kingdom Bilong God “i no bilong dispela graun” na i no gat ol boda bilong graun ol man i mas was long en. (Jon 18:36) I no longtaim na Pita bai insait long wanpela lain bilong spirit, na dispela lain i bilong heven. (Galesia 6:16; Filipai 3:20, 21) Olsem na kirap long dispela taim i kam, ol lain bilong Jisas bai mekim wankain pasin olsem Jisas taim ol man i birua na mekim nogut long ol—bai ol i no pret, tasol bai ol i no pait. Bai ol i putim ol samting long han bilong Jehova na bilip olsem em bai helpim ol long sanap strong na karim hevi.—Luk 22:42.
19 Sampela yia bihain, Pita i tok: “Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim. . . . Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” (1 Pita 2:21-23) Olsem Jisas i tok, ol man i bin birua nogut tru long ol Kristen. Long taim bilong ol aposel, na long taim bilong yumi tu ol Kristen i bihainim pasin Jisas i makim na ol i sanap strong na stap gut long God, ol i soim klia ol i lain bilong stap isi na holimpas bilip. (KTH 2:9, 10) Yumi olgeta wan wan i laik mekim olsem long taim ol hevi i painim yumi.—2 Timoti 3:12.
‘Pasim Jisas Olsem Klos’
20-22. Olsem wanem ol Kristen i ‘pasim Jisas olsem klos’?
20 Pol i tokim kongrigesen long Rom: “Kisim Bikpela Jisas Krais na pasim em olsem klos pait bilong yupela. Na yupela i no ken tingting long bihainim laik nogut bilong bodi.” (Rom 13:14) Ol Kristen i pasim Jisas kain olsem ol i pasim wanpela klos. Ol i stap olsem piksa tru bilong Bikman bilong ol, Jisas, na ol i wok strong long bihainim ol pasin bilong em maski ol i no gutpela olgeta.—1 Tesalonaika 1:6.
21 Yumi inap ‘pasim Jisas olsem klos’ sapos yumi kisim save long wokabaut bilong em na wok strong long mekim wankain pasin em i bin mekim. Yumi bihainim pasin daun bilong em, pasin bilong em long laikim tumas stretpela pasin, nolaik tru long pasin nogut, laikim tru ol brata, em i no bilong dispela graun, na pasin bilong em long stap isi na karim hevi. Yumi no “tingting long bihainim laik nogut bilong bodi”—olsem nambawan samting long laip bilong yumi i no bilong winim sampela mak bilong graun o inapim sampela laik bilong skin. Nogat. Taim yumi makim ol samting yumi laik mekim o wok long stretim hevi, yumi mekim askim olsem: ‘Taim samting olsem i painim Jisas em bai mekim wanem? Em i laik bai mi mekim wanem?’
22 Na yumi bihainim Jisas long rot bilong givim bel long “autim gutnius.” (Matyu 4:23; 1 Korin 15:58) Long dispela rot tu, ol Kristen i mekim wankain pasin olsem Jisas i bin mekim, na stadi i kamap bihain long dispela bai stori long olsem wanem ol i mekim olsem.
Yu Inap Stori Long Dispela?
• Bilong wanem ol Kristen i mas i gat pasin daun?
• Olsem wanem yumi ken save gut long wanem pasin i stret na i no stret?
• Olsem wanem ol Kristen i bihainim pasin bilong Jisas taim ol man i birua na mekim nogut long ol?
• Olsem wanem yumi inap ‘pasim Jisas olsem klos’?
[Piksa long pes 7]
Jisas i nambawan gutpela piksa long mekim pasin daun
[Piksa long pes 8]
Bilong wokabaut olsem wanpela Kristen na mekim wok autim tok, olgeta Kristen i mas i gat pasin daun
[Piksa long pes 9]
Satan inap mekim na amamas nogut i luk olsem samting i stret long Kristen i mekim
[Piksa long pes 10]
Pasin laikim bilong ol brata bilong yumi bai helpim yumi long sanap strong